“O tei faaroo ra, a parau atoa oia e, e haere mai”

“E te parau nei te [v]arua e te vahine faaipoipo apî, E haere mai. E o tei faaroo ra, a parau atoa oia e, E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” — APOKALUPO 22:17.

I roto i te roaraa o te matahiti i mua nei, i roto hau atu i te 200 fenua e mau motu, e ohipa te mau Ite no Iehova ia au i ta ratou irava no te matahiti 1991: “O TEI FAAROO RA, A PARAU ATOA OIA E, E HAERE MAI.”

1. Te titauhia ˈtu nei ia tatou ia haere mai e inu i teihea “pape”?

TE TITAUHIA ˈTU nei outou ia “haere mai”! Haere mai no te aha? No te haamâha i to outou poihâ. E ere te pape e horoahia ˈtu i te pape mai ta tatou i matau, o te pape râ ta Iesu i faahiti, a parau ai oia i te vahine no Samaria i pihai iho i te apoo pape ra e: “Area te inu i te pape e horoahia ˈtu e au nei, e ore roa ïa oia e poihâ faahou, e riro râ taua pape e horoahia ˈtu e au na ˈna ra, ei pape pihaa i roto ia ˈna iho, e tia i te pihaaraa e tae noa ˈtu i te ora mure ore ra.” (Ioane 4:14). No hea roa taua “pape” a Iesu ra?

2. Eaha te pu o te “pape”, e ua haamata te reira i te tahe mai i muri aˈe i teihea mau tupuraa?

² Ua ite o Ioane na roto i te hoê orama i te pu i reira taua “pape” ra e matara mai ai. Ma te faahiti i taua taime taa ê ra, te parau ra te aposetolo i roto i te Apokalupo 22:1 e: “Ua faaite maira te melahi ia ˈu i te hoê pape ora tahe ra, mai te kerehe ra te ateate, no roto mai i te terono o te Atua e to te Arenio ra.” Oia mau, te pu o taua pape maramarama maitai e e taoˈa ora to roto, no ǒ mai ïa i te Pu o te ora o Iehova iho, o te horoa mai na tatou i te ora na roto i te arai o te Arenio, o Iesu Mesia (Hiˈo Apokalupo 21:6). Te faaite ra te mau parau “te terono o te Atua e to te Arenio” e ua haamata paha te pape o te ora i te tahe i muri aˈe i te haamauraahia te Basileia mesia, i te matahiti 1914 ra, oia hoi i muri aˈe i te haamataraa o te mahana o te Fatu. — Apokalupo 1:10.

3, 4. Eaha ta te “pape” e faahohoˈa ra, e o vai tei nehenehe e inu?

³ Eaha ta taua pape ora e faahohoˈa ra? Te faahohoˈa ra te reira i te mau faanahoraa ta te Atua i rave ia nehenehe te mau taata e ora e a muri noa ˈtu na roto i te huru taata tia i nia i te hoê fenua tei faarirohia ei paradaiso. Te faahohoˈa ra te pape o te ora i te mau faanahoraa atoa i ravehia e te Atua no te ora, na roto i te arai o Iesu Mesia. E nehenehe anei e fanaˈo i teie mau faanahoraa atoa i teie mahana? Eita, no te mea e e tia i te Atua ia faaore na mua roa i te amuiraa o te ao iino e to ˈna faatere itea-ore-hia, o te Diabolo ra o Satani. Teie nei râ, e nehenehe ta tatou e inu i te “pape” e vai ra i to tatou nei tau, na roto i te faarooraa i te parau apî maitai o te Basilea e na roto i te auraroraa, oia hoi ma te faaauraa ˈtu i to tatou oraraa i te mau mea ta tatou e haapii ra. — Ioane 3:16; Roma 12:2.

⁴ No reira, i muri aˈe i to ˈna faaiteraa ia ˈna i te ‘anavai o te ora’, ua faataa aˈera o Iesu ia Ioane i te tumu o ˈna i tono ai i ta ˈna melahi e te orama. I muri iho, ua faaroo o Ioane i te faahitiraa e: “E te parau nei te [v]arua e te vahine faaipoipo apî, E haere mai. E o tei faaroo ra, a parau atoa oia e, E haere mai. E o tei poihâ ra, a haere mai. E tei hinaaro ra, a rave noa mai oia i te pape ora.” (Apokalupo 22:17). No reira te mau tavini a te Atua e titau ai i te feia e poihâ ra, ia haamata i te ‘inu’ i te mau faanahoraa a te Atua ia roaa ia ratou te ora mure ore i nia i te fenua nei, na roto i te arai o te Arenio o te Atua. — Ioane 1:29.

Te rahi nei te hinaaro i te mau pape o te ora

5. Mea nafea to te huitaata nei hinaaroraa i teie faanahonahoraa a te Atua?

⁵ Ma te peapea mau, aita to tatou mau metua matamua i faaea i nia i te eˈa o tei nehenehe e horoa na ta raua mau tamarii, te utuafare fetii taata taatoa, i te oraraa e a muri noa ˈtu i roto i te hoê paradaiso, na roto i te huru taata tia roa. Ia nehenehe te mau taata e ora e a muri noa ˈtu, e tia ia Adamu, te hoê poieteraa maramarama, ia tavini i to ˈna Atua ma te auraro; o te reira tei tia ia ˈna ia maiti. I raro aˈe i te aratairaa a te hoê poieteraa varua patoi, ua faahuru ê aˈera o Eva i te tereraa o te mau ohipa, i nia i te hoê eˈa o te aratai i te huitaata i te pohe. Ua maiti aˈera ta ˈna tane, o Adamu, te hoê taata tia, i te pee ia ˈna i roto i te haerea iino mau. I muri iho, ua horoa o Adamu i te ora no te mau ui taata no a muri aˈe; o o ˈna mau â te taata o tei faaô mai i te pohe i roto i te aamu o te utuafare taata. No reira tatou e taio ai i roto i te Bibilia e: “No te taata hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12). I muri aˈe to Adamu raua o Eva toparaa i roto i te hara, ua haamata ˈtura raua i te fanau mai i te mau melo apî i roto i te utuafare taata. — Salamo 51:5.

6. No te aha o Iehova i rave ai i te mau faanahonahoraa ia nehenehe te mau taata ia inu i te “pape”?

⁶ Na taua tupuraa ra anei e tapea e a muri noa ˈtu i te Atua ia faatupu i ta ˈna opuaraa, oia hoi ia riro mai te fenua ei paradaiso î i te mau taata tia? Te pahono maira te Bibilia e, eita! Teie nei râ, no te faatupu i ta ˈna opuaraa, ua rave te Atua i te hoê faanahoraa î i te aroha no te faatitiaifaro i te hape ino roa a Adamu. E e tuea taatoa taua faanahoraa i te parau-tia e te parau au, o te Atua hoi te hiˈoraa tia e otahi roa. Na roto i te arai o te ‘anavai o te pape ora’, e horoa mai Iehova i te oraraa taata tia i te huitaata auraro, e no to Adamu hoi hape i ore ai ratou i tapae i te Pu o te ora. E tahe taua pape ra ma te puai mau i roto i te roaraa o te Faatereraa hoê tausani matahiti a Iesu Mesia. I roto i te roaraa o taua tau ra, e tia i te mau taata e te feia e faatia-faahou-hia mai mai te pohe mai, ia inu i te ‘anavai o te pape ora’. — Hiˈo Ezekiela 47:1-10; Ohipa 24:15.

7. Ua niuhia te faanahonahoraa no nia i te “pape” i nia i te aha?

⁷ Te au nei o Iehova i te ora, e mea au na ˈna ia horoa i te hoê tuhaa o ta ˈna poieteraa, i te haamaitairaa ia fanaˈo i te oraraa maramarama. Te niu o te mau faanahoraa o tei ravehia e Iehova no te horoa i te ora, o te tusia taraehara ïa a Iesu Mesia (Mareko 10:45; Ioane 1, 4:9, 10). E tia ia amui-atoa-hia te Parau a te Atua ta te Bibilia e pii ra i te tahi taime te hoê “pape” (Ephesia 5:26). No reira te Atua ra o Iehova e nehenehe ai e parau e, “E haere mai”, i ta ˈna poieteraa taata, o tei erehia i te mau faanahoraa i ravehia i te omuaraa no te tane e te vahine matamua ra o Adamu e o Eva.

Te parau nei te vahine faaipoipo e, “E haere mai”

8. Afea râ e ia vai ra taua “pape” ra i te horoa-na-mua-raahia?

⁸ Te feia matamua o te parau nei e: “E haere mai”, o te feia ïa tei riro ei vahine faaipoipo taipe a te Arenio, te Tamaiti fanau tahi o te mau tamaiti i te pae varua a Iehova (Apokalupo 14:1, 3, 4; 21:9). Aita te vahine faaipoipo i te pae varua a te Mesia e parau nei e: “E haere mai” ia ˈna iho, oia hoi i te mau taata tei tia â i te Atua ra o Iehova ia haaputuputu, ia nehenehe te numera e 144 000 melo o te pǔpǔ a te vahine faaipoipo ia tia roa mai. No te mau taata o te tiaturi nei e tapae i te huru taata tia i nia i te fenua nei i muri aˈe ia Aramagedo teie mau parau titauraa (Apokalupo 16:14, 16). Mai te haamataraa o te hopea o te amuiraa o te mau mea nei, mai te matahiti 1914 mai â, i nehenehehia ˈi e faaroo i teie titauraa i haapararehia e “te vahine faaipoipo”, o te rave amui ra i te ohipa e te varua moˈa o te Atua.

9. Nafea tatou e ite ai e aita taua “pape” ra i faataahia no te hoê noa pǔpǔ iti taata?

⁹ I roto i te buka hopea o te Bibilia, te haapii nei tatou ma te oaoa e te pahono nei te “feia rahi roa, e ore roa e pau ia taio” i te faaiteraa o te parau apî maitai o te Basileia o te Atua, e te tia papu nei ratou i te pae o taua faatereraa arii ra (Apokalupo 7:9, 10, 16, 17). Tei roto atoa anei outou i teie feia rahi roa? Mai te peu e, e, “o tei faaroo ra, a parau atoa oia e, E haere mai”.

Te parau nei te varua e te vahine faaipoipo e, “E haere mai”

10. No hea mai te pape taipe ra, e no te aha tatou e nehenehe ai e parau i te reira?

¹⁰ Teie nei râ, no te aha aita i faahitihia i te parau no te Atua e no te tane faaipoipo taipe i roto i te Apokalupo 22:17? Na mua roa, a tapao na e noa ˈtu e aita teie irava e haapapu ra e te ohipa ra te varua i raro aˈe i teihea aratairaa, na roto noa i te faahitiraa i te varua, te huti nei ïa te reira i to tatou feruriraa i nia i te Atua ra o Iehova. I te mea e o o ˈna te Pu mau o te varua moˈa ra, e ere ïa te auraa e aita te Metua i roto i taua parau tohu ra. I muri iho, mai ta ˈna iho e parau ra, te ohipa amui ra te Tamaiti e to ˈna Metua: “Eita e tia ta te Tamaiti ia rave oia anaˈe ihora, maori râ o ta ˈna i ite i te Metua i te raveraa ra.” (Ioane 5:19). Hau atu â, noa ˈtu e no ǒ mai i te Atua ra o Iehova teie faahitiraa i faauruahia, “E haere mai”, e nehenehe e roaa i te mau taata i te aratairaa a te Atua, te tahi mau ‘faahitiraa i faauruahia’, na roto i te arai o Iesu Mesia, “te Logo”. (Apokalupo 22:6; hiˈo atoa 22:17, Tatararaa a te ao apî, neneiraa beretane 1984, nota: “te varua aore ra te faahitiraa i faauruahia”; Ioane 1:1). No reira, mea tano atura ïa e ia faatuati tatou i te Mesia, te tane faaipoipo apî, i taua titauraa ra. Oia mau, e nehenehe tatou e papu e te apiti nei te Atua ra o Iehova, te Metua tane o te Tane faaipoipo, e o Iesu Mesia, te Tane faaipoipo, i “te vahine faaipoipo” na roto i te arai o te varua moˈa ma te parau e, “E haere mai”.

11, 12. a) Eaha te mea i faaite oioi e e faataehia ˈtu te titauraa a te Apokalupo 22:17 i te tahi atu mau taata? b) Mea nafea te reira i te maramaramaraa mai i roto i te roaraa o te mau matahiti?

¹¹ I te roaraa o te mau matahiti, ua faahitihia taua titauraa ra i te feia e poihâ ra i te “pape ora”. Mai te matahiti 1918 ra, ua haamata te pǔpǔ o te vahine faaipoipo i te poro i te hoê poroi no te feia iho â râ i maitihia no te ora i nia i te fenua nei. Ua riro taua poroi ra i horoahia na roto i te hoê oreroraa parau huiraatira, teie hoi te upoo parau “E nehenehe te tahi tau mirioni taata e ora nei i teie mahana, e ore roa e pohe”, ei tumu no te tiaturiraa: e ora mai e rave rahi taata i Aramagedo e, i muri iho, e nehenehe ratou e ora e a muri noa ˈtu i roto i te Paradaiso i nia i te fenua nei, i raro aˈe i te faatereraa a te Basileia mesia a te Atua. Teie nei râ, aita taua poroi ra i faaite ma te papu i te mea te tia ia ratou ia rave no te ora ˈtu, maoti hoi te faaohiparaa i te parau-tia.

¹² Ia nehenehe e rave rahi atu â mau taata e faaroo i teie titauraa, i te matahiti 1922 ra, ua faataehia te faaueraa i muri nei i te feia atoa e hinaaro ra e tavini i te Atua: “A faaite i te Arii e to ˈna Basileia.” I te matahiti 1923 ra, ua taa i te pǔpǔ o te vahine faaipoipo e e fa mai te mau “mamoe” e te mau “puaaniho” ta te parabole a Iesu e faahiti ra i te parau i roto i te Mataio 25:31-46, na mua ˈˈe ia Aramagedo. I muri iho, i te matahiti 1929, ua nehenehe e taiohia i roto i te hoê tumu parau o Te Pare Tiairaa o te 15 no mati, neneiraa beretane, i raro aˈe i te upoo parau e “Titauraa aroha”. Ua niuhia taua tumu parau ra i nia i te irava o te Apokalupo 22:17 e te faaite ra e tei te pǔpǔ o te vahine faaipoipo te hopoia ia parau e: “E haere mai.” — Api 87-89a.

Te apiti nei te mau mamoe ê atu i te feia e parau nei e: “E haere mai”

13, 14. I te mau matahiti 1930, eaha te tahi atu mau haamaramaramaraa i horoahia no nia i te parau e e tia i te tahi atu mau taata ia inu i te pape taipe?

¹³ Hau atu, mai te matahiti 1932, ua faaite Te Pare Tiairaa e e hopoia atoa na te mau “mamoe ê atu” ia parau e: “E haere mai.” (Ioane 10:16). E nehenehe e taiohia i roto i te vea no te 1 no atete, neneiraa beretane, api 232, paratarapha 29 e: “Te vai ra to te mau Ite no Iehova i teie nei, te itoito o Iehu e e tia ia ratou ia faaitoito i te pǔpǔ a Iehonadaba [te mau mamoe ê atu] ia haere mai e o ratou no te faaite i te mau taata e ua fatata roa te Basileia o te Atua.” Ua faahitihia te irava o te Apokalupo 22:17, e ua parauhia e: “Ia faaitoito te feia i faatavaihia i te mau taata atoa e apiti atu i te pororaa o te parau apî maitai o te basileia. Aita e faufaa e ia riro ratou ei feia faatavaihia a te Fatu no te faaite i ta ˈna poroi. Mea tamahanahana mau na te mau Ite no Iehova ia ite mai teie atu nei e e nehenehe ta ratou e afai i te mau pape ora i te hoê pǔpǔ taata o te nehenehe e ora ˈtu i Aramagedo e e ora e a muri noa ˈtu i nia i te fenua nei, maoti te maitai rahi o Iehovab.”

¹⁴ Mai te matahiti 1934, ua faaite te toea i faatavaihia e e tia i teie mau mamoe ê atu, i teie nei, ia pûpû ia ratou iho no te Atua e ia faataipe i taua pûpûraa ra na roto i te bapetizoraa, e i muri iho ia tahoê i te pǔpǔ o te vahine faaipoipo no te parau e: “E haere mai” i te tahi atu mau taata e poihâ ra. Te tapao o taua titauraa maramarama maitai ra i faahitihia e te pǔpǔ o te vahine faaipoipo, no te haaputuputu ïa i te mau mamoe ê atu o te poihâ ra i roto i te “hoê aˈe nǎnǎ”, i raro aˈe i te aratairaa a te ‘hoê tiai’, o Iesu Mesia (Ioane 10:16). I te matahiti 1935, i te hoê tairururaa rahi, ua haapii aˈera te toea i faatavaihia ma te putapû mau e te pǔpǔ o te mau “mamoe” o ta ˈna e parau atu e: “E haere mai”, o te “feia rahi roa” ïa i faataahia i roto i te Apokalupo 7:9-17. Ua horoa te reira i te hoê puai faahiahia mau no te ohipa pororaa.

15. Eaha te ohipa a te ‘varua’ i roto i te titauraa i faahitihia i roto i te Apokalupo 22:17?

¹⁵ Ma te parau e: “E haere mai”, te rave amui ra te pǔpǔ o te vahine faaipoipo i te ohipa e te varua o te Atua. Oia mau, mea na roto i te ravea o to ˈna varua to Iehova faaiteraa i te auraa o te mau parau tohu i papaihia i roto i ta ˈna Parau, e ua turai te reira i te pǔpǔ o te vahine faaipoipo ia faahiti i teie titauraa. Hau atu, ua faauruahia te mau parau tohu i reira i niuhia ˈi te titauraa, e te varua o te Atua. No reira, o te varua mau â o te Atua mau, o te ohipa ra roto i te arai o te Mesia e o ta ˈna vahine faaipoipo, o tei parau e: “E haere mai” i te feia rahi roa o te mau mamoe. — Apokalupo 19:10.

16. No nia i te titauraa i faahitihia i roto i te Apokalupo 22:17, eaha te taairaa e vai ra i rotopu i te varua e te vahine faaipoipo?

¹⁶ I teie nei â mahana, ‘te tamau noa nei’ te varua e te vahine faaipoipo, faahohoˈahia e te toea, ‘i te parau e: “E haere mai.”’ Te faaitoito nei te toea i te mau mamoe ê atu ia parau e: “E haere mai” i te tahi atu mau taata; no te mea eita e tia i te mau mamoe ia tapea na ratou anaˈe i te “pape ora” e roaa mai i teie nei mahana. E tia ia ratou ia auraro i te faaueraa a ‘te varua e a te vahine faaipoipo’, oia hoi: “o tei faaroo ra, a parau atoa oia e, E haere mai.” E tia i te feia e haamâha nei i to ratou poihâ, ia faatae i te titauraa i te mau taata atoa e i te mau vahi atoa, ma te ore e hiˈo i te iri, te nunaa, te reo aore ra te haapaoraa o te feia ta ratou e farerei ra. Ma te tamoni ore, te titau nei te mau Ite no Iehova e te tauturu nei ratou i te mau nunaa paatoa ia inu i te “pape ora” e vai ra i to tatou nei tau.

17. Eaha te mau “pape” ta tatou e nehenehe e rave i teie mahana?

¹⁷ No reira i roto i te ao taatoa nei, te aratai nei te Arenio, o Iesu Mesia, i te feia rahi roa “i te mau pape ora pihaa ra”. (Apokalupo 7:17.) E ere hoi i te pape viivii, te ravehia nei teie pape ateate, haumǎrû e o te haamaitai, i roto roa i to ˈna ra Pu. Rahi atu â i te taa-maitai-raa i te mau parau mau bibilia, e faahohoˈa taua mau pape ra i te taatoaraa o te mau faanahonahoraa i ravehia e te Atua na roto i te arai o Iesu Mesia o te tuu ra, mai teie atu nei, i te feia rahi roa, i nia i te eˈa o te ora mure ore i roto i te huru taata tia e te oaoa.

O te taime ïa no te apiti atu i te feia e parau ra e: “E haere mai”

18. I roto i teihea faito taua titauraa ra i parare ai i to tatou nei tau?

¹⁸ I teie nei â, e taiohia ra e rave rahi mirioni mau melo i roto i taua feia rahi roa ra teie e tamau noa nei i te poro ma te itoito i te parau apî maitai o te Basileia i nia i te fenua atoa nei. Ma te tamau, te horoa nei teie mau taata i te hoê tabula o te ohipa taviniraa ta ratou e faatupu ra i roto e 212 fenua e mau motu. A faaite noa ˈi te Atua ra o Iehova, te Fatu o te tau, i te faaoromai e te aroha i roto i te roaraa o teie hopea o te amuiraa o te mau mea nei, e tamau noa ratou i te poro i te parau apî maitai o te Basileia. I te taime i faataahia, e ite te Atua e ua tae te taime no ˈna no te faatupu i ta ˈna parau tǎpǔ, tei faahitihia e rave rahi taime i roto i te mau parau tohu bibilia: e faaite o ˈna i te mau taata atoa e o o ˈna o Iehova. — Ezekiela 36:23; 38:21-23; 39:7.

19. No te aha e nehenehe ai e parau e te operehia nei teie “pape” ma te tamoni ore?

¹⁹ No reira, i te mea e te vai ra â te taime, te tahoê nei te mau melo o te feia rahi roa i te toea o te vahine faaipoipo, ma te oaoa, no te parau e: ‘A haere mai na muri ia matou e inu i te mau pape ora, ma te tamoni ore!’ Te faatupu ra te feia e poro nei i teie parau apî o te faaora, i ta ratou taviniraa, ma te tamoni ore: aita ratou e titau nei i te moni no te ohipa ta ratou e rave ra ma te haaparare i te poroi o te Basileia i roto i te ao taatoa nei.

20. Eaha ïa te faahopearaa i te mea e te itehia nei teie “pape” i te mau vahi atoa?

²⁰ I teie mahana, te itehia nei te mau pape o te ora i nia i te fenua atoa nei, no reira e nehenehe te mau taata atoa e hinaaro ra, e inu i taua mau pape ra e ia mâha roa ratou, e e roaa ˈtu ai te ora. Oia mau, e fanaˈo te huitaata i hoohia i te ora mure ore i nia i te fenua nei o te faarirohia ei paradaiso, e e faatupu te reira i te opuaraa faahiahia mau a Iehova. Aita to tatou Atua i poiete i te fenua ma te faufaa ore, ia riro râ oia ei aua rahi, te hoê Edene aore ra Paradaiso o te oaoa, faaeahia e te mau taata tia, tei poietehia ia au i to ˈna hohoˈa e to ˈna huru.

21. Nafea te opuaraa a te Atua no te fenua nei e tupu mai ai?

²¹ Auê ïa haamaitairaa rahi e auê ïa oaoa o te ore e nehenehe e faaauhia, ia ora ˈtu i roto i taua ao apî ra! I reira te faaueraa ta te Atua i horoa i na taata matamua e tupu ai ma te rahi (Genese 1:27, 28). I mua i te ati tei tairi i te utuafare fetii taata, e faatia te ohipa faahiahia mau a Iehova e ia vî te fenua, oia hoi ia riro ei paradaiso e ia î i te taata tia. E hiˈo ïa te Atua i te mau mea atoa ta ˈna i rave e, inaha, e riro mau â i te mea maitai roa. I reira atoa anei outou i taua tau ra? Mai te peu e o te reira to outou hinaaro, e tia ia outou ia faaite mai teie atu nei i to outou anaanatae no te parau apî maitai ma te rave i te pape ora ma te tamoni ore. Te parauhia ˈtu nei ia outou e “E haere mai”, ia inu e ia mâha roa, no te haamâha i to outou poihâ, i taua pape ora o tei haamata i te tahe e o te tamau â i te tahe hau atu â i roto i te roaraa o te Mileniuma. O tei faaroo i teie titauraa mǎrû mau, a parau atoa e: “E haere mai.”

[Nota i raro i te api]

Eaha ta outou e pahono atu?

◻ Eaha taua “pape” ra i faahitihia i roto i te Apokalupo 22:17?

◻ Eaha te pu o te “pape”?

◻ No te aha te mau taata e hinaaro ai i te “pape”, e afea râ taua pape ra i te haamataraa i te tahe?

◻ I roto i te Apokalupo 22:17, te haapapu ra te parau o te ‘varua’ i te aha, e eaha te tiaraa ta te “vahine faaipoipo” e hauti ra?

◻ O vai te nehenehe e inu i te “pape”, e eaha ta ˈna mau faahopearaa?