A tiaturi i te Atua no te oaoa e to hoa faaipoipo

Na Iehovaa i faatupu i te faaipoiporaa matamua. Te faaite ra te Bibilia e ua hamani oia i te vahine matamua e ‘ua aratai ia ˈna ia Adamu.’ Ua oaoa roa te tane matamua i parau ai oia: “E ivi teie no to ˈu nei ivi, e iˈo hoi no to ˈu nei iˈo.” (Genese 2:22, 23) Te hinaaro noa ra Iehova ia oaoa te feia faaipoipo.

I manaˈo na paha oe e eita te feia faaipoipo e fifi noa ˈˈe, e ere roa ˈtu râ mai tera. Noa ˈtu e mea here roa na hoa faaipoipo te tahi i te tahi, e faaruru iho â raua i te fifi. (Korinetia 1, 7:28) I roto i teie buka rairai, e ite oe i te mau aratairaa Bibilia o te tauturu atu. Ia haapao oe i te reira, e oaoa orua e to orua utuafare atoa.—Salamo 19:8-11.

1 A FARII I TE HOPOIA TA IEHOVA I HOROA ˈTU

TA TE BIBILIA E PARAU RA: O te tane te upoo o te utuafare.—Ephesia 5:23.

E tane faaipoipo anei oe? Te titau atura Iehova ia aupuru i ta oe vahine. (Petero 1, 3:7) Ua hamani oia ia ˈna ei tauturu au no oe e te hinaaro ra ia faatura e ia here oe ia ˈna. (Genese 2:18) E itehia te reira ia haapao na mua oe i to ˈna mau hinaaro.—Ephesia 5:25-29.

E no oe te vahine faaipoipo, te hinaaro ra Iehova ia faatura mau oe i ta oe tane e ia tauturu ia ˈna ia haapao i ta ˈna hopoia. (Korinetia 1, 11:3; Ephesia 5:33) A turu atu ïa i ta ˈna mau faaotiraa e a haa amui e o ˈna. (Kolosa 3:18) Ma te na reira, e vahine nehenehe ïa oe i te aro o to tane e o Iehova atoa.—Petero 1, 3:1-6.

TA OE E NEHENEHE E RAVE:

• A ani i to hoa faaipoipo e nafea oe e riro ai ei tane aore ra ei vahine maitai aˈe. A faaroo maite e a rave i te nehenehe no te taui

• A faaoromai, e titauhia hoi te taime ia haapii orua e nafea ia faaoaoa te tahi i te tahi

2 A HAAPAO MAITE I TE MAU HINAARO O TO HOA

TA TE BIBILIA E PARAU RA: E tia ia haapao maite oe i te mau hinaaro o to hoa faaipoipo. (Philipi 2:3, 4) A faaite e mea faufaa o ˈna no oe ma te haamanaˈo e te titau ra Iehova i ta ˈna mau tavini ia faaite ‘i te mǎrû i te taata atoa.’ (Timoteo 2, 2:24) Teie ta te Bibilia e parau ra: “Te taata vavi noa ra, e au ïa i te ˈoˈe patiatia ra; o te arero râ o te taata paari ra, mai te raau rapaau maˈi ra ïa.” A haapao maitai i ta oe mau parau. (Maseli 12:18) E tauturu atu te varua moˈa o Iehova ia paraparau ma te mǎrû e ma te here.—Galatia 5:22, 23; Kolosa 4:6.

TA OE E NEHENEHE E RAVE:

• Hou a tauaparau ai no nia i te tahi ohipa faufaa, a pure no te ore e riri e no te faaroo i to ˈna manaˈo

• A feruri maite i ta oe e parau e e nafea ia parau

3 A HAA AMUI

TA TE BIBILIA E PARAU RA: I te faaipoiporaa, e riro orua ei “hoê.” (Mataio 19:5) E titauhia râ ia haapii e nafea ia na reira noa no te taa ê o to orua huru e manaˈo. (Philipi 2:2) Mea faufaa roa ˈtu â ia hoê orua no te rave i te faaotiraa. Te na ô ra te Bibilia: “Ia rahi te ui [aore ra aˈo] e papu ai tei manaˈohia.” (Maseli 20:18) A vaiiho i te mau aratairaa Bibilia ia tauturu ia orua ia rave amui i te faaotiraa faufaa mau.—Maseli 8:32, 33.

TA OE E NEHENEHE E RAVE:

• A faaite i to hoa eaha to oe huru, eiaha noa râ i ta oe i ite aore ra e manaˈo ra

• A ani i te manaˈo o to hoa hou a rave ai i te faaotiraa