IA AU I TE BIBILIA
Eaha te tupu ia pohe tatou?
Ua rau te faataaraa a te mau haapaoraa no nia i te tupu ia pohe tatou. Mea papu râ ta te Bibilia e haapii ra.
Te vai ra anei te tahi mea i roto ia tatou o te ora ˈtu ia pohe tatou?
TA TE TAATA E PARAU RA
E rave rahi te tiaturi te vai ra te tahi mea i roto ia tatou o te ora ˈtu i muri aˈe i te pohe. Te manaˈo ra vetahi e tamau noa te hoê taata i te ora faahou i roto i te tahi atu tino i muri aˈe i te pohe. Area te tahi atu, te na ô nei e haere ïa i te raˈi aore ra te po auahi.
TA TE BIBILIA E PARAU RA
Aita hoê aˈe mea i roto ia tatou e ora ˈtu i muri aˈe i te pohe. Teie noa râ, e pohe tatou. Ia au i te peropheta Ezekiela ta te Atua hoi i faaohipa no te papai i te hoê buka o te Bibilia, e nehenehe te hoê taata e faautuahia i te pohe. Te faahiti atoa ra te Bibilia i te parau “taata pohe.” (Levitiko 21:11) Eita ïa te tahi mea i roto ia tatou e ora ˈtu ia pohe tatou.
“O tei rave i te hara ra, o tei pohe ïa.”—Ezekiela 18:20.
Eaha te tupu ia pohe te taata?
TA TE BIBILIA E PARAU RA
Ia pohe te taata, teie ta te Bibilia e haapapu ra: “Aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.” (Koheleta 9:10) Te na ô atoa ra: “Te hoˈi nei oia i to ˈna ra repo; mou roa ˈtura ta ˈna i opua i taua mahana ra.” (Salamo 146:4) Aore rea ohipa ta te taata pohe e nehenehe e rave. No reira te Bibilia i faahohoˈa pinepine ai i te pohe i te “taoto.”—Mataio 9:24.
NO TE AHA MEA FAUFAA IA ITE?
Ia pohe te feia ta oe e here ra, e hinaaro oe e ite i te pahonoraa i teie mau uiraa: Teihea ratou? Eaha te tupu i nia ia ratou? Te mauiui ra anei ratou? E topa roa to tatou hau i te ite i ta te Bibilia haapapuraa aita ratou e mauiui ra. Aita hoi a ratou e parau itea faahou.
“Aita râ a te feia i pohe ra e parau itea.”—Koheleta 9:5.
Eaha te tiaturiraa no te feia pohe?
TA TE BIBILIA E PARAU RA
Ua fafau te Atua e faatia faahou mai oia i te feia ta ˈna e haamanaˈo ra no te ora i roto i te hoê ao apî parau-tia. A tiai noa ˈtu ai râ i tera taime, e taoto noa ratou i roto i te pohe. Te hinaaro mau ra te Atua mana hope e faaara mai ia ratou. E ere anei i te mea tamahanahana?—Isaia 26:19.