E nafea ia tauturu i to matou mau taeae i roto i te ati?

Ia tupu te hoê ati, e faanaho oioi te mau Ite no Iehova i te tauturu no to ratou mau taeae e fifi ra. E haapapuraa tera mau tutavaraa i to matou here mau te tahi i te tahi. (Ioane 13:34, 35; Ioane 1, 3:17, 18) Eaha ta matou e rave?

E horoa i te moni. I te tupuraa te hoê oˈe rahi i Iudea, ua hapono te mau Kerisetiano matamua no Anetiohia i te moni na to ratou mau taeae pae varua. (Ohipa 11:27-30) Ia faaroo atoa matou e te fifi ra to matou mau taeae i te tahi vahi, e hapono matou i te tahi mau ô na roto i ta matou amuiraa no te tauturu atu.—Korinetia 2, 8:13-15.

E tauturu atu. Ia tupu te hoê ati i ǒ ratou, e imi te mau matahiapo e mea maitai anei te mau mero atoa o te amuiraa. E haapao te hoê tomite tauturu i te maa, te pape inu, te ahu, te puhapa e te mau ravea rapaauraa. Mea rahi te Ite no Iehova aravihi te haere e tauturu aore ra e tataî i te mau fare e Piha a te Basileia. Na ratou iho e aufau i to ratou tere. Maoti te auhoêraa o ta matou faanahonahoraa e te aravihi i noaa mai no te ohipa-amui-raa, ua ineine matou i te faanaho oioi i te tauturu i te mau taime ati. Te na reira nei matou no to matou “mau taeae e tuahine i roto i te faaroo” e no vetahi ê atoa ia nehenehe, aita e hiˈoraa i te haapaoraa.—Galatia 6:10.

E tamahanahana atu maoti te Bibilia. E hinaaro iho â te feia i roto i te ati i te tamahanahanaraa. Na Iehova, “te Atua no ˈna anaˈe te mahanahana” e faaitoito mai. (Korinetia 2, 1:3, 4) Te faaite nei matou ma te oaoa i te mau parau fafau Bibilia i te feia e ahoaho ra, ma te haapapu e ua fatata te Faatereraa arii a te Atua i te faaore i te mau ati atoa o te faatupu i te oto e te mauiui.—Apokalupo 21:4.

• No te aha e tia ˈi i te mau Ite no Iehova ia faanaho oioi i te tauturu i te mau taime ati?

• Eaha te tamahanahanaraa Bibilia ta matou e faaite i te feia i roto i te ati?