“Ua au to Noa haerea i te Atua”

A FERURI na ia Noa i nia i te hoê pou tarava e faafaaea ra maa taime. Te mauiui ra to ˈna tua. Te hauˈahia ra te tapau; te faaroohia ra te maniania a tâpûhia ˈi te raau. Mai te vahi ta ˈna e parahi ra, e nehenehe Noa e ite i ta ˈna mau tamaiti e ohipa ra. Ehia matahiti to ta ˈna mau tamaroa, ta ratou vahine e ta ˈna iho i te tautururaa ia ˈna no te hamani i te araka. Tau tuhaa tei oti, e rave rahi râ te toe ra!

No to ratou tiaturi i te hoê diluvi o te nina i te fenua i manaˈo ai te taata o tera vahi e ua maamaahia to Noa utuafare. Rahi atu â te ohipa i te haere i mua, rahi atu â te taata i te faaooo ia ratou. Mea maamaa mau te ati ta Noa i faaara tamau atu! Aita ratou e taa ra no te aha teie taata e to ˈna utuafare e haamâuˈa ˈi i to ratou taime. Mea taa ê roa râ te manaˈo o Iehova, te Atua o Noa.

Te na ô ra te Bibilia: “Ua au to Noa haerea i te Atua.” (Genese 6:9) Te auraa, ua tiaturi e ua auraro oia i te Atua a ora noa ˈi ia au i to ˈNa hinaaro. E taairaa piri roa ïa to Noa e o Iehova. E tausani matahiti i muri aˈe, ua parau te Bibilia no ˈna: “No te faaroo hoi [o] Noa, . . . faahapa ihora i to te ao.” (Hebera 11:7) Mea nafea? Eaha te haapii mai i to ˈna faaroo?

TE TAHI TAATA HAPA ORE I ROTO I TE HOÊ AO INO

Ua paari mai Noa i roto i te hoê ao i ino roa. Ua haamata ê na te reira i te tau o to ˈna metua tane tupuna o Enoha, te tahi atu taata parau-tia i haere e te Atua. Ua tohu Enoha e e tae mai te hoê mahana haavaraa no te faautua i te taata iino. I te tau râ o Noa, ua ino roa ˈtu â. No Iehova, ua î te fenua i te parau-tia ore. (Genese 5:22; 6:11; Iuda 14, 15) Eaha tei tupu?

E tupuraa peapea mau tei itehia i rotopu i te mau melahi a te Atua. Ua orure hau ê na te hoê ia Iehova e ua riro ei Satani te Diabolo a faaino ai oia i te Atua e a turai ai ia Adamu raua Eva ia rave i te hara. I to Noa tau, ua na reira atoa vetahi mau melahi a patoi ai ratou i ta Iehova faatereraa tia. Ua faarue ratou i te tiaraa ta te Atua i horoa ˈtu i te raˈi no te pou mai i te fenua nei. Ma te rave i te tino taata, ua maiti ratou i te mau tamahine nehenehe ei vahine. E au taua mau melahi miimii e te teoteo i te raau taero no te taata.—Genese 3:1-5; 6:1, 2; Iuda 6, 7.

I taua apitiraa tano ore, fanau ihora ta ratou tamarii tamaroa e mau aito teitei e te puai rahi. Ua ino roa ˈtu â te taata i taua feia haavî iino ra. Ite aˈera te Atua Poiete “e ino rahi to te taata o te ao nei, e ua ino anaˈe te mau manaˈo atoa, e te mau opuaraa atoa o te aau i te mau mahana atoa.” Faaoti atura Iehova e haamou i te taata iino i roto 120 matahiti.—Genese 6:3-5.

E ere iho â i te mea ohie no Noa ia haamau i te hoê utuafare i taua tau ra! Ua nehenehe râ ta ˈna. Ua itea ia ˈna te hoê vahine maitai. A 500 ai to Noa matahiti, fanau atura ta raua e toru tamaroa o Sema, Hama e Iapheta.a Ua paruru raua toopiti i tera mau tamaroa i te amuiraa iino e haaati ra. Mea au hoi na te tamaroa i te mau ohipa maere e te faahiahia a te mau “aito” e te “feia tuiroo.” I ara atoa na ïa Noa e ta ˈna vahine eiaha na tamaroa e toru e ite i te reira. I te hoê â taime, ua haapii raua ia ratou i te parau mau no nia ia Iehova, te Atua e riri i te ino. Ua tauturuhia ïa te mau tamaroa ia taa e ua peapea roa Iehova no te ino e orureraa hau.—Genese 6:6.

Mea papu e te taa ra te mau metua o teie tau i te tupuraa o Noa e ta ˈna vahine. Ua taero atoa teie ao i te ino e te orureraa hau. Te faatianianihia ra te mau tamarii ia au i te reira. Ei metua maitai, e rave outou i te nehenehe no te patoi i te reira ma te haapii atu o vai Iehova te Atua o te hau, te faaore roa i te ino. (Salamo 11:5; 37:10, 11) E manuïa anei outou? Ua nehenehe ia Noa e ta ˈna vahine. Ua riro ta raua na tamaroa ei taata maitai. Ua faaipoipo atoa i te vahine o tei farii i te tuu na mua roa i te Atua mau Iehova i roto i te oraraa.

“A TARAI NA OE I TE HOE ARAKA NO OE”

I roto noa i te area o te hoê mahana i taui roa ˈi to Noa oraraa. Ei tavini here na te Atua, ua faaite atu Iehova ia ˈna i ta ˈna opuaraa e haamou i te ao o taua tau ra. Ua faaue atura te Atua: “A tarai na oe i te hoe araka no oe, i te raau.”—Genese 6:14, Te Bibilia Moˈa V.C.J.S., 1976.

E ere te araka i te hoê pahi, mai ta te rahiraa e manaˈo ra. Aita hoi e muaraa aore ra e muriraa, aita atoa e taˈere e faatere. E au te araka i te hoê afata e nehenehe e vai i nia i te miti. Ua horoa Iehova ia Noa i te mau faito tia atoa e te hohoˈa a faaue atu ai e parai i roto e i rapaeau i te tapau. Ua faataa ˈtu oia: “Te faaaratai nei au i te mau pape diluvi i nia i te fenua . . . e pau ihora te mau meaˈtoa o te fenua nei.” Ua faaara ˈtu râ: “ E tomo oe i roto i te araka, o oe, e to mau tamarii, e to vahine, e na vahine o to mau tamarii.” (Genese 6:17, 18, Te Bibilia Moˈa V.C.J.S., 1976) Ia na reira-atoa-hia no te mau huru animara atoa. O tei roto anaˈe i te araka te ora mai i te diluvi!—Genese 6:19, 20.

E ohipa rahi ïa ta Noa. Oia mau, teie hoi te mau faito o te araka: 133 metera te roa, e 22 metera te aano e 13 metera te teitei. Mea rahi aˈe te reira i te pahi raau rahi roa ˈˈe o teie tau. Ua otohe anei Noa, ua amuamu aore ra ua taui anei i te mau faito no te faaohie i ta ˈna ohipa? Te na ô ra te Bibilia: “Ua na reira hoi Noa i te mau mea atoa ta te Atua i faaue mai ia ˈna ra, o ta ˈna ïa i rave maite.”—Genese 6:22.

Peneiaˈe e 40 e tae atu e 50 matahiti te maoro o taua ohipa ra. E rave rahi raau tei tâpûhia, amohia no te hamani i te mau pou tarava e te vai ra ˈtu â. E toru tahua e e rave rahi piha to te reira. I te hoê pae o te araka, te hoê ïa uputa. E au ra e, to nia roa te mau haamaramarama. I ropu ua hamanihia te hoê tafare. Eita ˈtura ïa te pape e tahe mai.—Genese 6:14-16.

A mairi ai te mau matahiti e a hamani-noa-hia ˈi te araka, ua oaoa mau Noa i te turu a to ˈna utuafare! Mea ohie aˈe râ tera ohipa i te tahi atu. Ia au i te Bibilia, e ‘taata poro i te parau-tia’ o Noa. (Petero 2, 2:5) Na ˈna iho ïa i faaoti e faaara ma te itoito i te haamouraa o te feia iino. Ua aha ïa ratou? Ma te haamanaˈo i tera tau, ua faataa Iesu e aita te taata i tâuˈa aˈe. Ua parau oia e ua riro roa te taata i te mau ohipa o te mau mahana atoa mai te amuraa, te inuraa e te faaipoiporaa. Aita ˈtura i haapao i te faaararaa a Noa. (Mataio 24:37-39) Mea papu e e rave rahi tei faaooo e tei patoi atu. Ua hinaaro atoa paha vetahi e taparahi ia ˈna.

Aita to Noa utuafare i taora i te tauera. A ora noa ˈi i roto i te hoê ao o te haafaufaa i to ratou iho oraraa, ua tamau ratou i te hamani i te araka a faaruru noa ˈi i te mau fifi. Noa ˈtu e te parau ra te taata e e mea maamaa ta ratou ohipa aore ra o ratou tei maamaahia, ua rave noâ ratou i te ohipa ta ratou i haamata. E haapii mai te mau utuafare Kerisetiano o teie tau i te faaroo o Noa e to to ˈna utuafare. Te ora nei tatou i “[te] anotau hopea” o teie ao. (Timoteo 2, 3:1) Ua faaite Iesu e e au to tatou tau i to Noa a hamani ai oia i te araka. Ia ore te taata e tâuˈa i te poroi o te Basileia o te Atua aore ra ia faaooo, ia hamani ino mai ratou, e haamanaˈo anaˈe ia Noa. E ere o tatou anaˈe tei faaruru i te reira.

“A TOMO NA OE I ROTO I TE ARAKA”

Ua fatata roa te araka i te oti. Ua piri roa Noa i te 600 matahiti. Ua faaruru oia i te oto a pohe ai to ˈna papa o Lameha.b E pae matahiti i muri aˈe, to ˈna papa ruau Metusela. Ia au i te Bibilia, o oia tei ora maoro roa aˈenei. E 969 ïa matahiti. (Genese 5:27) Ua ite ïa to ˈna na tupuna ia Adamu, te taata matamua.

I tera noâ matahiti, ua tae te poroi a Iehova i te patereareha Noa: “A tomo na oe i roto i te araka, o oe e to utuafare atoa.” (Genese 7:1, Te Bibilia Moˈa V.C.J.S., 1976) Ua parau atoa ˈtu te Atua ia ˈna ia rave i te mau huru animara atoa. E hitu no tei viivii ore, e tano no te tusia, e te toea e piti.—Genese 7:2, 3.

Eita roa e moehia tera taime. Ua hau atu i te hanere animara te itehia. Te vai ra te haere ra, te rere ra, te nee ra e te mea teiaha. Mea rau to ratou rahi e hohoˈa. Mea taehae atoa vetahi. Auê Noa i te aroha ia feruri tatou! Te taputô ra, te tamata ra i te faarata aore ra i te taparu i te animara oviri ia tomo i roto i te hoê vahi ǒaǒa o te araka. Te na ô ra te faatiaraa e “ua tataipiti anae ïa i te tomoraa i roto i te araka, e o Noa.” (Na matou e haapapu ra.)—Genese 7:9, Te Bibilia Moˈa V.C.J.S., 1976.

E parau paha vetahi: ‘Ua tupu mau anei te reira? E nehenehe anei tera mau animara atoa e ora amui i roto i te hoê vahi pirihao?’ I to oe manaˈo: Eita anei te Atua i poiete i te ao nui e nehenehe e faarata i te mau animara ta ˈna iho i hamani, tei taehae iho â râ? A haamanaˈo e o Iehova te Atua i vahi i te miti Uteute e i tapea i te mahana. Eita anei ta ˈna e nehenehe e faatupu i tei faatiahia i roto i te aamu o Noa? Oia e tera iho â ta ˈna i rave!

Parau mau, e nehenehe ta te Atua e faaora i te mau animara ma te tahi atu ravea. Ua maiti râ oia i teie faaoraraa ia haamanaˈo tatou e ua poiete oia i te taata ia vi te mau mea atoa i te fenua nei ia ˈna. (Genese 1:28) E rave rahi metua te haapii nei i to Noa aamu no te faataa e no Iehova mea faufaa te animara e te taata ta ˈna i poiete.

Ua parau Iehova ia Noa e hoê hebedoma te toe ra e tupu ai te diluvi. Te ru nei iho â ïa te utuafare. A manaˈo na i te taime no te faahaere i te mau animara atoa ia au i to ratou hohoˈa e no te faanaho i te maa. Ua feruri atoa paha ta Noa, ta Sema, ta Hama e ta Iapheta vahine i te mau mea atoa e hopoi ia nahonaho to ratou oraraa i roto i te araka.

Eaha te huru o te taata? Noa ˈtu e ua papu ta Iehova haamaitairaa ia Noa e i ta ˈna mau tutavaraa, aore roa ratou i haapao. Ua ite iho â te taata i te mau animara i te tomoraa i roto i te araka aita râ i tauturu atu. Aita tatou e maere ra i to ratou huru. Mai tera atoa hoi teie tau. Noa ˈtu te mau haapapuraa e te ora nei tatou i te mau mahana hopea o teie ao, aita te taata e tâuˈa ra. E mai ta te aposetolo Petero i tohu, e itehia te feia e tâhitohito i tei haapao i ta te Atua faaararaa. (Petero 2, 3:3-6) Ua na reira-atoa-hia o Noa e to ˈna utuafare.

I te pae hopea, eaha tei tupu? I to Noa, to ˈna utuafare e te mau animara tomoraa i roto i te araka “na Iehova i opani i te uputa [i muri] ia ˈna.” Ua haamamûhia iho â ïa te feia faaooo i ite i te reira. Aita anaˈe, na te ûa ïa. Ua topa ˈtura te pape, rahi roa maira i nia i te fenua nei mai ta Iehova i parau.—Genese 7:16-21.

Ua mauruuru anei te Atua i te pohe o te taata ino? Aita! (Ezekiela 33:11) Ua vaiiho atu râ oia i te taime no te taui i to ratou haerea a rave atu ai i te maitai. Ua na reira anei ratou? Ta to Noa oraraa ïa e faaite maira. Ma te auraro i te Atua i roto i te mau mea atoa, ua haapapu Noa e e nehenehe e ora mai. No reira e parauhia ˈi e ua faahapa mau to Noa faaroo i to te ao ino o to ˈna ra ui. No to ˈna faaroo i faaorahia ˈi oia e to ˈna utuafare. Ia faatupu oe i te faaroo mai to Noa, e ora ˈtu ïa oe e te feia ta oe e here ra. Mai ia Noa, e riro Iehova ei hoa piri roa no oe. E taairaa mure ore ïa te reira!