E tari mau anei te mau pahu no Afirika i te parau?

Na te papai vea a A ara mai na! i Nigeria

I ROTO i to ˈna tere i te Anavai no Congo i te mau matahiti 1876-1877, aita te taata imi fenua ra o Henry Stanley i nehenehe e feruri maitai i nia i te faufaaraa o te tairiraa pahu o taua vahi ra. No ˈna e no to ˈna mau hoa ratere, e nehenehe e haapoto noa i te poroi a te mau pahu i roto i te hoê taˈo: tamaˈi. Te faataa ra te haruru o te pahu ta ratou i faaroo e fatata te mau taata tamaˈi iino e ta ratou mau omore i te haere mai e aro ia ratou.

I muri iho roa i te mau taime hau aˈe to Stanley taaraa e e nehenehe te mau pahu e faatae i te tahi atu â mau poroi, taa ê noa ˈtu i te piiraa no te tamaˈi. Na roto i te faataaraa i te hoê pǔpǔ taata i ora na i Congo, teie ta Stanley i papai: “Aitâ [ratou] i faaohipa ˈtura i te mau tapao uira, te vai ra râ ta ratou te hoê ravea aravihi no te tari i te parau. E faatae ta ratou mau pahu rarahi, tei tairihia i te mau vahi huru rau, i te feia i taa i te auraa, i te poroi maramarama atoa i te hoê poroi parau-vaha-hia.” Ua taa ˈtura ia Stanley e te faatae ra te feia tairi pahu hau atu i te hoê noa tapao a te hoê pu aore ra a te hoê pu faaararaa; e nehenehe te mau pahu e faatae i te mau poroi taa ê.

E nehenehe teie mau huru poroi e haapurorohia na tera e tera oire iti. Ua faaroohia te tahi mau pahu e vau e tae atu i te hoê ahuru kilometera te atea, mai te peu iho â râ e e tairihia te pahu i te po mai nia mai i te hoê paˈepaˈe e painu ra aore ra te hoê aivi. E faaroo te feia tairi pahu atea, e taa ia ratou i te auraa, e e haapuroro ratou i taua mau poroi ra ia vetahi ê. Ua papai te ratere no Beretane ra o A. B. Lloyd i te matahiti 1899 ra e: “Ua parauhia mai ia ˈu e mai te hoê oire iti i te tahi atu oire iti, hau atu i te 160 kilometera te atea, e nehenehe e faatae i te hoê poroi i roto noa e piti hora, e te tiaturi nei au e e nehenehe iho â e rave i te reira i roto maa taime noa.”

Inaha, i te senekele 20 ra, ua hauti noa na te mau pahu i te hoê tiaraa faufaa no te haapuroro i te mau parau apî. Teie ta te buka ra Te mau tauihaa faataˈi upaupa no Afirika (Beretane), tei neneihia i te matahiti 1965 ra, i parau: “Te faaohipahia ra te mau pahu tari parau mai te mau niuniu paraparau e te mau niuniu uira. E faataehia te mau huru poroi atoa—no te faaite i te fanauraa o te hoê tama, te pohe, e te faaipoiporaa; te mau haa tuaro, te mau ǒriraa, e te mau oroa; te mau poroi a te faatereraa, e no te faaite i te tamaˈi. I te tahi mau taime, e faatae te mau pahu i te tahi mau parau faaino aore ra mau parau hauti.”

Tera râ, nafea te mau pahu ia tari i te parau? I Europa e i te tahi atu mau vahi, e faataehia te mau poroi na roto i te mau puai uira i nia i te mau reni niuniu uira. Ua faataahia to te reta tataitahi o te piapa to ˈna iho tapao, e nehenehe ïa e faahiti i te reta tataitahi o taua mau taˈo ra e mau pereota ra. Tera râ, aita e reo papaihia to te feia no Afirika i Ropu, aita ïa te mau pahu e nehenehe e faahiti i te reta tataitahi o te mau taˈo. Ua faaohipa te feia tairi pahu no Afirika i te hoê ravea taa ê.

Te reo o te pahu

Te ravea no te taa i te reo o te pahu, o te iteraa ïa i te mau reo no Afirika iho. E piti huru taˈiraa to e rave rahi mau reo i Afirika i Ropu e Tooa o te râ—te vai ra to te tiaraa parau tataitahi (parauhia syllabe na roto i te reo Farani) o te mau taˈo atoa, te hoê o na taˈiraa reo faufaa e piti, oia hoi te taˈiraa teitei aore ra raro. Ia taui anaˈe te taˈiraa, e taui atoa ïa te auraa o te taˈo. Ei hiˈoraa, e rave tatou i te taˈo ra lisaka, na roto i te reo Kili no Zaire. Ia faahitihia na tiaraa parau e toru na roto i te hoê taˈiraa reo raro, te auraa o te taˈo ra oia hoi “vahi pape aore ra vahi vari”; ia faahitihia na roto i te mau taˈiraa raro-raro-teitei, to ˈna auraa oia hoi “parau tǎpǔ”; e te mau taˈiraa raro-teitei-teitei, oia ïa “taero.”

E piti atoa taˈiraa reo to te mau toere no Afirika tei faaohipahia no te haapuroro i te mau poroi, te mau taˈiraa teitei e raro. Oia atoa, ia faatae anaˈe te mau pahu vehîhia i te iri animala i te hoê poroi, e faaohipahia ïa e piti pahu, te hoê pahu e taˈiraa teitei to ˈna, e te tahi e taˈiraa raro. No reira, e faatae te taata tairi pahu aravihi i te poroi na roto i te tairiraa i te taˈi o te mau taˈo e au i to te reo paraparauhia. Te parau ra te buka ra Te mau pahu tari parau no Afirika (Beretane) e: “Hoê â teie tairiraa parau-noa-hia te reo o te pahu e te reo paraparauhia o te opu fetii.”

Parau mau, i roto i te hoê reo e piti taˈi, e rave rahi taˈo e hoê â taˈiraa e hoê â tiaraa parau to ratou. Ei hiˈoraa, i roto i te reo Kili, tau 130 iˈoa e hoê â taˈiraa (teitei-teitei) to ratou mai te parau ra sango (metua tane). Hau atu i te 200 e hoê â taˈiraa (raro-teitei) mai te parau ra nyango (metua vahine). Ia ore te mau taˈo ia anoihia, e horoa atoa te feia tairi pahu i te tahi tatararaa no teie mau taˈo, ma te apiti mai i te tahi pereota poto matau-maitai-hia tei roto te tahi tauiraa parau ia nehenehe te feia e faaroo ra e taa i te auraa o te mea e parauhia ra.

Te tari parau e te mau toere

Te toere, o te hoê ïa huru pahu tari parau. (A hiˈo i te hohoˈa i te api 21.) E faaapoohia te hoê tuhaa o te tumu raau no te hamani i teie huru pahu. Aita na hiti parahurahu e piti i vehîhia i te iri. Noa ˈtu e e piti apoo to te pahu i nia i te hohoˈa, e rave rahi e hoê anaˈe apoo roa. Ia tairihia i te hoê pae o te apoo, e taˈiraa teitei ïa te faaroohia; e ia tairihia i te tahi atu pae, e taˈiraa raro ïa. Mea matauhia 1 metera te roa to te mau toere, noa ˈtu e e nehenehe oia e poto rii mai e afa metera aore ra e roa ˈtu â e 2 metera. E nehenehe e taeahia to ˈna tiametera e 20 tenetimetera e tae atu i te 1 metera.

Ua faaohipahia te mau toere hau atu i te faatae-noa-raa i te mau poroi na tera e tera oire iti. Ua faataa te taata papai buka no Cameroun ra o Francis Bebey i te tiaraa o teie mau pahu i roto i te mau taputôraa. Ia ineine anaˈe na pǔpǔ e piti no te tataˈu i te mahora o te oire iti, e ǒri te mau aito ia au i te tairiraa o te mau toere a arue noa ˈi te mau taˈiraa pahu ia ratou. E nehenehe te pahu o te hoê pǔpǔ e parau e: “E aito e, ua ite-ê-na-hia anei e oe i tei faito ia oe? O vai te nehenehe e faaû ia oe, a faaite mai na, o vai? Te manaˈo ra tera ˈˈe mau taata iti e . . . e pau oe i te tahi [taata] iti o ta ratou e pii ra e aito . . . , tera râ, eita roa ˈtu oe e pau.” E taa i te feia tairi pahu o te tahi atu pǔpǔ i teie mau parau faaino arearea e e tairi ïa ratou i te hoê parau paari ei pahonoraa oioi e: “Te urî taata iti e . . . te urî taata iti e . . . te hinaaro ra o ˈna e paiuma i nia i te tumu raau, te manaˈo ra râ te taata atoa e e topa o ˈna. E mea etaeta râ te urî taata iti e, eita oia e topa, e paiuma oia i nia roa, teie urî taata iti e.” E tamau noa te mau pahu i te faaarearea e i te faaanaanatae i te taata i te roaraa o te taputôraa.

Te mau pahu tari parau maitatai roa ˈˈe

E haere roa ˈtu â te puai o te mau pahu faatôhia i mua. Ua piihia te pahu ta outou e ite ra i nia i te hohoˈa i te pae atau te dundun, o te pahu tari parau tuiroo ïa no Yoruba, i Nigeria. Mai te uati farii one ra to ˈna hohoˈa, e tapoˈi iri puaaniho rairai tei rapaauhia to teie pahu i na hiti parahurahu tataitahi. E puoihia na tapoˈi i te mau taura iri puaa. Ia vî anaˈe te mau taura, e tô atu â ïa te tapoˈi e e nehenehe ïa e faataˈi i te mau nota mai te vauraa aore ra hau atu. Na roto i te faaohiparaa i te hoê tairi fefe e te tauiraa i te teitei e te tupaˈi o te mau taˈi, e nehenehe te hoê taata tairi pahu e apee ia faateitei e ia faatopa te hoê taata i to ˈna reo. E nehenehe ïa te feia tairi pahu e “tari i te parau” i te tahi atu feia tairi pahu o te nehenehe e tatara i te auraa e e hauti i te reo pahu.

I te avaˈe Me 1976 ra, ua itehia te aravihi rahi o te feia tairi pahu e tari i te parau ma te faaohipa i te mau pahu, na roto i te feia hauti upaupa o te fare a te hoê raatira no Yoruba. E parau mǎrû noa na te tahi mau taata i putuputu mai i te tahi mau faaueraa i te faatere tairi pahu, e na ˈna ïa e tairi i nia i ta ˈna pahu te mau faaueraa i te tahi atu taata hauti i te vahi atea roa i te aua. Ma te pahono atu i te mau faaueraa i tairihia i nia i te pahu, e taui haere na te taata hauti upaupa i te vahi, e e rave na oia i te mau ohipa atoa i faauehia ia ˈna ia rave.

E ere i te mea ohie ia haapii i te faatae i te hoê poroi na roto i te tairiraa i te pahu. O ta te taata papai ra o I. Laoye ïa i parau: “E ohipa aravihi fifi roa e te rave atâ te tairiraa pahu no Yoruba, o te titau hoi e rave rahi matahiti haapiiraa. Eita e titau-noa-hia i te taata tairi pahu i te aravihi rahi e faaohipa i te pahu e te ite e tairi, ia mau maitai atoa râ ia ˈna te pehepehe e te aamu o te oire.”

I na matahiti tau ahuru i mairi iho nei, aita te mau pahu no Afirika i tari rahi i te parau mai tei matauhia na, noa ˈtu e e tiaraa faufaa noâ to ratou i roto i te upaupa. Te na ô ra te buka ra Te mau tauihaa faataˈi upaupa no Afirika e: “E mea fifi roa ia haapii i te tairi i te mau poroi i nia i te mau pahu; no reira, te ore oioi ra teie ohipa aravihi i Afirika.” Te na ô atoa ra te taata aravihi i te pae haapuroro parau ra o Robert Nicholls e: “Te ore ra te mau pahu rarahi no mutaa iho, e nehenehe hoi to ratou reo e faaroohia e mau kilometera te atea e o tei faaohipa-noa-hia no te faatae i te mau poroi.” Te faaohipa nei te rahiraa o te mau taata i teie mahana i te niuniu paraparau ei ravea ohie aˈe.

[Hohoˈa i te api 21]

Te toere

[Hohoˈa i te api 21]

Te pahu tari parau no Yoruba