Te papai mai nei te feia taio

Auhoaraa E 16 matahiti to ˈu, e te hinaaro nei au e haamauruuru ia outou no te tumu parau no nia ia Mama Louie, “To ˈu hoa here.” (8 no Febuare 1996) Ua huti te hohoˈa i to ˈu ara-maite-raa e ua taio oioi au i te tumu parau. Ua paruparu rii au, no te mea te rahiraa o to ˈu mau hoa, e ere i te hoa faahou. Ua faaitoito mau â te tumu parau ia ˈu ia faahoa ˈtu i te mau taata paari aˈe ia ˈu.

L. N., Italia

Haa tuaro i te fare haapiiraa Mauruuru roa no ta outou tumu parau ra “Te uiui nei te mau taurearea . . . Te haa tuaro tapǔpǔ—Mea maitai anei no ˈu?” (8 no Febuare 1996) E au ra e ua papaihia te reira no ˈu. Ua faataa mai te reira ia ˈu e peneiaˈe ua haamori na vau i te mau maona e tae mai i teie mahana. Ua tauturu atoa mai te tumu parau ia ˈu ia taa e “te haamataro hoi i ta te tino nei, e faufaa iti haihai to te reira.”—Timoteo 1, 4:8.

Y. T., Tapone

Mau rao Mauruuru roa no te tumu parau anaanatae roa “Taua mau rao au-ore-hia ra—Hau aˈe anei te faufaa i ta outou e manaˈo ra?” (8 no Mati 1996) I te tau veavea i mairi aˈenei, ua rave au i te tahi taime no te maimi no nia i te mau rao, aita râ i iteahia mai ia ˈu te tahi haamaramaramaraa au maitai. Ua manaˈo vau e mea haumani te rao e te reporepo, mai ta te tumu parau e faahiti ra. I teie nei râ, ua ite au e e ohipa faufaa ta ratou e rave ra—ahiri e aita ra, eita ïa to tatou Poiete e hamani mai ia ratou. Ua faahiahia roa vau i te mau tumu parau o ta outou e nenei ra.

T. G., Italia

Haamanaˈoraa Te haamauruuru mau nei au no te tumu parau ra “A haamaitai i to outou haamanaˈoraa.” (8 no Eperera 1996) I mutaa iho, ua tamata na vau i te haamanaˈo i te mau iˈoa o te mau melo atoa o ta ˈu amuiraa a te mau Ite no Iehova—ua moe-noa-hia râ ia ˈu. Ua rahi roa iho nei te faateimaharaa i to ˈu nominoraahia e te Taiete Watch Tower ei tavini ratere. Ua pahono teie tumu parau i ta ˈu mau pure! Na roto i te faaohiparaa i te mau manaˈo tauturu i horoahia, ua nehenehe au e haamanaˈo i te mau iˈoa hau atu i te afaraa o te feia o ta ˈu i farerei i roto e vau amuiraa taa ê.

C. E. U., Nigeria

Itehia te Atua Mea anaanatae mau â te aamu o Scott raua o Steve i to raua imiraa i te Atua. Ua imi atoa vau i te Atua i roto e rave rahi ekalesia, aita roa ˈtu râ i iteahia mai ia ˈu. Ua hinaaro rahi hoi au e faaoaoa i te Atua, aita râ vau i ite e nafea. Auê au i te mauruuru e, e ua ite Iehova i te hinaaro o to ˈu mafatu! Ua faaora mai te taviniraa ia Iehova ia ˈu e ua horoa mai i te hau.

D. C., Hau Amui no Marite

Paruru a te Atua? No hepohepo noa iho nei au, no te mea ua manaˈo vau e aita Iehova e faaroo maira i ta ˈu mau pure. Teie râ, ua tauturu mai te tumu parau ra “Ia au i te Bibilia: E tiai anei te Kerisetiano mau ia paruru mai te Atua ia ˈna?” (8 no Eperera 1996) ia ˈu ia taa e te ohipa nei te Atua ia au i ta ˈna mau opuaraa e eiaha noa ia au i to tatou mau hinaaro. Ia haamaitai mai Iehova ia outou i to outou papairaa i te mau tumu parau o te tauturu nei ia matou ia tuu i to matou tiaturi i nia ia ˈna.

C. A. A., Beresilia

Huˈa avaava Mauruuru roa no te tumu parau ra “Te uiui nei te mau taurearea . . . Huˈa avaava—Mea ino anei?” (8 no Eperera 1996) Aita vau i taa maitai i te upoo parau, e na te reira i turai ia ˈu ia taio i te tumu parau. Noa ˈtu e aita vau i farerei i teie fifi i ǒ nei i Togo, ua tauturu mai te tumu parau ia ˈu ia taa i te mau huru fifi e faaruruhia ra e vetahi ê i te tahi atu mau vahi o te ao nei.

C. H., Togo