E nafea te mau tiaau haaati e tauturu mai ai?

E faahiti pinepine te mau Papai Heleni Kerisetiano ia Baranaba e i te aposetolo Paulo. E tiaau raua i ratere na na te mau amuiraa matamua. No te aha? No to raua haapeapea mau no to raua mau taeae pae varua. Ua parau Paulo e te hinaaro ra oia e “hoˈi . . . e hiˈo i te mau taeae” no te ite eaha to ratou huru. Noa ˈtu te atea, ua ineine oia i te haere e faaitoito ia ratou. (Ohipa 15:36) Mai tera atoa ta matou mau tiaau ratere i teie mahana.

E faaitoito mai. E piti taime i te matahiti, e tere te tiaau haaati tataitahi na roto e 20 amuiraa aore ra iti mai, hoê ïa tuhaa haaati. Hoê hebedoma i roto hoê amuiraa. E nehenehe matou e fanaˈo i te aravihi o teie mau taeae e o ta ratou iho vahine faaipoipo. Te faaitoito nei ratou i te haamatau i te feia apî e te feia paari atoa e te oaoa nei i te apee ia matou i roto i te pororaa e ta matou mau haapiiraa Bibilia. E apee atoa teie mau tiaau i te mau matahiapo ia haere ratou e faaitoito i te mau mero o te amuiraa. E horoa atoa ratou i te mau oreroraa parau i te mau putuputuraa e tairururaa.—Ohipa 15:35.

E haapao ratou i te taatoaraa. Te tâuˈa mau nei te mau tiaau haaati i te maitai pae varua o te mau amuiraa. E putuputu ratou e te mau matahiapo e tavini tauturu no te hiˈo i te haereraa i mua a te amuiraa e no te horoa i te tahi mau manaˈo no te amo i ta ratou mau hopoia. E tauturu ratou i te mau pionie ia rave maitai i ta ratou taviniraa, e mea au na ratou e haamatau i tei apiti apî mai, a ite atu ai i ta ratou haereraa i mua i roto i te parau mau. Mea itoito roa teie mau taeae i te ohipa no to matou maitai. (Korinetia 2, 8:23) E pee anaˈe i to ratou faaroo e here i te Atua.—Hebera 13:7.

• No te aha te mau tiaau haaati e tere ai na te mau amuiraa?

• E nafea oe e faufaahia ˈi i to ratou tere?