Te mahana haavaraa—Te hoê taime oaoa!

MAI te peu e te mǎtaˈu ra outou i te mahana haavaraa, no te aha ïa outou e ore ai e tuatapapa i ta te Bibilia e parau ra no nia i taua mahana ra? Ei hiˈoraa, e parau mau anei e, ia haava anaˈe te Atua i te feia hara, e taorahia ˈtu ratou i roto i te po auahi?

Ua tupu te haavaraa matamua a te Atua i tapaohia mai i te omuaraa ra iho o te aamu o te taata. E nehenehe hoi ta Adamu raua o Eva e ora e a muri noa ˈtu i roto i te paradaiso i nia i te fenua nei. (Genese 1:26-28; 2:7-9, 15-25) Tera râ, ua hara raua e ua roohia ˈtura raua i te haavaraa a te Atua. Eaha ïa te hopea? Ua faaere ihora te Atua ia raua i te ǒ o te ora. Oia hoi te auraa, ua pohe raua. Ua parau atura te Atua ia raua e: “E amu oe i ta oe maa ma te hou i nia i to rae, e hoˈi noa ˈtu oe i raro i te repo, no reira mai hoi oe; e repo hoi oe, e e hoˈi faahou atu â oe i te repo.”—Genese 3:16-19.

E haavaraa etaeta mau teie, e haavaraa parau-tia atoa râ. E aita roa ˈtu e faahitihia ra i ǒ nei i te parau no te po auahi. I te taime a pohe ai o Adamu raua o Eva, ua hoˈi atu raua i te repo. Ua faaea raua i te ora. Aita roa ˈtu te hoê vahi o te Bibilia e faataa ra e ua ora noâ te hoê tuhaa i roto ia Adamu aore ra i te tahi atu taata i muri aˈe i te pohe e ua haamauiuihia i te hoê vahi e a muri noa ˈtu. Tera râ, te taio nei tatou e: “Ua ite te feia e ora nei, e pohe ratou, aita râ a te feia i pohe ra e parau itea.”—Koheleta 9:5.

Ua ite anei outou e te faahiti ra te Bibilia i teie parau? Ua ite atoa anei outou e aita roa ˈtu te Bibilia e faaohipa ra i te parau ra “nephe pohe ore”? Te na ô nei râ oia e: “[Te nephe] o tei rave i te hara ra, o te pohe ïa.” (Ezekiela 18:4) Ua tuea maitai teie parau e te faaueraa a te Bibilia e na ô ra e: “E utua te pohe no te hara.” (Roma 6:23) E tano teie ture no tatou paatoa. E huaai anaˈe tatou paatoa no roto mai i te taata hara ra o Adamu, no reira, ua hara paatoa tatou e ua roohia tatou i te utua o te hara, oia hoi te pohe. Mai ta te Bibilia e parau ra: “No te taata hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12) Ua riro te Mahana Haavaraa ei tuhaa faufaa roa o te faanahoraa ta te Atua i rave no te faaora mai ia tatou i teie huru tupuraa.

Te niu o te Mahana Haavaraa

Ia au i te Bibilia, fatata e 2 000 matahiti i teie nei to te Atua haamauraa i te niu no te ohipa e tupu i te Mahana Haavaraa. Ua tupu ïa te reira i te taime a haere mai ai o Iesu i nia i te fenua nei e to ˈna pûpûraa mai i to ˈna ora taata tia roa no tatou nei. Na Iesu iho i faataa mai e: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”—Ioane 3:16.

Ia faaroo tatou ia Iesu, e faufaahia ïa tatou na roto i to ˈna tusia, i teie nei iho â i roto i te hoê auraa i te pae varua. E faaore te Atua i ta tatou mau hara e e faatia oia ia tatou ia haafatata ˈtu ia ˈna. (Ioane 14:6; Ioane 1, 2:1, 2) Teie râ, e feia tia ore noâ tatou, e feia hara, e na nia i teie tiaraa to tatou ra, te roo-noa-hia nei tatou i te maˈi e i te pae hopea, e pohe tatou. Aitâ i noaa ˈtura ia ratou i te ora mure ore ta Iesu i tǎpǔ mai. E tupu te reira i te hopea o te Mahana Haavaraa.

Te Mahana Haavaraa

Ua ite te aposetolo Ioane i te hoê orama no nia i te Mahana Haavaraa, e teie ta ˈna e faataa ra: “Ite atura hoi au i te hoê terono rahi teatea, e tei parahi i nia ihora, pee ê atura hoi te fenua e te raˈi i to ˈna mata, e aita ˈtura o raua e vairaa i itea. E ite atura hoi au i tei pohe ra, o te taata rii, e te feia rarahi, i te tiaraa i mua i te Atua ra; e heua ihora na buka ra: e heua ihora hoi te tahi buka, oia te buka ora ra: e haavahia ihora taua feia i pohe ra i te mau parau i papaihia i roto i taua na buka ra, i ta ratou ra mau ohipa.”—Apokalupo 20:11, 12.

Oia, ia au i te orama a Ioane, na te Atua iho e peretiteni mai i te Mahana Haavaraa. Teie râ, te vai atoa ra te tahi atu taata. Te faataa ra te aposetolo Paulo e: “Ua [haapao te Atua i] te mahana e haava mai ai oia i to te ao atoa nei ma te parau-tia, i te taata i haapaohia e ana ra.” (Ohipa 17:31) O vai taua taata ra? O Iesu ïa, o tei parau e: “Aore roa hoi a te Metua taata i haava, ua pûpû-hua-hia mai te haava i te Tamaiti.” (Ioane 5:22) No reira, o Iesu te Haava e faatoroahia e te Atua i te Mahana Haavaraa.

E parau oaoa teie no te mau taata. Te faaite maira te mau Evanelia ia Iesu mai te hoê taata aroha rahi. E ere o ˈna i te taata teoteo aore ra faahepo, area ra, ‘e taata mǎrû oia e te haehaa o te aau.’ (Mataio 11:29; 14:14; 20:34) Te oaoa nei tatou i te mea e tei roto tatou i te rima o te hoê haava mai teie te huru.

Afea te reira e tupu ai?

Afea râ te Mahana Haavaraa e tupu ai? Te na ô ra te buka Apokalupo e, i te taime ‘e ua pee ê ai te fenua e te raˈi.’ E faahaamanaˈo te reira ia tatou i teie mau parau a te aposetolo Petero: “Area te raˈi e te fenua e vai nei, te tapeahia nei ïa e taua parau ra no te auahi ia tae i te mahana haavaraa, i te poheraa o te feia paieti ore ra.” (Petero 2, 3:7) E riro anei te fenua mau i te tutuihia i te auahi? Eita, inaha mea maramarama maitai te Bibilia i nia i teie parau. Eita roa ˈtu te fenua mau e haamouhia. ‘E ore roa te fenua e aueue.’ (Salamo 104:5) Te faaite maira te mau irava no reira mai teie mau parau a Petero e, o teie faanahonahoraa paieti ore o te mau mea, o te haamouhia. O te feia paieti ore, eiaha râ te Fenua nei, o te haamouhia.—Ioane 12:31; 14:30; Ioane 1, 5:19.

E haamouhia teie feia paieti ore i te taime ta te Bibilia e parau ra te tamaˈi no Aramagedo—o te fatata roa i te tupu mai ta teie nei vea e faaite pinepine ra. (Apokalupo 16:14, 16) I muri iho, e taorahia o Satani iho i roto i te abuso e e tapeahia oia ia ore oia ia haafifi mai i te huitaata nei e hoê tausani matahiti te maoro, o te maororaa ïa o te Mahana Haavaraa. (Apokalupo 19:17–20:3) Eaha te ohipa e tupu no te feia faaroo ia haamouhia te feia paieti ore i Aramagedo? E ora ˈtu ïa ratou no te tomo atu i roto i te Mahana Haavaraa. Te taio nei tatou e: “Na te feia piˈo ore hoi e parahi i te fenua, e te feia parau-tia te haapapuhia i reira; e tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.”—Maseli 2:21, 22.

Ei haapapuraa i teie parau, te faahiti ra te Bibilia i te tahi “feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa” o te fa mai i nia i te fenua nei na mua ˈˈe ia Aramagedo. “O te feia i haere mai mai roto mai i te ati rahi ra”; oia hoi, e ora ˈtu ratou i te hopea o teie ao paieti ore mai ia Noa i ora mai i te hopea o te ao o to ˈna ra tau. (Apokalupo 7:9-17; Petero 2, 2:5) Ua ite anei outou e te vai ra teie feia rahi roa o te mau kerisetiano itoito no te mau nunaa atoa i teie nei mahana? Te tiaturi nei ratou e ora ˈtu i te ati rahi e e ora e a muri noa ˈtu i nia i te fenua nei. Ua riro ratou ei tapao haapapuraa e te fatata maira te Mahana Haavaraa.

O vai te haavahia?

E haavahia teie feia rahi roa i te Mahana Haavaraa. E ere râ o ratou anaˈe. Te na ô faahou ra te parau a Ioane e: “E ua tuu maira te miti i te feia i pohe i roto ia ˈna ra, e ua tuu maira te apoo e hade i te feia i pohe i roto ia raua ra, e haavahia ihora ratou atoa i ta ratou mau ohipa.” (Apokalupo 20:13) Teie â te tahi atu haapapuraa e eita te taata e mauiui e a muri noa ˈtu i roto i te po auahi. Ahiri e e tuu mai te po auahi [hade] i te feia i pohe i roto ia ˈna ra, nafea ïa te hoê taata e nehenehe ai e faaea i reira e a muri noa ˈtu? Inaha, te po auahi a te Bibilia, o te menema ïa o te mau taata atoa, i reira te feia pohe e vai ai ma te aramoina i te mau mea atoa, a tiai noa ˈtu ai i te tia-faahou-raa. I te Mahana Haavaraa, e tuu-paatoa-hia mai te feia pohe e vai ra i roto i te po auahi.—Koheleta 9:10.

O vai te faatiahia mai mai te pohe mai i te Mahana Haavaraa? Te na ô ra te aposetolo Paulo e: “E tia-faahou-raa to tei pohe, te feia parau-tia e te feia parau-tia ore.” (Ohipa 24:15) No reira, e faatiahia mai te mau tavini haapao maitai a te Atua, oia hoi “te feia parau-tia.” Teie râ, e faatia-atoa-hia mai te mau rahiraa taata ê atu, oia hoi “te feia parau-tia ore.” Oia mau, e faatiahia mai te feia atoa o tei pohe e vai noa ra i roto i te menema—taa ê atu i te feia o tei rave i te mau hara ino mau ta te Atua i haava ê na e eita roa ˈtu e tia ia ratou ia fanaˈo i te ora.—Mataio 12:31.

Te Haavaraa

Eaha ïa te roohia i te feia rahi roa e ora mai e te feia e faatiahia mai i te Mahana Haavaraa? Te na ô ra te Bibilia e: “E haavahia ihora taua feia i pohe ra i te mau parau i papaihia i roto i taua na buka ra, i ta ratou ra mau ohipa.” E taime hiˈopoaraa teie. E tapaohia te iˈoa o te feia atoa o te farii i te auraro i ‘te mau parau i papaihia i roto i te mau buka ra’—oia hoi te mau titauraa a te Atua no te huitaata i taua taime ra—i roto i “te buka ora.” (Apokalupo 20:12) Tei nia ïa ratou i te eˈa e noaa ˈtu ai te ora mure ore!

I reira ïa te pohe tusia o te Mesia e hopoi mai ai i te mau haamaitairaa i te pae tino! Te feia i tapaohia i roto i te buka ora i taua taime ra, eita ïa ratou e peretete haere faahou i roto i te hara e te pohe. Tera râ, e aratai-mǎrû-noa-hia ratou e tae roa ˈtu i te faito taata tia roa, maoti te ora mure ore e tâpûhia mai i te feia atoa e faaroo ia Iesu. Auê ïa tiaturiraa faahiahia mau e! Teie râ, e riro vetahi i te patoi i te auraro i ‘te mau parau i papaihia i roto i te mau buka.’ Eaha te roohia i nia ia ratou? Eita ïa te ora mure ore e noaa ia ratou. Area ra, te na ô ra te irava e: “E te taata atoa aore i itea to ˈna iˈoa i te papairaahia i roto i te buka ora ra, ua hurihia ïa i roto i te roto auahi ra.”—Apokalupo 20:15.

Tera anei te po auahi ta te amuiraa faaroo kerisetiano e faahiti ra? Aita, no te mea i roto i te irava na mua ˈtu, te taiohia ra e: “E hurihia ˈtura te apoo e hade i roto i te roto auahi. O te piti teie o te pohe.” (Apokalupo 20:14) Ahiri e e taorahia o hade [te po auahi] i roto i te roto auahi ra, e ere ïa teie roto i te po auahi. Hau atu, e ere te pohe i te tahi mea e nehenehe e fafahia, e inaha, e haruhia mai e e taorahia ˈtu i te hoê vahi. No reira, e hohoˈa taipe to te roto auahi. E taipe ïa no te aha? Te na ô ra te Bibilia e: “O te piti teie o te pohe.” Ia taorahia te pohe e o Hade i roto i te roto auahi, e “pohe” raua, oia hoi e mou roa raua. Oia atoa, te feia auraro ore o te tapae atu i reira, e pohe ïa ratou, aore ra e haamou-roa-hia ratou. Teie ïa te piti o te pohe, aita e tiaturiraa no te tia-faahou-raa.

Te Mahana Haavaraa—Te hoê taime oaoa

No reira, ia manaˈo tatou i te Mahana Haavaraa, eiaha ïa tatou e mǎtaˈu aore ra e riaria. E taime oaoa te Mahana Haavaraa, te hoê taime i reira e noaa faahou ai i te huitaata nei i te ora mure tei erehia ia Adamu ra. A faaroo na i te mau haamaitairaa ta te Mahana Haavaraa e hopoi mai no te feia atoa e haavahia ei feia haapao maitai: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.

I te hopea o te Mahana Haavaraa hoê tausani matahiti, e riro mai te feia haapao maitai no te mau fenua atoa ei feia tia roa. E “ora faahou” mai ratou i roto i te auraa mau, e e naeahia ïa te tapao o te Mahana Haavaraa. (Apokalupo 20:5) Te na ô ra te Bibilia e, i reira o Satani e tuuhia mai ai i mua i te huitaata nei no te taime hopea. (Apokalupo 20:3, 7-10) E fanaˈo te feia o te ore e hema ia ˈna i taua taime hopea ra, i te tupuraa taatoa o te parau tǎpǔ a te Bibilia e na ô ra: “E parahi te feia parau-tia i nia i te fenua, e parahi tamau â ratou i reira.”—Salamo 37:29.

Ua riro mau â te Mahana Haavaraa ei faanahoraa faahiahia roa! E mea faahiahia atoa i te mea e e nehenehe tatou e faaineine ia tatou i teie nei iho â, na roto i te tuatapaparaa i te Bibilia, te haapiiraa i te hinaaro o te Atua, e te faaohiparaa i teie hinaaro no ˈna ra i roto i to tatou oraraa! Eita iho â ïa e maerehia i te mea e ua faaite te papai salamo i to ˈna oaoa i te manaˈoraa i te haavaraa a te Atua, ia ˈna i papai e: “Ia rearea te mau raˈi ra, e ia oaoa te fenua; ia haruru te tai e to ˈna îraa atoa ra: ia ouˈauˈa te mau ô e to roto atoa ra; e ia himene hua mai te mau raau o te vahi ururaau ra, i te aro o Iehova, te haere maira hoi oia, te haere maira oia e haava i te fenua.”—Salamo 96:11-13.