E mau papu anei au?

E mau papu anei oe? Te mauiui ra anei oe no . . .

• te pohe o tei herehia?

• te maˈi tamau?

• te hoê ati natura?

Te parau ra te mau taata maimi e ere noa i mua i te mau fifi rahi e titauhia ˈi ia mau papu oe. E nehenehe atoa te hepohepo e tuino i to oe ea. No reira, mea faufaa ia mau papu oe i roto i te mau fifi nainai aore ra fifi rahi.

• Eaha te auraa ia mau papu oe?

• No te aha mea faufaa ia mau papu oe?

• E nafea oe e mau papu noa ˈi?

• To ratou manaˈo

Eaha te auraa ia mau papu oe?

O te neheneheraa ïa e faaruru i te mau tauiraa e te mau fifi. E û atoa te taata o te mau papu, i te fifi mai ia tatou pauroa. Tera râ, e matara mai oia mai roto mai i taua fifi ra, noa ˈtu ma te mauiui, ma te puai atu â râ.

No te aha mea faufaa ia mau papu oe?

• O tatou pauroa te faaruru i te fifi. Te parau ra te Bibilia: “Eita te taata vitiviti e upootia noa i te hororaa, . . . eita atoa te feia e ite to ratou e manuïa noa, no te mea e roohia ratou pauroa i te taime e te tupuraa manaˈo-ore-hia.” (Koheleta 9:11) Te haapiiraa: E mauiui atoa te feia maitai, noa ˈtu i te rahiraa o te taime e ere na ratou te hape.

• E paruru te reira ia oe. Teie ta te hoê taata aˈo o te haapiiraa tuarua e parau ra: “Mea rahi te piahi o te haere mai i ta ˈu piha ohipa e te riri pauroa no ta ratou nota hiˈopoaraa raro roa aore ra no te tahi parau tano ore i nia i te reni faahoaraa.” Te parau ra o ˈna e ere teie i te fifi rahi ia hiˈohia. Aita anaˈe râ te piahi i ite eaha te rave, e nehenehe o ˈna “e fifihia i te pae feruriraa e i te pae aau.”a

• E maitaihia oe i teie nei e ia paari mai oe. No nia i te mau tupuraa toaruaru o te oraraa, te parau ra te orometua haapii o Richard Lerner: “No te riro ei taata paari o tei manuïa i roto i to ˈna oraraa, mea faufaa ia ore ia taora i te tauera i mua i te mau tupuraa toaruaru, ia haamau i te mau fa apî aore ra ia imi i te tahi atu mau ravea ia naea ta oe mau fa.”b

E nafea oe e mau papu noa ˈi?

• Eiaha e faarahi i to oe mau fifi. A haapii eaha te hoê fifi rahi e eaha te hoê fifi nainai. Te parau ra te Bibilia: “E faaite oioi te maamaa ua fiu oia, eita râ te taata feruriraa haroˈaroˈa e tâuˈa i te tuhi.” (Maseli 12:16) E ere pauroa te fifi i te fifi iti rahi.

  “I te fare haapiiraa, te vai ra te mau piahi o te amuamu hanoa no te tahi mau tupuraa e ere hoi i te fifi rahi. I muri iho, i nia i te reni faahoaraa, e parau to ratou mau hoa e ua tano iho â ratou i te amuamuraa. E rahi roa ˈtu ïa te au ore o taua mau piahi ra. Eita ïa teie raveraa e tamǎrû ia ratou.”—Joanne.

• A haapii mai i te hiˈoraa o vetahi ê. Te faataa ra te Bibilia: “Mai te auri e faaoi i te auri, e faaoi atoa te hoê taata i to ˈna hoa.” (Maseli 27:17) E nehenehe oe e huti mai i te haapiiraa i te mau taata tei faaruru na i te mau fifi ino mau.

  “A paraparau ai ia vetahi ê, e ite oe e mea rahi te fifi ta ratou i faaruru na, e mea maitai râ ratou i teie nei. A paraparau ïa ia ratou. E ite ïa oe eaha ta ratou i rave aore ra i ore i rave i mua i taua mau fifi ra.”—Julia.

• A faaoromai. Te parau ra te Bibilia: “E nehenehe hoi te taata parau-tia e topa e hitu taime, e e tia faahou mai oia.” (Maseli 24:16) E titauhia te taime no te farii i te hoê tupuraa fifi. Eiaha ïa e maere ia toaruaru oe i te tahi mau mahana. Te mea faufaa, ia “tia faahou mai” oe.

  “No te tia faahou mai i muri iho i te hoê fifi, mea faufaa ia rapaauhia to oe aau. E ere mea ohie, e titauhia atoa te taime. Ua itea mai ia ˈu e a mairi ai te mau mahana, mea ohie atu â ïa no ˈu ia maitai mai.”—Andrea.

• A faatupu i te aau mauruuru. Te parau ra te Bibilia: “Ia mauruuru atoa outou.” (Kolosa 3:15) Noa ˈtu eaha te fifi ta oe e faaruru ra, te vai ra iho â te tahi mau mea e mauruuru ai oe. A feruri e toru mea e hoona ˈi to oe oraraa.

  “Ia û oe i te fifi, pinepine oe i te parau ‘No te aha vau?’ No te mau papu, e titauhia eiaha e manaˈonaˈo i to oe mau fifi. E faaoti râ oe e faatupu i te feruriraa maitai e ia mauruuru i te mau mea ta oe e fanaˈo ra aore ra ta oe e nehenehe e rave.”—Samantha.

• A maiti i te mauruuru noa i te mea e vai ra ia oe. Ua parau te aposetolo Paulo: “Ua haapii hoi au i te mauruuru noa i te mea e vai ra ia ˈu i roto i te mau tupuraa atoa.” (Philipi 4:11) Aita to Paulo e mana i nia i te mau fifi ta ˈna e faaruru ra. E nehenehe râ ta ˈna e maiti e nahea o ˈna i mua i te reira. Ua faaoti papu o ˈna e mauruuru noa.

  “Hoê mea ta ˈu i haapii mai no nia ia ˈu, to ˈu ïa huru matamua i mua i te hoê fifi, e ere mea maitai. Ta ˈu fa, o te faatupuraa ïa i te feruriraa maitai i mua i te mau huru tupuraa atoa. O vau te maitaihia e vetahi ê atoa.”—Matthew.

• A pure. Te parau ra te Bibilia: “A huri i ta oe hopoia i nia ia Iehova, e na ˈna e tauturu ia oe. Eita roa oia e vaiiho ia marua te taata parau-tia.” (Salamo 55:22) Eita oe e pure no te mea noa e maitai mai oe. No te mea atoa râ e aparauraa teie e to oe Atua poiete o ‘te haapeapea ra no oe.’—Petero 1, 5:7.

  “Eita e titauhia ia faaruru noa o vau anaˈe. Ma te faaite roa ia Iehova i to ˈu mau fifi e ma te haamauruuru ia ˈna no ta ˈu e fanaˈo ra, e tiatonu ïa vau i te mau haamaitairaa ta ˈna e horoa mai ra. Mea na reira e pee ai to ˈu mau huru aau tano ore. Mea faufaa roa ïa te pure!”—Carlos.