E faaitoito anaˈe na tatou te tahi e te tahi a fatata noa ˈi te mahana
“E faaitoito râ; e ia rahi atu â te faaitoito, no te mea te hiˈo na outou i taua mahana ra i te fatataraa mai.” — HEBERA 10:25.
1, 2. Eaha te mahana e fatata ra, e eaha tei tia i te mau tavini a Iehova ia rave?
EITA te feia e parau ra i to tatou nei tau e: ‘A haere mai e inu e o matou i te pape ora’ e faataa ê ia ratou. A piri noa ˈi te mahana rahi o te upootiaraa o Iehova, te pee nei ratou i teie aˈoraa bibilia e: “E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra: eiaha hoi e faarue i to tatou haaputuputuraa, mai ta te tahi pae ra peu, e faaitoito râ; e ia rahi atu â te faaitoito, no te mea te hiˈo na outou i taua mahana ra i te fatataraa mai.” — Hebera 10:24, 25.
2 Te faahiti ra te mau parau tohu bibilia i te parau no taua “mahana” ra mai te ‘mahana o Iehova’. (Petero 2, 3:18.) I te mea o Iehova te Atua Teitei, te Atua Mana Hope, aita ˈtu mahana e nehenehe e faaore i To ˈna mahana (Ohipa 2:20). I taua mahana e fatata ra, mahana faufaa roa hoi o te ore e nehenehe e faaauhia, e fariihia ˈi te mana arii o te Atua i roto i te ao taatoa nei.
3. Te piri ra te mahana o Iehova no te mau kerisetiano o te senekele I i roto i teihea auraa, e eaha ˈtura ïa te huru no tatou i teie nei mahana?
3 I te senekele I o to tatou nei tau, ua parau te aposetolo Paulo i te mau kerisetiano e te fatata ra te mahana o Iehova. Te oaoa ra te mau pǐpǐ i te manaˈoraa e e tae mai taua mahana ra, teie râ, hau atu i te 19 senekele e faataa ê ra i to ratou tau e taua mahana ra (Tesalonia 2, 2:1-3). Noa ˈtu â te reira, ua tia ia Paulo ia faaitoito ia ratou no te mea eita e ore taua mahana ra i te tae mai; mai te peu e e tapea papu te mau kerisetiano i to ratou tiaturiraa, e tomo ïa ratou i roto i taua mahana haamaitaihia ra (Timoteo 2, 4:8). I te senekele I, ua ite-aˈena-hia taua mahana ra i te fatataraa mai; i teie nei mahana, e nehenehe tatou e parau e ua piri roa te mahana o Iehova. Ua riro mau â te mau parau tohu bibilia atoa o te ite ra i te hoê tupuraa faahiahia mau i to tatou nei tau, ei haapapuraa oaoa mau. Fatata roa, e faaraahia te iˈoa o to tatou Atua ra o Iehova e a muri noa ˈtu. — Luka 11:2.
Ia ite na tatou i te hoê faaitoitoraa i roto i te iˈoa o te Atua
4. I au i te Apokalupo 19:6, o vai tei tia ia haamau i ta ˈna faatereraa, e i roto i teihea parau e itehia ˈi to ˈna iˈoa?
4 E tia i te utuafare fetii taata atoa ia anaanatae i te iˈoa o te Atua. Mai teie te huru to te La Bible en français courant huriraa i te hoê irava o te Apokalupo: “A haamaitai i te Atua! No te mea ua haamau te Fatu, to tatou Atua mana hope, i ta ˈna faatereraa!” (Apokalupo 19:6). I roto i taua tatararaa no to tatou nei tau, te parauhia ra no te Fatu, te Atua mana hope. Mai te tahi atu â mau tatararaa no teie nei tau, aita oia e horoa ra i te iˈoa o te Atua o tei tia ia haamau i ta ˈna faatereraa. Teie nei râ, te vai ra te iˈoa o te Atua i roto i te faahitiraa “Haleluia!” (“E haamaitai ia Ia” aore ra “E haamaitai ia Iehova”) o te itehia i roto i te Bible Osty e i te Bible de Jérusalem i roto i te Apokalupo 19:6 (hiˈo atoa i te Traduction Œcuménique). I roto i te hoê tuhaa rahi o to tatou nei tau, ua tuu te mau tatararaa o te Bibilia i te iˈoa o te Atua i te hiti. Teie râ, mai ta tatou e ite i muri iho, ua faaitoito rahi taua iˈoa ra i te mau tavini a te Atua no te tau tahito e no to tatou nei tau atoa.
5, 6. a) No te aha mea hinaaro na Mose e ite i te iˈoa o te Atua ta ˈna i rave i te tiaraa? b) Eaha te huru o te mau ati Iseraela a parau ai o Mose ia ratou no nia i te iˈoa o te Atua?
5 Te haamanaˈo ra tatou e a tonohia ˈi o Mose e te Atua Teitei i te mau ati Iseraela, o tei tapea-tîtî-hia i Aiphiti, ua aniani ratou e na vai i tono ia ˈna. Ua ite maitai o Mose e e hinaaro taua nunaa ra i hamani-ino-hia e ite i te iˈoa o te Atua ta ˈna e rave ra i te tiaraa. No reira te taio nei tatou i roto i te Exodo 3:15 e: “Ua parau maira hoi te Atua ia Mose, E na ô atu oe i te tamarii a Iseraela, Na Iehova, te Atua no to outou hui metua, te Atua o Aberahama, te Atua o Isaaka, te Atua o Iakoba, na ˈna vau i tono mai ia outou nei, O to ˈu ïa iˈoa e a muri noa ˈtu, o to ˈu ïa faaite e tae noa ˈtu i te mau ui atoa ra.”
6 Mea papu maitai e ua faaitoito rahi taua mau parau ra i te mau ati Iseraela. Inaha, te haapapuhia ra to ratou faaoraraa e te Atua mau otahi roa, oia hoi o Iehova! Hau atu, mea papu maitai e ua oaoa roa ratou i te manaˈoraa e e nehenehe ta ratou e ite i te Atua ia faaite anaˈe o Iehova i te auraa o to ˈna iˈoa, ma te ore e faaea o ˈna anaˈe iho ma te teoteo. — Exodo 3:13; 4:29-31.
7. a) Nafea tatou e ite ai e ua ite te mau pǐpǐ a Iesu i te iˈoa o te Atua? b) Mea nafea te iˈoa o te Atua i tuuhia ˈi i te hiti?
7 Ua faaitoito-rahi-atoa-hia te mau pǐpǐ a te Fatu ra o Iesu Mesia e te iˈoa o te Atua, Iehova, e te mea ta ˈna e faahohoˈa ra (Ioane 17:6, 26). Eita roa ˈtu e nehenehe e parau e, i roto i te roaraa o ta ˈna taviniraa i nia i te fenua nei, ua tuu o Iesu i te iˈoa o te Atua i te hiti no te faateitei i to ˈna iˈoa. I muri aˈe i te haamataraa o te taivaraa i tohuhia, te faarueraa i te faaroo kerisetiano mau, i tuuhia ˈi te iˈoa o te Atua i te hiti e ua fatata roa oia i te moe i roto i te vaha o te mau kerisetiano (Ohipa 20:29, 30). I te taime i horoahia ˈi no te iˈoa o te Tamaiti i te hoê faufaa rahi aˈe i to te Metua, ua riro mai te haamoriraa ta te mau “kerisetiano” e pûpû ra i te Metua ei haamoriraa o te ore e pûpûhia i te hoê taata taa maitai, e aita roa ˈtu e auraa piri faahou, e aita te reira i riro ei faaitoitoraa.
8. Eaha te faahopearaa i roohia i nia i te mau tavini a te Atua e tae roa mai i teie nei mahana, i to ratou amoraa i te iˈoa ra Ite no Iehova?
8 Mea na roto ïa i te hoê oaoa rahi to te Feia haapii i te Bibilia o te ohipa amui ra e te Taiete Watch Tower, raveraa i te iˈoa ra Ite no Iehova, i te matahiti 1931. Aita noa taua faanahoraa ra i faaoaoa ia ratou, ua faaitoito rahi atoa râ ia ratou. No reira, i muri aˈe taua iˈoa i te toparaahia i nia ia ratou, ua nehenehe te feia haapii i te Bibilia e faaitoito te tahi e te tahi. — Hiˈo Isaia 43:12.
9. Eaha te ohipa ta te mau kerisetiano mau i manaˈo e mea maitai ia ravehia?
9 No reira, i teie nei mahana, ua ite te mau kerisetiano mau e mea maitai ia faaite e o vai mau te Atua e o ratou hoi to ˈna mau Ite ia au i te mau parau tohu. O ta Iesu Mesia ïa, to ratou Aratai, i rave a vai ai oia i nia i te fenua nei (Apokalupo 1:1, 2). Te faaite ra ratou e o O ˈna anaˈe o te amo ra i te iˈoa ra Iehova. — Salamo 83:18.
Î i te oaoa e i te varua moˈa
10-12. a) Eaha te mana o te puai ohipa o te Atua i nia i te mau pǐpǐ a Iesu? b) Eaha te huru o te mau tavini oaoa a Iehova, i nia i te tahi e te tahi?
10 Na mua ˈˈe i te faarue i ta ˈna mau aposetolo, ua parau aˈera o Iesu ia ratou e: “E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [v]arua [moˈa]; ma te haapii atu ia ratou i te haapao i te mau mea atoa ta ˈu i parau atu ia outou na: e inaha, tei pihai atoa iho ïa vau ia outou, e tae noa ˈtu i te hopea o teie nei ao.” — Mataio 28:19, 20.
11 A tapao na tatou e i muri aˈe i te roaaraa ia ratou te hoê haapiiraa, ua tia i te mau pǐpǐ ia bapetizohia i roto i te iˈoa o te varua moˈa. E ere taua varua ra i te hoê taata, o te puai ohipa râ o te Atua, ta ˈna e faaohipa ra na roto i te arai o Iesu. I te Penetekose, na roto i te Mesia, ua ninii o Iehova i taua puai ohipa ra i nia i te mau pǐpǐ a Iesu o tei pûpû aˈena ia ratou (Ohipa 2:33). Ua î atura ïa taua mau pǐpǐ ra i te varua moˈa, e o te oaoa ïa te hoê o ta ˈna mau faaiteraa, aore ra mau hotu (Galatia 5:22, 23; Ephesia 5:18-20). E mana faaitoito to te oaoa. E tia i te mau pǐpǐ a te Mesia ia î i te oaoa ta te varua moˈa e horoa ra. Ua pure hoi te aposetolo Paulo na roto i teie huru feruriraa: “Ia faaîhia mai outou i te oaoa e te hau i te faarooraa e te Atua, e noaa ˈi te tiaturiraa, ia rahi to outou tiaturi i te mana o te [v]arua [moˈa] ra.” — Roma 15:13.
12 Ma te î i taua varua ra o te horoa i te oaoa, te turai-mau-hia ra te mau Ite no Iehova, oia atoa te “feia rahi roa” ia faaitoito te tahi e te tahi i roto i te hoê ao e faaterehia ra e te riri. Te faaohipa nei ratou i te ‘faaitoitoraa te tahi e te tahi’ ta te aposetolo Paulo i faahiti. — Apokalupo 7:9, 10; Roma 1:12; 14:17.
Te mau pu faaitoitoraa e rave rahi
13. Eaha te mau pu faaitoitoraa e eaha te mau tumu e vai ra ia tatou no te faaitoito te tahi e te tahi?
13 No te mea e te ora ra ratou i roto i te hoê ao e o te taata patoi i te mau mea tia atoa te raatira, e te atua atoa, te faaitoito nei te mau kerisetiano te tahi e te tahi i roto i te amuiraa o te ao nei, o tei î i te varua moˈa o te Atua ra o Iehova (Hebera 10:24, 25; Ohipa 20:28). Te vai ra ta tatou e rave rahi mau pu faaitoitoraa. E î roa tatou i te mauruuru no te ite mau e vai ra ia tatou no nia ia Iehova, no nia i ta ˈna Tamaiti e no nia i te puai ohipa ta raua e faaohipa ra, oia hoi te varua moˈa. Auê hoi to tatou mauruuru rahi ia raua i to raua horoaraa mai i te hoê tiaturiraa faahiahia mau no tatou! Maoti taua mau haamaitairaa ra, e nehenehe tatou e haamori ia Iehova ma te mafatu oaoa. Ua parau te aposetolo Paulo i te mau kerisetiano ta ˈna i faatae atu i ta ˈna rata e, e tia ia ratou ia faaitoito te tahi e tahi e ia haapaari te tahi e te tahi i roto i to ratou faaroo moˈa roa. E e tia ia ratou ia na reira ‘ia ite anaˈe ratou, na roto i te hoê huru taipe, e te fatata maira te mahana’. Hau atu, ia haamou anaˈe te mau puai politita o te fenua nei i te mau haapaoraa e iˈoa kerisetiano noa to ratou, e oia atoa i te tahi atu mau haapaoraa hape, e tia i te mau kerisetiano mau ia faaitoito hau atu â te tahi e te tahi.
14. O vai tei tia ia faaitoito i te tahi pae, e nafea e nehenehe ai e na reira?
14 Parau mau roa e o te mau matahiapo te feia matamua o tei tia ia faaitoito i te nǎnǎ; teie nei râ, tei te mau kerisetiano atoa te hopoia ia faaitoito te tahi e te tahi, mai ta tatou e nehenehe e taio i roto i te Hebera 10:25. O te hoê faaueraa teie i faataehia ˈtu ia ratou. Mai te peu e tei roto outou i te amuiraa kerisetiano, te horoa ra anei outou i taua faaitoitoraa ra? Peneiaˈe e te aniani nei outou e eaha ta outou e nehenehe e rave no te reira. A tahi, aita anei to outou mau hoa kerisetiano atoa i faaitoitohia na roto noa i to outou taeraa ˈtu i te mau putuputuraa e na roto i te turu ta outou e horoa nei i te mau faanahoraa e ravehia ra, mai ia outou atoa paha i faaitoitohia i to outou iteraa ia ratou i te apiti mai ma te haapao maitai i taua mau putuputuraa ra? E nehenehe atoa to outou hiˈoraa i te pae o te faaoromai tamau e riro ei faaitoitoraa no ratou. Ma te tamau â i roto i ta outou ohipa kerisetiano noa ˈtu te mau fifi e te mau hepoheporaa o te oraraa, ma te ore e faarue, e nehenehe outou e riro ei hiˈoraa anaanatae mau no vetahi ê.
Ia aro anaˈe i te manaˈo haaparuparu no ǒ mai i te Diabolo ra
15. No te aha “e riri rahi” to te Diabolo, e ua faataehia taua riri ra i nia ia vai?
15 E ere o tatou anaˈe o te ite ra e ua fatata roa te mahana o Iehova. Ua ite atoa te Diabolo ra o Satani. Te parau ra te Apokalupo 12:12 e te ite ra te fenua i teie mahana i te ati, ‘no te mea tei raro na hoi te Diabolo ia tatou na, e riri rahi hoi to ˈna, no te mea ua ite oia e maa taime poto to ˈna e toe nei’. Mai ta te Apokalupo 12:17 e faaite ra, te faahaere ra o Satani i to ˈna riri rahi i nia i te feia e “haapao [ra] i te parau a te Atua ra, o tei mau maite i te parau a Iesu Mesia i faaite maira”. Aita e feaaraa: te hinaaro nei te Diabolo e haaparuparu ia tatou. Ua taa maitai ia ˈna nafea ia rave. Ua ite o ˈna i to tatou mau paruparu e to tatou mau fifi, e te faaohipa ra oia i te reira.
16. No te aha o Satani e faaohipa ˈi i te manaˈo haaparuparu?
16 No te aha te Diabolo e faaohipa ˈi i te manaˈo haaparuparu? No te mea e pinepine taua mauhaa ra i te manuïa. E nehenehe atoa te hoê taata o tei faaruru i te patoiraa aore ra i te hamani-ino-raa, e roohia i te manaˈo haaparuparu. Te hinaaro nei o Satani e faaino i te Atua ra o Iehova e e tamata i te faaite e e nehenehe oia e haafariu ê atu i Ta ˈna mau tavini Ia ˈna ra (Maseli 27:11; hiˈo Ioba 2:4, 5; Apokalupo 12:10). Mai te peu e e nehenehe ta ˈna e haaparuparu ia tatou, peneiaˈe e haere mǎrû outou i roto i ta outou taviniraa no te Atua; peneiaˈe atoa e faaea outou e e riro mai ai outou ei taata e ore e poro faahou i te parau apî maitai o te Basileia. — Korinetia 2, 2:10, 11; Ephesia 6:11; Petero 1, 5:8.
17. Mea nafea te mau faahopearaa iino o te manaˈo haaparuparu i te haapapuraahia i te tau o Mose?
17 Te haapapu maitai ra te mau ohipa i tupu i nia i te mau ati Iseraela, i Aiphiti i tahito ra, i te mau faahopearaa iino o te manaˈo haaparuparu. I muri aˈe i to ˈna aparauraa e o Mose, ua faateimaha atu â o Pharao i te hopoia a te nunaa e ua hamani ino rahi atu â ia ratou. Ua parau aˈera ïa te Atua ia Mose ia haere e farerei i te mau ati Iseraela no te horoa ia ratou i te haapapuraa e e faaora mau â O ˈna ia ratou, e faariro Oia ia ratou ei nunaa No ˈna, e horoa Oia na ratou i te ravea no te ora e e aratai Oia ia ratou i te Fenua i tǎpǔhia ra. Ua faahiti o Mose i taua mau parau ra i te mau tamarii o Iseraela. Teie nei râ, teie ta tatou e nehenehe e taio i roto i te Exodo 6:9: “No te taia râ o te aau, e te ati rahi i te ohipa, aore aˈera ratou i faaroo mai ia Mose.” I mua i taua huru feruriraa ra o te mau ati Iseraela, ua tia aˈera ia Iehova ia paraparau atu i ta ˈna tavini ma te haapapu e ma te faaitoito, no te mea aita o Mose i hinaaro faahou e haere e farerei ia Pharao, mai ta Iehova i faaue ia ˈna, no te mea e ua paruparu roa o ˈna. — Exodo 6:10-13.
18. No te aha e tia ˈi i te mau tavini a te Atua ia aro mau i te manaˈo haaparuparu e faatupuhia ra e te Diabolo?
18 Ua ite maitai te Diabolo ra o Satani i te mau faahopearaa iino ta te manaˈo haaparuparu e nehenehe e faatupu i nia i te mau tavini a te Atua. Te taio nei tatou i roto i te Maseli 24:10 e: “Ia paupau to aho i te mahana e ati ai ra, te iti hua ra to oe itoito.” Ua piri roa te mahana hopea ta tatou e ora nei; no reira e tia ia tatou ia riro ei taata itoito e te puai i te pae varua. E rave rahi ohipa te tia ia tatou ia rave no te aro i ta tatou mau hapa e mau hapa rii, o te nehenehe e faataupupu i to tatou haereraa i mua; teie nei râ, i te mea e ua ite tatou e te hinaaro ra o Satani e faaohipa i to tatou mau huru paruparu, te taa maitai ra ia tatou e te hinaaro ra tatou i te tauturu.
Ia tiaturi taatoa tatou i te tusia o te Mesia
19. Na te aha e nehenehe e tauturu ia tatou ia aro i te manaˈo haaparuparu, e no te aha?
19 I roto i taua tuhaa ra, ua riro mau â te hoo ta Iehova i horoa na roto ia Iesu Mesia, ei tauturu rahi no tatou. Mai te peu e e tiaturi taatoa tatou i roto i taua hoo ra, e nehenehe tatou e upootia mai i roto i te mau tamataraa. Mea atâata roa ia faaiti i te faufaaraa o taua faanahoraa ra; no te mea e a vai taata tia ore noa ˈi tatou, e hara iho â tatou. Teie nei râ, eiaha roa tatou e haaparuparu e e faarue, ma te manaˈo e aita e tiaturiraa faahou, no te mea e e topa ïa tatou i roto i te marei a Satani. Ua ite tatou e ua pûpûhia te hoê tusia taatoa no te hara. Oia mau, e nehenehe te hoo e faaore i te mau hara. Mai te peu e tei roto tatou i te “feia rahi roa”, e nehenehe tatou e horoi i to tatou mau ‘ahu roa’ e ia faateatea i roto i te toto o te Arenio; o te reira ïa te hoê parau tǎpǔ tei tia ia tatou ia tiaturi ma te taatoa. — Apokalupo 7:9, 14.
20. Nafea, ia au i te Apokalupo 12:11, e nehenehe ai ta tatou e upootia i nia i te Diabolo, o te imi nei i te haaparuparu ia tatou?
20 I roto i te Apokalupo 12:10, te piihia ra o Satani “te tihotiho i to tatou mau taeae i raro, o tei tihotiho ia ratou i mua i te aro o to tatou Atua i te rui e te ao”. Nafea tatou e nehenehe ai e aro i taua pari haavare aroha ore ra, taua tuputupuatea o te imi nei i te haaparuparu ia tatou? Te horoa nei te irava 11 o taua â pene i te hoê pahonoraa: “Pohe atura râ oia ia ratou i te toto o te Arenio, e i te parau ta ratou i faaite ra, aore hoi ratou i nounou i to ratou iho ora ua faaoromai râ e tae noa ˈtu i te pohe.” E tia i te mau tavini a Iehova ia tapea i te hoê tiaturiraa taatoa i roto i te toto o te Arenio, oia hoi i roto i ta ˈna tusia taraehara. Ia tamau â tatou i te huti mai i te hoê faaitoitoraa hohonu i roto i ta tatou ‘faaiteraa’, ma te poro tamau i te parau apî maitai o te Basileia o te Atua i te mau taata atoa.
21. Nafea tatou e nehenehe ai, ma te ore roa ˈtu e ite, e rave i te hinaaro o te Diabolo e e haaparuparu i to tatou mau taeae?
21 E nehenehe atoa e tupu mai, ma te ore tatou e ite, e e rave tatou i te hinaaro o te Diabolo e e haaparuparu tatou i to tatou mau taeae. Mea nafea ïa te reira? Ma te riro ei taata ohumu, aore ra faahepo aore ra ma te faataata parau-tia hua ia tatou iho (Koheleta 7:16). E mau huru iino e e mau huru paruparu to tatou paatoa. Eiaha na tatou e pee i te Diabolo: eiaha na tatou e faaohipa i te mau hapa rii o vetahi pae. Taa ê atu, ia faahiti anaˈe na tatou i te mau parau faaitoito no nia i to tatou mau hoa, e no nia atoa i te nunaa e te faanahonahoraa a Iehova. Te hinaaro nei tatou ia tamau â, eiaha i te haaparuparu ia tatou, i te faaitoito râ te tahi e te tahi.
Ia faaitoito rahi atu â tatou te tahi e te tahi a fatata noa ˈi te mahana
22, 23. a) No te aha e ore ai e tia ia tatou ia manaˈo e o te mau matahiapo anaˈe tei tia ia riro ei mau pu faaitoitoraa? b) Nafea tatou e nehenehe ai e faaitoito i te mau tiaau kerisetiano?
22 No te mea e te fatata maira te mahana, ia rave na tatou i te faaotiraa papu e ia riro noa tatou ei taata o te faaitoito i te tahi. E nehenehe tatou e faaitoito i to tatou mau hoa ma te riro ei hiˈoraa i te pae o te haapao maitai e ma te faahiti i te mau parau tamǎrû. Ia pee na tatou i te hiˈoraa o Iehova e te Fatu ra o Iesu Mesia. Eiaha na tatou e manaˈo e o te mau matahiapo anaˈe o te amuiraa o tei tia ia riro ei pu no te faaitoitoraa. I te parau mau, te hinaaro nei ratou atoa i te faaitoitoraa. Mai te toea o te nǎnǎ, te vai atoa ra to ratou mau paruparu, e e tia ia ratou ia faaruru i te hoê â mau fifi no te horoa i te mea e hinaarohia e to ratou utuafare i roto i te hoê ao e topa noa ˈtura. Hau atu, te ite ra te mau matahiapo i te mea ta Paulo e pii ra te hepohepo no nia i te mau amuiraa (Korinetia 2, 11:28, 29). No te teimaha o te hopoia ta ratou e amo ra, mea hinaaro mau â ratou i ta tatou mau faaitoitoraa.
23 E nehenehe tatou e faaitoito hau atu â i te feia o tei tia ia haapao i te amuiraa kerisetiano ma te rave amui i te ohipa e o ratou ma te hinaaro mau. E pee ïa tatou i te aˈoraa i papaihia i roto i te Hebera 13:17: “E faaroo i to outou mau aratai, e auraro atu outou; te faaitoito ra hoi ratou i to outou mau [nephe], e faaitehia hoi ta ratou parau; ia na reira râ ratou ma te oaoa, eiaha ma te oto: e ore hoi e faufaahia ta outou i te reira.”
24. I to tatou nei tau haaparuparuraa, eaha tei tia ia tatou ia rave, e no te aha?
24 Te ora nei tatou i te hoê tau haaparuparuraa. Mai ta Iesu i tohu, te tarapape ra te mafatu o te mau taata no te mǎtaˈu e te manaˈoraa i taua mau mea ra e fatata ra i te tupu i nia i te fenua nei (Luka 21:25, 26). Ua riro te mau fifi e rave rahi ta tatou e ite ra ei tumu no te hepohepo e no te haaparuparuraa; no reira ‘ia rahi atu â te faaitoito, no te mea te hiˈo na tatou i taua mahana ra i te fatataraa mai’. Ia pee na tatou i te aˈoraa maitai ta Paulo e horoa ra i roto i te Tesalonia 1, 5:11: “E tena na, e haamahanahana outou ia outou iho, e e faatupu i te maitai te tahi i te tahi, mai ta outou â hoi e rave na.”
Eaha ta outou e pahono atu?
◻ No te aha, hau atu â i teie nei i to mutaa ihora, e tia ˈi i te mau kerisetiano ia faaitoito te tahi e te tahi?
◻ Eaha te faaitoitoraa ta te mau tavini a Iehova e huti nei na roto i te iteraa i te iˈoa o te Atua?
◻ Nafea tatou e nehenehe ai e faaitoito te tahi e te tahi?
◻ No te aha e ore ai e tia ia tatou ia rave i te hinaaro o te Diabolo e e haaparuparu i to tatou mau taeae?
[Hohoˈa i te api 28]
Te horoa nei te mau matahiapo i te hiˈoraa ma te riro ei mau pu faaitoitoraa no te nǎnǎ.