Mau uiraa a te feia taio
No te aha o Noa i tuu ai i rapae i te araka i te hoê oreba e i muri iho te hoê uuairao?
Aita te Bibilia e horoa ra i te hoê tatararaa papu. Teie râ, mea tano roa i to Noa na reiraraa.
E 40 mahana e e 40 po te uâ-noa-raa i nia i te fenua, ma te faatupu i te hoê diluvi o tei tapoi roa i te niaraa o te mau mouˈa e pae avaˈe te maoro. I muri iho, “ua iri ihora taua pahi ra i nia i te mouˈa ra o Ararata.” (Genese 7:6–8:4) Tau avaˈe i muri iho, ua “itea ihora te upoo mouˈa,” “ua tuu atura [o Noa] i te hoê oreba, tei maue atu, e ua maue mai.”—Genese 8:5, 7.
No te aha oia i rave ai i te hoê oreba? E manu rere maoro oia, e e nehenehe oia e ora i nia i te mau huru maa atoa, e tae noa ˈtu te mau tino pohe. Peneiaˈe ua tuu o Noa i te hoê oreba no te ite ahiri e e hoˈi mai oia aore ra e faaea ˈtu oia i rapae i te araka, ma te amu paha i te mau toetoea o te mau tino pohe e vai noa a iti ai te pape e a fa mai ai te fenua. Aita râ te oreba i faaea i rapae. Te na ô ra te Bibilia e ua hoˈi mai oia, aita râ e parauhia ra e ua hoˈi mai oia ia Noa ra. Peneiaˈe ua hoˈi mai oia no te faafaaea rii i nia i te araka a rere faahou atu ai no te imi i te maa e painu haere noa ra na nia i te pape rahi.
I muri iho, ua opua aˈera o Noa e tuu i te hoê uuairao. Te na ô ra te taioraa e: “Aita râ o te uuairao tauraa i itea, hoˈi maira oia i te pahi ia ˈna ra.” (Genese 8:9) Te faaite ra te reira e i to ˈna aˈe pae, e nehenehe te uuairao e haapapu ahiri e ua iti te mau pape o te diluvi. E tiaturi rahi to te mau uuairao i te taata. E nehenehe o Noa e tiaturi e e hoˈi mai te uuairao, eiaha noa no te tau i nia i te araka, e hoˈi mai râ o ˈna ia Noa ra.
Te parauhia ra e e tau te mau uuairao i nia anaˈe i te fenua mǎrô, ua itehia e e rere ratou i raro roa i roto i te mau peho, e e amu ratou i te raau tupu. (Ezekiela 7:16) Te faahiti ra te hoê buka parau paari (Grzimek’s Animal Life Encyclopedia) e: “I te mea e e amu te mau uupa e te mau uuairao atoa i te mau huero e te mau maa huero, mea fifi roa no ratou ia itea mai i te maa ia vai noa te hiona [aore ra te pape] hau atu i te hoê mahana, no te mea tei nia te rahiraa o ta ratou maa i te repo fenua.” No reira, e nehenehe te uuairao e faahoˈi mai ia Noa ra i te tahi tapao faaite e ua itea mai ia ˈna te tahi vahi mǎrô aore ra te mau raau o tei oteo. Te taime matamua a tuu ai o Noa ia ˈna, ua hoˈi noa mai te uuairao ia ˈna ra i roto i te araka. Te piti o te taime, ua hoˈi mai te uuairao e te hoê rauere olive. Te toru o te taime, aita ïa o ˈna i hoˈi faahou mai, e tapao haapapuraa ïa e e nehenehe ta Noa e faarue i te araka ma te haapeapea ore.—Genese 8:8-12.
Noa ˈtu e te manaˈo nei vetahi e e mau parau rii papu ore noa teie, i te mea e ua faataa-maitai-hia teie aamu, ma te ore e hohora i te taatoaraa o te mau ohipa i tupu, te haapapu ra ïa te reira i te parau mau o te Bibilia. Te horoa maira oia i te tahi atu tumu no te farii i te aamu, eiaha mai te hoê parau feruri-noa-hia aore ra tei faatia-noa-hia, mai te hoê râ aamu mau e te haavare ore. I te mea e aita i faataahia te mau parau rii taatoa e te mau tatararaa, te faaite atoa ra ïa i te mau mea anaanatae ta te mau kerisetiano haapao maitai e nehenehe e ani atu ia Noa ia faatia-faahou-hia mai o ˈna e ia faataa mai oia iho e no te aha oia i rave ai i tera aore ra tera ohipa.—Hebera 11:7, 39.