Ua tupu te parau tohu

I TO te mau pǐpǐ a Iesu Mesia aniraa ˈtu ia ˈna i te tapao o to ˈna vairaa mai itea-ore-hia i roto i te mana o te Basileia, ua tohu o Iesu e “rahi te ino i te tupuraa.” (Mataio 24:3, 12) Te tupu ra anei teie parau tohu i teie nei tau?

Papu maitai! Te na ô ra te buka Te mau Nunaa Amui e te arairaa i te taparahiraa taata (beretane), neneihia e te mau Nunaa Amui i te avaˈe atopa 1991, e: “Ua riro te mau ohipa iino ei fifi uˈana rahi no te rahiraa o te mau nunaa o te ao nei. Eita to te mau nunaa tataitahi e mana faahou no te haavî i te mau ohipa iino i roto i to ratou iho fenua e ua uˈana roa teie mau ohipa i rapeau atu i te fenua e eita e vî faahou i te taatoaraa o te mau nunaa o te ao nei. . . . Ua maraa te mau ohipa iino ravehia e te mau pǔpǔ taparahi taata faanahohia i roto i te mau faito riaria, e te faatupu nei te reira i te mau faahopearaa iino tei itehia na roto i te haavîraa puai i te pae tino, te haamǎtaˈuraa e te petaraa i te mau tia mana. Ua haapohe te ohipa totovaraa i te mau ahuru tausani feia hapa ore. Ua riro te ohipa hooraa i te mau raau faataero ei ati rahi no te ao nei. Ua rave te haaviiviiraa haapao ore i te natura i te mau faito riaria, e ua fariihia teie fifi mai te hoê faainoraa i nia i te ao iho.”

Hamani-ino-raa: Te hoê maraaraa mai te 150 hamani-ino-raa no e 100 000 taata i te matahiti 1970 i nia i te area e 400 no e 100 000 i te matahiti 1990.

Eiâraa: Te hoê maraaraa mai hau atu i te 1 000 no e 100 000 i te matahiti 1970 i nia i te 3 500 no e 100 000 i te matahiti 1990.

Taparahiraa taata opuahia: I roto i te mau fenua ravai ore, te hoê maraaraa mai te 1 e te 2.5 no e 100 000 i rotopu i te mau matahiti 1975 e 1985. I roto i te mau fenua ona, te maraaraa i roto i te hoê â area taime, mai raro mai i te 3 e hau atu i te 3.5.

Taparahiraa taata taaihia i te raau taero: Te na ô ra teie buka e: “Ua hau roa ˈtu te mau hooraa huna rahi i te mau ravea a te mau Hau o te mau nunaa nainai i te pae moni e i te pae no te mau mauhaa, e ua manuïa atoa ratou i te haafifi i te opaniraa e te mau ture atoa ta te mau fenua ona i faanaho.”

Faito o te taatoaraa o te taparahiraa taata: Te manaˈohia ra e e tataipitihia mai te 4 000 no e 100 000 i te matahiti 1985 tapiri atu i te 8 000 i te matahiti 2000.

Ua riro noa hoi te maraaraa o te taparahiraa taata na te ao nei ei hoê o te mau tuhaa o te parau tohu a Iesu e faaite ra e te ora nei tatou i ‘te hopea o te faanahoraa o te mau mea.’ (Mataio 24:3) Ua parau o Iesu e: “Ia hiˈo outou i taua mau mea nei i te tupuraa, ua fatata ïa te basileia o te Atua, ia ite hoi outou.”—Luka 21:31.