Ua itehia te ohipa a te amuiraa faaroo kerisetiano e ta ˈna haamoriraa hape

“O te fenua teie aore i faaroo i te reo o to ratou Atua o Iehova, aore hoi ratou i farii i te aˈo.” — IEREMIA 7:28.

1, 2. Eaha te huru hiˈoraa a Ieremia i te ohipa ta Iehova i horoa mai ia ˈna ra?

“TE AMA NOA RA te auahi o te tiaturiraa mau i roto ia ˈna. Te faahepo ra te hoê puai ia ˈna ia faaite i te parau mau, ia aˈo e ia faaitoito.” Mea na roto i taua mau parau nei to na toopiti taata tuatapapa i te parau hebera, faataaraa mai i te huru o Ieremia. Mea riaria mau te ohipa ta te Atua i horoa mai na ˈna e faaite i te nunaa o Iuda; teie râ, ua ite oia e e tia ia ˈna ia rave faahope roa i te reira. Teie hoi ta ˈna i parau: “Ua ruri-ê-hia te parau a Iehova ia ˈu ei faainoraa, e ei tâhitohitoraa, eita e faaea. Ia parau râ vau ra, E ore au e parau i te reira, e ore au e parau faahou i to ˈna ra iˈoa.” Oia mau, fatata te fifi no te hamani-ino-raa i te riro ei mea puai roa no Ieremia, teie râ, ua faarue anei oia? — Ieremia 20:8, 9a.

² Teie ta ˈna e parau faahou ra: “Riro atura taua parau ra mai te auahi ama i roto i tau aau ra, ua opanihia i roto i to ˈu ra mau ivi; rohirohi aˈera vau i te faaoromai-noa-raa.” (Ieremia 20:9b). Aita o Ieremia i faarue i ta ˈna ohipa: ua tamau noa hoi oia i te faaite i te mau haavaraa a te Atua no nia ia Iuda. — Ieremia 6:10, 11.

Te Ieremia o to tatou nei tau

3. Eaha te huru feruriraa o Iesu e ta ˈna mau pǐpǐ i te ohipa i horoahia mai ia ratou ra?

³ Mai ia Ieremia, ua faaite te Mesia ra o Iesu e te mau kerisetiano matamua ma te itoito i mua i te mau ati Iuda e i mua i te mau nunaa i te parau au-ore-hia o te Basileia o te Atua. Noa ˈtu â ïa e ua tuuhia ratou i roto i te fare tapearaa no te mea te faaite ra ratou i te parau apî maitai, ua pahono maira o Petero e te tahi atu mau aposetolo ma te itoito i te mau upoo faatere haapaoraa e faahapa ra ia ratou: “O te Atua ta matou e faaroo e tia ˈi eiaha te taata.” Ua taparahihia ratou no to ratou itoito e te reira na nia i te faaueraa a te upoo faatere haapaoraa. Aita râ hoi ratou i tuu, i te mea hoi e “aore e mahana tuua ia ratou i te aˈo e te haapii atu i te taata, e o Iesu â te Mesia, i roto i te hiero e i tera fare, i tera fare”. — Ohipa 5:29, 40-42; Mataio 23:13-33.

4. O vai, i teie nei senekele 20, teie e pee nei i te hiˈoraa o Ieremia, e nafea?

⁴ Te itehia ra e ua rave atoa te mau kerisetiano faatavaihia o te senekele 1 mai ia Ieremia. Noa ˈtu â ïa e ua faaruru ratou i te mau huru tupuraa taa ê e tae noa ˈtu hoi i te mau enemi i te pae faaroo etaeta mau, ua faaite ratou i te mau haavaraa a te Atua. O vai, i teie nei senekele e 20 teie e pee nei i te hiˈoraa o taua mau taata nei? O vai, i te vahi taata e i tera fare, i tera fare, teie e faaite nei i te mau haavaraa a te Atua no nia i te amuiraa o te mau mea nei e, oia hoi, no nia i tei faahohoˈahia ia Ierusalema, te amuiraa faaroo kerisetiano? Hau atu i te 68 matahiti i teie nei, te rahi noa ˈtura te mau haapapuraa e faaite ra e o te pǔpǔ o Ieremia o to tatou nei tau te pǔpǔ haihai hoi e te itoito râ, o te mau Ite no Iehova faatavaihia i te varua. Mai te matahiti 1935 maira, ua tauturuhia taua mau Ite ra e te hoê “feia rahi roa” e haere noa ˈtura i te rahiraa e e rave rahi milioni hoa ohipa to ratou i teie mahana o tei mairi-atoa-hia i te iˈoa ra Ite no Iehova. Ma te reo otahi, te faatupu nei ratou i ta ratou ohipa — mai tei horoahia ˈtu i mutaa ihora i roto i te rima o Ieremia — oia hoi te faaiteraa i te haapaoraa hape mai te hoê marei e te hoê ohipa eiâ. — Apokalupo 7:9, 10; 14:1-5.

Te amuiraa faaroo kerisetiano: hohoˈa no Ierusalema no to tatou nei tau

5. E au maitai te amuiraa faaroo kerisetiano i te Ierusalema i tahito ra i roto i tei hea auraa?

⁵ E riro vetahi pae i te aniani e i hea râ e itehia ˈi i te hoê tuatiraa i rotopu i te Ierusalema tahito e te amuiraa faaroo kerisetiano. E tia ia imi i roto i te mau haerea o te amuiraa faaroo kerisetiano teoteo e i roto i te huru tupuraa ta ˈna e farerei ra. Te tuu ra oia i to ˈna tiaturiraa i roto i ta ˈna mau ‘oire moˈa’ e ta ˈna mau hiero, mai te itehia ra i Roma, i Ierusalema, i Cantorbéry, i Fatima, i Guadalupe, i Saragosse. Mea faufaa roa ta ˈna mau fare pureraa rarahi, ta ˈna mau hiero e ta ˈna mau fare pure ta ˈna e faatiatia ra i to ratou huru hamaniraahia e te paari e nehenehe e vai e a muri noa ˈtu, mai te huru ra ïa e te fariihia maira oia e te Atua. E tae roa ˈtu hoi oia i te faahua parau e patuhia taua mau fare nei ‘no te hanahana o te Atua’. Teie râ, mea iti roa teie e amo nei i te iˈoa o te Atua ra o Iehova, inaha hoi te faahaamanaˈo-tamau-hia ra te iˈoa o te feia i patu, te feia peni, te feia tarai tei ohipa e tupu mai ai te reira, te mau taata moni roa i aufau aore ra i te feia “moˈa” i pûpûhia ˈtu na ratou. Mai te tiaturiraa hape ta Iuda i horoa i mutaa ihora no ta ˈna hiero moˈa, mai te reira atoa hoi te tiaturiraa ta te amuiraa faaroo kerisetiano e horoa ra no ta ˈna mau parau tutuu. — Ieremia 7:4.

6. Mea nafea to Iesu faataaraa mai i te huru o te mau upoo faatere haapaoraa ati Iuda e to te mau upoo faaroo faatere haapaoraa a te amuiraa faaroo kerisetiano?

⁶ Ua faautua o Ieremia i te mau tahuˈa e te mau peropheta ati iuda; eaha ˈtura ïa te nehenehe e parau i teie mahana no te mau upoo faatere haapaoraa o te amuiraa faaroo kerisetiano? Ma te huru papu maitai mai to Ieremia, ua horoa maira o Iesu i te hoê hohoˈa o te mau upoo faatere haapaoraa ati iuda e faataa maira i te huru o te mau upoo faatere o te amuiraa faaroo kerisetiano: “O te parau hoi ta ratou, aita râ i haapao. (...) E ta ratou atoa ra e rave ra, i rave ïa ia hiˈohia mai e te taata. (...) E te titau i te vahi teitei i te mau amuraa maa ra, e te parahiraa i hau i te mau sunago ra.” (Mataio 23:3-7). Aita anei e ite-pinepine-hia ra, i roto i te tahi mau fenua, te mau ekalesiatiko, feia poro matauhia hoi, ia turu mai i te mau haaputuputuraa i faanahohia e te feia politita, e ma te apiti atu ia ratou i roto i te mau afata teata?

7. a) Mea nafea to te tahi mau taata poro haavareraa i te mau taata e rave rahi? b) Eaha te hopoia ta te mau upoo faatere haapaoraa i ore i tâuˈa?

⁷ Te faaohipa rahi nei hoi taua mau taata poro ra i te mau ravea ta te afata teata e pûpû mai nei, e te mau huru peu haavarevare atoa e hauti i nia i te feruriraa o te rahiraa o te taata ia horoa mai to ratou mau taata i te moni. Tau piti ahuru ma ono senekele i muri iho, te tano noa râ te mau parau faautuaraa i faahitihia e Ieremia e na ô ra e: “Mai te taata iti haihai ra e tae noa ˈtu i tei rahi, ua riro roa ratou atoa i te nounou taoˈa; e mai te peropheta e tae noa ˈtu i te tahuˈa, ua ati paatoa ïa i te haavare.” I te tahi aˈe pae, ua faarue taua feia poro ra i te hopoia o te taviniraa kerisetiano mau, oia hoi: te pororaa i tera fare, i tera fare i mua i te aro o te mau taata. O te mau Ite no Iehova anaˈe tei farii i te reira, oia hoi te pǔpǔ o Ieremia (te mau melo faatavaihia i te varua) e te “feia rahi roa”. — Ieremia 6:13; Ohipa 20:20, 21.

Ua ora anei te amuiraa faaroo kerisetiano?

8. No te aha te amuiraa faaroo kerisetiano i manaˈo ai e eita oia e roohia i te haavaraa ta te Atua e faatupu i Aramagedo?

⁸ Te atuatu nei taua mau taata poro ra i roto i te feruriraa o te taata i te hoê manaˈo hau hape roa, ma te faahiti noa i te mau parau mai te “fanau-faahou-hia” aore ra “ora e a muri noa ˈtu”, mau parau ta ratou i faaohipa no te haamau i ta ratou mau haapiiraa. E rave rahi milioni taata no roto fatata i te mau haapaoraa atoa a te amuiraa faaroo kerisetiano, tei tiaturi e ua “fanau-faahou-hia mai ratou” e ua “ora” ratou. E pee maitai te feia politita e manaˈo faufau, ia ratou. Oia mau, e parau atu hoi te mau taata poro e au-roa-hia e ratou e i te mea hoi e “ua ora” ratou, e vai hau noa ˈtura ïa ratou e te Atua, e te reira noa ˈtu e te amahamaha ra ratou i te pae faaroo, i te pae politita e i te pae no te aiˈa. Mai te tau o Ieremia, e mau parau teie e au-roa-hia e te taata ia faaroo (Ieremia 5:31; 14:14). Te manaˈo ra ratou e eita ratou e roohia i te haavaraa ta te Atua e faatupu i Aramagedo. — Ieremia 6:14; 23:17; Korinetia 1, 1:10; Apokalupo 16:14, 16.

9. a) I te parau mau, o vai hoi tei ‘fanau-faahou-hia’? b) Eaha ta te Bibilia e parau ra no nia i te nephe? (No te pahono mai i taua na uiraa e piti nei, a rave i te buka ra Comment raisonner à partir des Ecritures.)

⁹ Teie râ hoi, te faaite mai nei te hoê tuatapaparaa papu maitai no nia i te Parau a te Atua e te mau haapiiraa a te Mesia e, ua taotiahia te numera o te mau taata e noaa ia ratou i te haamaitairaa ia fanau-faahou-hia “i te pape e te varua” no te apiti atu i roto i te faatereraa i nia i te raˈi a te Mesia (Ioane 3:3-5; Roma 8:16, 17; Apokalupo 14:1-3). I te mea hoi e, i nia i te fenua nei, eiaha râ i nia i te raˈi, te “feia rahi roa” o te mau kerisetiano mau e tiaturi ra e e ora e a muri noa ˈtu, aita ˈtura e faufaa no ratou ia fanau-faahou-hia mai (Petero 2, 3:13; Apokalupo 21:3, 4). Te turu ra hoi taua haapiiraa a te amuiraa faaroo kerisetiano ra i te haapiiraa hape oia hoi e nephe pohe ore to te taata o te tia ia faaorahia. Teie râ, aita roa ˈtu e mea i roto i te Bibilia e haapapu ra i taua haapiiraa nei, inaha, no roto mai hoi te reira i te philosopho helenia.

Aore ratou e au ra i ta ˈna Parau e i to ˈna Iˈoa

10. Eaha te hiˈoraa o e rave rahi mau ekalesiatiko i te Bibilia?

¹⁰ E itehia ˈtu â te tahi mau tuatiraa i rotopu i te Ierusalema tahito e te amuiraa faaroo kerisetiano. Te parau nei Ieremia e: “Inaha hoi te parau a Iehova, e parau faaino ïa na ratou, aore roa te reira i autia ˈtu e ratou.” (Ieremia 6:10). Mea au aˈe na te mau upoo faatere haapaoraa e faahiti i te mau manaˈo philosopho e te mau taata aivanaa maoti i te Parau a Iehova. Mea haama roa na te rahiraa o to ˈna mau melo i te Bibilia, e te haa atoa nei ratou i te faaino i te reira na roto i te ravea o te “faaino rahi”. Te faahua parau nei ratou e e buka aai noa te Bibilia: e buka nehenehe mau hoi (Ieremia 7:28). Area te iˈoa o tei Papai ia ˈna ra, mai ta tatou e ite atu, e ere roa ïa i te mea tâuˈa roa na ratou.

11. Eaha te taa-ê-raa e vai ra i rotopu i te amuiraa faaroo kerisetiano e o Ieremia no nia i te faaohiparaa i te iˈoa o te Atua?

¹¹ Noa ˈtu â ïa e e farereihia na leta e maha nei (יהוה) fatata e 7 000 taime i roto i te mau Papairaa hebera, ua monohia te iˈoa ra “Iehova” aore ra “Yahvé (Yahweh)” na roto i te hoê parau papu-ore-hia, “Mure ore” aore ra “te FATU”, i roto e rave rahi mau huriraa farani. Eita atoa e itehia hoê noa ˈˈe taime taua iˈoa nei i roto i te hoê huriraa no teie tau o te Bibilia na roto i te reo afrikaans; i roto i ta ˈna neneiraa tumu, te faaohipa ra te huriraa paniora Franquesa-Solé i taua iˈoa nei, ua faaorehia râ hoi i roto i te neneiraa apî e ua monohia na roto i te parau ra Señor (Fatu). E oia hoi, noa ˈtu e te vai ra te iˈoa o te Atua i roto i te mau huriraa a te amuiraa faaroo kerisetiano, e varavara roa te mau upoo faatere haapaoraa i te faahiti i taua iˈoa ra. Area o Ieremia ra, ua faaohipa ïa oia i te iˈoa o te Atua i roto i ta ˈna mau parau tohu e 726 taimeb.

Te “arii vahine o te raˈi” e te haamori idolo

12-14. a) Eaha te tapitapiraa a te mau utuafare fetii ati iuda? b) Mea nafea ta Iehova huru hiˈoraa i ta ratou haamoriraa?

¹² Te horoa maira te parau ta Ieremia i faaite atu i mua i te aro o Ierusalema i te tahi faaauraa. Ua faaue maira o Iehova i ta ˈna peropheta ia ore roa ˈtu oia e pure no te nunaa e ua faataa maira hoi oia e no te aha: “Aita oe i hiˈo i ta ratou e rave na i te mau oire o Iuda e te mau aroâ i Ierusalema? Te ohi haere ra te mau tamarii i te vahie, te tahu ra na metua i te auahi, te oˈi ra na vahine i te faraoa.” Eaha hoi te tapitapiraa a te utuafare taatoa? Te “oˈiraa ïa i te faraoa ei pane na te arii vahine o te mau raˈi ra”. — Ieremia 7:16-18; 44:15, 19.

¹³ Teie ta te hoê parau ati iuda e haapapu maira: “E faatupuhia na te haamori-tahaa-raa i te ‘arii vahine o te mau raˈi ra’ ma te itoito rahi.” Ma te ore e nehenehe e tiaturi, e faaohipa na te nunaa o Iuda i te haamori idolo ma te haamori i te hoê ruahine etene, eita e ore e o Ishtar, ruahine no te fanau no roto mai i te torutahi a to Babulonia i te pae no te fetia; aore ra te ruahine no Kanaana o Aschtoreth. — Te mau arii 1, 11:5, 33.

¹⁴ Taa ê atu i te haamoriraa i taua ruahine ra, e rave atoa na te mau ati Iuda i te tahi atu mau huru haamoriraa idolo. No reira hoi o Iehova i faautua mai ai ia ratou ia ˈna i na ô mai e: “Eaha ratou i faaooo mai ai ia ˈu i to ratou mau tii otiotihia ra, e ta ratou mau mea ê faufaa ore ra?” Te na ô râ oia e: “Aore hoi i faaroo i tau reo, aore hoi i na reira to ratou haerea; ua haapao râ ratou i te manaˈo o to ratou iho aau, e ua pee ratou i te mau atua na to ratou mau metua i haapii mai.” (Ieremia 8:19; 9:13, 14). Ua topa atoa anei te amuiraa faaroo kerisetiano i roto i taua marei nei?

15. a) Eaha i teie mahana te huru tupuraa o te amuiraa faaroo kerisetiano i mua i te haamori idolo? Eaha hoi te itehia ra i roto i to outou fenua? A horoa mai i te tahi mau hiˈoraa. b) Eaha te huru hiˈoraa o te mau kerisetiano mau ia Maria? (Hiˈo i te buka ra Comment raisonner à partir des Ecritures, api 230 e tae atu i te api 237.)

¹⁵ Fatata i roto i te mau vahi haamoriraa atoa a te porotetani, a te katolika e a te mau orthodoxes, e itehia te satauro. E i roto i te mau fare pure katolika e orthodoxes, e itehia ïa te mau tii i taraihia no te “vahine moˈa ra o Maria e faaea paretenia noa ra, te metua vahine o te Atua mau ra” ua rau huru ïa hohoˈac. E horoahia na hoi no ˈna te mau tiaraa faahiahia roa ˈˈe, mai te “arii vahine no te raˈi ra” e “arii vahine no te ao taatoa nei”d. I to ˈna aˈe pae, te pee maite ra te pǔpǔ o Ieremia, e farii ra hoi ma te tura ia Maria ei metua vahine no Iesu e ei kerisetiano faatavaihia i te varua, i teie nei aˈoraa i horoahia mai na te mau aposetolo: “E ara ia outou i te mau idolo ra.” — Ioane 1, 5:21; Ieremia 10:14.

Te mono ra te Torutahi i te Fatu Teitei ra o Iehova

16. Eaha te haapiiraa i aratai tia ˈtu i te haamoriraa ia Maria, e mea nafea te reira i te tupuraa mai?

¹⁶ E nehenehe tatou e aniani e mea nafea taua haamoriraa ra, taua faaturaraa ia Maria ra i te haamataraa. Ua tupu te reira maoti te tahi atu tauiraa no nia i te haamoriraa viivii ore ta te Ekalesia apotata o te mau senekele matamua i faatupu na roto i to ˈna hinaaro e huti mai ia ˈna i te mau etene. Ua parare roa te tiaturiraa i te hoê Atua e toru taata i roto i te mau etene o taua tau ra. E itehia i roto i te tahi mau hiero roma i te tahi mau tuhaa e toru piha “pûpûhia na te mau atua torutahi tahoêhia mai i roto i taua tiaturiraa ra e i roto i te haamoriraa. Mai te reira hoi no te hiero o Jupiter Très-Bon Très-Grand, i patuhia i nia i te Capitole e i pûpûhia ˈtu na te mau atua torutahi o Jupiter, Junon, Minervee”.

17, 18. a) I te haamoeraa i tei hea haapiiraa i matara maitai ai te haapiiraa no nia i te Torutahi? b) A horoa mai i te tahi mau haapapuraa no roto mai i te buka ra Comment raisonner à partir des Ecritures.

¹⁷ Ia farii-maitai-hia te “Torutahi-Moˈa Roa”, haapiiraa e haamata noa maira hoi, ua haamoe te Ekalesia katolika, i te III e te IV o te senekele, i te tiaturiraa hebera i faaite-maramarama-maitai-hia mai e Ieremia oia hoi: “Aore roa o oe e faito, e Iehova, te rahi ra hoi oe, e te rahi atoa ra to oe iˈoa i te puai. O Iehova râ, te Atua mau, te Atua ora, e te Arii hau mure ore.” Ua haapapu mai Iesu i te auraa o taua mau parau nei ia ˈna i faahiti i teie irava: “E faaroo mai, e Iseraela e; O Iehova to tatou Atua, hoê hoi Iehova.” — Ieremia 10:6, 10; Mareko 12:29; Deuteronomi 6:4.

¹⁸ Ua turu aˈera hoi te amuiraa faaroo kerisetiano apotata i te tiaturiraa tupapau oia hoi eita roa ˈtu te mau ati Iuda e faahiti noa ˈˈe i te iˈoa o te Atua, “Yahvé (Yahweh)” aore ra “Iehova”, e aita roa ˈtu hoi i faaohipa faahou i taua iˈoa nei. No reira, ua tupu aˈera te hoê apoo i te pae no te tuatapaparaa i te parau no nia i te Atua, ta te haapiiraa no nia i te “Torutahi-Moˈa” i faaîf.

19. a) Eaha te mau faahopearaa i itehia mai a farii ai te amuiraa faaroo kerisetiano i te Torutahi? b) Eaha te haavare i faaohipahia no te turu i te parau no te Torutahi?

¹⁹ No reira, ua opua te amuiraa faaroo kerisetiano e ‘haere na muri i te tahi atu atua’, te atua o te Torutahi, ta te mau ati Iuda, ta te Mesia, ta te mau kerisetiano mau i ore roa ˈtu i ite aˈenei. No te turu i taua ohipa maere ra no nia i te hoê Atua e toru taata, ua haavare atoa te amuiraa faaroo kerisetiano i roto i te huru huriraa i te mau Papairaa moˈag. Hau atu, o te ohipa mau hoi ïa e tupu, ua haamori noa ˈtura te amuiraa faaroo kerisetiano i te “Arii vahine o te Raˈi ra”. — Ieremia 7:17, 18, Jérusalem.

Te mau upoo faatere haapaoraa, te tumu matamua o te hamani-ino-raa

20, 21. Eaha te huru o te mau upoo faatere haapaoraa a te amuiraa faaroo kerisetiano e eaha te mau uiraa te tia mau ia uihia?

²⁰ No reira, e tano maitai iho â ïa te uiraa ta Ieremia i ui atu no te mau upoo faatere haapaoraa o te amuiraa faaroo kerisetiano: “Eaha outou i parau ai e, E paari to matou, e tei ia matou te ture a Iehova? Inaha mau â, e peni haavare ta te papai parau te haˈa ra ïa ei haavare. (...) Inaha, ua faarue ratou i te parau a Iehova, e te paari ra, eaha to roto ia ratou?” (Ieremia 8:8, 9). Ua faarue te mau upoo faatere haapaoraa a te amuiraa faaroo kerisetiano ia Iehova e to ˈna mau tia, oia hoi ta ˈna mau Ite. Mai te mau tahuˈa e te mau peropheta, i hamani ino na ia Ieremia, o ˈna te tumu no te rahiraa o te mau hamani-ino-raa riaria mau i farereihia e te mau Ite no Iehova i te roaraa o te senekele e 20.

²¹ Teie râ, no te aha te mau upoo faatere haapaoraa a te amuiraa faaroo kerisetiano i faatupu ai i taua mau hamani-ino-raa ra? Eaha ta te mau Ite i rave e riri mai ai hoi ratou? E tuatapapa te tumu parau hopea i taua mau uiraa nei e te tahi atu e tano maitai i te reira.

[Nota i raro i te api]

Te haamanaˈo ra anei outou?

◻ O vai hoi te pǔpǔ o Ieremia i teie mahana?

◻ Eaha vetahi mau faahohoˈaraa ta tatou e nehenehe e haamau i rotopu i te Ierusalema tahito e te amuiraa faaroo kerisetiano?

◻ Eaha ta te mau upoo faatere haapaoraa i rave ia tiaturi mai te taata e te vai hau noa ra ratou e te Atua?

◻ Eaha tei haamoehia e te amuiraa faaroo kerisetiano e eaha hoi te ohipa haamoriraa ta ˈna i faatupu?

[Hohoˈa i te api 9

I te matahiti 1938 ra, ua faautua te mau Ite i te haapaoraa hape ma te itoito.

[Hohoˈa i te api 10]

Mai te mau ati Iuda i tuu i to ratou tiaturiraa i roto i ta ratou hiero, te tuu atoa nei te amuiraa faaroo kerisetiano i to ˈna tiaturiraa i roto i te paari o ta ˈna mau hiero e o ta ˈna mau fare pure.

[Hohoˈa i te api 11]

Te faatiaturi nei te feia poro a te amuiraa faaroo kerisetiano i te mau milioni taata e ua “ora” ratou aore ra “ua fanau-faahou-hia” ratou.