Te taviniraa ei feia ravaai taata
“Ua parau maira Iesu ia Simona, Eiaha e mǎtaˈu, i teie nei, e taata ta oe e noaa.”—LUKA 5:10.
1, 2. (a) Eaha te tuhaa o te ohipa ravaai i roto i te aamu o te huitaata nei? (b) Eaha te ohipa ravaai apî tei haamatahia tau 2 000 matahiti i teie nei?
E RAVE rahi tausani matahiti to te taata taiˈaraa no te tamaa i roto i te mau miti, te mau roto, e te mau anavai pape o te fenua. Ua riro te mau iˈa no roto mai i te anavai Nile ei maa faufaa roa i Aiphiti tahito. I te taime a faarirohia ˈi te mau pape o te Nile ei toto i te tau o Mose ra, aita noa te feia no Aiphiti i fifihia na roto i te ereraa i te pape, no te mea atoa râ e ua pohe te mau iˈa, e ua ere-atoa-hia ˈtura ratou i te maa. I muri aˈe, i Sinai, i to Iehova horoaraa ˈtu i te Ture na Iseraela, ua parau atura oia e e nehenehe vetahi mau iˈa e amuhia, area vetahi ra, e iˈa viivii ïa, eiaha roa ˈtu ïa e amu. Te faaite ra te reira e e amu na te mau ati Iseraela i te iˈa i to ratou tapaeraa ˈtu i te Fenua i tǎpǔhia, e e riro ïa vetahi pae ei feia taiˈa.—Exodo 7:20, 21; Levitiko 11:9-12.
2 Teie râ, fatata e 2 000 matahiti i teie nei, ua faatupuhia te hoê ohipa ravaai apî i rotopu i te huitaata nei. E ohipa ravaai teie i te pae varua o te haamaitai eiaha noa i te feia taiˈa, i te mau iˈa atoa râ! Te rave-noa-hia nei teie ohipa ravaai i teie mahana, e e mau mirioni taata teie e faufaahia ra na te ao nei.
“E taata ta oe e noaa”
3, 4. O vai na feia ravaai toopiti o tei anaanatae rahi atu ia Iesu Mesia?
3 I te matahiti 29 o to tatou nei tau, ua bapetizohia aˈera o Iesu, Na ˈna hoi e haamata i teie ohipa ravaai apî, i roto i te anavai Ioridana e Ioane Bapetizo. Tau hebedoma i muri iho, ua faatoro atura o Ioane ia Iesu i ta ˈna na pǐpǐ e piti e ua na ô atura: “A hiˈo na i te Arenio a te Atua.” Ua haere oioi atura te hoê o teie nau pǐpǐ, o Anederea te iˈoa, e faaite i to ˈna ra taeae o Simona Petero e: “Ua itea ia mâua te Mesia.” Te vahi anaanatae, e toroa taata taiˈa to Anederea raua o Simona.—Ioane 1:35, 36, 40, 41; Mataio 4:18.
4 Tau taime i muri iho, te poro ra o Iesu i te mau nahoa taata i pihai iho i te Miti no Galilea, aita i atea roa ˈtu i te vahi i reira o Petero raua o Anederea e ora ˈi. Ua na ô atu oia i te taata e: “A tatarahapa, te fatata mai nei te basileia o te ao.” (Mataio 4:13, 17) Te taa ra ia tatou e te hinaaro ru ra o Petero raua o Anederea e faaroo i ta ˈna poroi. Aita râ raua e papu ra e ua fatata roa o Iesu i te faahiti i te tahi parau o te taui roa i to raua oraraa. Hau atu, te mea ta Iesu e parau e e rave i mua ia raua, e auraa faufaa roa ïa to te reira no tatou paatoa i teie mahana.
5. Mea nafea te taata ravaai ra o Petero i te tautururaa ˈtu ia Iesu?
5 Te taio nei tatou: “E te tia noa ra oia i te hoê mahana i te hiti roto i Genesareta ra, ua nenei noa maira te taata atoa e rave rahi ia ˈna ra, e faaroo i te parau a te Atua, hiˈo atura oia i e piti pue pahi i te tipae-noa-raa i te hiti roto, area te feia ravaai, tei uta ïa te uhi ra i ta ratou upeˈa.” (Luka 5:1, 2) I taua tau ra, mea pinepine te feia toroa ravaai i te taiˈa i te po, e te horoi ra teie mau taata i ta ratou mau upeˈa i muri aˈe i te hoê po taiˈaraa. Ua opua aˈera o Iesu e rave i te hoê o ta ratou mau poti no te poro ma te aravihi roa ˈtu â i mua i te tiaa taata. “Haere atura oia i nia iho i te hoê i taua na pahi ra, i ta Simona ra, ua parau atura ia ˈna e tute i tai iti aˈe. Parahi ihora oia i raro, e ua haapii maira i nia i te pahi i taua feia rahi ra.”—Luka 5:3.
6, 7. Eaha te semeio no nia i te ohipa ravaai ta Iesu i rave, e eaha te parau o ta ˈna i faahiti i muri iho no nia i te ohipa ravaai?
6 A tapao na e aita o Iesu e opua noa ra e haapii atu i te nahoa taata: “E oti aˈera ta ˈna parauraa, ua parau atura oia ia Simona, Ho atu i te vahi moana, e tuu i ta outou upeˈa i te hoê haroa.” A haamanaˈo na, ua taiˈa teie feia ravaai i taua po taatoa ra. Eita ïa e maerehia ia pahono atu o Petero e: “E te Fatu, i haa noa na matou e ao noa aˈenei te rui, e aore roa i noaa, e tuu râ vau i te upeˈa o oe i parau mai na.” Eaha te ohipa i tupu i to ratou tuuraa i te upeˈa? “Ua ati aˈera ia ratou te iˈa e rave rahi, motumotu ihora ta ratou upeˈa. Ua taparu atura ratou i to ratou i nia i te hoê pahi ra, ia haere atoa mai ratou e rave. Ua haere maira hoi ratou, ua faaî ihora i na pahi e piti atoa, e ua fatata roa i te tomo.”—Luka 5:4-7.
7 Ua rave o Iesu i te hoê semeio. Mea iˈa ore taua vahi ra i taua po atoa ra; i teie nei râ, ua î roa i te iˈa. Ua putapû roa o Petero i teie semeio. “Tipapa ihora [Simona Petero] i raro i te pae turi o Iesu, i te na ôraa ˈtu e, E haere ê oe, e te Fatu, e taata hara hoi au. Roohia ihora oia e ratou atoa i te maere rahi mǎtaˈu, i taua haroa iˈa i noaa ia ratou ra: o Iakobo atoa hoi e o Ioane, na tamarii a Zebedaio ra, ua amui atoa raua ia Simona.” Ua tamǎrû aˈera o Iesu ia Petero e ua faahiti atura i te mau parau o te taui roa i te oraraa o Petero. “Eiaha e mǎtaˈu, i teie nei, e taata ta oe e noaa.”—Luka 5:8-10.
Te feia ravaai taata
8. Mea nafea to e maha feia toroa ravaai fariiraa i te titauraa a Iesu ‘e ravaai i te taata’?
8 Te faaau ra o Iesu i te taata i te iˈa, e ua titau oia i teie taata taiˈa haehaa ia faarue i ta ˈna toroa no te tahi ohipa ravaai faahiahia ˈtu â—te ohipa ravaai taata. Ua farii aˈera o Petero, e to ˈna ra taeae o Anederea, i teie titauraa. “Faarue ihora raua i ta raua tau upeˈa i reira ra e ua pee atura ia ˈna.” (Mataio 4:18-20) Ua pii atura o Iesu i muri iho ia Iakobo raua o Ioane, tei nia hoi raua i to raua poti e tataˈi ra i ta raua upeˈa. Ua titau oia ia raua atoa ia riro mai ei feia ravaai taata. Eaha ta raua i rave? “Faarue ihora raua i te bǒti i reira ra e to raua metua tane, pee atura ia ˈna.” (Mataio 4:21, 22) Ua faaite mau â Iesu i te aravihi ei taata ravaai i te taata. I taua taime ra, e maha taata tei noaa mai ia ˈna.
9, 10. Eaha te huru faaroo ta Petero e to ˈna mau hoa i faaite, e mea nafea to ratou haapiiraahia ia rave i te ohipa taiˈa i te pae varua?
9 E noaa mai te moni a te taata toroa ravaai na roto i te hooraa i ta ˈna iˈa, area te taata ravaai i te pae varua ra, eita o ˈna e nehenehe e na reira. No reira, ua faaite teie mau pǐpǐ i te faaroo rahi i to ratou faarueraa i te mau mea atoa no te pee atu ia Iesu. Aita râ ratou i feaa e e manuïa ta ratou ohipa ravaai i te pae varua. Ua rave hoi o Iesu e ia î roa te mau pape iˈa ore i te iˈa mau. Oia atoa, ia tuu ratou i ta ratou mau upeˈa i roto i te mau pape o te nunaa Iseraela, e nehenehe te mau pǐpǐ e tiaturi e, maoti te tauturu a te Atua, e noaa mai te mau taata ia ratou. Te rave-noa-hia ra te ohipa ravaai i te pae varua o tei haamata i taua tau ra e, te horoa noa maira Iehova i te hoê auhune ruperupe.
10 I roto hau atu i te piti matahiti, ua haapii Iesu i teie mau pǐpǐ nafea ia ravaai i te taata. I te hoê taime, ua horoa ˈtura oia i te mau faaueraa papu maitai e ua tono aˈera ia ratou na mua ia ˈna no te poro. (Mataio 10:1-7; Luka 10:1-11) I te taime a hoohia ˈi e a taparahi-pohe-hia ˈi o Iesu, ua ahoaho roa te mau pǐpǐ. Teie râ, ua faaea anei te ohipa ravaai taata i te taime a pohe ai o Iesu? Na te mau ohipa i tupu i muri iho e horoa mai i te pahonoraa.
Te ohipa ravaai i roto i te miti o te huitaata nei
11, 12. I muri aˈe i to ˈna tia-faahou-raa, eaha te semeio ta Iesu i rave o tei taaihia i te ohipa ravaai?
11 I muri noa ˈˈe i te poheraa o Iesu i rapaeau ia Ierusalema e to ˈna tia-faahou-raa, ua hoˈi atura te mau pǐpǐ i Galilea. I te hoê taime, e hitu o ratou o tei haaputuputu i pihai iho i te Miti no Galilea. Ua parau atura o Petero e e haere o ˈna e taiˈa, e ua haere atoa ˈtura te tahi pae na muri ia ˈna. Mai tei matauhia, ua taiˈa ratou i te po. Ua tuu faahou ratou i ta ratou upeˈa i roto i te miti i taua po atoa ra e aita hoê aˈe iˈa i noaa mai. I te aahiata, ua pii maira te hoê taata e tia noa ra i te pae tahatai na nia ˈtu i te miti e: “E te mau tamarii ra, e maa ta outou?” Ua pahono atura te mau pǐpǐ e: “Aita.” Ua parau maira te taata e tia noa ra i te pae tahatai e: “A tuu na te upeˈa i te [pae atau] o te pahi na, e noaa ïa ta outou. Ua tuu atura ratou, e aita aˈera e maraa ia ratou ia ume i te rahi o te iˈa.”—Ioane 21:5, 6.
12 E ohipa maere mau teie! Eita e ore e ua haamanaˈo te mau pǐpǐ i te semeio matamua no nia i te ohipa ravaai, e ua taa ˈtura i te hoê o ratou e o vai râ taua taata i te pae tahatai ra. “Ua parau atura taua pǐpǐ herehia e Iesu ra ia Petero, O te Fatu; faaroo aˈera Petero e, o te Fatu tera, ua ahu ihora i tana ahu i nia iho, (o tei vaiiho-ê-hia e ana ra,) e tatia ihora hoi e ouˈa ˈtura oia i raro i taua roto ra. Na nia maira te hoê pae pǐpǐ ra i te boti, ma te upeˈa e te iˈa i te umeraa mai. (Aita hoi i maoro rea uta, e au i te piti hanere o te kubiti ra.”—Ioane 21:7, 8.
13. I muri aˈe i to Iesu paiumaraa i nia i te raˈi, eaha te porotarama ravaai na te ao atoa nei o tei haamatahia?
13 Eaha ta teie semeio e faaite ra? Aitâ ïa te ohipa ravaai taata i oti atura. Ua haapapuhia teie manaˈo i to Iesu parauraa ˈtu e toru taime ia Petero—e na roto ia ˈna i te mau pǐpǐ atoa—ia faaamu i te mau mamoe a Iesu. (Ioane 21:15-17) Oia mau, te vai ra te hoê porotarama faaamuraa i te pae varua i mua ia ratou. Hou to ˈna poheraa, ua tohu oia e: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa.” (Mataio 24:14) Ua tae ïa i te taime ia haamata te tupuraa o teie parau tohu no te senekele matamua. Te faaineine ra ta ˈna mau pǐpǐ i te tuu i ta ratou mau upeˈa i roto i te miti o te huitaata nei, e eita te mau upeˈa e hutihia mai e aita e iˈa to roto.—Mataio 28:19, 20.
14. Mea nafea te haamaitairaahia te ohipa ravaai a te mau pǐpǐ a Iesu i roto i te mau matahiti na mua ˈˈe i te haamouraa o Ierusalema?
14 Hou oia e paiuma ˈtu ai i mua i te terono o to ˈna Metua ra i te raˈi, ua parau atu o Iesu i ta ˈna mau pǐpǐ e: “E noaa râ to outou mana i te [varua moˈa] ia haere mai i nia iho ia outou: e ei ite hoi outou no ˈu i Ierusalema nei e Iudea atoa hoi e ati noa ˈˈe, e Samaria, e tae noa ˈtu i te hopea o te fenua ra.” (Ohipa 1:8) I te niniiraahia te varua moˈa i nia i te mau pǐpǐ i te Penetekose o te matahiti 33 o to tatou nei tau, ua haamata te ohipa ravaai taata rahi i te pae varua na te ao atoa nei. I te mahana o te Penetekose anaˈe, e toru tausani taata o tei noaa mai, e i muri noa iho “a pae atura tausani te taata ia taio.” (Ohipa 2:41; 4:4) Ua haere noa te maraaraa i mua. Te faaite maira te papai e: “Te feia râ i faaroo i te Fatu ra, e rave rahi roa ˈtura ïa tei amui mai ia ratou ra, te tane e te vahine atoa hoi.” (Ohipa 5:14) I muri aˈe, ua farii aˈera te mau ati Samaria i te parau apî maitai, e i muri noa iho, ua na reira atoa te feia o te mau nunaa peritome-ore-hia. (Ohipa 8:4-8; 10:24, 44-48) Tau 27 matahiti i muri aˈe i te Penetekose, ua papai atu te aposetolo Paulo i te mau kerisetiano no Kolosa e ua “faaite-haere-hia [te parau apî maitai] i te taata atoa i raro aˈe i teie nei raˈi.” (Kolosa 1:23) Oia mau, ua haere te mau pǐpǐ a Iesu e ravaai i te atea ê o te mau pape no Galilea. Ua tuu ratou i ta ratou mau upeˈa i rotopu i te mau ati Iuda i purara haere na roto i te Hau emepera Roma, e tae noa ˈtu i te mau miti tiaturi-ore-hia o te mau nunaa e ere i te ati Iuda. E ua î roa ta ratou mau upeˈa. No te mau kerisetiano o te senekele matamua, ua tupu te parau tohu a Iesu i roto i te Mataio 24:14 hou o Ierusalema e haamouhia ˈi i te matahiti 70 o to tatou nei tau.
Te ohipa ravaai taata i “te mahana o te Fatu”
15. I roto i te buka Apokalupo, eaha te ohipa ravaai ê atu tei tohuhia mai, e afea te reira e faatupuhia ˈi?
15 Teie râ, te vai faahou râ te ohipa i mua. Fatata i te hopea o te senekele matamua, ua horoa ˈtura Iehova ia Ioane, te aposetolo hopea e ora noa râ, i te tatararaa o te mau mea e tupu i roto i “te mahana o te Fatu.” (Apokalupo 1:1, 10) Hoê tapao faahiahia mau, o te pororaa ïa i te parau apî maitai na te ao atoa nei. Te taio nei tatou: “Hiˈo atura vau i te hoê melahi i te maueraa na ropu i te reva nei: ma te evanelia e tia i te vairaa ra ei pororaa ˈtu i te feia e parahi i te ao nei ra, i te mau fenua atoa, e te mau opu atoa, e te mau reo atoa, e te mau nunaa atoa.” (Apokalupo 14:6) I raro aˈe i te aratairaa a te mau melahi, e poro te mau tavini o te Atua i te parau apî maitai i nia i te fenua atoa nei, eiaha noa râ na roto i te Hau emepera Roma. E tia ia ravehia te hoê ohipa rahi no te ravaai i te mau taata, e ua itehia te tupuraa o taua orama ra i to tatou nei tau.
16, 17. Afea te haamataraa te ohipa ravaai i te pae varua no teie nei tau, e mea nafea to Iehova haamaitairaa i te reira?
16 Mea nafea te ohipa ravaai i te tupuraa i teie nei senekele e 20? I te omuaraa ra, mea iti roa te feia ravaai. I te hoperaa te Tamaˈi Rahi Matamua, fatata e maha noa tausani feia e poro ra i te parau apî maitai, te mau tane e te mau vahine itoito, e feia faatavaihia te rahiraa. Ua tuu ratou i ta ratou mau upeˈa i te mau vahi atoa tei irithia e Iehova, e e rave rahi mau taata o tei noaa mai. I muri aˈe i te piti o te tamaˈi rahi, ua iriti ihora Iehova i te mau pape apî no te ohipa ravaai. Ua haamata aˈera te mau mitionare o tei haere i te Haapiiraa Bibilia no Gileada a te Taiete Watchtower i te ohipa i roto e rave rahi mau fenua. Te mau fenua mai ia Tapone, Italia, e o Paniora, tei riro na hoi i te omuaraa ra ei mau fenua hotu ore, ua horoa mai ratou i te pae hopea i te auhune taata ruperupe. Ua ite atoa tatou aita i maoro aˈenei e ua manuïa te ohipa ravaai i Europa Hitia o te râ.
17 I teie mahana, i roto e rave rahi mau fenua, fatata roa te mau upeˈa i te motumotu. Na roto i te auhune rahi o te mau taata, ua titauhia te faanahoraa o te mau amuiraa e te mau tuhaa haaati apî. Ia noaa mai te mau vahi putuputuraa, te patuhia nei te mau Piha no te Basileia e te mau Piha Tairururaa apî i te mau taime atoa. Te titauhia nei te mau matahiapo e te mau tavini tauturu hau atu â no te haapao i te maraaraa. Ua haamatahia te hoê ohipa puai e te feia haapao maitai i te matahiti 1919 ra. I roto i te hoê auraa mau, ua tupu te Isaia 60:22. ‘Ua riro te mea iti haihai ei tausani,’ inaha, ua hau atu taua pǔpǔ feia ravaai ra e maha tausani i te maha mirioni i teie mahana. E aitâ ïa tatou i tae atura i te hopea.
18. Nafea tatou ia pee i te hiˈoraa nehenehe o te feia ravaai i te pae varua o te senekele matamua?
18 Eaha te auraa o teie mau mea atoa no tatou tataitahi? Te faaite ra te papai e, i to Petero, Anederea, Iakobo, e Ioane titauraahia ia riro mai ei feia ravaai taata, ‘faarue ihora ratou i te mau mea atoa e ua pee atura ia Iesu.’ (Luka 5:11) Auê ïa hiˈoraa nehenehe no te faaroo e te pûpûraa ia ratou taatoa! E nehenehe anei tatou e faatupu i te hoê â manaˈo haapaeraa ia ˈna iho, te hoê â ineineraa no te tavini ia Iehova noa ˈtu eaha te titauhia? E rave rahi mirioni o tei pahono e e nehenehe ta ratou. I te senekele matamua, ua ravaai te mau pǐpǐ i te mau taata i te mau vahi atoa i faatiahia e Iehova. Noa ˈtu e tei rotopu anei i te mau ati Iuda aore ra te feia no te mau nunaa, ua ravaai ratou ma te ore e tarani ia ratou iho. Ia poro atoa na tatou i te mau taata ma te ore e tapeapea aore ra e haamarirau, e tia ˈi.
19. Eaha te tia ia tatou ia rave mai te peu e aita te mau pape o ta tatou e taiˈa ra e hotu ra?
19 Eaha ˈtura mai te peu e ia hiˈo anaˈe tatou, aita ta tatou tuhaa fenua e hotu ra? Eiaha ïa e haaparuparu. A haamanaˈo e ua faaî o Iesu i te mau upeˈa a te mau pǐpǐ i muri aˈe i to ratou taiˈaraa i te po taatoa e aita hoê iˈa i noaa mai. E nehenehe atoa te reira e tupu i te pae varua. Ei hiˈoraa, i Irelane, ua tutava te mau Ite haapao maitai e rave rahi matahiti te maoro e mea iti roa te mau hotu i noaa mai. Aita râ i maoro aˈenei, ua taui te mau ohipa. Te faataa ra te Buka matahiti a te mau Ite no Iehova no 1991 e i te hopea o te matahiti taviniraa 1990, ua fanaˈo o Irelane e 29 numera tamau teitei! Peneiaˈe mai te reira atoa ta outou tuhaa fenua i te hotu mai a muri aˈe. A faatia noa ˈi Iehova, a tamau noa i te ravaai!
20. Afea tatou e rave ai i te ohipa ravaai taata?
20 I Iseraela, e haere na te feia ravaai e taiˈa i te po, a taoto ai vetahi pae i roto i to ratou roi mahanahana e te au maitai. Ua haere ratou i rapae, eiaha i te taime mea au aˈe na ratou, i te taime râ e noaa rahi mai ai te iˈa. E tia atoa ia tatou ia hiˈopoa i ta tatou tuhaa fenua no te haere atu e taiˈa i te taime tei te fare te rahiraa o te taata e e faaroo mai ratou. Peneiaˈe paha i te ahiahi, i te hopea hebedoma, aore ra i te tahi atu taime. Noa ˈtu e eaha te taime, ia imi tatou i te mau ravea atoa ia itea mai ia tatou i te feia mafatu tia.
21. Eaha te tia ia tatou ia haamanaˈo mai te peu e te poro-pinepine-hia ra ta tatou tuhaa fenua?
21 Eaha ïa mai te peu e e poro-pinepine-hia ta tatou tuhaa fenua? Mea pinepine te feia toroa ravaai o teie nei ao i te amumau i te mea e te taiˈa-rahi-roa-hia nei ta ratou mau vahi ravaairaa. Teie râ, e nehenehe anei ta tatou mau vahi taiˈaraa i te pae varua e taiˈa-rahi-roa-hia? Eita! E rave rahi mau tuhaa fenua o te hotu rahi nei ia poro-pinepine-anaˈe-hia. E horoa mai vetahi i te mau hotu maitatai aˈe no te mea te porohia ra ma te aravihi. Noa ˈtu râ, ia haere pinepine outou na te mau fare, a ara i te tapao maitai i te mau taata atoa aita to te fare e a hoˈi faahou atu e farerei ia ratou. A haapii e rave rahi mau tumu parau tauaparauraa. A haamanaˈo na e e taata te haere mai na muri ia tatou, no reira, eiaha e faahepo atu i te taata aore ra e faariri atu i te utuafare. A faarahi i to outou aravihi i roto i te pororaa na te mau aroâ e te pororaa i te taime faanaho-ore-hia e te amuiraa. A tuu i ta outou mau upeˈa i te pae varua i te mau taime atoa e na roto i te mau huru ravea atoa.
22. Eaha te haamaitairaa rahi ta tatou e fanaˈo nei i teie taime?
22 A haamanaˈo na, i roto i teie ohipa ravaai, o te taata taiˈa e te iˈa atoa o te faufaahia. Mai te peu e e tamau noa te feia e noaa mai ia tatou i te haere i mua, e nehenehe ratou e ora e a muri noa ˈtu. Ua faaitoito atu o Paulo ia Timoteo e: “E tamau maite â i te reira: tei te na reira hoi e ora ˈi oe e te feia atoa e faaroo mai ia oe ra.” (Timoteo 1, 4:16) Na Iesu i haapii na mua i te ohipa ravaai i te pae varua i ta ˈna mau pǐpǐ, e te rave-noa-hia ra teie ohipa i raro aˈe i ta ˈna aratairaa. (A faaau e te Apokalupo 14:14-16.) Auê ïa haamaitairaa rahi e vai ra ia tatou nei oia hoi te raveraa i te ohipa i raro aˈe i to ˈna mana ia hope roa i te tupu! Ia tuu noa tatou i ta tatou mau upeˈa a faatia noa ˈi Iehova. Eaha ˈtu te ohipa rahi roa ˈˈe e nehenehe e ravehia maoti râ te ohipa ravaai taata?
Te haamanaˈo ra anei outou?
◻ Eaha te ohipa ta Iesu i haapii atu i ta ˈna mau pǐpǐ ia rave?
◻ Mea nafea to Iesu faaiteraa e aita te ohipa ravaai i te pae varua i hope i to ˈna poheraa?
◻ Mea nafea to Iehova haamaitairaa i te ohipa ravaai i te pae varua i te senekele matamua?
◻ Eaha te rahiraa iˈa o tei noaa mai i roto i te upeˈa i “te mahana o te Fatu”?
◻ Nafea tatou tataitahi e nehenehe ai e riro ei feia ravaai taata aravihi atu â?
[Hohoˈa i te api 15]
I muri aˈe i te tia-faahou-raa o Iesu, ua haaparare atu â ta ˈna mau aposetolo i te ohipa ravaai taata a te Atua