Iesu, to ˈna oraraa e ta ˈna taviniraa

Taparahiraa taata i te taime tamaaraa o te hoê oroa mahana fanauraa

I MURI aˈe i to ˈna horoaraa i te mau faaueraa na ratou, ua tono tataipiti aˈera o Iesu i ta ˈna mau aposetolo i roto i te tabula fenua. Ma te papu maitai, haere ihora o Petero e to ˈna taeae o Anederea, o Iakobo e o Ioane, o Philipa e o Baretolomea, o Toma e o Mataio, o Iakoba e o Tadaio e, i te pae hopea, o Simona e o Iuda Isakariota. I te mau vahi atoa ta ratou i haere, ua faaite aˈera taua na pǔpǔ e ono ra o te feia poro evanelia i te parau apî maitai o te Basileia e ua faatupu ihora ratou i te mau faaoraraa semeio.

I taua taime ra, tei roto noâ o Ioane Bapetizo i te fare tapaearaa. Ua fatata e piti matahiti i teie nei. Te haamanaˈo ra paha outou: ua faaite o Ioane i mua i te huiraatira e e ohipa ino ta Heroda Anetipa i rave ma te raveraa ˈtu ia Herodia na ˈna, te vahine a to ˈna taeae o Philipa. No te mea hoi e ua haapapu aˈera o Heroda Anetipa e te pee ra oia i te ture a Mose, ua tano ïa o Ioane i te faahaparaa i taua taairaa faaturi. No reira o Heroda i tuu ai ia ˈna i roto i te fare tapearaa, peneiaˈe na roto i te onoonoraa a Herodia.

Ua ite maitai ihora o Heroda Anetipa e e taata parau-tia o Ioane e ua faaroo atoa aˈera oia ia ˈna ma te anaanatae. Ua feaapiti ihora oia no nia i te faautuaraa e faataa na ˈna. Area o Herodia, mea riri roa na ˈna ia Ioane e ua imi aˈera ma te tuutuu ore i te hoê ravea no te haapohe ia ˈna. I te pae hopea, ua tae maira te taime ta ˈna i tiai.

Maa taime noa na mua ˈˈe i te Pasa o te matahiti 32, horoa ihora o Heroda i te hoê oroa rahi no to ˈna mahana fanauraa. Ua titau manihini ihora oia i ta ˈna mau taata rarahi atoa e te mau raatira rarahi faehau ra, e te feia rahi roa ˈˈe i Galilea ra i te amuraa maa. I te taime o te oroa, haere maira te hoê potii no te ori mai i mua i te mau manihini: o Salome teie, te tamahine ta Herodia i fanau no ta ˈna tane matamua, o Philipa. Ua faahiahia roa ˈˈera ta ˈna ori, peneiaˈe e ori teie e faatupu i te mau hinaaro i te pae taatiraa tino, i te mau tane atoa i reira.

Ua au-rahi-roa-hia o Salome e Heroda. Ua tǎpǔ atura te arii e: “A ani mai i ta oe e hinaaro ra, e na ˈu ïa e ho atu na oe”, ma te tǎpǔ atoa e: “E o ta oe e ani mai ia ˈu nei, e horoahia ˈtu ïa e au, e tae noa ˈtu i te afa o to ˈu nei basileia.”Mc 6:22, 23

Hou a faahiti ai i ta ˈna aniraa, haere ê atura o Salome e ui atura i te manaˈo o to ˈna metua vahine. Na ô atura oia ia ˈna e: “Eaha ta ˈu e ani atu?”Mc 6:24

Teie hoi te taime i tiai-noa-hia e ana! “Te upoo o Ioane Bapetizo ra”, ta Herodia ïa i pahono atu ma te ore e haamarirau.Mc 6:24

I muri aˈe, hoˈi atura o Salome i pihai iho ia Heroda e ua na ô atura ia ˈna e: “Teie to ˈu hinaaro, e ho mai oe i te upoo o Ioane Bapetizo i roto i te hoê farii i teie nei â.”Mc 6:25

Oto rahi atura o Heroda. Tera râ, no te mea hoi e ua faaroo ta ˈna mau manihini ia ˈna i te parauraa i ta ˈna parau tǎpǔ, ua huru ê atura oia i te faaore atu, noa ˈtu e aratai te reira ia ˈna ia haapohe i te hoê taata hapa ore. Faaue atura oia ia na reirahia e, i taua iho taime ra, haere ihora te taata tâpû arapoa i te fare tapearaa no te rave faaoti i taua ohipa riaria mau ra. Aita i maoro roa, ua hoˈi maira taua taata ra e te upoo o Ioane i roto i te hoê farii ta ˈna i pûpû atu na Salome; hopoi oioi atura oia i to ˈna metua vahine ra. I to ratou iteraa i te ohipa i tupu, ua tii maira te mau pǐpǐ a Ioane i te tino i te fare tapearaa no te tanu ia ˈna, e ua faaite aˈera ratou i te parau peapea ia Iesu.

I muri iho, i to Heroda faarooraa e ua faaora o Iesu i te feia maˈi e ua tiavaru oia i te mau demoni, ahoaho aˈera oia, no te mea ua aniani ihora oia e e ere anei taua taata ra o Ioane o tei faatiahia mai mai te pohe mai. I muri aˈe, ua hinaaro rahi aˈera oia e ite ia Iesu, eiaha no te faaroo i ta ˈna haapiiraa, no te ite râ e ua tano anei ta ˈna mau mǎtaˈuraa aore ra aita. Mataio 10:1-5; 11:1; 14:1-12; Mareko 6:14-29; Luka 9:7-9.

◆ Eaha te tumu o Ioane i tuuhia ˈi i roto i te fare tapearaa, e no te aha aita o Heroda i hinaaro e haapohe ia ˈna?

◆ Mea nafea to Herodia tapaeraa i te haapohe ia Ioane?

◆ I muri aˈe i te poheraa o Ioane, no te aha o Heroda i hinaaro ai e ite ia Iesu?

[Hohoˈa api taatoa i te api 15]