Te toto te hoê ohipa imiraa moni rahi

Te auro uteute! Mai ta teie parau e faaite ra, e taoˈa faufaa rahi mau teie. Aita teie taoˈa a te natura, e pape faufaa rahi atoa hoi, i faaau-noa-hia i te auro, i te mori arahu atoa râ e te arahu. Teie râ, aita teie taoˈa e heruhia i raro i te fenua maoti te hou e te topita, no roto mai râ oia i te mau uaua o te taata, e na roto i te mau ravea mǎrû aˈe.

“Ee, mai na te tahi toto na ta ˈu aiû iti”, o te parau taparu ïa i papaihia i nia i te hoê hohoˈa rahi i roto i te hoê aroa no New York. Te ite-atoa-hia ra teie tuuraa reo taparuparu i roto i te tahi atu mau poroi faatianiani: “E te feia horoa toto, te titau nei te ao nei ia outou!” “Mea faufaa roa to outou toto. A faatoro mai na i to outou rima!”

Te putapû nei te feia e aroha nei ia vetahi ê i mua i teie mau poroi. Na te ao atoa nei, te itehia ra ratou e tiai noa ra i mua i te mau pu pâmuraa toto. Mea hinaaro mau â na te rahiraa o teie mau taata, e tae noa ˈtu te feia rave ohipa e iriti nei aore ra e pâmu atu nei i te toto, e tauturu i te feia e roohia nei i te ati e te tiaturi nei ratou e te na reira mau nei ratou.

Teie râ, i roto i te area taime e iritihia ˈi teie toto e e pâmuhia ˈtu ai i roto i te tahi taata, e haere te toto na roto i te rima o te mau arai e rave rahi e te ravehia nei e rave rau mau ohipa i nia i teie toto. Mai te auro ra te huru, te faatupu nei te toto i te nounou. I roto e rave rahi mau fenua, te hoohia nei oia i te taime matamua no te hoê moni rahi e i muri iho, e hoo-faahou-hia ˈtu no te tahi tino moni hau atu â. Te tataˈu nei te taata ia noaa mai ia ratou i te parau faatia no te haaputu i te toto, te hoo atu nei i te mau moni hoo teitei mau, te haamauhia nei te taoˈa rahi i nia ia ˈna e te hoo-huna-atoa-hia nei oia. Inaha, ua riro te hooraa i te toto ei ohipa imiraa moni rahi na te ao atoa nei.

I te hoê tau, i te Fenua Marite, e aufauhia na te feia horoa i to ratou toto. Teie râ, i te matahiti 1971, ua faahapa te taata papai buka beretane ra o Richard Titmuss i teie peu, na roto i te faataaraa i te atâata o te faanahoraa marite mai te peu e e faaitoitohia te feia veve e te feia maˈimaˈi ia horoa i to ratou toto no te tahi maa moni. Ua parau atoa oia e eita roa ˈtu e tano ia noaa te moni maoti te hoê ǒ i haapaohia no te tauturu i te taata. Ua aratai atura ta ˈna ohipa i te hau marite ia opani e ia aufauhia te feia horoa i te toto taatoa (teie râ te rave-noa-hia nei teie peu i roto i te tahi atu mau fenua). Teie râ, aita teie opaniraa i faaiti mai i te paeau moni o te ohipa hooraa i te toto. No te aha râ?

Te hoê ohipa tapihooraa hoona mau — No te aha?

I roto i te mau matahiti 40, ua itehia mai te ravea no te faataa ê i te mau tuhaa o te toto. Maoti teie ravea, parauhia i teie nei te vahiraa, ua maraa te moni hoo o te toto. Mea nafea? A hiˈo na: ia tataratarahia te hoê pereoo apî e ia hoohia to ˈna mau vaehaa tataitahi, e nehenehe to ˈna moni e naeahia e pae taime hau atu i te hoo o te pereoo taatoa. Oia atoa, mea hoona aˈe te toto mai te peu e e vahihia oia e ia hoo-taa-ê-hia to ˈna mau tuhaa.

Ua riro te pape toto (plasma), fatata te afaraa o te toto taatoa, ei tuhaa faufaa mau. Aita e vai ra i roto i teie pape toto te tahi puea iti ora (mai te mau toropuru ura, te mau toropuru uouo e te mau puea iti o te toto parauhia plaquettes faufaa roa no te haapaari i te toto), e nehenehe ïa oia e haamârôhia e e faahereherehia. Hau atu, eita e faatiahia ia iritihia te toto taatoa o te hoê taata hau atu i te pae taime i te matahiti, teie râ, e nehenehe ta ˈna e horoa i to ˈna pape toto e piti taime i te hebedoma. I reira, e ravehia ïa te ravea parauhia plasmaphérèse, oia hoi te iritiraa i te toto taatoa, e ravehia mai te pape toto, e i muri iho, e patia-faahou-hia ˈtu te mau puea iti o te toto i roto i te uaua o te taata horoa.

I te Fenua Marite, te faatia nei te ture e ia aufauhia te feia e horoa ra i to ratou pape toto. Hau atu, te farii nei teie fenua e ia horoa te taata i te matahiti i te hoê faito pape toto fatata e maha taime hau atu i te otia i faataahia e te Faanahonahoraa a te ao nei i te pae no te oraora-maitai-raa. No reira, eita iho â ïa e maerehia e te noaa mai nei ta te Fenua Marite hau atu i te 60% o te pueraa pape toto o te ao nei. Te faufaa o teie rahiraa pape toto, e naeahia ïa i te tahi tau 450 mirioni dala marite, tera râ, mea moni roa ˈtu â ia hoo-anaˈe-hia no te mea e nehenehe atoa te pape toto e vahihia. I roto i te ao nei, ua riro oia ei niu no te hoê ohipa tapihooraa e piti miria dala marite!

Ia au i te vea ra Mainichi Shimbun, te faaohipa nei te fenua Tapone fatata hoê tuhaa i nia i te toru o te pape toto e iritihia nei na te ao nei. Te hoo mai nei teie fenua e 96% o te tuhaa o ta ˈna e faaohipa nei, mai te Fenua Marite mai iho â râ, e no reira oia e parauhia ˈi “te aiaru o te ao nei” na te mau Tapone o te faahapa nei i teie huru raveraa. Hau atu, ua tutava te faatereraa hau tapone i te pae no te Oraora-maitai-raa e te mau Ohipa totiale i te faaiti mai i teie ohipa hooraa, ma te parau e e ere i te mea tano ia imi i te moni maoti te toto. Inaha, te naeahia nei te moni e noaa mai i te faito tau 200 mirioni dala marite i te matahiti, e te reira no te hoê noa tuhaa o te pape toto: te albumine.

Ua hau atu te mau taoˈa toto ta te Repubilita tooa o te râ no Helemani e faaohipa nei i ta te toea o Europa taatoa, tei ia ˈna ra te faito toto teitei roa ˈˈe e ravehia nei e te taata tataitahi i roto i te ao nei. Te na ô ra te vea Zum Beispiel Blut (Te hoê hiˈoraa taa ê roa — Te toto) no nia i te mau taoˈa toto e: “Hau atu i te afaraa teie e faahaerehia mai nei i roto i te fenua, no ǒ mai i te Fenua Marite iho â râ, tera râ, no ǒ atoa mai i te mau fenua veve. Te itehia ra te feia veve o te hoo nei i to ratou pape toto no te faarahi i ta ratou moni e noaa mai.” Ua rahi roa te toto ta vetahi i horoa e ua pohe roa ratou.

E rave rahi mau pu iritiraa pape toto tei riro ei pu tapihooraa o tei tuuhia i te mau vahi faufaa: i roto i te mau vahi e erehia nei i te pae faanavairaa faufaa aore ra na te hiti i te mau otia o te mau fenua veve. No reira, te huti nei ratou i te feia veve e te feia haihai o teie mau vahi, o tei oaoa roa i te hoo i to ratou pape toto e mea au aˈe hoi no ratou ia horoa hau atu i te tia ia ratou aore ra ia huna i te mau maˈi atoa o ta ratou e afaifai ra. Te ravehia nei teie ohipa hooraa i te pape toto i roto e 25 fenua. Ia tapea-anaˈe-hia i roto i te hoê fenua, e uˈana roa ˈtu ïa i roto i te tahi. Inaha, e ere te hoo-huna-raa e te petaraa i te feia toroa i te mea varavara.

Te imiraa moni i roto i te ao o te tamoni-ore-raa

Ua faahapa-rahi-atoa-hia te mau pu vairaa toto imi ore i te moni, i roto i te mau matahiti i mairi aˈenei. Ei hiˈoraa, i te matahiti 1986, i roto i te vea Money, ua faaite te vahine papai vea o Andrea Rock e, i te Fenua Marite, e faufau te hoê pu vairaa toto e 57,50 dala marite no te iritiraa i te hoê faito toto, e hoohia ˈtu teie faito e 88 dala marite i te fare maˈi ra, e e aufau te taata maˈi o tei pâmuhia i teie faito toto i roto i te 375 e te 600 dala marite.

Ua taui anei te mau ohipa i teie mahana? I te avae setepa 1989, ua papai te papai vea o Gilbert Gaul no te Philadelphia Inquirer i te tahi mau tumu parau no nia i te mau pu vairaa toto maritea. I muri aˈe i te hoê matahiti maimiraa, ua faaite aˈera oia e ua ani te tahi mau pu i te taata ia horoa noa mai i to ratou toto e i muri iho, ma te taui i ta ratou huru raveraa, ua hoo atu ratou i te afaraa o te rahiraa toto i ravehia mai, i te tahi atu mau pu e mea rahi roa te moni i noaa mai ia ratou. Ia au i te mau faataaraa a Gaul Tane, fatata e 500 000 litera toto i te matahiti teie e hoo-huna-hia nei, ma te faahoona i te tahi atu ohipa tapihooraa e 50 mirioni dala marite o tei tuea noa te huru faanahoraa e to te hoê Fare moni.

Hoê noa râ taa-ê-raa rahi: eita teie ohipa tapihooraa o te toto e vai ra i raro aˈe i te mana o te hau marite. Aita e taata e nehenehe e faataa i te faito mau o te ohipa hooraa e ravehia nei e e taotia atoa i te mau hoo. Hau atu, e rave rahi mau taata e horoa nei i to ratou toto o te ore roa ˈtu i ite i te ohipa e tupu ra. “Te haavarehia nei te taata”, o ta te hoê taata haapao tahito i te hoê pu vairaa toto i faˈi i roto i te Philadelphia Inquirer. “Te hunahia ra i te taata e te tae mai nei to ratou toto i ǒ matou nei. E riri roa ratou mai te peu e e ite ratou.” Ua haapoto te hoê tia no te Croix-Route marite i te parau i te na ôraa e: “E rave rahi matahiti to te mau raatira o te mau pu pâmuraa toto haavare-noa-raa i te huiraatira marite.”

I te Fenua Marite anaˈe, te haaputu nei te mau pu vairaa toto tau 6,5 mirioni litera toto i te matahiti e te hoo nei ratou hau atu i te 30 mirioni faito o te mau taoˈa no roto mai i te toto no te tino moni maere mau ra fatata hoê miria dala marite. I roto i teie huru ohipa, eita e faahitihia i te parau no te “hoonaraa”; e parauhia ra “moni hau i nia i te mau haamâuˈaraa”. Ei hiˈoraa, i rotopu i na matahiti 1980 e 1987, ua tapao te Croix-Rouge marite e 300 mirioni dala marite ei “moni hau i nia i te mau haamâuˈaraa”.

Te patoi nei te mau pu vairaa toto ma te faateitei i to ratou tiaraa taatiraa imi ore i te moni e ma te tiaoro e, taa ê atu i te mau taiete rahi e tuhaa ta ratou i te fare moni, aita ta ratou moni e haere ra i te mau fatu tuhaa taiete ra. Teie râ hoi, ahiri e ua tapaohia te Croix-Rouge marite mai te hoê taiete tapihooraa tauihaa, e tuuhia ïa oia i roto i te mau taiete moni roa ˈˈe i Marite, hoê â faito e te taiete General Motors. Hau atu, mea aufau-maitai-hia te mau rave ohipa o te mau pu vairaa toto. I nia i te feia e rave ra i te ohipa i roto e 62 fare, i uiuihia e te Philadelphia Inquirer, 25% o tei aufauhia hau atu i te 100 000 dala marite i te matahiti, area vetahi ra, ua hau atu ïa i te 200 000 dala marite.

Te patoi atoa ra te mau raatira o te mau pu pâmuraa toto i te parau ra e te “hoo” nei ratou i te toto o ta ratou e haaputu nei, i te na ôraa e e faaaufau noa ratou i tei titauhia no te rapaauraa. No te pahono i teie nei manaˈo, te parau nei hoê e: “Mea riri roa na ˈu ia faaroo anaˈe vau i te Croix-Rouge [marite] i te parauraa e aita o ˈna e hoo ra i te toto. Mai te huru ra ïa e e parau mai te hoê fare toa e e faaaufau noa oia i te puohu, eiaha râ te û i roto.”

Te matete o te ao nei

Mai te hooraa i te pape toto, ua riro te hooraa i te toto taatoa ei ohipa tapihooraa e taati nei i te ao atoa nei. E inaha, te faaroo-atoa-hia ra te parau faahaparaa na te ao atoa nei. Ei hiˈoraa, i te avae atopa 1989, ua faatupu te Croix-Rouge tapone i te hoê patoiraa rahi i to ˈna tamataraa i te faaô atoa ˈtu ia ˈna i roto i te matete tapone na roto i te fariiraa i te mau hoo-mama-raa rahi i nia i te mau taoˈa no roto mai i te toto i horoahia mai e te taata ma te tamoni ore. Ua noaa mai i te mau fare maˈi i te mau tino moni rahi mau na roto i te papairaa i nia i te mau parau faaau e ua hoo mai ratou i te toto i te faito moni hoo o te matete.

Ia au i te hoê vea no Thaïlande (The Nation), ua titauhia vetahi mau fenua no Asia ia rave i te mau faanahoraa etaeta no te aro i te hooraa i te auro uteute na roto i te opaniraa i te mau horoaraa toto aufauhia. I Inidia, hau atu i te 500 000 taata o te ora nei maoti te hooraa i to ratou toto. Area vetahi feia e hahaere noa ra e te ahu motumotu, te taui nei ïa ratou i to ratou hohoˈa no te horoa pinepine roa ˈtu â i tei faatiahia e te ture. Ua tae roa vetahi mau pu vairaa toto i te iriti rahi roa i te toto o te tahi mau taata.

I roto i ta ˈna buka Te toto: ǒ horoa noa aore ra e taoˈa hoo (beretane), te faaite ra o Piet Hagen e, i te fenua Beresilia te mau pu vairaa toto e rave ai i ta ratou mau ohipa tia ore roa ˈˈe. Te faatere nei te mau hanere pu vairaa toto imi moni i te hoê matete hau atu i te 70 mirioni dala marite e ume ra i te feia peu tia ore. Te faahiti atoa ra te buka Bluternte (Te auhuneraa i te toto) i te parau no te mau nahoa feia veve e te feia e erehia ra i te ohipa o te faaapǐapǐ nei i te mau uputa o te mau pu pâmuraa toto e pue noa ra i Bogotá (Colombie). Te horoahia ra tau 350 e tae atu i te 500 pesos iti no te hoê afa-litera toto, o tei hoohia ˈtu e 4 000 e tae atu i te 6 000 pesos i te taata maˈi.

Ia hiˈohia teie mau parau atoa i faataahia, e fa mai ïa teie manaˈo: ua riro te toto ei imiraa moni rahi mau. ‘Eaha ïa? o ta vetahi paha e parau. Eaha hoi te fifi?’

A feruri na: No te aha e rave rahi mau taata e huru ê ai i mua i teie ohipa moni rahi? E ere anei no te nounou moni e itehia ra i roto i teie ohipa? Te nounou moni e itehia ra, ei hiˈoraa, i roto i te onoonoraa e faaitehia ra no te turai i te taata ia hoo mai i te mau ohipa o ta ˈna e ore e titau mau ra; aore ra, mea ino roa ˈtu â, i roto i te aimârôraa ia hoo atu i te tahi mau taoˈa atâata roa, aore ra i roto i te patoiraa i te faaohipa i te moni no te faariro i te reira ei taoˈa papu aˈe.

Mai te peu e te vai ra teie huru nounou moni i roto i te matete o te toto, te horo atura ïa te mau mirioni taata o te ao nei i roto i te hoê ati rahi. Mai te reira mau anei?

[Nota i raro i te api]

[Tumu parau tarenihia i te api 20]

Te ohipa hooraa i te pu fenua

Mea iti roa paha te vahine i fanau o te haapao ra i te ohipa e ravehia i nia i to ratou pu fenua, teie puea iri o tei faaamu i to ratou aiû i roto i te vairaa tamarii. Ia au i te Philadelphia Inquirer, e rave rahi mau fare maˈi marite o te tapea mai nei i te mau pu fenua, o te faatoetoe nei ia paari roa no te hoo atu i muri iho. No te matahiti 1987 noa, ua hapono te Fenua Marite tau 800 tane pu fenua. Te hoo mai nei te hoê taiete i roto i te tuhaa oire no Paris 15 tane i te mahana! Te vai ra i roto i te mau pu fenua te pape toto o te metua vahine, e faaohipahia e teie taiete no te hamani i te mau raau huru rau o ta ˈna e hoo atura i muri iho i te mau hanere fenua.

[Tapura/Hohoˈa i te api 18]

Te mau tuhaa matamua o te toto

Pape toto: fatata e 55% o te toto. E 92% pape, e te toea ra, e mau poroteina fifi roa ïa, mai te mau globulines, te fibrinogène e te albumine

Plaquettes: fatata e 0,17% o te toto

Toropuru uouo: fatata e 0,1%

Toroputu ura: fatata e 45%