Te parau tatarahapa a te hoê raatira mutoi
O Tom Will Lane taua raatira mutoi ra ta Edward Michalec i faahiti i roto i te tumu parau ra “Haapuaihia no te faaruru atu i te mau tamataraa” o te “A ara mai na!” o te 8 no Titema 1996. I roto i to ˈna aamu, te faatia ra o Michalec e:
“Ua hae te raatira mutoi no Wharton, i Texas, Hau Amui no Marite. O te maharaa ïa o te taime to ˈna tuuraa ia ˈu i roto i te fare auri, e ua tuô oia e: ‘No te aha oe e ore ai e faaroo i te parau e faauehia ia oe?’
“‘E tiamâraa to ˈu no te rave i teie ohipa,’ o ta ˈu ïa i pahono taue atu. Ua hae roa ˈtu â te raatira mutoi, e ua haamata ˈtura oia i te hui ia ˈu i te hoê hatua. Ua haere atoa mai te tahi mau mutoi e tupai ia ˈu e te tapearaa o ta ratou pupuhi.”
Aita i maoro aˈenei, ua papai o Mary Perez, te hoê vahine i rave na i te ohipa i ǒ i te Raatira mutoi Lane ra i te omuaraa o te mau matahiti 1960 ra, e: “Ua ite oia e e Ite no Iehova vau. Ua faaite mai oia nafea to ˈna hamani-ino-raa ia Ed Michalec. Ua ani mai oia e faaite i te tahi atu mau Ite e te tatarahapa ra oia no ta ˈna mau ohipa i rave. Ua parau oia e aita oia i ite e e feia maitai te mau Ite, e e feia auraro i te ture. Te tatarahapa mau ra oia.”
Ua parau faahou o Mary e: “Noa ˈtu e ua pohe te raatira mutoi ra tau matahiti aˈenei, te manaˈo nei au mea maitai ia faatae mau atu teie rata i to ˈna tatarahapa.”
I muri aˈe, te faataa ra oia nafea to ˈna riroraa mai ei Ite: “Ua tupu te hamani-ino-raa o Taeae Michalec i te omuaraa o te mau matahiti 1940 ra. Te reira te tumu i opua ˈi au e faaroo i te mau Ite ia haere mai ratou i ǒ ˈu ra. Aita i maoro te haapii ra mâua i te Bibilia. Ua bapetizohia mâua ta ˈu tane i te matahiti 1949 ra.”
O te tahi noa hiˈoraa teie e faaite ra i te ohipa e nehenehe e tupu i nia ia vetahi ê ia haapao maite te hoê taata i te mau faaueraa tumu kerisetiano. Ehia rahiraa taata, ei hiˈoraa, tei putapû roa e te tiaraa mǎtaˈu ore o Petero e te tahi atu mau aposetolo i te senekele matamua?—Ohipa 5:17-29.
[Hohoˈa i te api 27]
Ed Michalec e Mary Perez, i te mau matahiti 1940 ra