Te papai mai nei te feia taio

A paruru i ta outou mau tamarii Ua farerei au i te hoê vahine apî o tei farii i ǒ na, te tahi mau tamarii i hamani-ino-hia i te pae taatiraa. Ua vaiiho atu vau na ˈna te vea o te 8 no Atopa 1993, tei roto te mau tumu parau ra “A paruru i ta outou mau tamarii!” I to ˈu hoˈiraa ˈtu e hiˈo ia ˈna, ua parau mai oia: “Ua tauturu te mau tumu parau ia ˈu ia faaruru i teie huru tupuraa apî. Ua afai atoa vau i te vea i to ˈu haereraa i te hoê farereiraa i te fare haavaraa no te mau taurearea e ua faaite atu vau i te auvaha paruru. Ua maere roa oia, e te haava atoa, i te mau tumu parau e ua hinaaro oia e opere atoa na te tahi atu mau paruru.” Ua ani mai teie vahine apî i te tahi atu mau buka e te haapii ra oia i te Bibilia i teie nei na muri ia matou.

E. T. V., Beresilia

E geisha oia na mua ˈˈe Ua putapû roa vau i te tumu parau ra “Te tamarii a te rana.” (8 no Febuare 1996) No te mea ua faahepo mai to ˈu mama, ua haapii au i te ori tahito, mai to ˈu nainairaa mai â. I to ˈu riroraa mai ei Ite no Iehova, ua faaoti atura vau e vaiiho i te ohipa ori, noa ˈtu e e mea au roa na ˈu. Ua faaitoito teie tumu parau ia ˈu. Ua tauturu mai oia ia ˈu ia ite e te vai ra te tahi atu mau Kerisetiano o tei rave i te hoê â huru haapaeraa. Mauruuru roa mai te hohonuraa o to ˈu mafatu.

Y. S., Tapone

Ua tahe noa to ˈu roimata i to ˈu hiˈoraa ˈtu i te hohoˈa o Sawako Takahashi e to ˈna utuafare fetii oaoa e teotaratia. Ua haafifi maoro te mau mauiui o ta ˈu i faaruru i mutaa ihora i to ˈu oraraa, e no to ˈu faahapa-noa-raa ia ˈu iho, ua roohia vau i te peapea rahi. I te mea e ua taa ia ˈu e e faaore mai Iehova i ta ˈu mau hapa i rave i tahito ra, na te reira i horoa mai i te itoito no te tutava i te riro mai ei Kerisetiano bapetizohia.

M. K., Tapone

O te hoê ïa o te mau aamu anaanatae e te au roa ˈˈe o ta ˈu i taio aˈenei. Ua tauturu atoa mai oia ia ˈu ia ite eaha mau na tei taaihia i te haamoriraa tupuna. Aita i matara ia ˈu i te auraa o teie huru haamoriraa e tae roa i te taime a taio ai au i teie aamu taata.

P. Y., Hau Amui no Marite

Ia faatîtî te mau nunaa ona i te mau nunaa veve E 14 matahiti to ˈu, e te hinaaro nei au e haamauruuru ia outou no te mau tumu parau no nia i te mau nunaa ona e faatîtî nei i te mau nunaa veve. (8 no Novema 1995) Ua ani mai to matou orometua haapii teotarafia ia papai i te hoê tumu parau no nia i te “Veve.” Ua imi au i roto i te mau huru vea atoa aita râ i itehia mai ia ˈu te tahi mea o ta ˈu e nehenehe e faaohipa. I reira, i te taime mau a hinaarohia ˈi, ua tae mai teie vea e te reira ïa ta ˈu i faaohipa no te vauvau i ta ˈu tumu parau. Ua noaa ia ˈu te nota teitei roa ˈˈe o te pǔpǔ haapiiraa, e te haamauruuru rahi atu nei au ia outou no teie mau tumu parau.

A. O., Beresilia

Palaneta i hamani-ino-hia Te papai atu nei au no nia i te mau tumu parau ra “To tatou palaneta i hamani-ino-hia—E ora anei oia?” (8 no Tenuare 1996) Auê te au e ia taio i te tahi parau faaitoito. Te horoa maira te toru o te tumu parau i te tiaturiraa no nia i te Paradaiso, i reira eita tatou e haapeapea faahou no te natura aore ra te mau apoo i roto i te paruru ozone! Te tiaturi nei au e ora i roto i taua Paradaiso ra e to ˈu utuafare e to ˈu mau hoa.

A. C., Hau Amui no Marite

Ua au roa matou i te tumu parau tarenihia anaanatae roa i te mau api 8 e te 9, e faataa ra i te mau fifi mai te vavahiraa i te ururaau, te ereraa i te pape, e te mau animala e te mau raau haamǎtaˈuhia. Na roto i teie mau tumu parau, ua papu ia matou i te huru tupuraa o to tatou palaneta i teie nei. E topa to tatou hau i te iteraa e, tei to tatou Poiete te ravea hoê roa no te faatitiaifaro i teie fifi ino mau.

O. P. e F. J. O., Paniora