Mai te oroa Séder e tae atu i te ora

“E rave au i te aˈua ora e hopoi i nia, a tiaoro ai i te iˈoa o Iehova.” — SALAMO 116:13.

1. Eaha te himene tahito roa tei tuati i te mea e tupu i mua ia tatou?

E AU anei outou i te hoê himene e paraparau ra no nia i te hoê oraraa no a muri aˈe o te vai maoro mai e mea oaoa roa? O ta te hoê himene tahito roa ïa e mea ite-maitai-hia e faaite ra, e o outou tei tano aˈe i rotopu e rave rahi taata, no te taa ˈtu e no te au atu i te reira. Te pii nei te mau ati Iuda i te reira Hallel (Arueraa). Te faaitoito nei taua himene hohonu ra, oia hoi te mau Salamo 113 e tae atu i te 118, ia himene tatou “Halelu Ia”, oia hoi te auraa “A arue ia Iehova!”.

2. Mea nafea taua himene ra ia faaohipahia, e eaha to ˈna tuatiraa e te Séder?

² E himene te mau ati Iuda i te Hallel ia faatupu anaˈe ratou i te oroa o te Pasa. Mai te huru ra ïa e, no te tau i vai ai te hoê hiero a te Atua i reira e pûpûhia ˈtu ai na ˈna i te tahi mau tusia animala, taua himene ra. I to tatou nei tau, e himenehia te reira i roto i te mau utuafare ati iuda ia tupu anaˈe te Séder, oia hoi te ohipa e ravehia e te amuraa o te Pasa. Teie nei râ, i rotopu i te feia e himene nei i te reira i taua taime ra, mea iti roa ïa o te taa ra i te auraa o taua mau parau a te Salamo 116:13: “E rave au i te aˈua ora e hopoi i nia, a tiaoro ai i te iˈoa o Iehova.” Ua tuea te ora i te oroa Pasa i roto i teihea auraa? Ua tuea atoa anei to outou ora i te reira?

Te Pasa: te hoê oroa no te ora

3. No hea mai te Séder?

³ Ia haamanaˈo na tatou e ua vai tîtî te mau ati Iseraela i Aiphiti i raro aˈe i te faatereraa haavî a te hoê Pharao. I te pae hopea, ua maiti o Iehova ia Mose no te aratai i To ˈna nunaa i te tiamâraa. I muri aˈe to te Atua faatupuraa e iva ati i nia ia Aiphiti, ua faahiti o Mose i te ahururaa o te ati: e tairi o Iehova i te tamarii matamua o te mau utuafare atoa no Aiphiti (Exode 11:1-10). Area te mau ati Iseraela, e nehenehe ratou e faaorahia. Na roto i teihea ravea? E tia ia ratou ia tâpû i te arapoa o te hoê arenio, ia tuu atu i to ˈna toto i nia i te mau pou uputa e te teˈa i nia ˈˈe o to ratou mau fare e ia faaea i ǒ ratou no te amuraa i te hoê arenio, te pane faahopue-ore-hia e te raau rii maramara. I roto i te roaraa o taua Séder ra, e ‘na nia noa’ te Atua i to ratou mau fare ma te ore e haapohe i ta ratou mau tamarii matamua. — Exodo 12:1-13.

4, 5. Mea nafea to te Pasa aratairaa e rave rahi mau taata i te ora (Salamo 106:7-10)?

⁴ I muri aˈe i te ahururaa o te ati, ua parau o Pharao ia Mose e: “A tia, a haere ê, orua e te tamarii atoa a Iseraela, e faarue mai i to ˈu ra taata; e haere e haamori ia Iehova.” (Exodo 12:29-32). I muri aˈe i te revaraa o te mau ati Hebera e “te taata ěê atoa e rave rahi” i amui atoa, ua taui aˈera te manaˈo o Pharao e ua tapapa ˈtura ia ratou. Ua faaora semeio ihora te Atua i ta ˈna mau tavini ma te faahaere ia ratou ma te peapea ore na roto i te miti Uteute, i reira to Pharao e to ˈna nuu o tei tapapa ia ratou i haapohehia ˈi i roto i te moana. — Exodo 12:38; 14:5-28; Salamo 78:51-53; 136:13-15.

⁵ I te hiti o te miti Uteute, ua parau aˈera Mose i te mau ati Iseraela e: “Eiaha outou e mǎtaˈu; e parahi noa, e hiˈo i te ora a Iehova, i ta ˈna e rave no outou i teie nei mahana.” I muri iho, ua himene aˈera te nunaa i teie pehe: “O Iehova to ˈu puai, e ta ˈu arueraa, e ua riro oia ei ora no ˈu. Oia to ˈu Atua, e oia ta ˈu e imi i te parahiraa.” (Exodo 14:13; 15:2). Oia mau, ua riro te ora i itehia e Iseraela, ma te ape i te ahururaa o te ati e ma te haere tia ˈtu na roto i te miti Uteute ma te peapea ore, ei faaoraraa. Ua tano iho â ïa ta te papai salamo i parau no nia ia Iehova mai te hoê Atua “o tei faatupu i te ora i te fenua nei”. — Salamo 68:6, 20; 74:12-14; 78:12, 13, 22.

6, 7. No te aha te Pasa i haamauhia ˈi, e no te aha râ aita te reira i faatupuhia mai te omuaraa ra?

⁶ Ua tia ˈtura i te mau ati Hebera ia faatura i te Pasa no te haamanaˈo i taua faaoraraa ra. Ua parau te Atua ia ratou e: “E e riro taua mahana nei ei manaˈoraa no outou; e e haapao outou i te reira ei mahana oroa na Iehova; e hope roa ˈˈe to outou mau ui atoa ra.” (Exodo 12:14). I te amuraa pasa atoa, aore ra Séder, e tia i te metua tane ia faahaamanaˈo i taua faaoraraa ra i ta ˈna utafare, ia au i teie faaueraa a Iehova e: “E ia ui mai ta outou mau tamarii ia outou e, Eaha te auraa i teie nei oroa? ei reira outou e parau atu ai e, E tusia pasa teie na Iehova, o tei haere noa na nia iho i te mau fare o te tamarii a Iseraela i Aiphiti ra, a tairi ai oia i to Aiphiti, faaora ihora oia i to tatou mau fare i reira.” — Exodo 12:25-27.

⁷ Te haapapu nei te haapao-noa-raa o te mau ati iuda i te Séder e e aamu mau te reira. Teie nei râ, eita vetahi o ta ratou mau peu e tuea faahou nei i te mau faaueraa a te Atua. Teie te nehenehe e taiohia no nia i taua tumu parau ra i roto i te buka ra No hea mai te Séder (beretane): “Tei roto i te Bibilia te tahi mau faataaraa papu no nia i te Pasa e te oroa o te mau azymes; teie nei râ, aita taua mau faataaraa ra e tuea ra i te huru tupuraa o taua oroa ra i muri iho. E tapao taa ê tatou e te haafaufaa rahi nei te oroa i roto i te Bibilia i te tusia o te pasa, o te ore hoi e rave faahou nei te hoê tuhaa faufaa i roto i te mau buka i papaihia i muri aˈe i te Bibilia.” Te hoê tumu rahi o taua tereraa ohipa ra, no te mea ïa aita faahou ta te mau ati Iuda te hoê hiero no te pûpû atu i te mau tusia animala.

8. Eaha te tumu tatou e anaanatae taa ê ai i te Pasa?

⁸ Mea faufaa roa na te mau kerisetiano ia haapii i te mau oroa atoa ta te Atua i faaue ia Iseraela i tahito ra ia faatupua, i teie nei râ, e hiˈopoa ïa tatou i te tahi mau tuhaa o te Pasa te tia ia haapao-taa-ê-hia. Ua haapao o Iesu, e ati Iuda hoi oia, i te oroa Pasa. I te taime hopea oia i faatupu ai i te reira, ua haamau oia i te oroa otahi roa i te pae faaroo a te mau kerisetiano: te Amuraa a te Fatu, te haamanaˈoraa i to ˈna pohe. Ua tuea ˈtura ïa taua oroa kerisetiano ra i te Pasa.

Hau atu i te hoê arenio no te oroa pasa

9, 10. No te aha e mea taa ê te tusia o te arenio pasa, aore ra e tusia otahi?

⁹ I roto i te Hebera 10:1, te taio ra tatou e ‘e ata anaˈe te ture no te mau mea maitatai no a muri atu’. Te parau nei te hoê buka faahororaa (Cyclopædia of Biblical, Theological, and Ecclesiastical Literature, a McClintock e Strong) no nia i taua tumu parau ra e: “Aita hoê aˈe ata ê atu o te mau mea maitatai no a muri aˈe e itehia i roto i te Ture e nehenehe e faaauhia i te oroa o te Pasa.” E auraa rahi aˈe to te arenio no te pasa, i te oroa e faahaamanaˈo ra i to te Atua faaoraraa i te mau tamarii matamua, e te mau ati Hebera atoa, e i to ˈna faahaereraa mai ia ratou i rapae mai ia Aiphiti.

¹⁰ E animala otahi roa taua arenio ra i roto e rave rahi mau tuhaa. Ei hiˈoraa, e pûpûhia na e rave rahi mau tusia animala faauehia e te Ture a Mose e te hoê taata iho, no to ˈna haparaa aore ra no ta ˈna mau hara, e e tutuihia ïa te tahi tuhaa o te mau animala i nia i te fata (Levitiko 4:22-35). E horoahia te hoê tuhaa o te iˈo o te tusia no te maitai na te tahuˈa e ohipa ra aore ra na te tahi atu mau tahuˈa (Levitiko 7:11-38). Teie râ, eita te arenio pasa e tuuhia i nia i te fata, e e pûpûhia oia e e amuhia oia e te hoê pǔpǔ taata, te rahiraa o te taime e te hoê utuafare. — Exodo 12:4, 8-11.

11. Eaha te faufaa ta Iehova e horoa ra no te arenio pasa, e te faahohoˈa ra te reira i te aha (Numera 9:13)?

¹¹ No te mea e mea faufaa roa te arenio na Iehova, ua pii oia i te reira e “ta ˈu (...) tusia”. (Exodo 23:18; 34:25.) Ua haapapu te feia e tuatapapa ra i te Bibilia e “ua riro te tusia pasa ei tusia na Iehova i roto i to ˈna auraa teitei roa”. Ua faaite aore ra ua faahohoˈa papu taua arenio ra i te tusia a Iesu. Oia mau, ua pii aˈera te aposetolo Paulo ia Iesu “ta tatou pasa, i taparahihia ïa na tatou”. (Korinetia 1, 5:7.) Ua parauhia e o Iesu “te Arenio a te Atua” e “te Arenio taparahihia ra”. — Ioane 1:29; Apokalupo 5:12; Ohipa 8:32.

Te hoê toto o te faaora

12. Eaha te faufaaraa o te toto o te arenio i te Pasa matamua?

¹² I Aiphiti, ua riro te toto o te Arenio ei faufaa no te ora. A haapohe ai o Iehova i te mau tamarii matamua, ua haere oia na nia i te mau fare o tei tuuhia te toto i nia i te pou uputa. Hau atu, i te mea e aita ratou i taˈi no te pohe o ta ratou mau tamarii matamua, ua nehenehe atura ïa te mau ati Hebera e haere tia ˈtu na roto i te miti Uteute i te tiamâraa.

13, 14. Mea faufaa te toto o Iesu no te ora i roto i teihea auraa (Ephesia 1:13)?

¹³ I to tatou atoa mau mahana, te toto — to Iesu, ta ˈna i haamanii — ua tuati ïa i te ora. I te matahiti 32, a “fatata [ˈi] te pasa, e oroa na te ati Iuda ra”, ua parau atura Iesu i te hoê tiaa rahi taata e: “O te amu i to ˈu tino e te inu i to ˈu toto, e ora mure ore to ˈna, e na ˈu oia e faatia faahou ia tae i te mahana hopea ra. E maa mau to ˈu tino e e inu mau to ˈu toto.” (Ioane 6:4, 54, 55). Ua manaˈo paha te mau ati iuda atoa e faaroo ra ia ˈna i te Pasa e fatata ra i te tupu e i te faaohiparaa o te toto o te arenio o tei faatupuhia i Aiphiti.

¹⁴ Aita o Iesu e parau ra i ǒ nei no nia i te mau taipe e faaohipahia i te Amuraa a te Fatu. Ua haamauhia taua oroa apî ra no te mau kerisetiano hoê noa matahiti i muri iho. No reira, te mau aposetolo atoa tei faaroo ia Iesu i te faahitiraa i taua mau parau ra i te matahiti 32, aita ïa ratou i ite i te auraa. Tera râ, te faaite nei râ o Iesu e mea faufaa roa to ˈna toto no te ora mure ore. Te faataa ra o Paulo e: “No ˈna i noaa ˈi te ora ia tatou i to ˈna ra toto, i te hara i faaorehia nei no te rahi o to ˈna ra aroha mau.” (Ephesia 1:7). Maoti noâ te faaoreraa hapa e horoahia na roto i te toto o Iesu tatou e nehenehe ai e ora e a muri noa ˈtu.

Eaha ïa ora, e ihea roa?

15. Eaha te ora e eaha te mau haamaitairaa tei pûpûhia i te mau ati Hebera i Aiphiti, eaha râ te tiaturiraa tei ore i horoahia na ratou (Korinetia 1, 10:1-5)?

¹⁵ I Aiphiti tahito ra, ua horoa-noa-hia te hoê ora taotiahia i te feia i haere mai i rapae mai i taua fenua ra. Aita hoê aˈe o ratou i tiaturi i te hoê oraraa aita e hopea i muri aˈe i te revaraa. Oia mau, ua haamau te Atua i te mau ati Levi ei mau tahuˈa no te nunaa, e ua riro mai te tahi mau melo o te opu o Iuda ei mau arii no te hoê noa tau, ua roohia râ te taatoaraa o taua mau taata ra i te pohe (Ohipa 2:29; Hebera 7:11, 23, 27). Oia mau, aita i roaa i “te taata ěê atoa e rave rahi” tei faarue atoa ia Aiphiti i taua mau haamaitairaa ra; teie nei râ, i pihai iho i te mau ati Hebera, e nehenehe ratou e tiaturi e tapae atu i te Fenua i tǎpǔhia e e ora i te hoê oraraa maitai ma te haamori i te Atua. I te tahi aˈe pae, te vai ra to te mau tavini o Iehova o tei ora na mua ˈˈe i te tau kerisetiano te tahi mau tumu no te tiaturi e, i te taime mau, e roaa ia ratou te ora aita e hopea i nia i te fenua nei, i reira te Atua i opua ˈi e ora te huitaata, e e tuati te reira i te parau tǎpǔ ta Iesu i faahiti i roto i te Ioane 6:54.

16. Eaha te huru ora ta te mau tavini o te Atua no te tau tahito i nehenehe e tiaturi?

¹⁶ Ua faapapai te Atua i te tahi o ta ˈna mau tavini no te tau tahito e ua poietehia te fenua e ia taatahia e ia ora te feia parau-tia i nia iho e a muri atu (Salamo 37:9-11; Maseli 2:21, 22; Isaia 45:18). Nafea râ ïa e roaa ˈi i taua feia haamori mau ra taua ora ra mai te peu e e pohe ratou? E faatia faahou mai te Atua ia ratou i nia i te fenua nei. Ua faahiti o Ioba, ei hiˈoraa, i te tiaturiraa e e haamanaˈo te Poiete ia ˈna e e pii faahou mai ia ˈna i te ora (Ioba 14:13-15; Daniela 12:13). I te parau mau, e aratai te hoê o te mau tuhaa o te faaoraraa i te ora mure ore i nia i te fenua nei. — Mataio 11:11.

17. Ia au i te Bibilia, eaha te ora taa ê te pûpûhia nei i te tahi atu mau taata?

¹⁷ Te parau atoa ra te Bibilia no te ora i nia i te raˈi, i reira to Iesu Mesia haereraa i muri aˈe i to ˈna faatia-faahou-raahia. “O tei reva aˈenei i nia i te raˈi, e tei te rima atau o te Atua ra; e ua tuuhia te mau melahi, e te feia mana, e te feia hau, i raro aˈe ia ˈna.” (Petero 1, 3:18, 22; Ephesia 1:20-22; Hebera 9:24). E ere o Iesu anaˈe te taata otahi roa te haere i nia i te raˈi. Ua faaoti te Atua e e rave atoa oia i te hoê numera iti aˈe o te tahi atu mau taata i nia i te fenua nei. No reira Iesu i parau ai i te mau aposetolo e: “E rave rahi te parahiraa mau i te fare o tau Metua ra (...). Te haere nei au e haamaitai i te hoê vahi no outou. E ua oti anaˈe i te faaauhia e au te hoê vahi no outou ra, e hoˈi mai au e aratai ia outou i o ˈu ra; ei reira atoa outou i te vahi e parahihia e au ra.” — Ioane 14:2, 3.

18. Eaha te tumu tatou e nehenehe ai, i teie nei, e parau no nia i te faaoraraa no te oraraa i nia i te raˈi?

¹⁸ Mea faahiahia aˈe ïa te ora i nia i te raˈi e o Iesu i te ora taotiahia tei horoahia i muri aˈe i te Pasa matamua (Timoteo 2, 2:10). I te rui o te Séder hopea tei fariihia to Iesu haamauraa i te oroa apî na ta ˈna mau pǐpǐ, oroa o te haafaufaa i te ora i nia i te raˈi. Ua parau oia i te mau aposetolo e: “E na reira outou ei manaˈoraa ia ˈu.” (Luka 22:19). Hou tatou e hiˈopoa ˈi nafea e tia i te mau kerisetiano ia haapao i taua oroa ra, e hiˈo tatou na mua nafea ia faatupu i te reira.

Te hoê “taime mau ra”

19. No te aha e mea tano i te feruriraa ia faatuatihia te Pasa e te Amuraa a te Fatu?

¹⁹ Ua parau aˈera o Iesu e: “Hinaaro rahi roa to ˈu i te amu i teie nei pasa, o vau e outou atoa, a pohe atu ai au.” (Luka 22:15). Ua haamau atura oia i muri iho i te Oroa o te Fatu, tei tia i te mau pǐpǐ ia haapao no te faahaamanaˈo i to ˈna ra pohe (Luka 22:19, 20). E faatupuhia na te oroa o te Pasa hoê taime i te matahiti. E tano ïa e ia faatupuhia te Amuraa a te Fatu hoê taime i te mau matahiti atoa. I teihea ïa mahana? I te tau uˈaraa tiare, i te taime e faatupuhia ˈi te Pasa, oia hoi i te 14 no Nisana (ia au i te kalena ati iuda), eiaha noa i te mahana pae no te mea e ua pohe o Iesu i taua mahana ra o te hebedoma.

20. No te aha te mau Ite no Iehova e anaanatae ai i te 14 no Nisana?

²⁰ Mea papu maitai o te mahana o te 14 no Nisana te taio mahana e vai ra i roto i te feruriraa o Paulo a papai ai oia e: “Ua amu anaˈe outou i teie nei pane, e ua inu anaˈe i teie nei aˈua, ua faaite â ïa outou i te pohe o te Fatu, e tae noa mai oia ra.” (Korinetia 1, 11:26). I roto i te roaraa o na senekele e piti i muri mai, ua faaea taiva ore noa e rave rahi mau kerisetiano i te 14 no Nisana no te oroa Haamanaˈoraa; ua piihia ratou Quartodécimans, ei iˈoa no roto mai i te parau latino, oia hoi te auraa te “ahuru-ma-maha-raa” ïa. Ua faˈi o McClintock e o Strong no taua parau ra e: “E faatupu te mau Ekalesia no Asie Mineure i te oroa o te poheraa o te Fatu i te mahana e tuati i te 14raa o te mahana o te avae Nisana, mahana i reira, ia au i te manaˈo o te Ekalesia atoa i tahito ra, i tupu ai te faasatauroraa.” I to tatou nei tau, e faatupu te mau Ite no Iehova i te oroa no te Amuraa a te Fatu i te mau matahiti atoa i te taioraa mahana e tuati i te 14 no Nisana. Teie nei râ, ua tapao vetahi e eita taua taio mahana ra e tuati pinepine i te taio mahana i reira te mau ati Iuda e faatupu ai i ta ratou oroa Pasa. Eaha ïa te tumu?

21. Afea ra te arenio pasa e faatusiahia ˈi, te aha nei râ te mau ati Iuda i to tatou nei mau mahana?

²¹ E haamata te mahana hebera mai te taperaa mahana (i te hora 6 i te po) e tae atu i te taperaa mahana i muri iho. Ua faaue te Atua ia taparahihia te arenio pasa i te 14 no Nisana, “i te ahiahi ra”. (Exodo 12:6.) E tuati te reira i teihea taime? I to tatou mau mahana, te pee nei te mau ati Iuda i te manaˈo a te mau upoo faatere o ta ratou haapaoraa e parau ra e ua tâpûhia te arapoa o te arenio i te hopearaa o te 14 no Nisana, i rotopu i te taime te mahana e haamata ˈi i te topa (i te hora toru i te avatea) e te toparaa mau o te mahana. No reira, e faatupu ratou i te Séder i muri aˈe i te taperaa mahana, a haamata ˈi te 15 no Nisana. — Mareko 1:32.

22. Eaha te tumu e, i te tahi taime, eita te taio mahana o te oroa Haamanaˈoraa e tuati i te mahana i reira te mau ati Iuda e faatupu ai i te Pasa (Mareko 14:17; Ioane 13:30)?

²² Te vai ra râ ta matou te tahi mau tumu papu no te taa i taua parau ra na roto i te hoê manaˈo taa ê. I roto i te Deuteronomi 16:6, te parau-papu-maitai-hia ra e, e tia i te mau ati Iseraela ia pûpû i “te [tusia] pasa ei te ahiahi ra, i te mairiraa o te mahana ra”. Te faaite papu maitai ra taua mau parau ra “ei te ahiahi ra” i te marumarupo, mai te taperaa mahana (tapao ra i te omuaraa o te 14 no Nisana) e tae atu i te taime pouri roa. Mea na reira to te mau ati Iuda caraïtesb no te tau Tahito taaraa i taua parau ra, e mea na reira atoa te mau taata no Samariac e taa ˈi i te reira tae roa i to tatou nei tau. No te mea atoa e te farii nei matou e ua faatusiahia te arenio no te pasa e ua amuhia oia i te “taime mau ra”, i te 14 no Nisana, eiaha râ i te 15, e taa ê ai i te tahi taime te taio mahana matou e faatupu ai i te oroa Haamanaˈoraa, i ta te oroa Pasa ati iuda. — Numera 9:2-5.

23. No te aha e tia ia faaô atu i te tahi mau avae hau i roto i te kalena hebera, e mea nafea ïa te mau ati Iuda i te faatupuraa i te reira i to tatou nei tau?

²³ I te tahi taime, e taa ê te taio mahana tatou e faatupu ai i te oroa Haamanaˈoraa i te Pasa ati iuda no te tahi atu â tumu: e faaohipa te mau ati Iuda i te hoê kalena tei haamau-aˈena-hia, o tei farii-noa-hia i te IVraa o te senekele o to tatou nei tau. Na roto i taua kalena ra, e nehenehe ïa ratou e haamau i te taio mahana o te 1 no Nisana aore ra o te mau oroa, tau ahuru matahiti aore ra tau senekele na mua ˈˈe. I te tahi aˈe pae, e tia i te tahi taime ia faaô hoê atu â avae, te 13raa ïa, i roto i te kalena avae tahito, ia nehenehe te reira e tuati e te mau tau. I roto i te kalena ati iuda no teie nei tau, e faaôhia ïa taua avae ra i te mau taio mahana eita e taui: i roto i te anairaa e 19 matahiti, i te 3raa, 6raa, 8raa, 11raa, 14raa, 17raa e 19raa o te matahiti.

24, 25. a) I te tau o Iesu, nafea te mau ati Iuda i haamau ai i te omuaraa o te mau avae e e faaoti ai afea e tia ˈi ia faaô i te mau avae hau? b) Nafea te mau Ite no Iehova e faaoti ai i te taio mahana o te Oroa o te Fatu?

²⁴ Teie râ, mai ta Emil Schürer e haapapu ra, “i te tau o Iesu, aitâ [ta te mau ati Iuda] e kalena papu, e faahaamata râ ratou i te mau avae apî i nia i te niu o te hoê hiˈopoaraa haamauhia i nia i te aravihi, ia fa anaˈe mai te avae apî, e, te reira i nia noâ i te niu o te hiˈopoaraa”, e faaô mai ratou i te hoê avae hau mai te peu e mea titauhia. “Mai te peu e (...) e tapaohia i te hopea o te matahiti e e topa te oroa Pasa na mua ˈˈe i te tau uˈaraa tiare [i te area o te 21 no mati], e faaotihia ïa e e faaôhia mai te hoê avae na mua ˈˈe i te avae Nisana.” (Aamu no te nunaa ati iuda i te tau o Iesu Mesia [beretane], tuhaa 1). E ô ohie noa mai ïa te avae hau; eita ïa te reira e faaôhia mai ma te faahepohia.

²⁵ E rave te Tino aratai a te mau Ite no Iehova i taua ravea tahito roa ra no te haamau i te taio mahana o te Amuraa a te Fatu. E tuati ïa te 1 no Nisana i te mahana i reira e nehenehe ai e itehia te avae apî piri roa ˈˈe i te anotau e faito ai te po e te ao o te tau uˈaraa tiare, i te taperaa mahana i Ierusalema. Ia taio-anaˈe-hia 14 mahana mai taua taio mahana ra, e tapae ïa tatou i te 14 no Nisana, o te tuati pinepine i te mahana o te avae apî (hiˈo i Te Pare Tiairaa no te 15 no setepa 1977, api 575 e tae atu i te 576 [na roto i te reo farani]). Mea na roto i taua ravea ra a te Bibilia i nehenehe ai e faaara i te mau Ite no Iehova no te ao atoa nei e e faatupuhia te oroa Haamanaˈoraa i teie matahiti i te 10 no eperera, i muri aˈe i te taperaa mahana.

26. Eaha te tahi mau tuhaa o te Amuraa a te Fatu te tia ia tatou ia haapao maitai?

²⁶ E tuati taua taio mahana ra i te 14 no Nisana, mahana i reira Iesu i faatupu ai i te Pasa hopea tei fariihia. Teie râ, te haafaufaa nei te oroa Haamanaˈoraa i te hoê faaoraraa rahi atu â i ta te Séder ati iuda e faahaamanaˈo ra. E tia ˈtura ïa ia tatou paatoa ia taa e nafea e faatupuhia ˈi taua Amuraa o te po ra, to ˈna auraa e nafea te reira e tuati ai i to tatou ora.

[Nota i raro i te api]

Eaha ta outou e pahono atu?

◻ No te aha e tano iho â ia faatuatihia te Pasa i te ora?

◻ Eaha te ohipa hau atu ta te tusia a Iesu e nehenehe e faatupu i ta te arenio pasa?

◻ Eaha te ora e nehenehe e roaa mai maoti ia Iesu?

◻ Nafea te mau Ite no Iehova e faaoti ai i te mahana tano o te Amuraa a te Fatu?