Taata tei pohe i te hoê oroa fanauraa

A rave ai te mau aposetolo a Iesu i ta ratou taviniraa i Galilea, to roto noa â Ioane Bapetizo, tei parau e o Iesu te Arenio a te Atua, i te fare tapearaa fatata e piti matahiti.

I parau roa na hoi Ioane e aita i tano to te arii Heroda Anitipa raveraa ia Herodia, te vahine faaipoipo a Philipa to ˈna taeae, ei vahine na ˈna. I faataa na Heroda ia raua ta ˈna vahine matamua no te faaipoipo ia Herodia. Ia au i te ture a Mose, ta Heroda e faahua haapao ra, e faaipoiporaa faaturi teie tei opanihia e te ture. No te au ore i te faahaparaa a Ioane, faaue ihora Heroda ia tapeahia Ioane, mea onoonohia paha e Herodia.

Aita Heroda i ite e nahea o ˈna ia Ioane, te manaˈo ra hoi te taata e e peropheta Ioane. (Mataio 14:5) O Herodia râ, ua ite maitai ïa eaha ta ˈna e rave. E inoino rahi to ˈna ia Ioane, e te imi noa ra oia i te ravea no te haapohe ia Ioane. (Mareko 6:19) Tae maira te taime e tupu ai ta ˈna opuaraa.

Na mua ˈˈe i te Pasa 32, faatupu ihora Heroda i te hoê oroa rahi no to ˈna mahana fanauraa. Ua tae mai ta ˈna mau tia faatere, raatira nuu, e te feia tiaraa teitei no Galilea. I taua oroa ra, tonohia maira Salome, te tamahine a Herodia i ta ˈna tane faaipoipo matamua o Philipa, e ori no te mau manihini. Ua au roa Heroda e ta ˈna mau manihini.

No to ˈna mauruuru rahi i te tamahine a ta ˈna vahine, na ô atura Heroda: “A ani mai i ta oe e hinaaro, e horoa ˈtu vau.” Horeo atoa ˈtura oia: “Ta oe e ani mai, e horoa ˈtu vau, tae noa ˈtu i te afaraa o ta ˈu faatereraa.” Hou Salome a pahono ai, haere ihora oia i rapaeau e ui atura i to ˈna metua vahine: “Eaha ta ˈu e ani?”—Mareko 6:22-24.

Teie te taime ta Herodia i tiai noa na! Pahono oioi maira oia: “Te upoo o Ioane Bapetizo.” Hoˈi ru ihora Salome ia Heroda ra e na ô maira: “Te hinaaro nei au ia horoa mai oe i teie nei i te upoo o Ioane Bapetizo i roto i te hoê farii maa.”—Mareko 6:24, 25.

Peapea roa ihora Heroda, ua faaroo hoi ta ˈna mau manihini i ta ˈna i horeo ia Salome. Eita ta ˈna e nehenehe e otohe, noa ˈtu e e pohe te hoê taata aita e hara ta ˈna. Tono ihora ïa Heroda i te hoê faehau i te fare tapearaa ma te faaue e hopoi mai i te upoo o Ioane. Hoˈi oioi maira te faehau e te upoo o Ioane i roto i te hoê farii maa, e horoa maira ia Salome ra, o tei afai atu i to ˈna metua vahine.

I to te mau pǐpǐ a Ioane faarooraa i te ohipa i tupu, haere maira ratou e tii i to ˈna tino, huna aˈera e haere atura e faaite ia Iesu.

I muri aˈe, i to Heroda Anitipa faarooraa i to Iesu faaoraraa i te maˈi e tiavaruraa i te demoni, horuhoru ihora oia. Ua uiui oia e ere anei o Ioane Bapetizo tei “tia faahou . . . mai te pohe mai” te taata ra o Iesu e rave ra i teie mau ohipa. (Luka 9:7) Hinaaro roa ˈtura oia e ite ia Iesu, e ere iho â ïa no te faaroo i ta ˈna pororaa, no te ite papu râ e ua tano anei oia i te haapeapearaa aore ra aita.