Te hau, te tahoêraa e te here i rotopu i te mau arepurepuraa

UA TAHOÊ te mau kerisetiano ereere, uouo, inidia, afa e te mau ratere ma te oaoa i Afirika Apatoa, te fenua no te apartheid! Tau hora noa? Eita, e maha mahana. Efea ratou? Tau hanere noa? Eita, hau atu i te 77 000! I hea roa? I Johannesburg e i Durban, mai te 26 e tae atu i te 29 no titema 1985, i roto i na tairururaa taa ê e piti. Ua ite ratou i reira i te mau taime putapû eita roa ˈtu e moe ia ratou.

Hoê â teie mau putuputuraa e te mau tairururaa faanahohia e te mau Ite a Iehova i roto i te ao taatoa e teie te tumu parau, “Te mau taata viivii ore”. E rave rahi mau ahuru tausani taata tei haere mai i Johannesburg e i Durban na nia i te pereoo auahi, te pereoo mataeinaa, te pereoo aore ra te manu reva. No roto mai ratou i te mau vahi atoa o Afirika Apatoa, e tae noa ˈtu i te Lesotho, te Swaziland, te Namibie, te Botswana, te Zambie, te Zimbabwe, e te Mozambique tei amahamaha hoi na roto i te mau aroraa.

Mau hanere tia tei haere atoa mai na Europa, na te Fenua Marite, na Tapone e na Sainte-Hélène, te hoê motu iti no Atalanatika, oia hoi e 24 fenua. I to ratou tapaeraa mai, ua farii-popou-hia ratou e te mau Ite no te fenua iho — te mau Ereere, te mau Uouo, te mau afa — e ua arataihia ratou i to ratou vahi faaearaa.

Ua tupu te tairururaa no Johannesburg i te Parc national des Expositions, e vai ra i te pae apatoa-tooa o te râ no te oire. O te hoê ïa fare rahi apî e rave rahi mau piha faaiteiteraa tei haaati i te hoê aua heeuri e te marumaru: te vahi faahiahia roa ˈˈe no te faatupu i te hoê tairururaa rahi i roto e rave rahi reo. Te mau tia reo zoulou, sotho, tswana, beretane e afrikaner, e piha rahi ta ratou, area te mau Potiti e te mau Heleni e piha nainai aˈe ïa ta ratou. Hoê â anaˈe porotarama. Oia mau, ia haamata anaˈe te rururaa, e putuputu iho â ïa te mau pupu ia au i to ratou reo, ia faaoti anaˈe râ, e oaoa paatoa ïa ratou ia amui te tahi e te tahi, ma te haapao ore i te huru iri aore ra te nunaa.

E rave rahi mau ratere tei faaea i roto i te mau vahi faataahia no te mau Uouo tei maere i te mea e aita hoê aˈe peapea. Ua parau te hoê tia helemani e: “Aita roa ˈtu te mau ohipa i tupu mai ta matou i manaˈo.” Ua oaoa pauroa ratou i te iteraa i te hoê hau e te hoê tahoêraa rahi i te vahi tairururaa. Ua faaite te hoê tia marite tei haere mai i te tairururaa no Johannesburg e: “A hiˈo na i teie mau huru taata atoa tei amui. E hinaaro vau ia tavirihia te hoê hohoˈa no nia i teie tairururaa e ia patahia na roto i te tele marite.”

Ua tupu te piti o te tairururaa i Durban, vahi tapaeraa pahi e te vahi faafaaearaa tuiroo. Mea rahi aˈe te Beretane i roto i taua oire ra, te faaea atoa ra râ e rave rahi mau Inidia i reira. Ua tupu te tairururaa i te Parc Royal, te hoê fare taaroraa rahi i pihai iho i te miti. Ua faaohipahia e piti tahua taaroraa tapiri, hoê na te mau Ite reo zoulou e te tahi ra no te feia reo xhosa (te vai ra te mau Pondos i roto) e te feia reo beretane (te vai ra te mau hanere Inidia e afa i roto).

Te vai ra anei te hau e te tahoêraa i roto i taua tairururaa ra? Teie te pahonoraa a te hoê vahine xhosa, e ere i te Ite e tei ratere mai e 600 kilometera no te apiti atu i roto i te tairururaa e: “Ua maere roa vau i te iteraa e e nehenehe te mau taata no te mau huru iri atoa e tahoê, i ô nei, i Afirika Apatoa. Aita roa ˈtu vau e ite ra i te reira i roto i te mau fare pure.” Ua faaite te hoê potii Inidia e: “Mea faahiahia mau. Ua taui roa to ˈu huru hiˈoraa i te oraraa i to ˈu iteraa i te mau afa, te mau Inidia, te mau Uouo e te mau Ereere i te anoi-noa-raa.”

Te mau fifi tei faatitiaifarohia

Mea ohie roa i te imi i te tahi nohoraa no te mau ratere uouo i roto i te mau hotela e te mau vahi faaearaa o te Uouo. E ere râ hoê â huru no te imi i te nohoraa no te mau tausani Ereere i Soweto, te oire rahi o te feia Ereere i te pae tooa o te râ no Johannesburg, mea fifi roa hoi i reira. Mea maitai roa râ te huru o te mau Ite no Soweto. Ua farii te tahi mau utuafare fatata e 20 ratere tei haere mai no te tairururaa. Teie râ, i te po o te mahana matamua o te tairururaa, ua patoi te mau taata faahoro pereoo mataeinaa no te mau fenua atea mai i te faauta i ta ratou horo patete i Soweto. (E rave rahi hoi mau pereoo mataeinaa tei tutuihia i te auahi i roto i te mau peapea.) I taua po ra, e rave rahi tei taoto i roto i te pereoo mataeinaa, ua farii râ ratou i te reira ma te ore e amuamu. I te ahiahi faahou iho, ua ravehia te tahi mau faanahoraa, e ua itehia e ratou te mau vahi faaearaa maitai.

Ua oaoa atoa te mau Ite no Johannesburg i te iteraa e rave rahi mau taata no te Cap mai. No te haere e no te hoˈi mai i rotopu i teie na oire e piti e 2864 kilometera ïa. Teie râ, mea veve roa te tahi mau Ite ereere e afa. Nafea ratou ia aufau i to ratou tere? Ua faanaho te hoê tomite Ite huru iri taa ê ia uta e 26 pereoo mataeinaa no te haere e no te hoˈi mai e ia faatopahia te moni i te afaraa o te tarifa mau. Noa ˈtu te mau fifi, ua haapae vetahi pae, e tae noa ˈtu i te mau ivi e tamarii ta ratou, i te tahi mau mea no te haere mai i te tairururaa. No nia i te tahoêraa i rotopu i te mau horo patete, ua parau te peretiteni o te tomite e: “I roto i te mau hebedoma hopea nei, ua arepurepu te Cap na roto i te tahi mau peapea. Ua tere râ te mau Ite ereere, afa e uouo i roto hoê â pereoo mataeinaa ma te hau.”

I Durban atoa, ua ite-maitai-hia te taa-ê-raa i rotopu i te hau e te mau aroraa. Te mahana na mua noa ˈˈe i te tairururaa, ua tupu te mau taputoraa ino mau i rotopu i te mau Zoulous e te mau Pondos tau kilometera noa te atea i te oire. No nia i taua ohipa ra, ua nenei te mau vea i teie faataaraa e: “I te Noela, fatata 58 taata tei pohe i roto i te mau peapea i rotopu 2 000 Zoulous e 3 000 Pondos.” Ua tupu â te tahi ati aita i atea roa i te tairururaa a tupu noa ˈi oia. Ua tairi te hoê pupu Ereere i te mau Inidia te faafaaea noa ra i tatahi i te raau, ma te faahuehueraa ia ratou.

Te mau taime oaoa e te mau taime putapû

I Johannesburg, i te mahana matamua iho â, ua hau atu te taata i te faito i manaˈohia. E 6 000 parahiraa i roto i te piha i reira i tairuru ai te feia reo beretane, 8 942 râ taata tei haere mai. E rave rahi tei afai mai to ratou iho mau parahiraa. Te mahana matamua, te rahiraa taata i roto i na tairururaa e piti, ua naeahia ïa 59 996 taata; i te rururaa hopea, ua naeahia ïa i te hoê faito faahiahia oia hoi 77 830 taata! I te omuaraa, aita te pupu faataahia no te pae maa i taa faahou e nafea ra inaha aita i ravai te maa.

Aita râ i erehia i te maa pae varua. Ua au-maitai-hia te mau oreroraa parau faahiahia mau, te mau faaueraa rû ia faaea ma te haapao maitai i roto i teie mau mahana ino, te mau aˈoraa tei faataehia i te mau taurearea, te mau hautiraa taata ora haaputapû tei faatahe i te roimata o te mau taata tei tairuru mai.

Ua putapû atoa to tatou mau taeae no te mau pupu atoa no Afirika i te farereiraa e te faarooraa ˈtu i te mau tia tei ratere mai. I to ratou faaiteraa ˈtu i te mau parau tei î i te aroha e te autahoêraa tei faataehia mai e te mau taeae no to ratou mau fenua, ua popo te feia i tairuru mai ma te oaoa. Ua horoa mai te mau melo no te Pû faatere a te mau Ite a Iehova tei tae mai i na tairururaa e piti i te mau oreroraa parau oraora maitai tei faaoaoa i te feia faaroo. Ua faaite-atoa-hia mai te mau buka apî. Ei haapotoraa, ua oaoa roa te feia i amui mai.

Ua riro te mau bapetizoraa ei taime oaoa mau no taua tairururaa ra. I Johannesburg, ia au i te mau numera no te mau matahiti i mairi aˈenei, ua manaˈohia e e 400 feia e bapetizo. Teie râ, e 921 Ite apî tei pûpû ia ratou no Iehova i roto i te bapetizoraa. Eita e moehia ia ratou taua mahana ra, e ore atoa e moehia i te feia rahi tei haere e hiˈo i te bapetizoraa i te mau taata no te mau huru iri atoa. E rave rahi te mau Ite ereere tei himene amui i te himene no te Basileia, na te reira hoi i haafaahiahia roa ˈtu â i taua oroa ra. I roto i te taatoaraa, 1363 taata tei bapetizohia.

Te mau tumu no te haamauruuru

I roto i taua mau tairururaa ra, ua nehenehe i te mau Ite no Afirika Apatoa i te farerei ma te hau, ma te taua ore i te huru o te iri, mea varavara roa hoi te itehia te reira. I Johannesburg, te vai ra te mau tamarii tei moe i roto i te nahoa no te rahi o te taata; inaha, i te hoê ahiahi aita te tahi mau tamarii ereere i taa fahou e tei hea to ratou mau metua. Na te mau Ite uouo e faaea ra i roto i te pereoo caravane i pihai iho i te vahi tairururaa i rave mai ia ratou. Ma te here, ua faahopu ratou i teie mau tamarii i te pape, ua faatamaa e ua faataoto; i te poipoi aˈe ua faahoˈi atu ratou i teie mau tamarii i to ratou mau metua ra, o tei oaoa roa hoi!

Ua tarahu te mau Ite uouo i te hoê pereoo auahi taa ê ia nehenehe e pae amuiraa Ite ereere no East London e haere i Durban e e hoˈi mai. I to ˈna taeraa mai, ua faahaerehia taua pereoo auahi ra i roto i te hoê vahi vairaa pereoo fatata mai i te vahi tairururaa. Ua vaiihohia oia i reira, inaha ua riro to ˈna mau tavere ei faaearaa no te mau Ite no East London i te taime tairururaa e ua oaoa roa hoi ratou i teie faanahoraa faahiahia mau!

No te mea hoi e ua faaarahia e te vai ra te hoê topita, ua haere mai te hoê mutoi no te pae paruru e hiˈopoa i te vahi tairururaa no Durban. E faaararaa hape râ te reira. I muri aˈe, ua parau teie mutoi i te hoê Ite uouo e: “Ua putapû roa vau i ta outou haafaufaaraa i te hau. Ua faaroo vau ia oe i te piiraa e ‘taeae’ i tera Ereere i ô. Ua ite outou i te ora ma te hau.” I muri aˈe i te tairururaa, ua parau te taata haapao i te Parc Royal i te tiaau o te tairururaa e: “Ua maere roa vau i ta outou faanahoraa faahiahia roa. O outou anaˈe te vaiiho nei i te tahua taaroraa mea mâ maitai. Ua ite iho â vau e vai mâ noa teie vahi.”

I Johannesburg, ua haafaahiahia atoa te mau mutoi ereere no te pae paruru i te huru hau o te tairururaa. Ua parau te hoê o ratou e: “Aitâ matou i ite aˈenei i te ohieraa ta matou ohipa i roto i teie huru tairururaa.”

I te tairururaa no Johannesburg, e rave rahi mau Ite ereere a tahi ra a amui ai e to ratou mau taeae uouo. Te faaite ra te hoê o ratou, o te tavini ra ei matahiapo i roto i ta ˈna amuiraa e: “Mea faahiahia mau.” Ua parau te hoê Ite no Zambie e: “Ua oaoa roa vau. A tahi ra vau a haere ai i te hoê tairururaa mai teie te huru.” Te ohipa i tupu i roto i teie tairururaa te faahohoˈa-mau-hia ra ïa i te mau parau a Iesu e: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” — Ioane 13:35.

Te horoa ra te mau peapea e haafifi ra ia Afirika Apatoa e te hau e te tahoêraa kerisetiano i te hoê taa-ê-raa papu maitai. No te faaiteraa i mua i te taatoa i to ratou mauruuru e to ratou manaˈo papu no te haamaitai atu â i te tau i mua nei, ua farii te feia tei amui mai ma te oaoa i teie parau o tei taiohia i roto i teie na tairururaa e piti e:

“O matou, te mau Ite a Iehova tei tahoê mai no te mau tairururaa ‘Te mau taata viivii ore’ tei tupu i te 26 e tae atu i te 29 no titema 1985 i Johannesburg e i Durban, i Afirika Apatoa, te hinaaro nei matou e faaite i to matou mauruuru rahi ia Iehova, to tatou Metua i nia i te raˈi, no te maa pae varua faufaa mau o ta ˈna i horoa mai, maa tei haamaramarama e tei faaitoito mai ia matou. Te oaoa nei matou i te mau tia no roto mai i teie e 24 fenua tei faaite papu i te here e te tahoêraa o te itehia ra i roto i te fetii o te mau tavini a Iehova i te ao paatoa nei. Te oaoa nei matou i te mea e ua tupu ta tatou nau tairururaa i roto i te hau noa ˈtu te mau fifi e te mau peapea iino e faaamahamaha nei i teie fenua e te tahi atu â. Te oaoa nei matou i te amui-hoê-raa i rotopu i to tatou mau taeae e mau tuahine no roto i te mau tuhaa rarahi o te nunaa e te mau reo no Afirika Apatoa. Ua ineine matou no te tapea tamau i to tatou taairaa no te here e no te au-taeae-raa, ma te ore e haapao i te huru o te iri, e no te pororaa ma te itoito mau i te parau apî maitai o te Basileia i roto i teie fenua peapea noa, e ia vai tamau noa ei taata haapao maitai, no te faahanahana i te iˈoa o Iehova.”

I to tatou nei mahana, mai te mea ra e e ere i te mea papu te parau no te oraraa no a muri atu no te rahiraa o te taata. Eiaha râ no te mau Ite a Iehova. Te haamaramarama mai nei te mau parau tohu o te Bibilia ia ratou e te fatata roa mai nei te hopea o te faanahoraa o te mau mea ino e vai nei. Te feia e ora mai i taua ati rahi ra e tomo atu ïa ratou i roto i te faanahoraa o te mau mea apî faaterehia e te Basileia o te Atua e e haamaitairaa rahi aˈe ïa ta ratou i ta Noa e to ˈna utuafare i to ratou oraraa mai i te diluvi rahi ra (Zephania 2:3). E hinaaro anei outou e o outou atoa to roto i te feia e ora mai? Mai te peu e mai te reira ra, a apiti atu ïa i roto i te fetii rahi o te feia e haamori ra ma te oaoa i te Atua hoê roa, o Iehova.

“E riro ia tae i te mau mahana hopea ra, e faatiahia te mouˈa ra o te fare o Iehova i nia i te tupuai mouˈa, e faateiteihia ïa i nia a ˈˈe i te mau aivi; e tairuru atoa mai te mau etene atoa ra i reira. E rave rahi te taata e haere ma te parau e, E haere mai, e haere tatou i nia i te mouˈa o Iehova, i te fare o te Atua o Iakoba; e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.” — Isaia 2:2, 3.

[Hohoˈa i te api 15]

I nia: e piti tavini i te taime taatoa — teie Ite ereere 101 matahiti to ˈna.

I raro: te mau tia afirika e ahu peni puai to ratou.

[Hohoˈa i te api 16]

Te mau tia i roto i te hoê putuputuraa o te tairururaa no Durban.

[Hohoˈa i te api 17]

I nia: te feia tei tae mai ma te hopoi mai i to ratou tauihaa ia au i te peu afirika.

I raro, i te pae aui: te hoê metua vahine te amo ra i to ˈna aiû ia au i te peu afirika.

I raro, i te pae atau: te tauturu ra te hoê taata tei haere mai i te tairururaa i te tahi no te tuu i to ˈna vairaa ahu i roto i te vairaa.

[Hohoˈa i te api 18]

Taatoaraa o te feia bapetizo: 1363.

[Hohoˈa i te api 19]

E piti tia tapone i rotopu i te tahi mau Ite.