Ia ofati au i te tahi faatureraa a to ˈu mau metua: E nafea ïa?

I roto i te mau utuafare atoa, te vai ra te mau faatureraa, no nia anei i te hora ia hoˈi mai i te fare, te taime e faaohipa ˈi oe i te mau matini afaifai, e to oe huru i nia ia vetahi ê.

E nafea mai te peu ua ofati oe i te tahi faatureraa? Aita ta oe e nehenehe e taui i te ohipa i tupu. Tera râ, te vai ra te ravea ia ore ia ino roa ˈtu te tupuraa. Te faaite ra teie tumu parau eaha te rave.

• Te ore e rave

• Te hoê ravea maitai aˈe

• To ratou manaˈo

Te ore e rave

• Mai te peu aita to oe metua i ite e ua ofati oe i te tahi faatureraa, e tamata paha oe i te huna i ta oe hapa.

• Mai te peu ua ite to oe metua e ua ofati oe i te tahi faatureraa, e tamata paha oe i te imi i te mau otoheraa aore ra i te pari ia vetahi ê.

E ere roa ˈtu i te mea tano ia na reira. No te aha? No te mea eita oe e maitaihia ia tapoˈi oe i ta oe hapa aore ra ia imi oe i te otoheraa. Te faaite ra oe i to oe mau metua e tamarii noa oe.

“E ere te ravea maitai ia haavare oe. E fa mai iho â te parau mau i muri mai, e mea ino roa ˈtu â te utua ahani oe i faaite aˈena i te parau mau.”—Diana.

Te hoê ravea maitai aˈe

• A faaite i te parau mau. Te faaite ra te Bibilia: “Eita te taata o te tapoˈi i ta ˈna mau hapa e manuïa.” (Maseli 28:13) Ua ite to oe metua e ere oe i te mea tia roa. Ua hinaaro râ ratou ia faaite oe i te haerea haavare ore.

  “E faaore oioi to oe mau metua i ta oe hapa mai te peu e faaite oe i te parau mau e e rahi atu â to ratou tiaturi ia oe.”—Olivia.

• A tatarahapa. Te parau ra te Bibilia: “Ia ahu . . . outou paatoa i te haehaa.” (Petero 1, 5:5) E titauhia te haehaa no te parau “ua hape au” e ia ore e imi i te otoheraa.

  “Ia imi noa te mau taata i te otoheraa, eita ïa to ratou manaˈo haava e hauti faahou. E aita ˈtura ia ratou e haama faahou i te rave i te mea ino.”—Heather.

• A farii i te mau faahopearaa. Te parau ra te Bibilia: “A faaroo i te aˈo.” (Maseli 8:33) Eiaha e amuamu e a farii i te mau aˈoraa a to oe metua.

  “Rahi atu â oe i te amuamu i te aˈoraa, e fifi atu â ïa to oe tupuraa. A imi i te ravea no te farii i te mau aˈoraa, e eiaha e tiatonu i te mau mea ta oe i ere.”—Jason.

• Ia noaa faahou te tiaturiraa a to metua. Te parau ra te Bibilia: “Ia haapae i te huru taata tahito tei au i to outou haerea na mua ˈˈe ra.” (Ephesia 4:22) A haamata na mua i te faaite i te hoê feruriraa paari.

  “Mai te peu e tamau oe i te rave i te mau faaotiraa paari e i te faaite i to oe mau metua e aita oe e rave i taua noa ra hapa, e tiaturi faahou ïa raua ia oe.”—Karen.

MANAˈO TAUTURU: A faaite e nehenehe oe e tiaturihia. Ei hiˈoraa, ia haere oe i rapae, a faaara i to oe mau metua e te hoˈi ra oe i te fare noa ˈtu aita oe e taerehia. E faaite te reira e ua hinaaro oe ia tiaturi faahou mai to oe mau metua ia oe.