‘Te arero o te feia reo otuitui ra, e papu ïa i te parau’

TEI te taime avatea o te hoê mahana tairururaa taa ê a te mau Ite no Iehova i Tekolovakia (Repubilita no Tekolovakia i teie nei), e mau hanere taata tei putuputu mai no te fanaˈo i te haapiiraa no nia i te Bibilia. Te tia noa ra vau i muri mai i te tahua e te hiˈopoa faahou ra vau i ta ˈu tuhaa. E ere hoi i te tuhaa rahi. E piti taurearea Ite o te faatia mai i te ohipa i farereihia e raua, e o vau ïa te taeae orero no tera tuhaa. I taua poipoi ra, ua riaria vau, i teie nei râ, te rahi noa ˈtura to ˈu riaria. E au ra e aita to ˈu e puai faahou, ua peapea roa vau, e eita ta ˈu e nehenehe faahou e paraparau.

Te manaˈo ra paha outou e mai te reira iho â no te rahiraa o te taata i roto i teie huru tupuraa. E ere noa râ te tahi riaria matauhia. E faatia ˈtu vau e no te aha râ.

To ˈu fifi no te paraparauraa

I te 12raa o to ˈu matahiti, ua topa vau e ua pepe to ˈu upoo, to ˈu âˈi, e to ˈu ivi tua. I muri iho, ua ǔǔ rii au i te tahi mau taime, aore ra aita ta ˈu parau i matara maitai, te mau taˈo iho â râ e haamata e te mau reta p, k, t, d, e m. I te tahi mau taime, eita ta ˈu e nehenehe e paraparau.

Aita te reira i haafifi rahi roa ia ˈu i tera tau; e mea au ore noa, tirara ˈtu ai. A mairi ai râ te mau matahiti, ua riaria roa vau i te paraparauraa i mua i te taata. Ua matapourihia vau i to ˈu vauvauraa i te hoê tumu parau i te fare haapiiraa. E i te tahi mau taime, ia haere au i te fare toa, e ia ani mai te taata hoo e eaha ta ˈu e hinaaro, eita ta ˈu e nehenehe e pahono atu. E ia tamata vau i te paraparau, e fiu mai ratou: “Haaviti. E ere o oe anaˈe. Te tiai noa ra te taata.” E no reira, aita vau i hoo mai i te mau taoˈa o ta ˈu i hinaaro.

Mea fifi roa ta ˈu tau haapiiraa. Ia tia ˈtu vau no te vauvau i ta ˈu mau tumu parau, e faaooo mai te mau taurearea haapiiraa ia ˈu no to ˈu ǔǔ. Teie râ, ua noaa ta ˈu parau tuite no te fare haapiiraa tuarua, e i te matahiti 1979 ra, ua haere â vau i te fare haapiiraa tuatoru i Prague, i Tekolovakia. I te mea e mea au na ˈu te haa tuaro, ua rave au i te tuhaa haapiiraa no te riro mai ei orometua haapii i te faaetaetaraa tino. Nafea râ e naeahia ˈi ia ˈu ta ˈu fa? Noa ˈtu to ˈu feaa, ua faaoti au e haere i mua.

Ua imi au i te tauturu

Ua papu ia ˈu e te vai ra te ravea no te faaore i to ˈu ǔǔ. No reira, i te noaaraa mai ta ˈu parau tuite no te fare haapiiraa tuatoru, ua opua ˈtura vau e imi i te tauturu i pihai iho i te mau taote. Ua imi au i te hoê fare maˈi i Prague tei aravihi i te rapaauraa i te mau fifi o te paraparauraa. I te farereiraa matamua, ua parau taue mai te vahine utuutu maˈi e: “Mea huru ê roa to oe maˈi feruriraa!” Ua mauiui roa vau i to ˈna manaˈoraa e ua inohia to ˈu feruriraa, noa ˈtu e ua farii te feia aravihi e, e ere te ǔǔ i te hoê maˈi no te feruriraa. Aita i maoro, ua papu atura ia ˈu e tei mua vau i te hoê tautooraa otahi roa: E taurearea vau e 24 matahiti, e e tamarii anaˈe te feia e rapaauhia ra.

Aita i maoro, ua tahoê aˈera te pǔpǔ rapaau taatoa, e tae noa ˈtu te taote rapaau feruriraa, no te tauturu ia ˈu. Ua tamata ratou i te mau ravea atoa. I te hoê taime, ua opani ratou ia ˈu ia paraparau i te taata e pae hebedoma noa ˈtu. I te tahi atu taime, ua faatia mai ratou ia ˈu ia paraparau ma te tauiui ore i te taˈiraa reo e ma te faahiti m-ǎ-r-û noa i te mau parau. Ua tauturu teie ravea ia ˈu, tera râ, ua piihia vau te Faarata Ophi no te mea e rave rahi te varea i te taoto ia vauvau anaˈe au i ta ˈu mau tumu parau.

To ˈu farereiraa i te mau Ite no Iehova

I te hoê mahana i te tau veavea o te matahiti 1984, te haere ra vau i te oire na raro, e piti taurearea tei haere mai e paraparau ia ˈu. E ere to raua huru rapaeau o tei faahitimahuta ia ˈu, te mea râ o ta raua i parau mai. Ua parau mai raua e e faatereraa ta te Atua, e Basileia, o te faatitiaifaro i te mau fifi atoa o te huitaata nei. Ua horoa mai raua i to raua numera niuniu, e ua taniuniu atu vau ia raua.

I taua tau ra, aita te mau Ite no Iehova i faatiahia e te ture ei faanahonahoraa faaroo i Tekolovakia. Aita râ i maoro, ua rahi roa to ˈu anaanatae e ua haere atura vau i ta ratou mau putuputuraa. Ua ite roa ˈtu vau i te here e te manaˈo aupuru o te mau Ite i te tahi e te tahi.

Te ravea i ore ai to ˈu riaria

Ua noaa ia ˈu te tauturu no to ˈu ǔǔ na roto i te arai o te Haapiiraa o te Taviniraa Teotaratia, e haapiiraa tahebedoma e faaterehia i roto i te mau amuiraa atoa a te mau Ite no Iehova. Ua faaitoitohia vau ia tapao i to ˈu iˈoa, o ta ˈu ïa i rave. Ma te faaohipa i te mau manaˈo i horoahia i roto i te hoê o te mau buka a te haapiiraa, te Buka no te Haapiiraa o te taviniraa teotaratia, ua tutava vau i te ohipa i nia i te mau aravihi o te oreroraa, mai te ohieraa o te parau, te faahitiraa, te aravihi o te oreroraa e te tauiuiraa i te reo.a

Ua hape roa ta ˈu oreroraa matamua, e taioraa Bibilia. Ua riaria roa vau e fatata aita vau i tapae i te fare. Na te hopuraa i te pape veavea i tamǎrû ia ˈu!

I muri aˈe i teie oreroraa matamua, ua tauturu taa ê mai te tiaau no te haapiiraa ia ˈu ma te mǎrû. Aita noa oia i horoa mai i te mau aˈoraa faaitoito, ua haapopou atoa râ oia ia ˈu. Ua haapuai te reira ia ˈu no te tamata faahou. Aita i maoro roa i muri iho, i te matahiti 1987, riro mai nei au ei Ite bapetizohia. Tau avaˈe i muri iho, ua faarue au ia Prague no te haere e faaea i te oire iti hau mau o Žďár nad Sázavou. Ua farii popou mai te pǔpǔ iti Ite no Iehova no taua vahi ra ia ˈu. Aita atoa ratou i tâuˈa i ta ˈu huru paraparau otuitui, e ua faaitoito te reira i to ˈu faatura ia ˈu iho.

I muri iho, ua haamata ˈtura vau i te faatere i te hoê pǔpǔ haapiiraa Bibilia iti, e ua horoa atoa vau i ta ˈu oreroraa parau huiraatira Bibilia matamua. E inaha, i te tauiraa te faatereraa i Tekolovakia, ua haamata ˈtura vau i te horoa i te mau oreroraa parau huiraatira i roto i te mau amuiraa tapiri mai. Ia tia vau i te hoê vahi matau-ore-hia, e otuitui faahou ta ˈu parau. Aita râ vau i faarue.

Te faarururaa i te mau fifi taa ê

I te hoê mahana, ua ani mai te hoê matahiapo kerisetiano ia haere i ta ˈna vahi raveraa ohipa. Ua parau mai oia: “Petr, e parau apî ta ˈu na oe! Te hinaaro nei matou e ia vauvau oe i te hoê tuhaa i te tairururaa haaati i mua nei.” Ua manaˈo vau e e matapourihia vau e ua imi au i te hoê parahiraa. Ua huru ê rii to ˈu hoa i to ˈu patoiraa i teie aniraa.

Ua haapeapea noa taua patoiraa ra ia ˈu. Aita ta ˈu i nehenehe e tumâ i te reira i to ˈu feruriraa. I te mau putuputuraa kerisetiano, ia faahiti-anaˈe-hia te parau no te tiaturiraa i te Atua, e haamanaˈo faahou vau i taua patoiraa ra ma te mauiui. I te tahi taime, i te mau putuputuraa, e faahitihia mai o Gideona, tei faaruru i te nuu ati Midiana taatoa ma te aratairaa a te Atua e ta ˈna noa e 300 taata. (Te mau tavana 7:1-25) Tera te hoê taata o tei tiaturi mau i to ˈna Atua ra o Iehova! Ua pee anei au i te hiˈoraa o Gideona i to ˈu patoiraa i taua hopoia ra? E tia hoi ia ˈu ia parau e, aita. Ua haama roa vau.

Teie râ, aita to ˈu mau taeae kerisetiano i faarue ia ˈu. Ua pûpû mai ratou i te tahi atu hopoia. Ua ani mai ratou ia rave i te hoê tuhaa i roto i te porotarama o te mahana tairururaa taa ê. I tera râ taime, ua farii au. Noa ˈtu to ˈu mauruuru i taua hopoia taa ê ra, ua pohe roa vau i te riaria i te manaˈoraa e paraparau i mua i te hoê piha tei î roa i te taata. E tia hoi ia ˈu ia tutava i te faarahi i to ˈu tiaturi ia Iehova. Nafea râ?

Na roto i te tuatapapa-maite-raa i te faaroo e te tiaturi o te tahi atu mau Ite ia ˈna. Ua haapuai te reira ia ˈu. Ua riro atoa te rata a Verunka, te tamahine e ono matahiti o te hoê hoa, ei hiˈoraa maitai roa no ˈu. Teie ta ˈna i papai: “E haere au i te haapiiraa i te avaˈe Setepa. Aita vau i ite e eaha te ohipa e tupu e te himene aiˈa. Te tiaturi nei râ vau e e aro Iehova no ˈu, mai ta ˈna i rave no Iseraela.”

E mau ohipa anaˈe te reira tei tupu na mua ˈˈe i te rururaa avatea o te mahana tairururaa taa ê ta ˈu i faahiti atu i te omuaraa o te tumu parau. Ua pure puai au. I teie nei, aita vau i haapeapea rahi roa no ta ˈu huru paraparau, no te arueraa râ i te iˈoa teitei o te Atua i mua i teie nahoa rahi.

E ua tia ˈtura vau e te micro i mua ia ˈu, ma te hiˈo tia ˈtu i te mau hanere taata. I reira, ma te haamanaˈo e mea faufaa aˈe te poroi i te taata auvaha, ua huti ihora vau i te aho e ua haamata ˈtura vau i te paraparau. I muri iho to ˈu feruriraa i te ohipa i tupu. Ua riaria anei au? Eita e ore, e ua ǔǔ atoa vau i te tahi mau taime. Tera râ, ahiri e aita te turu a te Atua, ua ite au e eita hoê aˈe parau e matara mai.

I muri iho, ua feruri atoa vau i te hoê parau ta te hoê taeae kerisetiano i faahiti mai: “A oaoa e e ǔǔ oe.” I te taime a faahiti ai oia i tera parau, ua hitimahuta vau. Nafea hoi oia e nehenehe ai e parau i te reira? Ia feruri râ vau i te ohipa i tupu, te taa ra ia ˈu i teie nei eaha te auraa o ta ˈna parau. Ua tauturu to ˈu ǔǔ ia ˈu ia turui hau atu â i nia i te Atua, i nia ia ˈu iho.

Ua mairi te mau matahiti mai taua avatea ra o te mahana tairururaa taa ê. I roto i teie mau matahiti, ua fanaˈo vau i te tahi atu mau hopoia taa ê e orero i mua i te mau nahoa rahi. Ua nominohia vau ei matahiapo kerisetiano i Žďár nad Sázavou e ei pionie atoa, te iˈoa ïa o te mau tavini ma te taime taatoa a te mau Ite no Iehova. A feruri na! I tera tau, ua horoa vau hau atu i te hoê hanere hora i te avaˈe no te paraparau i te taata no nia i te Basileia o te Atua, e aita i taiohia te taime o ta ˈu i horoa i te mau hebedoma atoa no te haapii i te taata i ta matou mau putuputuraa kerisetiano. E i teie nei, te tavini nei au ei tiaau haaati, e te horoa nei au i te mau oreroraa parau i mua i te hoê amuiraa taa ê i te mau hebedoma atoa.

E putapû roa to ˈu mafatu i te mauruuru ia taio anaˈe au i teie parau tohu taa ê o te buka Bibilia a Isaia: “E te arero o te feia reo otuitui ra, e titiaifaro ïa e te papu ia parau.” (Isaia 32:4; Exodo 4:12) Ua tia mai iho â Iehova i pihai iho ia ˈu, ma te tauturu ia ˈu ia ‘papu ia parau’ ei haamaitairaa, ei arueraa, e ei faahanahanaraa ia ˈna. Te mauruuru rahi nei au e te oaoa nei au i te neheneheraa e arue i to tatou Atua aroha rahi.—Faatiahia e Petr Kunc.

[Nota i raro i te api]