Te faarururaa i te ati auaa te puai o Iehova

NA TE PAPAI VEA A A ARA MAI NA! I PANIORA

I TE avaˈe Febuare o teie matahiti, e rave rahi melo o te Amuiraa a te mau Ite no Iehova no Bailén, tei fanaˈo i te hoê mahana maitai roa i te mau Mouˈa Sierra Nevada. E pae noa râ kilometera hou ratou a tapae ai i to ratou fare, ua tioi maira te hoê pereoo i te pae e terehia ra e to ratou pereoo uta taata, e ua û atura raua. Ua paaina e ua ura te pereoo uta taata. Ua manuïa vetahi mau horopatete i te haere i rapae, e rave rahi râ to muri i te pereoo uta taata o tei tapoˈi-roa-hia i te auauahi e tei pohe.

Ia taio-pauroa-hia, e 26 Ite tei pohe, tei roto e maha tavini ma te taime taatoa e e rave rahi tamarii—fatata hoê tuhaa i nia i te maha o te Amuiraa no Bailén. Ua haavevo te arii no Paniora, o Juan Carlos, i te manaˈo o te rahiraa o te mau Paniora, na roto i te poroi ta ˈna i faatae i te tavana oire no Bailén: “Ua hitimahuta roa matou i teie ati mauiui mau. Te faatae atu nei matou i te tapao aroha. A faaite atu i te mau utuafare o te feia i pohe i to matou aroha e to matou turu i roto i teie mau taime oto mau.”

Teie te uiraa tei haaferuri i te tahi i rotopu i te mau tausani taata i tae mai i te oroa hunaraa maˈi, No te aha teie mau ati e tupu ai? Oia mau, e nehenehe te mau ati faatupuhia e “te taime e te tupuraa manaˈo-ore-hia” e roohia i nia i te mau tavini o Iehova mai te tahi atu mau taata. (Koheleta 9:11, 12, MN) Noa ˈtu râ, ua tǎpǔ mai Iehova e fatata roa, eita teie mau ati e tupu faahou.—Apokalupo 21:4, 5.

E rave rahi melo o te fetii o te amaa a te mau Ite no Iehova no Paniora e e mau tausani Ite no te mau tuhaa ê atu o te fenua, tei tere mai i Bailén no te tamahanahana e no te turu i te mau taeae. Ua oto atoa te huiraatira no Bailén, e tae noa ˈtu te mau tia mana no te oire iho e no te mataeinaa, i pihai iho i te mau utuafare Ite no Iehova. E rave rahi feia mataitai tei maere roa i te itoito o te mau Ite tei heva.

“E rave rahi matahiti to ˈu matauraa i te mau Ite,” o ta Antonio Gómez, te tavana oire no Bailén, ïa i parau, “e noa ˈtu e e taata manaˈo feaa vau no nia i te Atua, te faatura nei au i to outou faaroo. I te taime a tupu ai teie ati, ua manaˈo vau i reira iho e, e tauturu to outou tahoê i te pae faaroo e to outou autaeae ia outou, ia faaruru maitai aˈe i te ati i te tahi atu mau pǔpǔ. Ua ite au i te taatoaraa o te oire i te tururaa i te mau utuafare e oto ra. Peneiaˈe na mua ˈˈe, e manaˈo hape to te taata no nia ia outou, te oaoa nei râ vau i te parau e, ua ore teie mau manaˈo hape. Te vai ra te hoê puai i roto ia outou e mea fifi roa ia taa no te hoê taata e ere oia i te Ite.”

Ua farii o José Borrell, te faatere hau o te mau ohipa a te hau, tei haere mai i te hunaraa maˈi ei tia no te hau Paniora, e: “Eaha ta oe e parau atu i te feia tei erehia fatata i to ratou utuafare taatoa i te hoê noa tairiraa? Aita ˈtu parau maoti râ ta ratou i fanaˈo aˈena i roto i to ratou faaroo . . . E faaroo faahiahia mau to outou.”

“E haamahanahana outou ia outou iho”

Eaha ta ratou ‘i fanaˈo i roto i to ratou faaroo’? Oia mau, ua fanaˈo ratou i te tamahanahanaraa no ǒ mai ia Iehova ra, “te Atua no ˈna anaˈe te mahanahana; o tei haamahanahana mai ia matou i to matou mau pohe atoa nei.” (Korinetia 2, 1:3, 4) Noa ˈtu to ratou mauiui, ua noaa mai ia ratou te puai no te haamahanahana i te tahi e te tahi, ia au maite i te mau parau a Paulo i to Tesalonia: “E haamahanahana outou ia outou iho, e e faatupu i te maitai te tahi i te tahi.”—Tesalonia 1, 5:11.

Auê te putapû e ia ite i te mau taeae e te mau tuahine kerisetiano, vetahi e vau fetii to ratou tei pohe, i te haereraa e farerei i te tahi atu mau melo o te amuiraa e heva ra. “Ua taˈi matou i to matou farereiraa. Tera râ, a tahe noa ˈi to matou roimata, ua faahaamanaˈo matou i te tahi e te tahi i te tiaturiraa o te tia-faahou-raa, e na te reira i tamahanahana ia matou,” o ta Francisco Saez, te tiaau-peretiteni, ïa e faataa ra, ua pohe ta ˈna e piti anaˈe ra tamarii.

“Aita matou i tuu i ta matou ohipa pororaa i te hiti, e ua tutava matou i te haere e farerei i te mau fetii o te feia i pohe e ere ratou i te Ite e te vea ra Ia pohe tei herehia e outou na.” Te na ô râ o Francisco e: “O vau iho nei, ua hinaaro vau e poro, no te mea ua ite au e ia poro atu vau ia vetahi ê, e mǎrû rii mai to ˈu mauiui. E aita iho â i hape, noa ˈtu e ua haere au ma te taˈi, ua hoˈi mai au i te fare ma te tamahanahanahia.”

Ua farii maitai te huiraatira no Bailén i teie ohipa pororaa. Hoê hebedoma i muri aˈe i te ati, ua haere atu o Encarna, tei oto i te poheraa e piti tamahine ta ˈna e e maha mootua, e hiˈo i te hoê vahine ta ˈna i haamata iho nei i te hoê haapiiraa Bibilia. Ua tamahanahana hoi o Encarna i teie vahine na roto i te mau Papai, inaha ua pohe ta ˈna tane e maha avaˈe na mua ˈtu. “I teie nei, e tia ia tâua ia tamahanahana i te tahi e te tahi,” o ta ˈna ïa i parau, a tamau ai raua i te tuatapapa i te vea ra Ia pohe tei herehia e outou na.

Ua tae oioi atoa mai te turu no ǒ mai i te mau taeae na te ao nei. “Ua itoito-roa-hia te amuiraa taatoa na roto i te mau tausani rata e mau poroi tei faataehia mai,” o ta Francisco Capilla, te papai parau a te amuiraa, ïa i faataa. “Ua tono te fare rata i te hoê pereoo rahi i to matou fare i te mau mahana atoa no te afai mai i te mau rata. E mauruuru rahi to matou i te tapitapi î i te aroha o te mau taeae.”

Te tiaturiraa noa ˈtu te ati

Eaha te vahi maitai e noaa mai na roto i teie huru ati? “Tei te fare oto ra te aau o te taata paari,” o ta te Arii no tahito ra o Solomona ïa i papai. (Koheleta 7:4) Ia au i teie aˈoraa, ua turai te ati i tupu i Bailén i te tahi mau taata ia feruri hau atu â i to ratou mau taairaa e te Atua. Ua parau o Faustino, e tane e ere oia i te Ite, e piti o ta ˈna e ono tamarii tei pohe i roto i te ati, i ta ˈna vahine ra o Dolores e: “E parau apî ta ˈu na oe. E haamata vau i te haapii i te Bibilia, no te mea te hinaaro nei au e farerei faahou i ta ˈu mau tamarii i roto i te ao apî.”

Noa ˈtu e eita te mauiui o to tatou mau taeae e mau tuahine no Bailén e mǎrû oioi noa, te tamahanahana nei ratou ia vetahi ê e te tamahanahanahia nei ratou. Te haapuai nei Iehova ia ratou na roto i to ˈna varua e na roto i te turu a te mau taeae e te mau tuahine here e rave rahi. Te tamau noa nei tatou i te faatae i te mau pure i to tatou Metua i te raˈi ra no ratou.

[Hohoˈa i te api 26]

E maha o te feia i pohe