Eaha te hopoia a te mau tavini tauturu?

Te faataa ra te Bibilia e piti pǔpǔ tane Kerisetiano e amo nei i te hopoia i roto i te amuiraa, “te mau tiaau e te mau tavini tauturu.” (Philipi 1:1) Te vai ra teie mau taeae i roto i te mau amuiraa. Eaha te hopoia a te mau tavini tauturu?

E turu ratou i te tino matahiapo. Mea apî aore ra mea paari, e taairaa piri to ratou e o Iehova. E tane tiaturihia ratou e te haapao maitai. Na ratou e haapao i te mau ohipa faufaa tei taaihia i te amuiraa e i te Piha a te Basileia, ia nehenehe te mau matahiapo e haapao i te haapiiraa e te aupururaa i te nǎnǎ a Iehova.

Ua rau ta ratou ohipa. Na ratou e farii i te taata atoa e haere mai i te mau putuputuraa, e haapao i te matini haapuai reo, te mau papai, te faufaa moni a te amuiraa, aore ra te tuhaa fenua no te pororaa. E atuatu atoa ratou i te Piha a te Basileia. E ani paha te mau matahiapo ia ratou ia tauturu i te mau ruhiruhia. Noa ˈtu eaha te hopoia e horoahia ˈtu, e rave iho â te mau tavini tauturu ma te aau tae. Mea faatura te amuiraa ia ratou.—Timoteo 1, 3:13.

E horoa i te hiˈoraa maitai. No to ratou mau huru maitatai Kerisetiano i maitihia ˈi te mau tavini tauturu. Ia vauvau ratou i te mau tumu parau, e puai to matou faaroo. E faaitoitoraa to ratou hiˈoraa maitai i roto i te pororaa. No ta ratou turu i te tino matahiapo e tupu ai te oaoa e te auhoêraa. (Ephesia 4:16) E nehenehe ratou atoa e faaî i te mau titauraa no te tavini ei matahiapo.

• Mai te aha te huru o te mau tavini tauturu?

• Eaha te hopoia a te mau tavini tauturu?