IA AU I TE BIBILIA
Te hopea o teie nei ao
Te parauhia ra i roto i te Ioane 1, 2:17: “Te mou nei hoi teie nei ao, e ta to te ao atoa e hinaaro nei.” Eaha tera “ao”? E nafea e afea te reira e mou ai?
Eaha te “ao” o te mou?
TA TE BIBILIA E PARAU RA
E ere te fenua, e “hinaaro” hoi to tera ao o ta te Atua e ore e au. O te mau taata râ aita e haapao ra i te Atua a riro atu ai ei enemi no ˈna. (Iakobo 4:4) O ratou “te [faa]utuahia mai ïa i te pohe mure ore.” (Tesalonia 2, 1:7-9) Area te feia e haapao i ta Iesu Mesia faaueraa, “e ere outou i to teie nei ao,” e nehenehe ïa e fanaˈo i te ora mure ore.—Ioane 15:19.
No reira e parauhia ˈi i te pae hopea o te Ioane 1, 2:17: “O tei haapao râ i to te Atua ra hinaaro, e tia ïa i te oraraa e a muri noa ˈtu.” E fanaˈo ïa tera mau taata i te ora mure ore i nia i te fenua nei mai tei parauhia i roto i te Salamo 37:29: “E parahi te feia parau-tia i nia i te fenua, e parahi tamau â ratou i reira.”
“Eiaha e hinaaro i teie nei ao, e te mau mea atoa o teie nei ao. O te taata i hinaaro i teie nei ao ra, aore te hinaaro i te Metua ra i roto ia ˈna.”—Ioane 1, 2:15.
E nafea te ao e mou ai?
TA TE BIBILIA E PARAU RA
E piti tuhaa ia tae mai te hopea o te ao. Na mua, e haamou te Atua i te haapaoraa hape o tei faahohoˈahia i te tahi vahine faaturi o “Babulonia rahi” te iˈoa. (Apokalupo 17:1-5; 18:8) Noa ˈtu e parau oia te haamori ra o ˈna i te Atua, te turu ra oia i te mau tia poritita o te ao. E fariu râ ratou i nia ia ˈna. “E faufau ïa [ratou] i taua faaturi ra, e e pau oia ia ratou i te haru, e e veve roa, e e amu i to ˈna tino [aore ra ta ˈna mau faufaa], e e tutui ia ˈna i te auahi.”—Apokalupo 17:16.
I muri iho, o “te hui arii o te fenua nei,” te mau faatere poritita, e te feia iino ta te Atua e haamou. E tupu te reira i “te tamaˈi i taua mahana rahi o te Atua Puai hope ra” o te parau-atoa-hia Aramagedo.—Apokalupo 16:14, 16.
“E imi ia Iehova, e te feia i haehaa i nia i te fenua nei, . . . e imi i te parau-tia, e imi i te haehaa: peneiaˈe outou o te faatapunihia ia tae i te mahana e riri ai Iehova ra.”—Zephania 2:3.
Afea te hopea o te ao e tae mai ai?
TA TE BIBILIA E PARAU RA
E tae mai te hopea ua faaite-maitai-anaˈe-hia na te ao te poroi o te Basileia o te Atua, te hoê faatereraa no te ao taatoa o te mono i ta te taata. (Daniela 7:13, 14) Ua na ô Iesu Mesia: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) E tuhaa tera ohipa pororaa, o te faaite i te parau-tia a te Atua e to ˈna aroha, o te “tapao” o te anotau hopea. Oia atoa te mau tamaˈi, te mau aueueraa fenua, te oˈe e te mau maˈi i te mau fenua atoa.—Mataio 24:3; Luka 21:10, 11.
Te faaite atoa ra te Bibilia mai te aha te huru o te taata i te “anotau hopea.” Te parauhia ra: “E tupu te ati rahi i taua anotau hopea nei, ia ite mai oe. E riro te taata nei ei miimii, e nounou moni, . . . e faaroo ore i te metua, . . . e haapao ore, e iria, e te au ore i te taata maitatai ra, . . . e te hinaaro i te mau mea e navenave ai ra aore hinaaro i te Atua.”a—Timoteo 2, 3:1-5.
Fatata teie nei ao i “te mou.”—Ioane 1, 2:17.
Te faaite ra tera mau tupuraa atoa ua haamata tera anotau i te area matahiti a tupu ai te Tamaˈi rahi matamua i 1914. Hau atu â, te faaitehia ra te Basileia o te Atua i te mau vahi atoa mai tera matahiti mai â. Te oaoa nei te mau Ite no Iehova ua ite te taata o ratou te rave nei i tera ohipa. No reira i ravehia ˈi te iˈoa Te Pare Tiairaa e faaite ra i te Basileia o Iehova no ta ratou vea faufaa mau.
“E teie nei, e ara, aore hoi outou i ite i te mahana e te hora atoa.”—Mataio 25:13.
a No te ite atu â, a hiˈo i te pene 9 o te buka Eaha ta te Bibilia e haapii mau ra? piahia e te mau Ite no Iehova. Te vai atoa ra i nia www.jw.org/ty.