Ua topahia te iˈoa ra Veve no te hoê aiû

I ROTO i te hoê oire iti no Afirika, ua oaoa te hoê tane o Okot te iˈoa e ta ˈna vahine o Matina, i te fanauraa mai ta raua aiû matamua, e tamahine. Ua ratere mai te mau fetii e te mau hoa i te oire iti no te afai mai i te mau ô e no te faaite i to ratou tiaturiraa e e noaa i teie aiû te hoê oraraa maoro e te oaoa.

E oraraa fifi e te haehaa to teie nau hoa. E faaapu na raua i te hoê tuhaa fenua iti, e to raua fare, i reira o Matina i te fanauraa i to ˈna aiû, ua hamanihia te papai i te vari mǎrô e e tapoˈi fare ota. Ua faaoti papu raua e tutava ia ohie aˈe te mau mea no ta raua matahiapo i to raua iho. Ia haamanaˈo noa raua i ta raua opuaraa, ua topa raua i te iˈoa Acan oia hoi “E Veve au” no ta raua tamahine.

Eaha to mua ia Acan? Mai te peu e hoê â hohoˈa to ˈna oraraa e to te rahiraa i to ˈna fenua, eita roa paha o ˈna e haapii i te taio e i te papai. Ia paari anaˈe mai o ˈna, ahiri e e ohipa ta ˈna, e noaa noa ia ˈna 190 dala Marite i te matahiti hoê. I to ˈna fenua, e 42 matahiti anaˈe iho te roaraa o te oraraa i numerahia.

E ere te oraraa haihai o Acan i te mea varavara. I nia fatata i te 6 miria taata i nia i te fenua, e noaa i te tahi 1,3 miria taata e tiahapa iti aˈe i te 370 dala Marite i te matahiti hoê. Te moni au noa e noaa i te taata taitahi i te mau fenua ona e 21 598 dala Marite ïa i te matahiti hoê. I te mahana hoê, e 67 000 hau atu o te amui atu i te rahiraa feia veve, fatata ïa e 25 mirioni i te mau matahiti atoa. Te ora ra te rahiraa i roto i te ao navai ore—i Afirika, i Asia, e i Marite Latino. I roto râ i te mau nunaa ona, te vai atoa ra te mau vahi veve. E e 7 i nia i te 10 o te ao veve e mau vahine ïa.

E ore roa te rahiraa o te taata e ora mai i te veve rahi. E faaere te reira i to ratou mau hinaaro matamua—te maa, te ahu, e te nohoraa. E nehenehe ratou e erehia i te tiamâraa, te tura, te haapiiraa, e te oraora-maitai-raa. Te parau nei te Faanahonahoraa o te Oraora-maitai-raa na te Ao nei e: “E faatae te veve i to ˈna mana haamou i nia i te mau tuhaa atoa o te oraraa o te taata, mai te tôraahia e tae roa ˈtu i te menema. E ohipa amui te reira e te mau maˈi pee haapohe e te mauiui roa no te horoa i te hoê oraraa peapea no te taatoaraa o te roohia i te [veve].”

Tera râ, aita anei te huru oraraa i roto i te mau nunaa navai ore e maitai maira? I roto i vetahi, e. I roto e rave rahi, aita ïa. Te faataa ra te hoê vea Choices no nia i te haereraa i mua o te taata i te manaˈo e “te tapapa maira te feia veve” ei ‘manaˈo haavare atâta.’ Te parau nei râ oia e: “Te ora ra tatou i roto i te hoê ao o te riro mau i te amaha na roto e piti pǔpǔ i te pae faanavairaa faufaa, i rotopu i te mau fenua e oia atoa i roto ia ratou iho.”

E tamau noa anei te veve i te faaino i te huitaata e a muri noa ˈtu? E tuatapapa te A ara mai na! i roto i na tumu parau e piti i muri nei, i teie tumu parau fifi ma te faaite eaha te ravea e vai ra.