Ia au i te Bibilia . . .

Eita anei e tano ia oto?

“Te tiaturi papu nei au i te tia-faahou-raa, e ua manaˈo vau e eita e tia ia ˈu ia faaite i to ˈu oto i mua i te tahi atu mau taata e e riro hoi ratou i te manaˈo e aita e vai ra ia ˈu teie tiaturiraa papu. Ua manaˈo vau e mai te peu e te tiaturi mau ra vau i te tia-faahou-raa, eita vau e oto rahi i teie poheraa.”—Charlene, te hoê vahine kerisetiano bapetizohia hau atu i te 21 matahiti.

IA POHE anaˈe te hoê taata o ta outou e here ra, e tupu mai te mau manaˈo hohonu e te mau haerea o ta outou i ore i manaˈo aˈe—te mǎtaˈu, te riri, te manaˈo faahapa, e te hepohepo. E nehenehe te parau tǎpǔ tamahanahana a te Bibilia no nia i te tia-faahou-raa o te feia pohe no te ora i nia i te fenua tei riro ei paradaiso i raro aˈe i te faatereraa o te Basileia a te Atua, e tauturu i te hoê kerisetiano ia tamǎrû rii i te mauiui i mua i te poheraa. (Ioane 5:28, 29; Ohipa 24:15; Apokalupo 21:1-4) Teie râ, mai ta te mau parau a Charlene raua o Eileen e faaite ra, ia pohe anaˈe te hoê taata herehia, te amo nei vetahi mau kerisetiano i te hoê hopoia teimaha ma te faufaa ore—i te manaˈoraa e eita e tia ia mihi, e ia oto ratou e tapao faaite ïa te reira e aita ratou e tiaturi mau ra i te parau tǎpǔ a te Bibilia no nia i te tia-faahou-raa.

Eaha râ ta te Bibilia e parau ra no nia i te oto? Eita anei e tano ia mihi ia pohe anaˈe te hoê taata herehia?

Ua oto ratou

Ua ite-papu-hia te faaroo o Aberahama. I to ˈna tamataraahia, ua ‘pûpû Aberahama [i ta ˈna tamaiti] ia Isaaka.’ (Hebera 11:17; Genese 22:9-13) Inaha hoi, aita aˈenei te hoê taata i faatiahia hou to ˈna ra tau, tera râ, ua tiaturi o Aberahama e, mai te peu e e titauhia, “e tiâ i te Atua ia faatia faahou mai [i ta ˈna tamaiti] mai te pohe maira.” (Hebera 11:19) Tau 12 matahiti i muri aˈe i te tamataraahia te faaroo o Aberahama, ua pohe ta ˈna vahine o Sara. Eaha ˈtura te huru o teie taata faaroo? Te faataa ra te Bibilia e “ua haere maira hoi Aberahama i te otoraa [auêraa] ia Sara e oto [taˈi] ia ˈna.”a (Genese 23:2) Oia mau, ua faaite tahaa teie taata o tei tiaturi e e faatia mai te Atua i te feia pohe, i to ˈna oto. Noa ˈtu râ, te faahitihia ra o Aberahama mai te hoê hiˈoraa faahiahia o te faaroo.—Hebera 11:8-10.

I mua i te pohe, te vai nei te feia aore e tiaturi ra i te tia-faahou-raa i roto i te taiâ rahi. Noa ˈtu e te parau ra ratou e te tiaturi ra ratou i te tahi oraraa i muri aˈe i te pohe, e mea iti o te ite nei i te tamahanahanaraa papu na roto i teie tiaturiraa. No e rave rahi atu â, te oto nei ratou eiaha noa no te mea e ua faataa ê te pohe ia ratou i to ratou feia herehia, oia atoa râ, te manaˈo nei ratou e e faataa-ê-raa tamau teie. I te mea e aita i noaa ia ratou te maramarama no nia i te tia-faahou-raa, e aramoina to ratou mau tiaturiraa ia tanu anaˈe ratou i te feia o tei herehia e ratou; i to ratou manaˈoraa, eita ratou e farerei faahou.—Faaau e te Korinetia 1, 15:12-19, 32.

E mea taa ê râ no te mau kerisetiano mau. Ua faataa o Paulo e ua riro te pohe mai te taoto ra te huru—eiaha noa no te mea e e huru aramoina teie e au i te hoê taoto hohonu, oia atoa râ no te mea e nehenehe e ara mai maoti te ravea o te tia-faahou-raa. (Salamo 13:3; Koheleta 9:5, 10) E faataui teie tiaturiraa niuhia i nia i te Bibilia i te mau ohipa.

Ia pohe anaˈe te hoê taata herehia, e putapû hohonu te kerisetiano, mai te feia tiaturi ore ra, i te moeraa o te hoê hoa, te oreraa e ite faahou i te hoê mata matau, te oreraa e faaroo faahou i te hoê reo herehia. Eita te tiaturiraa i te tia-faahou-raa e tupohe roa i te putapûraa o te mafatu. Area ra, te tamǎrû nei oia aore ra te faaaifaito nei oia i te mihi. Eita, eita teie tiaturiraa e faaore i te hinaaro e oto, teie râ, e nehenehe oia e tamǎrû i te mauiui.

Hoê o te mau hiˈoraa putapû roa ˈˈe o te oto faaite-tahaa-hia i te poheraa o te hoê taata herehia, o Iesu Mesia iho ïa. No nia i te poheraa o Lazaro, te hoê hoa piri no Iesu, te taio nei tatou e: “E tae atura Maria i taua vahi tei reira Iesu ra, ite atura ia ˈna, haamairi ihora oia i raro i tana pae avae, na ô atura ia ˈna, E te Fatu, ahiri oe i ǒ nei, e ore tau tuaane e pohe. E ite aˈera Iesu ia ˈna i te otoraa e te ati Iuda hoi i haere atoa maira, uuru ihora oia e horuhoru atura tana varua, na ô atura, Teihea oia i te vaiihoraahia e outou? Ua na ô maira ratou ia ˈna, E te Fatu, a haere mai a hiˈo. Oto ihora Iesu.”—Ioane 11:32-35.

E mea tamahanahana mau ia ite e aita te Tamaiti tia roa a te Atua i haamâ i te faaite tahaa i to ˈna oto. Te auraa o te parau na roto i te reo tumu ra e “oto” [i ǒ nei] (da·kryʹo) oia hoi “e tahe mǎrû noa te pape mata.” Te mea faahiahia oia ïa e piti taata ta Iesu i faatia na mua ˈtu—te tamaiti a te vahine ivi no Naina e te tamahine a Iaeiro—e ua opua iho â oia e faatia mai ia Lazaro. (Luka 7:11-15; 8:41, 42, 49-55; a faaau e te Ioane 11:11.) Tau taime na mua ˈtu ua parau atu oia ia Mareta e: “Tei ia ˈu te tia-faahou-raa e te ora, o te faaroo ia ˈu ra, pohe noâ oia e ora â ïa.” (Ioane 11:25) Teie râ, no te horuhoru hohonu o Iesu, ua tahe aˈera to ˈna roimata.

Te vai ra te tahi mea faufaa roa ˈtu â. O Iesu ‘te hohoˈa mau no [Iehova] iho.’ (Hebera 1:3) Te faataa maira ïa te mau manaˈo aroha e te hohonu i te poheraa te hoê taata herehia i te hoê hohoˈa putapû no to tatou Metua i te raˈi ra o Iehova. Te faahohoˈa maira hoi teie mau manaˈo i te hoê Atua e mauiui to ˈna mafatu i te peapea no te oto o to ˈna mau tavini.—Faaau e te Salamo 56:8.

Ma te papu maitai ïa, aita e ino ia oto ia pohe te hoê taata i herehia e outou. Ua oto o Aberahama i te poheraa o Sara. Ua faaite tahaa o Iesu i to ˈna oto i to Lazaro poheraa. Te taa ra i te Atua ra o Iehova i to tatou mauiui no te mea ‘te haapao maira’ oia ia tatou.—Petero 1, 5:7.

Eaha râ no nia i te tiaturiraa kerisetiano? E taui anei te reira i te mau ohipa?

‘Ia ore ia taiâ, mai te tahi pae’

I to vetahi pae i roto i te amuiraa kerisetiano no Tesalonia i te senekele matamua otoraa i te poheraa o te mau hoa faaroo, ua tutava o Paulo i te tamǎrû ia ratou. Ua papai oia e: “E teie nei, e te mau taeae, aita vau i hinaaro e ia ore outou ia ite i te parau i te feia i mairi te taoto nei, ia ore hoi outou ia taiâ, mai te tahi pae aore o ratou tiairaa ra.” (Tesalonia 1, 4:13) Oia, mea fanaˈo aˈe te feia o te tiaturi nei i te parau tǎpǔ a te Atua e faatia mai i te feia pohe, i te feia aita e tiaturi ra i te tia-faahou-raa.b Mea nafea ïa?

[Nota i raro i te api]

[Faaiteraa i te fatu o te hohoˈa i te api 30]

Jean-Baptiste Greuze, tuhaa o Le fils puni, Louvre; © Photo R.M.N.