Te peu faufau i anoihia i roto i te upaupa
“TE FIFI noa ˈtura te hopoia tumu a te mau pǔpǔ hauti upaupa rock—oia hoi te faaturoriraa i te manaˈo o te mau metua e rave rahi—i roto i te hoê ihotumu te haere noa ˈtura i te faufauraa i te mau mahana atoa,” o ta te hoê tumu parau a te vea ra U.S.News & World Report ïa e faataa ra. Teie râ, te faaite atoa ra teie vea e ua faaruru vetahi mau pǔpǔ rock i te “tamataraa i te faaturori i te feia aueue ore” na roto i te raveraa i te mau parau faufau roa ˈtu â—i roto i ta ratou upaupa e tae noa ˈtu i roto i te iˈoa o ta ratou e maiti nei no ta ratou pǔpǔ. Te faataa ra te tumu parau e: “I teie nei te vai ra fatata e 13 pǔpǔ upaupa tei mairihia i te iˈoa na nia i te melo taatiraa o te tane, e 6 na nia i te melo taatiraa o te vahine, e 4 na nia i te pape faahotu o te tane, e 8 na nia i te haamaruaraa tamarii e hoê na nia i te hoê maˈi o te melo vahine.” Te na ô atoa ra teie tumu parau e ua itea mai na roto i te hoê maimiraa e fatata e hoê ahuru pǔpǔ upaupa o tei rave mai i te iˈoa na nia i te mau “peu taatiraa taa ê” e e ono na nia i te pihae. Oia mau, eita teie mau pǔpǔ hauti upaupa i matauhia, teie râ, e mana mau to ratou.
I Floride, ua faaoti te hoê tiribuna e mea faufau roa te hoê pehe a te pǔpǔ hauti upaupa rock ra 2 Live Crew, inaha, ia au i te hoê taata hiˈopoa, te vai ra i roto “e 87 huru faataaraa i te taatiraa na roto i te vaha, 116 faahitiraa no nia i te mau melo taatiraa o te tane e o te vahine e te tahi atoa mau parau rii puai mau no nia i te iitâraa o te tane.” Ua faaorehia ˈtura i muri iho te faaotiraa a te tiribuna. Teie râ, ua tapeahia te hoê taata hoo pehe, ua faautuahia no te raveraa i te peu faufau e ua titauhia oia ia aufau e 1 000 dala marite no te mea ua hoo oia i teie pehe. Ua faaineine to ˈna mau paruru i te patoi i teie faautuaraa.
Aita râ te mau taata atoa e turori ra i teie mau pueraa peu faufau atoa. I roto i te vea no te Hau no Washington, The Olympian, ua haafaahiahia roa te hoê taata hiˈopoa i te hautiraa a te hoê pǔpǔ hauti upaupa parauhia heavy-metal au-roa-hia e te taata. Ua tapao oia e ‘ua naeahia paha’ i teie pǔpǔ ‘i te hoê faito aitâ i naeahia ˈtura’ i to ratou faaohiparaa i te hoê parau faufau, no nia i te mau taatiraa, “hau atu i te 200 taime i roto i te mau parau faatuatiraa i te mau himene. Ua pahono maitai atu te nahoa taata. Ua riro taua po ra, ei po faufau, ei po no te rock ’n’ roll ia au i te peu no Marite ma, e ua oaoa roa te huiraatira.” Ua na ô maira oia e, “mea faahiahia roa te pǔpǔ hauti upaupa.”
Ua atea roa te huru hiˈoraa o te feia himene e te feia hiˈopoa upaupa o teie nei mahana i te aˈoraa paari mau a te Bibilia e na ô ra e: “Eiaha ei parau faufau to roto mai i to outou vaha.” (Ephesia 4:29) E tia mau â i te feia mea au roa na ratou i te upaupa, te feia apî e tae noa ˈtu i te feia paari, ia ara ia ore te parau faufau e ô atoa ˈtu i roto i to ratou tariˈa.