Ua horo matou e tapuni i te mau topita—e 50 matahiti i muri iho!
“Fatata roa te mau topita i te paaina i ǒ nei. A haere e tapuni!”
NA TEIE mau parau a te hoê mutoi i faaara ia mâua ta ˈu tane ia faarue i te fare e ia horo e tapuni i roto i te hoê pare tima i pihai iho atu. Ua hitimahuta mâua i teie parau. Aita hoi mâua i roto i te hoê fenua tamaˈi; ua haere mai mâua e hiˈo i te mau hoa i nia i te hoê o te mau motu haehaa atea e te haviti mau o te mau Motu Marshall, i Micronesia.
Ua haere mai mâua e faaea hoê hebedoma e te hoê hoa e ta ˈna tane, i nia i te motu iti no Tõrwã. O te vahine anaˈe hoi te Ite no Iehova i nia i teie motu, e ua hinaaro mâua e tauturu ia ˈna ia poro i te taata e faaea ra i reira.
E nunaa taata auhoa mau te feia no Marshall e mea au roa na ratou ia tauaparau no nia i te Bibilia. No matara noa maira hoi te buka ra E nehenehe oe e ora e a muri noa ˈtu i roto i te paradaiso i nia i te fenua nei na roto i te reo no reira, e mea rahi te mau buka o ta matou i opere. Ua parau mai te feia atoa i farii i te buka e e taio ratou, eita râ ratou e faaohipa i teie buka ei ken karawan, oia hoi ei “taoˈa tahutahu haamanuïa,” no te tiahi i te mau demoni. I ǒ nei, ua matau te taata i te tuu i te hoê api firihia o te Bibilia i roto i te hoê mohina e faatautau atu ai i nia i te hoê raau fare aore ra te hoê tumu raau i pihai iho mai, ma te manaˈo e e tiahi te reira i te mau varua iino.
Tau mahana tei mairi e ua oaoa roa mâua i to mâua tere, tera râ, i te Mahana maa, ua taa ˈtura ia mâua e e ere hoê â huru. I te poipoi roa, ua haere mâua e aˈu i roto i te tairoto mâ maitai e te mahanahana. A hoˈi mai ai mâua na te pae tahatai mai, ua ite atura mâua i te hoê pahi maereere huru ê roa i te fatataraa mai. Aita i maoro, ua faarooroo atura mâua e eaha ta teie pahi e afai maira. Ua faataa maira te hoê mutoi e, ua tae mai te hoê pǔpǔ e hitu faehau Marite no te haapaaina i te mau topita tahito i nia i te motu. No te paruru i te huiraatira, ua anihia te mau taata o te motu ia faarue i to ratou fare e ia haere i roto i te mau pare tima tei patuhia e te mau Tapone i te Piti o te Tamaˈi Rahi.
Ua riro teie mau pare tima, ta te mau ratere i Tõrwã e ite oioi noa, ei tapao no te hoê tau riaria i mahemo. Na te atea mai, e au te motu i te hoê paradaiso, tera râ, ia tapirihia ˈtu, e ite-papu-hia e ua faainohia te haviti o Tõrwã e te mau toetoea o te hoê tamaˈi i hope tau 50 matahiti i teie nei. I mutaa iho, e pu manureva rahi teie na te mau Tapone, e ua î roa te motu i te mau pehu no te Piti o te Tamaˈi Rahi mai. Na te mau vahi atoa, te vai nei te mau taoˈa tamaˈi tahito tei tutaeauri—te mau manureva tamaˈi, te mau pupuhi fenua, e te mau mauhaa topita—tei tapoˈihia i te mau raau tupu o te motu.
Te mea riaria roa ˈˈe râ, o te mau topita ïa i toe mai. I te tau tamaˈi, ua faarue te mau nuu Marite hau atu i te 3 600 tane topita, napalm, e topita auahi i nia ia Tõrwã, e ua haapue te mau nuu Tapone i ta ratou iho mau topita e mau mauhaa i nia i te fenua. Noa ˈtu e te manaˈohia ra e eita te hoê topita i vai na e 50 matahiti te maoro e paaina, mea atâta noâ râ, e no reira te mau pǔpǔ tinai topita i haere mai ai i te motu nei e pae aˈe taime mai te matahiti 1945 mai, te matahiti ïa i hope ai te tamaˈi.
Ua uiui mâua e e parau mau anei teie faaararaa, no reira ua haere roa ˈtura mâua i te vahi i tapae mai ai te pǔpǔ tinai topita e ua paraparau atura mâua ia ratou. E parau mau iho â, o ta ratou ïa i faaite mai, hau atu râ, e haapaainahia te mau topita i roto i te hoê hora! Mai te peu e eita mâua e haere e tapuni i roto i te pare tima, o tei parauhia mai ïa, e tia ia mâua ia faarue i te motu i te reira iho taime.
Ua faaoti atura to mâua hoa e faaea i Tõrwã e e tapuni i roto i te hoê pare tima rahi tei riro na ei vairaa pupuhi i te tau tamaˈi, e te tahi atu mau utuafare. Ua parau mai oia ia mâua i muri iho e, o te mau apoo vairaa pupuhi anaˈe te mau haamaramarama i roto i te pare tima tahito, e no reira, mea veavea roa i roto e ua apǐ roa i te taata. I to ˈna faaearaa i taua mahana ra i reira, ua haamanaˈo faahou atura oia i te mau matahiti tamaˈi, e ua parau oia e, i to ˈna nainairaa, ua au roa oia i te mau paainaraa topita, e mea riaria râ i teie nei.
Ua farii ta ˈna tane i te afai ia mâua i te Motu Wollet, tau vau kilometera te atea, i roto i te hoê poti iti matini. Tau minuti noa i muri aˈe i to matou faarevaraa, ua faaroo atura matou i te hoê haruru puai. I to matou fariuraa ˈtu i nia ia Tõrwã, ua ite atura matou i te hoê ata au auahi mai te vahi faaearaa mai o te motu. Aita i maoro, ua faaroohia te tahi atu paainaraa e te toru, mea puai roa ˈtu â te haruru.
Ua poro mâua i taua mahana ra i Wollet, e ua faaroo-noa-hia te mau paainaraa topita i te atea ê. Ua itehia mai e ua tapaohia te mau topita tahito tau avaˈe na mua ˈtu. Ua itehia mai te mau topita faehau na te mau vahi atoa—i te pae miti, i ropu i te motu i pihai iho i te tauraa manureva, e tae noa ˈtu i roto i te mau aua o te taata! No te faaiti i te mau haapaainaraa, ua haaputu te pǔpǔ tinai topita i te mau topita nainai aˈe e ua haapaaina amui ia ratou.
Fatata roa te toparaa mahana i to matou hoˈiraa ˈtu i Tõrwã. A piri ai matou i te motu, ua ite atura matou e aita taua au auahi matauhia ra o te mau tahuraa maa. Ua taa ia matou e aita te tahi mea e afaro ra. Ma te hitimahuta, ite atura matou i te hoê poti iti i te tere-oioi-raa mai ia matou ra, no te faaara mai ia matou e eiaha e tapiri atu â. Te toe râ te hoê topita rahi i raro i te miti te tia ia haapaainahia i pihai iho i te ǎau. No reira, a faaatea ˈi matou i te taperaa mahana, ua ite atura matou i te hoê mea ta te rahiraa o te taata e ora nei i teie tau i ore i ite aˈenei—te paainaraa i raro i te miti o te hoê topita no te Piti o te Tamaˈi Rahi, o te haapihaa i te pape e i te au auahi tau hanere metera i roto i te reva!
Auaa râ hoi, aita hoê taata i Tõrwã i pepe aˈe i taua mahana ra. Ua haapaaina anei te pǔpǔ tinai topita i te mau topita atoa e vai ra i nia i te motu? Aita paha. Ua parau te raatira o te pǔpǔ e, te tiaturi ra oia e e itea faahou mai i te feia o te motu te mau topita faehau tahito i te tau mua nei. Parau mau, ua riro te reira ei tumu parau tauaparauraa anaanatae roa e te taata, a faaoti ai mâua i ta mâua ohipa pororaa i Tõrwã. Ua riro mau â ei haamaitairaa taa ê i te faaiteraa i teie huiraatira no te mau motu, no nia i te tau ‘e faaore ai [te Basileia o Iehova] i te tamaˈi e tae roa aˈenei i te hopea o te fenua!’—Salamo 46:9.
Faatiahia e Nancy Vander Velde
[Hohoˈa i te api 25]
Te hoê topita tei ore i paaina