Te hoê parau fafau o ta ˈu e tapea roa
FAATIAHIA E MARIAN TSIBOULSKI
I TE avaˈe Febuare 1945, e 20 matahiti to ˈu e e faehau vau no te nuu Soviet o tei tiavaru atu i te mau Helemani e mau hanere kilometera e tae roa ˈtu i to ratou iho fenua. I te mau mahana atoa ua ite au i te mau ohipa riaria o te tamaˈi, e te mau hoa o te pohe ra na pihai iho ia ˈu. Ua tae matou i pihai iho i te oire no Breslau i Helemani, i teie nei o Wrocław ïa i Polonia. I reira i te hoê ahiahi, ua ravai roa vau i teie taparahiraa taata rahi e i te mauiui, ua fafau atu vau i te Atua ra e, mai te peu e e faahoˈi ora o ˈna ia ˈu i to ˈu fare, e pûpû atu vau i to ˈu ora no te raveraa i to ˈna hinaaro.
E toru avaˈe i muri iho, ua pau o Helemani, i muri aˈe i to ˈu faarueraa i te nuu, i te avaˈe Titema 1945, ua na raro noa vau i te haere e tae atu ai i Rogizno, te hoê oire rii piri ia Lvov (i teie nei o Lviv), i Ukraine, te oire tumu ïa o to ˈu metua tane. Ia poipoi aˈe, ua farerei au i te hoê Ite no Iehova e ua faaite mai oia ia ˈu i te mea atoa no nia i te Basileia o te Atua. Noa ˈtu e ua ite aˈena vau te tahi mau mea no nia i te Bibilia e ua taio atoa vau i te tahi mau papai a te mau Ite, i teie nei râ, ua putapû to ˈu mafatu. Ua ite au e e taairaa to taua farereiraa ra e ta ˈu parau fafau.
Te naearaahia ˈtu ta ˈu parau fafau
Ua noaa oioi ia ˈu te hoê ohipa ei orometua i te fare haapiiraa tuatahi. Aita i naeahia e piti matahiti, ua faaue te upoo no te piha ohiparaa haapiiraa a te mataeinaa e ia haapiihia te mau tamarii e aita e Atua, ua faahoˈihia ïa vau. Fatata i te hoê â taime, i te avaˈe Me 1947, ua haamata vau i te apiti atu i te pororaa ˈtu i te taata e te mau Ite no Iehova. Ua faaitoito te mau Ite e ia haere vau i te pae apatoa no Borislav, i reira ua noaa oioi ta ˈu ohipa ei taata toroa uira.
I Borislav, ua farerei au i te mau taata o tei riro ei mau Ite i te mau matahiti 1930. E rave rahi papai Bibilia ta ratou o ta ˈu i taio rahi, e te mau buka atoa no Te mau haapiiraa i roto i te mau Papai, e te rahiraa o te mau buka i papaihia e Joseph F. Rutherford, te hoê peretiteni tahito no te Taiete Watch Tower. Ua taio atoa vau i te mau vea tahito Te Pare Tiairaa e Te Tau Auro (i teie nei A ara mai na!), e vai ra i vetahi mau Ite. Te mea râ o te faahuru ê roa ia ˈu o te mau pueraa rata ïa i papaihia e te mau Ite no Helemani o tei faautua-pohe-hia i raro aˈe i te faatereraa a Hitler. Ua iritihia teie mau rata na roto i te reo Polonia, o te nenei-rima-hia, e o tei nirahia ei buka rii. I muri iho, na roto i te haamanaˈoraa i te huru fati ore o teie mau taeae Helemani, ua noaa ia ˈu te itoito no te faaruru atu i te mau tamataraa.
I te pae hopea, i te matahiti 1949, ua bapetizohia vau i roto i te hoê roto pape no Borislav, na reira vau i te faatupu-papu-raa i te parau fafau e tavini i te Atua, o ta ˈu i tǎpǔ i nia i te tahua aroraa. I teie nei râ, e parau fafau o tei niuhia ïa i nia i te ite papu.
Te haamataraa o ta ˈu tamataraa
Aita i maoro ua faahoˈihia vau i ta ˈu ohipa. No reira i te avaˈe Febuare 1950, ua haere au i te oire tapiri no Stryj, i reira ua noaa faahou ta ˈu ohipa ei taata toroa uira. Ua farii-popou-hia vau e ta ˈu mau taeae kerisetiano e ua anihia vau e horoa i te oreroraa parau no te oroa Haamanaˈoraa matahiti no te haamanaˈo i te pohe o Iesu Mesia o tei tupu maa hebedoma i muri iho.
I taua taime ra, ua uˈana te aaraa ˈtu e te haamǎtaˈuraa ˈtu i te mau Ite. E pee huna te mau melo o te KGB, te Tomite Mutoi huna a te Hau ia matou. No reira, ua vai ara matou ma te faaineine ia matou ahiri e e tapeahia e e uiuihia matou. Ua tauturu te himeneraa i te mau himene o te Basileia i te mau putuputuraa ia faaea puai matou i te pae varua.
I te 3 no Tiurai 1950, ua anihia vau e tarima i te Tiaororaa a Stockholm, te hoê tiaororaa no te patoi i te mau mauhaa atomi i tarimahia e 273 000 000 e tiahapa taata, te rahiraa e huiraatira no te mau fenua Communiste. Aita hoi vau i na reira, ma te faataa i to ˈu tiaraa amui ore i te politita, ua faahoˈi-faahou-hia vau i ta ˈu ohipa. I muri iho i te reira, ua tapeahia vau, ua haavahia e ua faautuahia vau e 25 matahiti tapearaa i roto i te hoê aua ohiparaa.
Na tera e tera aua
I te avaˈe Titema 1950, ua tuuhia e rave rahi o matou i roto i te vairaa puaatoro no te pereoo auauahi e ua hopoihia matou fatata e 3 000 kilometera te atea i te hoê vahi piri i te mau Mouˈa Oural apatoerau, o te faataa i te tahi pae ia Rusia Asia e ia Rusia Europa. I reira ua tapeahia vau i roto e rave rahi aua taa ê. Hoê â huru raveraa i te mau aua atoa—te ohipa teimaha e te maa navai ore. E piti aore ra e toru noa avaˈe mai te reira no te tauiraa i te feia apî e te oraora maitai ei mau huru tino pohe. E rave rahi i pohe. Aita matou i manaˈonaˈo noa ˈˈe e ora, te feia iho â ra i rotopu ia matou e mau matahiti faautuaraa roa.
Ua riro te matahiti e aita ta ˈu e papai Bibilia e aita ta ˈu e taairaa e vetahi atu mau Ite, ei mea ati mau no ˈu. E mea ahoaho roa te faaearaa o ˈna anaˈe. Ua itoitohia râ vau i te pae varua i to vetahi mau auri faarooraa ia paraparau atu vau ia ratou no nia i te Basileia o te Atua. I te pae hopea, ua pahonohia ta ˈu mau pure ma te aau tae, e ua hopoihia vau fatata e 2 000 kilometera i te pae apatoa hitia o te râ i te hoê vahi e rave rahi aua i te oire niu-apî-hia no Angarsk, i Sibérie hitia o te râ. I reira te patuhia ra te hoê fare aano hamaniraa taoˈa mai te raau te huru, e na te mau mau auri e rave i te rahiraa o te ohipa.
Ua tuuhia vau i roto i te Aua 13, i pihai iho i te vahi paturaa. I reira, ua farerei oioi au i te tahi atu mau Ite, o te toro mai ia ˈu te mau vea hopea o Te Pare Tiairaa e te Informateur, mai tei piihia Te taviniraa o te Basileia. Auê ïa amuraa maa pae varua rahi mau â! Nohea mai râ anei te taatoaraa?
I te avaˈe Eperera 1951, e mau tausani Ite no Ukraine i hopoihia i Sibérie, e rave rahi vahi e ere i te mea atea ia Angarsk. Ua noaa i teie mau taeae te mau vea o Te Pare Tiairaa e te tahi atu mau papai i nenei-huna-hia, e e faaô huna ratou i te reira i roto i te mau aua. Ua noaa-atoa-hia te hoê Bibilia. Ua tufa matou i te reira na roto i te mau tuhaa o ta matou i opere i rotopu ia matou iho. Mai te peu e e faatupuhia te hoê maimiraa, e tuhaa noa ïa o te Bibilia te haruhia. Ua faatere atoa matou i te hoê Haapiiraa o Te Pare Tiairaa e te hoê Haapiiraa o te Taviniraa Teotaratia i roto i te aua!
I te hopea o te matahiti 1952, ua hopoihia vau i te Aua 8. I te avaˈe Mati i muri iho, ua faatupu matou i te oroa Haamanaˈoraa i roto i te hoê piha rii i reira te mau auri e vaiiho ai i ta ratou iho mau tauihaa. E 12 noa tei tae—e 3 Ite e e 9 feia anaanatae. Ua itehia e te mau tiai ta matou putuputuraa, e ua tiavaruhia vau i te Aua faautuaraa 12, no te mea ia au i ta ratou parau “e taata orure hau totoa” vau. E pae atu mau Ite, o tei faautua-atoa-hia no ta ratou pororaa, tei reira aˈena ratou i roto i teie â aua. I reira, ua faahepohia matou e ô i te hoê vahi niuraa aano e te mau ropa e te mau ope noa.
E rave rahi mau auri no te Aua 12 e feia taparahi taata iino roa ˈˈe ratou. Ua manaˈo mau â te mau tiai e ia tuuhia ˈtu matou i reira e paruparu roa ïa matou. Ua paraparau râ matou i te mau mau auri no nia i te Basileia o te Atua, e ua himene matou i te mau himene o te Basileia i roto i te mau fare iri. I te hoê taime, i to matou faaearaa i te himene ua haafatata ˈtu te hoê raatira feia ohipa iino i te hoê Ite e ua na ô oia e: “Ia rave ino noa ˈtu te hoê taata ia oe, e taparahi vau ia ˈna!” Ua haapii atoa vetahi feia taparahi taata i ta matou mau himene o te Basileia e ua apee atoa mai ratou i te himeneraa!
I te ropuraa o te matahiti 1953, ua hopoihia e rave rahi Ite no te tahi atu mau aua i te Aua 1. I te haamataraa, e 48 Ite i roto i te Aua 1, aita râ i naeahia e toru matahiti, ua tae to matou numera i te 64. Oia mau, i taua taime ra e 16 i farii i te parau mau o te Bibilia e i bapetizohia! Noa ˈtu e e moemoe noa na te mau tiai o te aua i te haapapuraa no te hoê ohipa faaroo, ua nehenehe matou e faatupu i ta matou mau putuputuraa e mau bapetizoraa i roto i te fare haumitiraa o te aua no te mea na te hoê Ite e haapao i te reira.
Matararaa, e te hoê utuafare
I te matahiti 1956, ua tuuhia te rahiraa o te mau Ite o te aua, ma te haaparare hoi i te mau tiatiavea o te parau apî maitai na te mau vahi atoa o te tuhaa fenua Rusia rahi. Ua faaitihia te faautuaraa e 25 matahiti tapearaa i te 10 matahiti e tae roa ˈtu i te 6 matahiti e e 6 avaˈe. No reira i te avaˈe Febuare 1957, ua matara atoa vau.
Ua na mua vau i te haere i Biriousinsk, te hoê oire no Sibérie, fatata e 600 kilometera i te pae apatoerau no Angarsk. E rave rahi Ite no Ukraine i hopoihia i taua vahi ra, e mea au na ˈu ia tufa ˈtu e o ratou i te mau mea i tupu e te faarooraa ˈtu i te parau no te mau hoa Ite o ta matou i matau na. Mai reira mai, ua hoˈi au i Borislav, i Ukraine, i reira te ora ra te hoê Ite no Ukraine o Eugenia Bachinskaja te iˈoa. Ua matara mai oia mai te fare auri mai i te matahiti hou to ˈu matararaa mai.
E Ite mǎtaˈu ore o Eugenia i faautua-pohe-hia na i te matahiti 1950 no ta ˈna ohipa pororaa. I muri aˈe râ 18 mahana i te vahi haapoheraa o te fare auri, ua faaitihia te faautuaraa i te 25 matahiti i roto i te hoê aua taa ê. I te pae hopea o te matahiti 1957, i to ˈu hoˈiraa ˈtu i Ukraine, ua faaipoipo mâua. I muri aˈe i te faaipoiporaa, ua faaoti mâua e faaea i Borislav, i reira vau i te bapetizoraahia e iva matahiti na mua ˈˈe. Ma te taa ê râ, ua horoahia ia ˈu e 48 hora no te faarue ia Ukraine!
Ua haere vau i te pae Caucase, i Rusia apatoa, i reira o Eugenia i te farereiraa ia ˈu i muri iho. I muri aˈe râ i te faaearaa i roto i te hoê fare rii vairaa tauihaa fatata e ono avaˈe, ua reva mâua i Biriousinsk no te apiti atu i to matou mau taeae e mau tuahine kerisetiano i tiavaruhia. Fatata e 500 o ratou i Biriousinsk e e pae amuiraa, e ua nominohia vau ei tiaau peretiteni no te hoê amuiraa. I te matahiti 1959, ua fanau mai ta mâua tamahine o Oksana, e to muri iho i te matahiti 1960 o Marianna ïa. Mai to raua nainairaa e haere noa raua i te mau putuputuraa e ua paari raua ma te matau noa i te mau ohipa i te pae varua a te amuiraa i Sibérie.
Aita te feia mana no Sibérie i haapeapea roa i te mau ohipa a ta matou amuiraa, ia faaau-anaˈe-hia i te mau opaniraa etaeta no nia i ta matou ohipa i Ukraine. E ere â i te mea ohie ia putuputu te taatoaraa o ta matou amuiraa. Auaa te mau hunaraa e nehenehe ai te rahiraa e putuputu amui. I taua mau taime ra, e horoa e rave rahi taeae i te mau oreroraa parau maramarama no nia i te Bibilia. I te iteraa te feia mana i te ohipa e tupu ra, ua haavî mai ratou. Ei hiˈoraa, i te hoê taime, ua tapeahia te haereraa o te hoê hunaraa e ua haruhia ˈtu te afata taata pohe ma te huna tia ˈtu i te menema.
Hoˈiraa ˈtu i Ukraine
I te matahiti 1965, ua hoˈi matou i Ukraine, ma te faaea i Kremenčug. E 12 anaˈe iho Ite i roto i teie oire, fatata e 800 kilometera i te pae hitia o te râ no Borislav. Ua ora matou i reira fatata e pae matahiti; i te rahiraa o taua taime ra, ua tavini au i te mau amuiraa ei tiaau ratere. I te matahiti 1969, e iva e hoê ahuru matahiti to ta mâua tamahine, i anihia ˈi matou e haere i te pae apatoa no te tauturu i te mau taeae o te oire rii no Moločansk.
I Moločansk, ua titauhia vau e te KGB no te hoê uiuiraa e rave rahi hora te maoro. I te mea mau, e ua titauhia vau e ono taime! I te mau uiuiraa taitahi, e fafauhia vau te hoê oraraa maitai a muri aˈe ahiri e faarue vau i ta ˈu mau taairaa e te mau “Jéhoviste.” I te pae hopea, ua fiu te KGB, e ua faautuahia te tahi atu Ite e o vau iho hoê matahiti fare tapearaa.
I te hoperaa ta ˈu utua i te matahiti 1973, ua haere vau e to ˈu utuafare i te hoê oire rii piri ia Kremenčug. Ua faatupu huna matou i te mau putuputuraa i roto i to matou fare, e te hoê oroa Haamanaˈoraa i te pohe o te Mesia, i te matahiti 1974. Ia poipoi aˈe, ua tomohia to matou fare e ua tapeahia vau.
Te hoê haavaraa, te aua ohiparaa, e te tiavaruraa
Ua opanihia te taata i taua haavaraa ra, ei titauraa anaˈe iho no te haere mai. E feia teitei e e mau raatira o te mataeinaa te feia i tae mai, te feia tiaraa totiale teitei. Ua maiti vau eiaha e rave i te hoê paruru e e 45 minuti ta ˈu no te paruru ia ˈu iho. Te mahana hou te haavaraa, ua tuturi o Eugenia e ta mâua na tamahine na roto i te pure, ma te ani, eiaha te hoê faautuaraa mâmâ aˈe aore ra ia faaorehia ta ˈu hara, tera râ ia horoahia ˈtu te hoê faaiteraa maitai no nia i te Basileia e te iˈoa moˈa o Iehova.
I te roaraa o te haavaraa ua taio te haava e rave rahi tuhaa o te mau vea Te Pare Tiairaa e A ara mai na! E ere te huru o te feia i tae mai mai ta te haava i manaˈo. I to te taata faarooraa e e mou teie ao ino i Aramagedo e na te Basileia o te Atua e faatere i te fenua, ua feaa roa ratou—ma te papu ore i te mea o ta ratou e tiaturi. Ua taa ihora i te haava to ˈna hape, e i ta ˈu mau parau faaotiraa, ua tamata oia i te faahoona ia ˈna iho ma te tâpû noa i ta ˈu faaiteraa. Na roto râ i to ˈna taioraa ˈtu i ta matou mau papai, ua tauturu te haava e ia horoahia ˈtu te hoê faaiteraa maitai, e ua î roa to ˈu mafatu i te mauruuru. Noa ˈtu te reira, ua faautuahia vau e pae matahiti tapearaa ma te ohiparaa, e apeehia ˈtu e pae matahiti tiavaruraa.
Ua ora vau i na matahiti e pae i muri iho i rotopu i te feia taparahi taata iino roa i te pae apatoerau roa o te aua ohiparaa no Yodva i te Repubilita Socialiste Soviétique tiamâ no Komi. I taua tau ra, e rave rahi taime au to ˈu no te faaiteraa ˈtu i te parau no te Basileia ia fatata 1 200 mau auri e oia atoa i te faatereraa o te aua. I muri aˈe i to ˈu matararaa mai i te matahiti 1979, ua tiavaruhia vau i te oire no Vorkouta, i te Poro toetoe no Apatoerau. Ua noaa oioi ta ˈu ohipa e te hoê vahi no te oraraa i Vorkouta, ua apiti mai to ˈu utuafare ia ˈu.
Ua ite te taata e ua patuhia o Vorkouta i nia i te mau ivi o te mau mau auri i pohe na, e to roto atoa e rave rahi Ite i faaea i reira i te mau ahuru matahiti matamua. I teie mahana, e oire mau teie, e eita e itehia i te hoê noa ˈˈe vahi te mau aua ohiparaa. I roto râ i te meumeuraa o te pape paari i te toetoe, te vai ra i roto e i rapae au i te oire te mau tino no e rave rahi taata i pohe ma te horoaraa i to ratou ora no te arue ia Iehova.
Te oaoaraa i te tiamâraa te haapaoraa
I te matahiti 1989, ua ratere matou na Vorkouta e tae atu ai i Polonia no te haere atu i na tairururaa nunaa e piti a te mau Ite no Iehova. Aita matou i haama i te taheraa to matou roimata i te mataitairaa ˈtu i te mau ahuru tausani taeae e tuahine kerisetiano i Varsovie e i Katowice e fanaˈo ra i te auhoaraa oaoa ma te mǎtaˈu ore e ia tapeahia ratou. Ua riro te hoê moemoeâ ei mea mau. Ua hoˈi matou i Vorkouta e te manaˈo papu faaapîhia e tavini i te mau faufaa o te Basileia.
E mea ino hoi te ahuaraˈi i te Poro toetoe no Apatoerau e ua fifihia te oraora-maitai-raa o Eugenia. No reira i taua matahiti ra i muri iho, ua hoˈi matou i Kremenčug, i reira matou e oaoa ai i te taviniraa ia Iehova e te tiamâraa rahi e fanaˈohia ra e matou i teie nei. E mau matahiapo no te amuiraa ta mâua na hunoa tane i Ukraine. E e mau pionie, mai te piihia ra te mau tavini ma te taime taatoa, ta mâua na tamahine, noa ˈtu e te faaamu ra raua e maha tamahine.
I te tahi mau taime, e haamanaˈo â vau i te tahua aroraa i te matahiti 1945 e te parau fafau o ta ˈu i rave afa senekele i teie nei. Ia nehenehe au e tapea i te reira, ua horoa mai Iehova i te ite papu, te hoê â ite a nehenehe ai te mau mirioni taata ˈtu â ia rave i te hoê â parau fafau—e tavini ia Iehova e a muri noa ˈtu.
[Hohoˈa fenua/Hohoˈa i te api 25]
RUSIA
Vorkouta
Lviv
Borislav
UKRAINE
Kremencǔg
Moločansk
Caucase
Biriousinsk
Angarsk
E ta mâua na tamahine e piti, ta raua nau tane faaipoipo, e ta raua tamarii e maha
[Faaiteraa i te tumu]
Mountain High Maps® Copyright © 1997 Digital Wisdom, Inc.