E taui anei te hoê buka haapiiraa apî i te aratairaa o te mau ohipa?
Na to tatou taata papai A ara mai na! i Italia,
“TE HOÊ buka haapiiraa apî no te matahiti 2000,” “Te tabura o te mau hara apî,” “Hohoˈa apî o te Ekalesia”—o te tahi teie mau upoo parau i roto i te mau vea no te fenua Italia no nia i te Haapiiraa sabati apî a te Ekalesia katolika, tei neneihia na roto i te reo farani, helemani, italia e paniora. I Italia, ua maraa te faito hooraa o te mau buka haapiiraa i nia i te 110 000 aita i roaahia i te toru hebedoma. Parau mau, i roto i te hoê fenua katolika e 58 milioni rahiraa taata, e ere roa ˈtu te reira i te mea rahi roa. Te parau ra te hoê taata papai buka italia e e riro te taata e hoo mai i te reira “ma te paimi hoi i te hoê buka no nia i te mau hara apî”, i te “ore roa ˈtu e mauruuru”.
I te 7 titema 1992 ra, ua faaite maira te pâpa Ioane Paulo II i te buka e 450 apî, ta ˈna i mairi e “buka no nia i te faaroo e te mau huru morare katolika.” E ono matahiti te maoro te papairaahia e te na nia-faahou-raahia i te papai, e ma te mau faainoraa e rave rahi no roto i te aorai katolika iho. Ma te papu maitai, te turu ra te reira i te haapiiraa moe a te amuiraa faaroo kerisetiano no nia i te “Torutahi Moˈa roa ˈˈe . . . , te parau moe matamua o te faaroo.” Te parau atoa ra oia e “na te “Atua iho i poiete i te mau nephe varua atoa . . . , e e mea pohe ore hoi te reira.” (A faaau e te Korinetia 1, 15:28; Mataio 24:36; a hiˈo atoa i te Ezekiela 18:4, 20.) No te aha râ hoi te hoê buka haapiiraa apî e titauhia ˈi?
Te papai ra te hoê taata tuatapapa katolika e: “E rave rahi mau buka haapiiraa i neneiha e te mau pu faaroo arataihia e te hoê epikopo, no nia i te mau buka haapiiraa, e mau buka taa ê roa, tei î i te mau haapiiraa hape e te mau manaˈo huru ê mau.” Inaha, ua faaohipahia te reira e rave rahi matahiti te maoro no te faaino i te mau katolika faaroo. Te parau ra te buka katolika ra La Civiltà Cattolica e te tumu o te anairaa parau apî, no te horoa ïa “i te hoê tauturu faufaa roa ei haapapuraa i te autahoêraa o te faaroo,” tei aueue hoi i na matahiti i mairi aˈenei. O te pâpa iho tei parau e: “E ere i te mea ohie ia hiˈo eaha te mau ohipa e faatupuhia e teie mau haapiiraa. Tera râ, . . . e nehenehe oia e riro ei buka faufaa roa, ei mauhaa hotu mau no te ite hohonu e ei faaapîraa i te pae varua e i te pae morare.”
Mai te reira mau anei? E faaora anei teie buka haapiiraa i te amahamaharaa i roto i te mau katolika? Ua ite-papu-hia hoi teie mau amahamaharaa i roto i te huru o te mau katolika o te ao nei no nia i te mau tumu parau mai te haamaruaraa tamarii, te faataimeraa i te fanau, te haapiiraa no nia i te tiamâraa, e te faaôraa ˈtu i roto i tei parauhia te mau tamaˈi (ia itehia iho â râ i roto i te mau katolika e aro i te mau katolika). I nia i te hoê faito teitei roa, ua tupu te au ore e te amahamaharaa i rotopu i te taatiraa katolika puai mau ra Opus Dei, turuhia na te pâpa e na te mau melo mana roa o te hierareha, e na te mau Jésuites, o te ore hoi e auhia i teie nei e te pâpa.
E taui anei teie buka haapiiraa i te mafatu e te haerea o te mau tausani taata politita i Italia e i te mau paoti ohipa i ô i roto i te mau ohipa eiâ e te mau ohipa roo ino mau? Inaha eaha mau na te faufaaraa o teie nei buka i nia i te haerea o te feia faatere i Italia? Mai te peu eita ta ˈna e nehenehe e taui i te mau haerea morare o te feia faatere, no te aha ïa te mau katolika faito au noa e arataihia ˈi? I te mea e e 450 api to teie buka—e te ohipa taio e ere ïa i te ohipa matauhia e te rahiraa o te taata—o te hoê anei ïa huru e vai maoro atu i nia i te haerea, te tiaihia ra?