Te faaitoito nei te nunaa a Iehova i roto i te faaroo
“Itoito atura te mau ekalesia i te faaroo, tupu atura i te rahiraa, aita e mahana tuua.” — OHIPA 16:5.
1. Mea nafea to te Atua faaohiparaa i te aposetolo Paulo?
UA FAAOHIPA o Iehova ia Saulo no Tareso mai te hoê “farii maitihia”. A riro ai oia ei aposetolo Paulo, ua ‘faaoromai oia e rave rahi mau mea’. Maoti râ ta ˈna ohipa e te ohipa a te tahi atu mau kerisetiano, ua ite te faanahonahoraa a Iehova i te autahoêraa e te hoê parareraa faahiahia mau. — Ohipa 9:15, 16.
2. No te aha e mea faufaa na tatou ia hiˈopoa i te Ohipa 13:1 e tae atu i te 16:5?
2 Ua riro vetahi mau Etene, o te rahi noa ˈtura, ei mau kerisetiano, e ua faatupu ihora te hoê apooraa faufaa mau o te tino aratai, i te autahoêraa o te mau tavini a te Atua e ua faaitoito aˈera ia ratou i roto i te faaroo. Mea faufaa roa na tatou ia tuatapapa i taua mau ohipa i tupu na e te tahi atu tei faahitihia i roto i te Ohipa 13:1 e tae atu i te 16:5, no te mea te ite nei te mau Ite no Iehova i teie mahana i te hoê â maraaraa e te hoê â mau haamaitairaa i te pae varua (Isaia 60:22). (I roto i ta outou haapiiraa tataitahi o te mau tumu parau o teie nei vea no nia i te buka a te mau Ohipa, te faaitoito nei matou ia outou ia taio i te mau irava o taua buka ra o tei papai-orarahi-hia.)
Te ohipa nei te mau mitionare
3. Eaha te ohipa i faatupuhia i Anetiohia e ‘te tahi mau peropheta e te tahi mau orometua’?
3 Ua tauturu te mau taata i tonohia e te amuiraa, i Anetiohia no Suria, i te feia faaroo ia itoito mai i roto i te faaroo (13:1-5). I Anetiohia, te vai ra ‘te tahi mau peropheta e te tahi mau orometua’: Baranaba, Simeona (Nigere), Lukio no Kurene, Manaena e o Saulo no Tareso. E faataa na te mau peropheta i te Parau a te Atua e e faaite na ratou i te mau ohipa e tupu mai, area te mau orometua ra, e horoa ïa ratou i te hoê haapiiraa no nia i te mau Papai Moˈa e no nia i te huru oraraa o te feia paieti (Korinetia 1, 13:8; 14:4). Ua noaa maira ia Baranaba e ia Saulo i te hoê ohipa taa ê. Ma te rave ia Mareko, fetii no Baranaba, na muri iho ia raua, haere atura ratou i Kupero (Kolosa 4:10). Ua poro aˈera ratou i roto i te mau sunago no Salami, tapearaa pahi no te pae hitia o te râ o te motu, aita râ hoê aˈe mea e haapapu ra e ua farii maitai te mau ati Iuda i ta ratou poroi. I te mea e e feia navai taua mau ati Iuda ra i te pae faufaa, eaha hoi ratou e hinaaro ai i te Mesia?
4. Eaha te ohipa i tupu a tamau noa ˈi te mau mitionare i te rave i ta ratou ohipa pororaa i Kupero?
4 Ua haamaitai te Atua i te ohipa pororaa i ravehia i te vahi ê, i Kupero (13:6-12). I Papho, ua farerei aˈera te mau mitionare ia Bara-iesu (Elima), taata tahutahu e peropheta haavare ati iuda. A tamata ˈi oia i te tapea i te tavana ra o Serigio Paulo ia faaroo i te parau a te Atua, ua haamata aˈera o Saulo i te î i te varua moˈa e ua parau atura e: “Auê oe i î i te haavare e te ino e, e te fanauˈa a te diabolo e, e enemi oe no te mau parau-tia atoa nei, eita oe e faaea i te haapiˈo i te parau titiaifaro a te Fatu nei?” I taua taime iho, faautua ihora te Atua iho ia Elima ma te haapouri i to ˈna mata no te hoê taime, e “faaroo atura [o Serigio Paulo], maere roa ˈtura hoi i te parau a te Fatu [Iehova]”.
5, 6. a) A parau ai oia i roto i te sunago no Anetiohia i Pisidia, eaha ta Paulo i faahiti no nia ia Iesu? b) Eaha te ohipa i tupu i muri aˈe i te oreroraa parau a Paulo?
5 Mai Kupero, reva ˈtura te pǔpǔ i Perege, i te fenua Asie Mineure. Ua tapea o Paulo e o Baranaba i to raua tere i te pae apatoerau. Ua tere aˈera raua na roto i te mau peho nainai e te atâata hoi, peneiaˈe ‘na roto i te mau ati i te pape tahe, e te mau ati i te feia eiâ’, e tapae atura i Anetiohia i Pisidia (Korinetia 2, 11:25, 26). I reira, ua paraparau ihora Paulo i roto i te sunago (13:13-41). Ua faahaamanaˈo atura o ˈna i te mau huru raveraa a te Atua i nia ia Iseraela e ua faaite ihora ia Iesu, huaai a Davida, mai te Faaora. Noa ˈtu e ua anihia aˈera e te mau upoo faatere ati iuda e ia haapohehia o Iesu, ua tupu râ te parau tohu i horoahia i to ratou mau tupuna a faatia ˈi te Atua ia ˈna (Salamo 2:7; 16:10; Isaia 55:3). Ua faaitoito aˈera o Paulo i ta ˈna feia faaroo ia ore e haavahavaha i te ora ta te Atua e pûpû ra na ratou na roto i te arai o te Mesia. — Habakuka 1:5, Septante.
6 Ua faaara te oreroraa parau a Paulo i te anaanatae o te mau taata, mai te mau oreroraa parau huiraatira faahitihia i teie mahana e te mau Ite no Iehova (13:42-52). I te sabati i muri iho, ua putuputu aˈera fatata te oire atoa no te faaroo i te parau a Iehova, e ua î roa te mau ati Iuda i te pohehae. A feruri na! I roto i te hoê noa hebedoma, mai te huru ra e ua rave te mau mitionare e ia taui e rave rahi aˈe Etene i taua mau ati Iuda ra i roto i te roaraa o to ratou oraraa! No te mea e te patoi nei te mau ati Iuda ia Paulo na roto i te mau parau faaino, ua tae ihora te taime no te haere e faaanaana i te maramarama i te pae varua i te tahi atu vahi. Ua parau aˈera o Paulo e: ‘O outou râ i tute ê atu i te parau a te Atua, e te parau na outou eita outou e au i te ora mure ore, inaha, te fariu nei matou i te Etene.’ — Isaia 49:6.
7. Eaha ta Paulo e ta Baranaba i rave i mua i te hamani-ino-raa?
7 Ua haamata aˈera te mau Etene i te oaoa, e ua riro mai te feia atoa i roto i te huru faanahoraa i haapaohia no te ora mure ore, ei feia faaroo. Mai te mea ra e ua tae roa te parau a Iehova i roto i te fenua atoa, ua tiarepu aˈera te mau ati Iuda i te mau vahine mana pure (peneiaˈe no te faaruri ê i te manaˈo o ta ratou mau tane aore ra o te tahi mau taata) e te mau taata haava ia hamani ino ratou ia Paulo e ia Baranaba e ia tiahi ê atu ia raua mai to ratou fenua. Aita te mau mitionare i faaea i ta ratou ohipa. Ua ‘ueue noa ˈtura raua i te repo i to raua avae ia ratou’ e haere atura i Ikonio (i teie mahana Konya), oire rahi no te tuhaa oire no Roma i Galatia (Luka 9:5; 10:11). Eaha te ohipa i tupu no te mau pǐpǐ i vaiihohia i Anetiohia no Pisidia? No te mea e ua faaitoitohia ratou i roto i te faaroo, ua “î aˈera [ratou] i te oaoa e i te [v]arua [moˈa]”. Te tauturu nei teie aamu ia tatou ia taa e aita te patoiraa e haafifi nei, i te mau taime atoa, i te mau haereraa i mua i te pae varua.
Mau papu i roto i te faaroo noa ˈtu te hamani-ino-raa
8. Eaha te faahopearaa o te faaiteraa maitai i horoahia i Ikonio?
8 Ua mau papu aˈera o Paulo e o Baranaba iho i roto i te faaroo noa ˈtu te hamani-ino-raa (14:1-7). Maoti te faaiteraa ta ratou i horoa i roto i te sunago i Ikonio, ua riro mai e rave rahi ati Iuda e Heleni ei feia faaroo. A tiarepu ai te mau ati Iuda o tei ore i faaroo, i te mau Etene no te patoi i te feia faaroo apî, ua paraparau aˈera na mitionare rohirohi ore e piti ma te itoito na roto i te mana o te Atua, o tei faaite e te farii nei oia ia raua ma te horoa ˈtu ia raua i te puai no te faatupu i te mau semeio. I reira râ, amahamaha ˈtura te pǔpǔ taata: no te mau ati Iuda vetahi, e te tahi pae, no te mau aposetolo ïa (te feia i tonohia). E ere te mau aposetolo e feia riaria haere noa, a ite ai râ ratou i te opuaraa ino i faaineinehia no te pehi ia ratou i te ofai, ua faaite ratou i te paari ma te faarue i te oire no te haere e poro i Lukaonia, fenua no Asie Mineure i te pae apatoa no Galatia. O tatou atoa, ma te haapao maitai, e nehenehe noâ tatou e vai itoito noa i roto i te taviniraa noa ˈtu te patoiraa. — Mataio 10:23.
9, 10. a) Eaha ta te feia no Lusetera i tiaturi i muri aˈe i to ratou iteraa i te faaoraraahia te hoê taata hapepa? b) Eaha te huru o Paulo e o Baranaba i mua i taua huru tupuraa ra i Lusetera?
9 I Lusetera ïa, oire no Lukaonia, i horoahia ˈi te faaiteraa i muri iho (14:8-18). Ua faaora aˈera o Paulo i te hoê taata pirioi mai to ˈna fanauraahia mai â. Ma te ore e taa ra e o Iehova te tumu o teie semeio, ua tuô aˈera te feia rahi e: “Ua pou mai te mau atua i raro i ǒ tatou nei mai te taata ra te huru.” No te mea e te parau ra ratou na roto i te reo lukaonia, aita ïa o Baranaba e o Paulo e taa ra eaha te ohipa e tupu ra. E i te mea e o Paulo iho â râ te paraparau ra, te manaˈo ra ïa te mau taata e o Hereme o ˈna (te vea rahi a te mau atua), e o Baranaba, o Zia ïa, te atua rahi roa ˈˈe o te mau atua heleni.
10 Ua hopoi atoa aˈera te tahuˈa no Zia i te tahi mau puaatoro e te tahi mau faaunauna no te pûpû i te tahi mau tusia ia Paulo e ia Baranaba. Peneiaˈe na roto i te reo heleni, reo i taa-maitai-hia, aore ra na roto i te arai o te hoê taata o te huri i te parau, ua oioi aˈera te mau ratere i te faataa ˈtu e e mau taata atoa ratou e te vai atoa ra to ratou mau paruparu, e te faaite nei ratou i te parau apî maitai ia nehenehe te mau taata ia faarue i “taua mau mea maamaa nei” (te mau atua, aore ra idolo aita e ora) no te huri tia ˈtu i nia i te Atua ora ra (Te mau Arii 1, 16:13; Salamo 115:3-9; 146:6). Oia mau, i mutaa ihora, ua faatia te Atua i te mau nunaa (eiaha râ i te mau ati Hebera) ia pee i to ratou eˈa, noa ˈtu e aita ratou i vaiiho-noa-hia ma te faaite-ore-hia no nia i to ˈna vai-mau-raa e to ˈna maitai, ‘ma te horoa ˈtu no ratou i te ûa no nia i te raˈi ra, e te anotau auhune, e te faaîraa mai i to ratou aau i te maa e te oaoa’. (Salamo 147:8.) Noa ˈtu taua huru haaferuriraa ra, ua fifi roa o Baranaba e o Paulo i te tapearaa ˈtu i te feia rahi ia pûpû mai i te hoê tusia na raua. Aita râ taua mau mitionare i farii e ia faahanahanahia raua mai te mau atua, aita atoa i faaohipa i te mana i horoahia ia raua no te rave e ia riro te mau taata no taua vahi ra ei mau kerisetiano. Auê ïa hiˈoraa nehenehe mau no tatou, mai te peu iho â râ e te hinaaro nei tatou e ia faahanahanahia tatou no te mea ta Iehova e faatia ra ia tatou ia rave i roto i ta ˈna taviniraa!
11. Eaha ta tatou e haapii ra na roto i te parau ra e: “E na roto tatou i te pohe rahi e ô atu ai i te basileia o te Atua ra”?
11 Ua haamata faahou aˈera te hamani-ino-raa ma te tupu taue noa (14:19-28). Nafea ïa te reira! Ma te turaihia e te mau ati Iuda no Anetiohia i Pisidia e no Ikonio, ua pehi atura te feia rahi ia Paulo i te ofai e ua aratai aˈera ia ˈna i rapaeau i te oire, ma te manaˈo e ua pohe roa oia (Korinetia 2, 11:24, 25). A putuputu ai râ te mau pǐpǐ i pihai iho ia ˈna, tia ˈtura oia e haere ihora ma te tapuni i roto i te oire o Lusetera, peneiaˈe i te po. E ao aˈera, reva ˈtura o Paulo e o Baranaba i Derebe, i reira to raua faariroraa e rave rahi mau taata ei pǐpǐ. A hoˈi faahou mai ai raua i Lusetero, i Ikonio e i Anetiohia, ua faaitoito aˈera te mau mitionare i te mau pǐpǐ, ua aˈo atura e ia mau papu ratou i roto i te faaroo e ua parau ihora ia ratou e: “E na roto tatou i te pohe rahi e ô atu ai i te basileia o te Atua ra.” O tatou te mau kerisetiano, te tiai atoa ra tatou e ia roohia tatou i te mau hamani-ino-raa, e eita e tia ia tatou ia tamata i te ape i te reira ma te ofati i to tatou faaroo (Timoteo 2, 3:12). Tei taua tau ra te mau matahiapo i tuuhia ˈi i roto i te mau amuiraa, e no taua mau amuiraa ra hoi i faataehia ˈi te rata a Paulo i to Galatia.
12. A hope ai te tere mitionare matamua a Paulo, ua rave na mitionare e piti i te aha?
12 Ma te haere tia ˈtu na roto i te oire no Pisidia, ua faahiti aˈera o Paulo e o Baranaba i te parau i Perege, oire matamua no Pamephulia. I muri iho, hoˈi atura raua i Anetiohia no Suria. Hope aˈera te tere matamua a Paulo e ua faatia aˈera na mitionare e piti i te amuiraa “i ta te Atua i rave ia raua ra, e ua iriti oia i te uputa faarooraa no te Etene”. Ua parahi maoro atura raua e te mau pǐpǐ no Anetiohia, e papu maitai e na te reira i faaitoito rahi atu â ia ratou i roto i te faaroo. I to tatou nei tau, e ohipa maitai atoa o te tupu mai i te pae varua, ia haere anaˈe mai te mau tiaau e farerei i te amuiraa.
Faaotiraahia te hoê uiraa faufaa
13. Eaha te mea i titauhia ia ore te kerisetianoraa ia amahamaha na roto i te hoê pǔpǔ heleni e te hoê pǔpǔ e ere i te ati iuda?
13 No te mau papu i roto i te faaroo, e tia ïa ia roaa te autahoêraa no nia i te manaˈo (Korinetia 1, 1:10). Ia ore te kerisetianoraa ia amahamaha na roto i te hoê pǔpǔ hebera e na roto i te hoê pǔpǔ e ere i te ati iuda, e tia ˈtura ïa i te tino aratai ia faaite e mai te peu e e tia i te mau Etene o tei haere maira i roto i te faanahonahoraa a te Atua, ia faatura i te Ture a Mose e ia peritomehia (15:1-5). Ua tae aˈena mai te tahi mau taata no Iudea i Anetiohia no Suria e ua haamata ratou i te haapii i te feia faaroo e ere i te ati iuda e eita ratou e ora mai te peu e eita ratou e peritomehia (Exodo 12:48). Ua tonohia aˈera râ o Paulo, o Baranaba e te tahi atu mau kerisetiano i pihai iho i te mau aposetolo e te mau matahiapo i Ierusalema. Oia atoa i reira, ua faahiti papu aˈera vetahi feia faaroo, e mau Pharisea turu i te ture i mutaa ihora, e e tia i te mau Etene ia peritome ia ratou e ia pee i te Ture.
14. a) Noa ˈtu e ua tupu te hoê paraparauraa i roto i te apooraa i Ierusalema, eaha te hiˈoraa maitai o tei horoahia? b) Ei haapoto-noa-raa, eaha te haaferuriraa ta Petero i horoa i taua putuputuraa ra?
14 Ua haaputuputuhia aˈera te hoê apooraa no te ite e eaha mau na te hinaaro o te Atua (15:6-11). Ma te papu, ua tupu te hoê aparauraa, aita râ hoê tatamaˈiraa i tupu mai i rotopu i te mau taata, e tiaturiraa hohonu hoi to ratou, o tei faaite i to ratou manaˈo. Ua riro te reira ei hiˈoraa nehenehe mau no te mau matahiapo i teie mahana. I te hoê taime, ua parau aˈera o Petero e: ‘Ua haapao te Atua i roto ia tatou nei ia ˈu i mutaa iho, ia ite te Etene [mai ia Korenelio] i te evanelia i to ˈu nei vaha ia faaroo. Ua faatia mai ia ratou, i te horoaraa mai i te varua moˈa ia ratou, e aore hoi i faahuru ê atu ia ratou e ia tatou nei [Ohipa 10:44-47]. Eaha outou i haapeapea ˈtu ai i te Atua, i te tuuraa i te zugo [te faaheporaa ia haapao i te Ture] i nia i to ratou aˈî, aore i maraa i to tatou hui tupuna ra e ia tatou atoa nei hoi? E ora tatou [te mau ati Iuda i te pae tino] i te aroha o to tatou Fatu o Iesu Mesia, mai ia ratou atoa ra.’ Ma te farii i te mau Etene peritome-ore-hia, te faaite ra te Atua e e ere te peritomeraa e te auraroraa i te Ture i te mea titauhia no te ora. — Galatia 5:1.
15. Eaha te mau manaˈo faufaa ta Iakobo i faahiti, e ua faaitoito aˈera oia ia papai i te mau kerisetiano e ere i te ati iuda, i te aha?
15 Ua mamû aˈera te feia i putuputu mai a faaoti ai o Petero, e faaite-faahou-hia mai râ te tahi atu mau haapapuraa parau (15:12-21). Ua faahiti aˈera o Baranaba e o Paulo i te mau tapao ta te Atua i faatupu na roto ia raua, i rotopu i te mau Etene. I muri iho, ua parau aˈera o Iakobo, taetaeae no Iesu, e na ˈna e faatere ra i te putuputuraa e: ‘Ua parau mai nei Simeona [iˈoa hebera no Petero] e, ua hiˈo aroha mai te Atua i te Etene i mutaa ihora, e rave i te hoê pae taata i roto ia ratou ra no to ˈna ra iˈoa.’ Ua faataa aˈera o Iakobo e te haamata ra te parau tohu e faaite ra i te hamani-faahou-raa i te “sekene o Davida” (te haamau-faahou-raahia i te faatereraa arii i roto i te huaai a Davida), i te tupu na roto i te putuputuraa mai te mau pǐpǐ a Iesu (te feia aiˈa o te Basileia) tei maitihia i rotopu i te mau ati Iuda e i rotopu atoa i te mau Etene (Amosa 9:11, 12, Septante; Roma 8:17). I te mea e na te Atua iho e hinaaro ra i taua haaputuputuraa ra, e tia i te mau pǐpǐ ia farii i te reira. Ua aˈo atura o Iakobo e ia papaihia i te mau kerisetiano e ere i te ati iuda, ia faarue ratou 1) i te maa i afaihia na te mau idolo ra, 2) i te faaturi, e 3) i te toto e i te mea uumihia. Tei roto taua mau opaniraa i te mau papai a Mose o tei taiohia i roto i te mau sunago i te mau sabati atoa. — Genese 9:3, 4; 12:15-17; 35:2, 4.
16. Eaha na tuhaa e toru o te rata a te tino aratai o te senekele I o tei horoa i te hoê aratairaa i te mau kerisetiano e tae roa i to tatou nei tau?
16 Ua faatae aˈera te tino aratai i te hoê rata i te mau kerisetiano e ere i te ati iuda no Anetiohia, no Suria e no Kilikia (15:22-35). Ua ani ihora te varua moˈa e te feia i papai i taua rata ra, ia ratou, ia haapae i te mau mea i pûpûhia ˈtu na te mau idolo, i te toto (tei amu-tamau-hia nei e vetahi), i te mea uumihia (e rave rahi feia aita e tiaturi ra i te Atua, o tei manaˈo nei e ua riro te iˈo tei ore i faatahehia i te toto mai te hoê maa maitai roa), e i te faaturi (pornéïa na roto i te reo heleni, oia hoi te auraa te mau taatiraa i te pae tino hairiiri i rapaeau mai i te mau taairaa o te faaipoiporaa ia au i te Bibilia). Ma te patoi i taua mau mea ra, e taoˈahia ïa taua mau kerisetiano ra i te pae varua, mai tei itehia no te mau Ite no Iehova i to tatou nei tau no te mea te faatura nei ratou i ‘taua mau mea tia ra’. Hoê â auraa to te faaohiparaa i te parau ra “Ia ora na.” i te parau ra “A parahi”; eita ïa e tia ia faaoti e, taua mau faaheporaa ra, e mau ravea noa ïa i te pae o te oraora-maitai-raa o te tino. A taiohia ˈi taua rata ra i Anetiohia, oaoa roa aˈera te amuiraa no te faaitoitoraa ta te reira i horoa no ratou. Ua haapaari-atoa-hia te mau tavini a te Atua e noho ra i Anetiohia, i roto i te faaroo, na roto i te mau parau faaitoito a Paulo, a Sila, a Baranaba e a te tahi atu â. O tatou atoa, ia tamau noa na tatou i te faaitoito atu e i te haapaari i to tatou mau hoa kerisetiano.
Haamataraa i te piti o te tere mitionare
17. a) Eaha te fifi i tupu mai a opuahia ˈi te piti o te tere mitionare? b) Mea nafea to Paulo e to Baranaba faaafaroraa i to raua peapea?
17 Ua tupu mai te hoê fifi a opuahia ˈi te piti o te tere mitionare (15:36-41). Ua ani aˈera o Paulo ia Baranaba ia haere raua e piti atoa i roto i te mau amuiraa no Kupero e no Asie Mineure. Ua farii atura o Baranaba, ua hinaaro atoa râ oia e aratai mai i to ˈna fetii o Mareko. Aita râ o Paulo i farii, no te mea ua faarue o Mareko ia raua i Pamephulia. Tupu atura “te mârô rahi ia raua iho”. Tera râ, aita o Paulo e aita atoa o Baranaba i imi i te faatano ia raua ma te tamata i te faaô mai i te tahi atu mau matahiapo aore ra i te tino aratai i roto i ta ratou iho peapea. Auê ïa hiˈoraa maitai e!
18. Eaha te faahopearaa o te faataa-ê-raa o Paulo e o Baranaba, e eaha ta taua fifi ra e faahaamanaˈo ia tatou?
18 Noa ˈtu te reira, ua faatupu taua peapea ra i te hoê faataa-ê-raa. Ua rave aˈera o Baranaba ia Mareko e haere atura i Kupero. Area o Paulo, apeehia mai e Sila, “haere atura oia na Suria e na Kilikia, i te faaitoitoraa i te mau ekalesia”. Ua vaiiho paha o Baranaba ia ˈna ia arataihia e te mau taairaa fetii, e tia hoi ia ˈna ia haapao i te mea e e aposetolo o Paulo e e “farii maitihia” o ˈna. (Ohipa 9:15.) E o tatou? E tia i taua ohipa i tupu na ia faahaamanaˈo ia tatou i te faufaaraa ia farii i te mana teotaratia e ia ohipa maite e “te tavini haapao maitai e te paari”. — Mataio 24:45-47.
Mau haereraa i mua tei faatupuhia i roto i te hau
19. Ua riro o Timoteo ei hiˈoraa no te mau kerisetiano no teie mahana i roto i teihea auraa?
19 Aita taua peapea ra i faaarepurepu i te hau i roto i te amuiraa. Ua tamau â te nunaa a te Atua i te faaitoito i roto i te faaroo (16:1-5). Ua haere atura o Paulo e o Sila i Derebe e tae roa ˈtu ai i Lusetero, i reira o Timoteo e ora ˈi, tamaiti na te hoê vahine ati Iuda faaroo, o Eunike, e na te hoê Heleni e ere i te taata faaroo. Mea apî roa o Timoteo, no te mea 18 aore ra e 20 matahiti i muri iho, ua papai â o Paulo ia ˈna e: “Eiaha roa ei taata e vahavaha mai i to apîraa na.” (Timoteo 1, 4:12). Mai te peu e “e taata roo maitai hoi oia i te mau taeae i Lusetera e Ikonio [mau oire tei atea e toru ahuru kilometera]”, no te mea ïa ua matau-maitai-hia oia no ta ˈna taviniraa maitai roa e to ˈna mau huru maitai tei auhia e te Atua. I to tatou nei tau, e tia i te mau kerisetiano apî ia imi i te tauturu a Iehova no te patu i te hoê roo mai te reira te huru. Ua peritome aˈera te aposetolo Paulo ia Timoteo, no te mea e haere raua i roto i te mau fare e te tahi mau sunago a te mau ati Iuda o tei ite e te metua tane o Timoteo, o te hoê Etene ïa, e aita oia i hinaaro e ia riro te reira ei marei no te mau ati Iuda tane e no te mau ati Iuda vahine o tei hinaaro ra e haapii no nia i te Mesia. I to tatou nei mau mahana, ma te ore e ofati i te mau faaueraa, te rave nei te mau Ite no Iehova i te mau mea atoa ia nehenehe te mau taata atoa e farii i te parau apî maitai. — Korinetia 1, 9:19-23.
20. Eaha tei roaa mai i te mau amuiraa no to ratou auraroraa i te rata a te tino aratai o te senekele I, e, ia au i to outou manaˈo, eaha te haapiiraa ta tatou e nehenehe e huti mai no nia i to ratou hiˈoraa?
20 Tauturuhia e Timoteo, ua horoa o Paulo e o Sila i te mau ture a te tino aratai, ia haapao ratou i te reira. Eaha ïa te faahopearaa? Ma te manaˈo paha i te oire no Suria, no Kilikia e no Galatia, ua papai o Luka e: “Itoito atura te mau ekalesia i te faaroo, tupu atura i te rahiraa, aita e mahana tuua.” Oia mau, ua tauturu te auraroraa i te rata a te tino aratai i te autahoêraa e i te maitai i te pae varua. Auê ïa hiˈoraa maitai i to tatou nei tau hopea no te nunaa a Iehova o te tia ia vai tahoê noa e ia mau papu i roto i te faaroo!
Eaha ta outou e pahono mai?
◻ Eaha te huru o Paulo e o Baranaba i mua i te hamani-ino-raa?
◻ Eaha ta tatou e nehenehe e haapii mai no nia i teie mau parau: “E na roto tatou i te pohe rahi e ô atu ai i te basileia o te Atua ra”?
◻ Te haapii maira na tuhaa e toru o te rata i faataehia e te tino aratai o te senekele I, ia tatou, i te aha?
◻ Eaha te mea, mai te senekele I, e faaitoito ra i te faaroo o te mau Ite no Iehova?