Eaha te raˈi?

Te pahonoraa a te Bibilia

I roto i te Bibilia, ua faaohipahia te taˈo “raˈi” no te faataa: (1) te raˈi ta tatou e ite ra, (2) te ao varua e (3) te hoê tiaraa teitei aore ra hanahana. Na te tupuraa e faaite eaha te auraa mau o te raˈi faahitihia ra.a

1. Te raˈi ta tatou e ite ra. Oia hoi te reva mataˈi o te fenua i reira e puihau te mataˈi, e rere ai te mau manu, e topa ˈi te ûa e te hiona e te mau anaparaa uira. (Salamo 78:26; Maseli 30:19; Isaia 55:10; Luka 17:24) E nehenehe atoa e parau e o te reva teitei i reira e vai ai “te mahana, te avaˈe e te mau fetia.”—Deuteronomi 4:19; Genese 1:1.

2. Te ao varua. E faaohipahia te taˈo “raˈi” no te faataa i te ao varua e e mea teitei aˈe te reira i to tatou raˈi e fenua. (Te mau arii 1, 8:27; Ioane 6:38) I reira e ora ˈi te Atua ra o Iehova ei “Varua” e te mau melahi ta ˈna i poiete. (Ioane 4:24; Mataio 24:36) I te tahi taime, te faahohoˈa ra “te mau raˈi” i te mau melahi haapao maitai “i roto i te amuiraa o tei moˈa.”—Salamo 89:5-7.

   Te faaohipa atoa ra te Bibilia i te taˈo “raˈi” no te faataa i te tahi vahi i roto i te ao varua ei nohoraa no Iehova, “te vahi e parahi ai” o ˈna. (Te mau arii 1, 8:43, 49; Hebera 9:24; Apokalupo 13:6) Ei hiˈoraa, ua faaite atea te Bibilia e hurihia Satani e ta ˈna mau demoni mai te raˈi mai, aita ratou e nehenehe e tia faahou i mua i to Iehova aro. Tera râ, te vai noa ra ratou i roto i te ao varua.—Apokalupo 12:7-9, 12.

3. Te hoê tiaraa teitei aore ra hanahana. Te f aaohipa ra te mau Papai i te taˈo “raˈi” no te faataa i te hoê tiaraa teitei, no te parau iho â ra o te mana faatere. O vai te nehenehe e rave i teie tiaraa?

   • O te Atua ra o Iehova, no te mea o ˈna te Arii hau ê e te Manahope.—Paraleipomeno 2, 32:20; Luka 15:21.

   • O te Basileia o te Atua aore ra te Faatereraa arii a te Atua, na te reira e mono i te mau faatereraa a te taata. Te parau ra te Bibilia o te “raˈi apî” teie Faatereraa.—Isaia 65:17; 66:22; Petero 2, 3:13.b

   • O te mau Kerisetiano te ora ra i nia i te fenua e e tiaturiraa to ratou ia ora i te raˈi.—Ephesia 2:6.

   • O te mau faatereraa taata tei faateitei ia ratou i nia i to ratou huiraatira.—Isaia 14:12-14; Daniela 4:20-22; Petero 2, 3:7.

   • O te mau varua ino tei faatere nei i teie ao.—Ephesia 6:12; Ioane 1, 5:19.

Mai te aha te huru o te raˈi?

Mea rahi te ohipa ravehia i roto i te ao varua. Te haa noa ra e rave rahi mirioni melahi o “te faatupu ra i ta [Iehova] parau.”—Salamo 103:20, 21; Daniela 7:10.

Te faataa ra te Bibilia e vahi anaana roa te raˈi. (Timoteo 1, 6:15, 16) Ua ite orama te peropheta Ezekiela i te raˈi mai “te tahi mea anaana,” area râ o Daniela, ua ite orama o ˈna i te hoê tahora mai “te auahi” ra te huru. (Ezekiela 1:26-28; Daniela 7:9, 10) Mea moˈa te raˈi aore ra mea viivii ore e te hanahana.—Salamo 96:6; Isaia 63:15; Apokalupo 4:2, 3.

Ia au i te Bibilia e vahi faahiahia mau te raˈi. (Ezekiela 43:2, 3) Teie nei râ, no te mea e ao varua te reira, aita te taata e nehenehe e taa roa eaha te raˈi.