Eaha te roohia i te mau vahi moˈa a te amuiraa faaroo kerisetiano?
TE ANI ra te feia nenei i te buka ra Te mau vahi moˈa a te amuiraa faaroo kerisetiano (beretane), a te taata ihipǎpǎ ra o Stewart Perowne, e: “O vai te nehenehe, noa ˈtu e eaha te faaroo kerisetiano o ta ˈna e haapao ra, e tia ˈtu i te Kalavari i te Fare pure o te Tia-faahou-raa [aore ra te Fare pure o te Menema Moˈa] i Ierusalema ma te ore e roohia i te hoê manaˈo faatura: i ǒ nei hoi, teie vahi faahanahanahia e tei faatupu i te aroraa i roto i te roaraa o te mau senekele, te pu o te amuiraa faaroo kerisetiano.”
Aita hoê taata i nehenehe e haapapu e ua patuhia teie fare pure i nia i te Kalavari, i reira to Iesu Mesia poheraa. Inaha, hou te emepera roma ra o Constantin faaotiraa e faatia i te hoê fare pure i reira, o te hoê hiero etene ïa te tia ra i taua vahi ra. Hau atu, ua parau o Iesu e: “E Varua te Atua, e te feia e haamori ia ˈna ra, e haamori ïa ma te varua e te parau mau e tia ˈi.” (Ioane 4:24) Eita teie feia haamori e faahanahana i te mau vahi “moˈa” materia.
I te hoê taime, ua riro o Ierusalema ei vahi i reira te faatiaraahia te hiero o te Atua e oia atoa ei pu no te haamoriraa viivii ore. No te faaroo ore râ o te feia no taua oire ra, ua faarue aˈera te Atua ra o Iehova ia ˈna, mai ta Iesu i faaite atea. (Mataio 23:37, 38) Ua tohu atoa o Iesu e e vai ano noa taua pu faaroo ra, ta te mau taata e rave rahi e tamau noa nei i te faariro ei vahi moˈa. Ua tupu ta ˈna mau parau i to Roma haamouraa ia Ierusalema e to ˈna hiero i te matahiti 70 o to tatou nei tau.—Mataio 24:15, 21.
E tupu â te parau tohu a Iesu i nia i te hoê faito rahi aˈe i nia i te taatoaraa o te hau faaroo a te amuiraa faaroo kerisetiano, o ta ˈna e faariro ra ei vahi moˈa. Tei mua ˈtura ïa te amuiraa faaroo kerisetiano e ta ˈna mau vahi moˈa i te haamouraa e faatupuhia e te hoê puai patoi i te haapaoraa tei parauhia “te mea faufau e ano ai ra.” (Daniela 11:31) E oaoa roa te mau Ite no Iehova i te haamaramarama ia outou no nia i te tupuraa o teie ohipa huru ê roa.
[Hohoˈa i te api 32]
Te hoê fare pureraa iti i roto i te Fare pure o te Menema Moˈa
[Faaiteraa i te tumu]
Pictorial Archive (Near Eastern History) Est.