Eaha te auraa o te upeˈa e te iˈa no outou?
“No te mea ua horoahia ia outou te ite i te parau aroaro i te basileia o te ao ra.”—MATAIO 13:11.
1, 2. No te aha e tia ˈi ia tatou ia anaanatae i te mau parabole a Iesu?
MEA au anei na outou ia ite i te hoê parau huna aore ra ia itea mai i te pahonoraa i te hoê piri? Eaha ˈtura mai te peu e e tauturu te reira ia outou ia ite papu atu â i ta outou tuhaa i roto i te opuaraa a te Atua? Inaha hoi, e nehenehe e noaa ia outou i teie maramarama faito ore na roto i te arai o te hoê parabole ta Iesu i horoa. Ua haafeaa oia i te manaˈo o te mau taata e rave rahi o tei faaroo i teie parau e te tahi atu mau taata i muri iho mai, e nehenehe râ outou e taa i to ˈna auraa.
2 A tapao na i te parau ta Iesu i faahiti i roto i te Mataio pene 13 no nia i ta ˈna faaohiparaa i te mau parabole. Ua ani te mau pǐpǐ e: “Eaha oe i parau parabole atu ai ia ratou?” (Mataio 13:10) Oia mau, no te aha o Iesu i faaohipa ˈi i te mau parabole ta te rahiraa o te taata e ore e taa i te auraa? Ua pahono oia i roto i te mau irava 11 e tae atu i te 13: “No te mea ua horoahia ia outou te ite i te parau aroaro i te basileia o te ao ra, aita râ i horoahia ia ratou. . . . I parau parabole atu ai au ia ratou; no te mea aore ratou i ite i te hiˈoraa, aore i faaroo i te faarooraa, e aore hoi i haapao.”
3. Nafea tatou e faufaahia ˈi i te maramarama no nia i te mau parabole a Iesu?
3 Ua faaohipa ˈtura Iesu i te Isaia 6:9, 10, o te faataa ra i te hoê nunaa o tei turihia te tariˈa e o tei matapohia i te pae varua. Eiaha râ tatou ia riro mai ia ratou ra te huru. Mai te peu e e taa ia tatou e e ohipa tatou ia au i ta ˈna mau parabole, e riro tatou i te oaoa rahi—i teie nei e a muri noa ˈtu. Te horoa maira o Iesu i teie haapapuraa tamahanahana mau: “Ua maitai râ to outou mau mata, te hiˈo nei hoi ïa, e to outou mau tariˈa, te faaroo nei hoi ïa.” (Mataio 13:16) E tano teie haapapuraa no te mau parabole atoa a Iesu, tera râ, e haamau tatou i to tatou feruriraa i nia i te parabole poto roa o te upeˈa, i papaihia i roto i te Mataio 13:47-50.
Te hoê parabole e auraa hohonu to ˈna
4. Eaha ta Iesu i faatia na roto i te hoê parabole o tei papaihia i roto i te Mataio 13:47-50?
4 “E au hoi te basileia o te ao ra i te upeˈa toro i tuuhia i raro i te tai o tei ati atoa i te iˈa e rave rahi te huru ra: e ati aˈera, ua ume maira ratou i uta, parahi ihora ua haaputu ihora i te iˈa maitatai i roto i te farii, faarue atura râ i te iˈa iino. Oia atoa ia tae i te hopea o teie nei ao; o te mau melahi te haere mai e haru i te feia parau ino no roto i te feia paraue-tia, a huri atu ai i roto i te umu auahi ra: tei reira te oto e te auauraa niho ra.”
5. Eaha te mau uiraa e uihia no nia i te auraa o te parabole o te upeˈa?
5 Ua ite aˈena paha outou i te mau taata taora upeˈa, peneiaˈe i roto i te hoê hohoˈa teata aore ra na roto i te afata teata, no reira e ere i te mea fifi ia papu i te parabole a Iesu. Teie râ, eaha ïa no te mau haamaramaramaraa iti e to ˈna auraa? Ei hiˈoraa, ua parau o Iesu e, no nia teie parabole i “te basileia o te ao ra.” Teie râ, aita o ˈna e hinaaro ra e parau e ‘te mau huru’ taata atoa, te maitai e te ino, e ô ïa ratou i roto i te Basileia. O vai atoa te feia taiˈa? Ua tupu anei te ohipa ravaai e te faataa-ê-raa i te iˈa i te tau o Iesu, aore ra e tupu anei i to tatou nei tau, “te hopea o teie nei ao”? Te taa ra anei ia outou i to outou tiaraa i roto i teie parabole? Nafea outou ia ape i te topa ˈtu i rotopu i te feia o te oto e o te auau i te niho?
6. (a) No te aha tatou e titau rahi ai ia noaa i te maramarama no nia i te parabole o te upeˈa? (b) Eaha te taviri e noaa mai ai te maramarama?
6 Te faaite maira teie mau uiraa e e ere teie parabole i te mea ohie. Eiaha râ ia moehia ia outou e: “Ua maitai râ to outou mau mata, te hiˈo nei hoi ïa, e to outou mau tariˈa, te faaroo nei hoi ïa.” E tuatapapa anaˈe na mai te peu e e nehenehe ta tatou e faahohonu i to ˈna auraa ia ore to tatou tariˈa ia piri e ia ore to tatou mata ia po no nia i to ˈna faufaaraa. Oia mau, te vai ra ia tatou nei te hoê taviri faufaa roa ia matara mai to ˈna ra auraa. Ua faahiti te tumu parau matamua i te parau no to Iesu titauraa i te feia ravaai no Galilea ia faarue i taua toroa ra e ia rave i te ohipa i te pae varua ei “ravaai taata.” (Mareko 1:17) Ua na ô atura oia ia ratou e: “I teie nei, e taata ta [outou] e noaa.”—Luka 5:10.
7. Eaha ta Iesu e faahohoˈa ra ia ˈna i faahiti i te parau no te iˈa?
7 Ia au maite i te reira, te faahohoˈa ra ïa te iˈa i roto i teie nei parabole i te taata. No reira, ia faahiti anaˈe te irava 49 i te parau no te faataa-ê-raa i te iˈa iino e te iˈa maitatai, te faataa ra ïa oia, eiaha i te mau mea ora maitatai aore ra iino o te moana, tera râ, i te feia maitatai e te feia iino. Oia atoa, eiaha tatou e manaˈo e te faahiti ra te irava 50 i te parau no te mau animala o te moana e oto ra aore ra e auau ra i te niho. Aita. No nia teie parabole i te haaputuputuraa i te mau taata e to ratou faataa-ê-raahia i muri iho, e ohipa faufaa roa hoi teie, mai ta te faahopearaa e faaite ra.
8. (a) Eaha ta tatou e nehenehe e haapii no nia i te faahopearaa o te mau iˈa iino? (b) Ia au i tei faataahia no nia i te mau iˈa iino, eaha ta tatou e nehenehe e faaoti no nia i te Basileia?
8 A tapao na e te mau iˈa iino, oia hoi te feia iino, e hurihia ïa i roto i te umu auahi, i reira ratou e oto ai e e auau ai i te niho. I te tahi atu vahi, ua faatuati o Iesu i teie oto e teie auauraa niho i te vairaa i rapaeau i te Basileia. (Mataio 8:12; 13:41, 42) I roto i te Mataio 5:22 e 18:9, ua faahiti atoa oia i te “auahi i gehena,” ma te faaau i te haamouraa mure ore. Aita anei te reira e haapapu ra e mea faufaa mau â ia taa i te auraa o teie parabole e ia ohipa mai tei titauhia? Ua ite tatou paatoa e aita e vai ra i teie nei e eita roa ˈtu te feia iino e ô i roto i te Basileia o te Atua. No reira, ia parau anaˈe o Iesu e “e au hoi te basileia o te ao ra i te upeˈa,” te hinaaro ra ïa oia e parau e, no nia i te Basileia o te Atua, te vai ra te hoê mea e faaauhia i te hoê upeˈa o te tuuhia no te haaputu i te mau huru iˈa atoa.
9. Eaha te tuhaa a te mau melahi i roto i te parabole no nia i te upeˈa?
9 Ia tuu-anaˈe-hia te upeˈa e ia haaputuhia te iˈa, e ravehia te hoê ohipa faataa-ê-raa. O vai ta Iesu e faaô ra i roto i teie ohipa? Te faaau ra te Mataio 13:49 i teie feia faataa ê i te iˈa i te mau melahi. Te faataa maira ïa Iesu i te hiˈopoaraa a te mau melahi i nia i te tahi mauhaa i nia i te fenua o te faaohipahia no te faataa i te huru o te taata—te feia maitatai e te tano no te Basileia o te raˈi, e vetahi pae o te ore e tano no teie piiraa.
Te ohipa ravaai—Afea e tupu ai?
10. Na roto i teihea haaferuriraa e nehenehe ai tatou e faataa e ua tupu te ohipa ravaai i nia i te hoê area taime maoro?
10 Te tauturu maira te mau irava tapiri ia itea mai e afea te reira e tupu ai. Na mua noa ˈˈe, ua horoa o Iesu i te hoê parabole no nia i te ueueraa i te huero maitai, teie râ, ua ueue-atoa-hia te zizania i roto i te aua, e faahohoˈa ra hoi i teie nei ao. Ua vauvau aˈera oia i roto i te Mataio 13:38 e te faahohoˈa ra te huero maitai i “te tamarii ïa o te basileia; e te zizania ra, o te tamarii ïa a te varua ino.” Ua tupu apipiti noa ˈtura teie nau huero i roto i te roaraa o te mau senekele, e tae roa ˈtu i te tau ootiraa i te hopea o te faanahoraa o te mau mea. I reira, ua faataa-ê-hia te zizania e ua tutuihia ˈtura i te auahi. Ia faatueahia teie tatararaa e te parabole o te upeˈa, te taa ra ia tatou e te hutiraa mai i te mau taata i roto i te upeˈa, e tupu ïa i nia i te hoê area taime maoro.—Mataio 13:36-43.
11. Mea nafea te ohipa ravaai i rotopu i te mau nunaa atoa i te raveraahia i te senekele matamua?
11 Ia au i te parabole a Iesu, e haaputuhia te mau iˈa ma te pae tahi ore, oia hoi e rave mai te upeˈa i te iˈa maitatai e te iˈa iino. A ora noa ˈi te mau aposetolo, ua faaohipa te mau melahi e aratai ra i te ohipa ravaai i te faanahonahoraa kerisetiano a te Atua ia noaa mai te “iˈa” o tei riro mai ei mau kerisetiano faatavaihia. E parau mai paha outou e na mua ˈˈe i te Penetekose o te matahiti 33 o to tatou nei tau, tau 120 pǐpǐ tei noaa mai na roto i te ohipa ravaai a Iesu. (Ohipa 1:15) Mai te tau mai râ a haamauhia ˈi te amuiraa o te mau kerisetiano faatavaihia, ua haamata te ohipa ravaai e te upeˈa, e e mau tausani iˈa maitatai o tei noaa mai. Mai te matahiti 36 o to tatou nei tau, ua parare roa ˈˈera te ohipa ravaai na roto i te mau pape o te mau nunaa, inaha, ua huti-atoa-hia mai te feia ěê i roto i te kerisetianoraa e ua riro maira ratou ei mau melo no te amuiraa faatavaihia a te Mesia.—Ohipa 10:1, 2, 23-48.
12. Eaha te ohipa i parare i muri aˈe i te poheraa o te mau aposetolo?
12 I roto i te mau senekele i muri aˈe i te poheraa o te mau aposetolo, ua ora noâ vetahi mau kerisetiano o tei tutava i te imi e i te tapea i te parau mau a te Atua. Ua fanaˈo vetahi i te farii maitai o te Atua, e ua faatavai oia ia ratou e te varua moˈa. Noa ˈtu râ, maoti te poheraa o te mau aposetolo, ua ore ïa te mana o tei tapeapea i te mau ohipa, e ua parare aˈera te ohipa apotata. (Tesalonia 2, 2:7, 8) Ua tupu atura te hoê faanahonahoraa o tei faahua parau e o ˈna te amuiraa a te Atua. Ua haavare oia i te na ôraa e o ˈna te nunaa moˈa faatavaihia e te varua o te Atua no te faatere e o Iesu.
13. No te aha e nehenehe ai e parau e e tuhaa atoa ta te amuiraa faaroo kerisetiano i roto i te ohipa tuuraa upeˈa?
13 I to outou manaˈoraa, e tuhaa anei ta te feia taiva e faahua kerisetiano ra i roto i te parabole no nia i te upeˈa? E nehenehe e parau e e. Tei roto atoa te amuiraa faaroo kerisetiano i te upeˈa taipe. Parau mau, no te hoê tau maoro, ua tamata te Ekalesia Katolika i te huna i te Bibilia i te huiraatira. Noa ˈtu râ, i roto i te mau senekele, ua hauti te mau melo o te amuiraa faaroo kerisetiano i te hoê tiaraa faufaa roa i te pae no te huriraa, te papai-faahou-raa, e te opereraa i te Parau a te Atua. I muri iho, ua faanaho aˈera aore ra ua turu atu te mau ekalesia i te mau totaiete Bibilia, o tei huri i te Bibilia na roto i te mau reo o te mau fenua atea. Ua tono atoa ratou i te mau mitionare toroa taote e te mau orometua haapii, o tei faariro i te taata ei kerisetiano na roto i te horoaraa ˈtu i te maa e te faufaa materia. Ua haaputu mai teie mau ohipa e rave rahi mau iˈa tano ore, o tei ore i fariihia e te Atua. Teie râ, ua naeahia râ i te mau mirioni taata e ere i te kerisetiano ia ite i te Bibilia e te tahi huru o te kerisetianoraa, noa ˈtu e mea ino.
14. Mea nafea te ohipa ravaai i te iˈa maitatai i te tururaahia na roto i te tahi ohipa i ravehia e te mau ekalesia a te amuiraa faaroo kerisetiano?
14 I to ratou aˈe pae, ua haa te feia taiva ore o tei purara ê e pee ra hoi i te Parau a te Atua ma te horoa ia ratou taatoa. Noa ˈtu eaha te anotau, o ratou te amuiraa mau a te Atua tei faatavaihia e te varua i nia i te fenua nei. E e nehenehe tatou e tiaturi e ua noaa atoa ta ratou iˈa, oia hoi te taata, e rave rahi ta te Atua e faariro ei feia maitatai o ta ˈna e faatavai e to ˈna varua. (Roma 8:14-17) Ua nehenehe teie mau kerisetiano maitatai e afai atu i te parau mau a te Bibilia i te feia e rave rahi o tei riro mai na ei kerisetiano na roto i te mau taoˈa materia aore ra o tei noaa mai i te tahi ite haihai no nia i te Bibilia maoti te mau Papai tei hurihia na roto i to ratou reo e te mau totaiete Bibilia a te amuiraa faaroo kerisetiano. Oia mau, te rave-noa-hia ra te haaputuraa i te iˈa maitatai, noa ˈtu e te rahiraa i haaputuhia mai e te amuiraa faaroo kerisetiano, e iˈa iino ïa i mua i te aro o te Atua.
15. Ma te papu maitai, te faahohoˈa ra te upea o te parabole i te aha?
15 No reira, te faahohoˈa ra te upeˈa i te mauhaa i nia te fenua o te tia ra ei amuiraa no te Atua e o te haaputu ra i te iˈa. Te vai ra i roto te amuiraa faaroo kerisetiano e tae noa ˈtu te amuiraa o te mau kerisetiano faatavaihia, e na teie pǔpǔ hopea nei i tamau noa i te haaputu i te iˈa maitatai, i raro aˈe i te aratairaa itea-ore-hia a te mau melahi, ia au maite i te Mataio 13:49.
Mea taa ê mau â to tatou nei tau
16, 17. No te aha e mea faufaa roa te tau o ta tatou e ora nei i roto i te faatupuraa i te parabole a Iesu no nia i te upeˈa?
16 E hiˈo anaˈe na i teie nei i te tereraa o te tau. I roto i te mau senekele, ua haaputu mai te upeˈa i te mau iˈa maitatai e tae noa ˈtu te mau iˈa, aore ra feia, iino. Ua tae aˈera i te taime i reira te mau melahi i haamata ˈi te hoê ohipa faataa-ê-raa faufaa roa. Anafea ïa? Te faaite papu ra te irava 49 e e tupu te reira i ‘te hopea o te faanahoraa o te mau mea.’ E tuea maitai te reira e ta Iesu i parau i roto i te parabole no nia i te mau mamoe e te mau puaaniho: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra.”—Mataio 25:31, 32.
17 No reira, ia au maite i te Mataio 13:47-50, ua ravehia te hoê ohipa faataa-ê-raa faufaa roa i raro aˈe i te aratairaa a te mau melahi mai ‘te hopea mai â o te faanahoraa o te mau mea’ o tei haamata i te matahiti 1914. Ua ite-papu-hia te reira i muri aˈe i te matahiti 1919, i to te toea faatavaihia faatiamâraahia i te faatîtîraa poto i te pae varua, oia hoi te tapearaa, e to ratou riroraa ei mauhaa aravihi aˈe no te faatupu i te ohipa ravaai.
18. Mea nafea te iˈa maitatai i te haaputuraahia i roto i te mau farii?
18 Eaha te roohia i te mau iˈa maitatai e faataa-ê-hia mai? Te na ô ra te irava 48 e “ua haaputu ihora [te mau melahi ravaai e te faataa ê iˈa] i te iˈa maitatai i roto i te farii, faarue atura râ i te iˈa iino.” Ua riro te mau farii ei mau vairaa paruru i reira e tuuhia ˈi te mau iˈa maitatai. Ua tupu anei te reira i to tatou nei tau? Papu maitai. Ei mau iˈa taipe maitatai o tei noaa oraora noa, ua haaputuhia ratou i roto i te mau amuiraa a te mau kerisetiano mau. Ua paruru mau â teie mau amuiraa tei faaauhia i te mau farii e ua faaherehere ia ratou no te taviniraa a te Atua, e ere anei? Area ra, e nehenehe vetahi e manaˈo e, ‘Mea faahiahia roa te reira, eaha râ te taairaa e to ˈu nei oraraa e te tau i mua nei?’
19, 20. (a) No te aha e mea faufaa roa i teie mahana ia ite i te auraa o teie parabole? (b) Eaha te ohipa ravaai faufaa roa o tei ravehia mai te matahiti 1919 mai â?
19 Te tupuraa tei faahohoˈahia i ǒ nei, aita ïa i taotia-noa-hia i te mau senekele i rotopu i te tau o te mau aposetolo e te matahiti 1914. I roto i taua area tau ra, ua haaputu te upeˈa i te mau kerisetiano haavare e te mau kerisetiano mau. Inaha, ua haaputu oia i te mau iˈa iino e te mau iˈa maitatai. Hau atu, aita te ohipa faataa-ê-raa a te mau melahi i hope i te area matahiti 1919. Aita. I roto i te tahi mau tuhaa, e tano teie parabole no nia i te upeˈa e tae roa mai i to tatou nei tau. E tuhaa atoa ta tatou e e ohipa atoa te reira i nia i to tatou oraraa i mua nei. Mea ru mau â ia taa tatou e mea nafea e no te aha, mai te peu e te hinaaro ra tatou e ia tano teie mau parau i nia ia tatou nei: “Ua maitai râ to outou mau mata, te hiˈo nei hoi ïa, e to outou mau tariˈa, te faaroo nei hoi ïa” ma te maramarama.—Mataio 13:16.
20 Ua ite iho â paha outou e i muri aˈe i te matahiti 1919, ua rave puai te toea faatavaihia i te ohipa pororaa ma te apiti atu i te mau melahi, o tei tamau noa i te faaohipa i te upeˈa taipe no te huti mai i te mau iˈa i te pae tahatai, no te faataa ê i te mau iˈa maitatai e te mau iˈa iino. Te faaite ra te mau numera no taua tau ra e ua tamau noa te haaputuraa mai i te iˈa maitatai no te faatavairaa e te varua moˈa, e tae roa ˈtu i te taime a haaputuhia ˈi te mau melo hopea o te mau 144 000 i roto i te upeˈa taipe. (Apokalupo 7:1-4) Teie râ, i te afaraa o te mau matahiti 1930, ua hope te haaputuraa i te mau iˈa maitatai ia faatavaihia ratou e te varua moˈa. E tia anei ïa i te amuiraa o te toea faatavaihia ia faarue i te upeˈa, a faaea noa ˈtu ai ma te ohipa ore, ma te tiai i ta ratou haamauruururaa i nia i te raˈi? Eita ïa!
Ta outou tuhaa i roto i te ohipa ravaai
21. Eaha te tahi atu ohipa ravaai o tei tupu i to tatou nei tau? (Luka 23:43)
21 Ua tuu te parabole a Iesu no nia i te upeˈa i te tapao i nia i te mau iˈa maitatai o te haamaitaihia e te hoê parahiraa i roto i te Basileia o te raˈi. Taa ê atu râ i teie parabole, te vai ra te tahi atu ohipa ravaai taipe te tupu ra i nia i te hoê faito rahi aˈe, hau atu i tei faahohoˈahia i roto i te tumu parau matamua. Teie ohipa ravaai, e ere ïa no te mau iˈa faatavaihia maitatai i faahitihia i roto i te parabole a Iesu, no te mau iˈa taipe ra e noaa mai o te fanaˈo i te tiaturiraa faahiahia e ora i roto i te paradaiso i nia i te fenua nei.—Apokalupo 7:9, 10; a faaau e te Mataio 25:31-46.
22. Eaha te faahopearaa oaoa mau ta tatou e nehenehe e fanaˈo, e eaha ïa te maitiraa?
22 Mai te peu e te reira to outou tiaturiraa, e nehenehe ïa outou e oaoa i te mea e ua haapao Iehova i te hoê ohipa ravaai faaora o te tamau noa ra e tae roa mai i teie nei. Mea na reira hoi te noaaraa mai ia outou i te hoê tiaturiraa faahiahia roa. Te hoê tiaturiraa? Oia, e tano roa teie nei parau, no te mea ua taaihia te hopea e noaa mai i to outou tamau-noa-raa i te auraro i te Taata e aratai ra i te ohipa ravaai e tupu nei. (Zephania 2:3) A haamanaˈo na e, i roto i te parabole, aita te mau iˈa atoa e noaa mai i roto i te upeˈa e fanaˈo i te hoê hopea maitai. Ua parau o Iesu e e faataa-ê-hia te feia tano ore, aore ra iino, e te feia maitatai. Eaha ïa to ratou hopea? I roto i te Mataio 13:50, ua faataa o Iesu i te faahopearaa atâta no te mau iˈa tano ore, aore ra iino. E hurihia ratou i roto i te umu auahi ra, oia hoi te haamouraa mure ore.—Apokalupo 21:8.
23. No te aha te ohipa ravaai e riro ai ei ohipa faufaa roa i teie mahana?
23 Area te mau iˈa faatavaihia maitatai ra, e tae noa ˈtu te mau iˈa taipe o te nehenehe e ora e a muri noa ˈtu i nia i te fenua, te vai ra te hoê oraraa hanahana no a muri aˈe. Ma te papu maitai, te haapao nei te mau melahi i teie nei iho â e ia ravehia te ohipa ravaai ma te manuïa na nia i te palaneta taatoa nei. E mea rahi mau â te iˈa e noaa maira! Mea tano roa ia parau e, ua riro te reira ei taiˈaraa semeio tei au i te pueraa iˈa i noaa mai i te mau aposetolo i to ratou tuuraa i te upeˈa na nia i te faaueraa a Iesu.
24. Eaha te tia ia tatou ia rave no nia i te ohipa ravaai i te pae varua?
24 Te horoa ra anei outou i to outou itoito taatoa i roto i teie ohipa ravaai faaora i te pae varua? Noa ˈtu eaha te tuhaa o ta tatou tataitahi i rave e tae roa mai i teie nei taime, e nehenehe tatou e faufaahia ia hiˈo tatou i te tuhaa rahi i ravehia i roto i te ohipa ravaai e te faaoraraa e tupu nei. Ia na reira tatou, e turaihia tatou ia faaite i te hoê itoito puai roa ˈtu â no te tuu i te mau upeˈa ia noaa mai te iˈa i te tau i mua ia tatou nei!—A faaau e te Mataio 13:23; Tesalonia 1, 4:1.
Te haamanaˈo ra anei outou i teie mau tuhaa?
◻ Eaha te faahohoˈahia ra na roto i na huru iˈa e piti i roto i te parabole a Iesu no nia i te upeˈa?
◻ I roto i teihea auraa te mau ekalesia a te amuiraa faaroo kerisetiano raveraa i te hoê tuhaa i roto i te ohipa tuuraa upeˈa?
◻ No te aha e mea faufaa roa te ohipa ravaai e ravehia ra i to tatou nei tau?
◻ E tia i te parabole o te upeˈa ia turai ia tatou ia rave i teihea hiˈopoaraa tataitahi?
[Hohoˈa i te api 18]
E ravehia na te ohipa ravaai i te Miti no Galilea i roto i te roaraa o te mau senekele
[Faaiteraa i te tumu]
Pictorial Archive (Near Eastern History) Est.