Afea te hopea o teie ao e tae mai ai?

Te pahonoraa a te Bibilia

No te ite afea te hopea o te ao e tae mai ai, mea faufaa ia taa nafea te Bibilia e faaohipa ai i te taˈo “ao.” E pinepine te taˈo Heleni kosmos hurihia ei “ao” i te faataa i te huitaata, te taata iho â ra tei atea ê i te Atua e i to ˈna hinaaro. (Ioane 15:18, 19; Petero 2, 2:5) I te tahi taime, e faataa te taˈo kosmos i te mau mea a te totaiete taata, oia hoi te faanahoraa tapihooraa, poritita e faaroo.​—Korinetia 1, 7:31; Ioane 1, 2:15, 16.a

Eaha “te hopea o teie nei ao”?

E nehenehe atoa e hurihia te pereota “te hopea o teie nei ao” itehia i roto e rave rahi huriraa Bibilia ei “te anotau hopea o te ao nei” aore ra o “te faanahoraa o te ao.” (Mataio 24:3) Aita ïa e faahitihia ra te haamouraa o te paraneta aore ra o te huitaata, o te hopea râ o te hoê faanahoraa.​—Ioane 1, 2:17.

Te haapii ra te Bibilia e “e haamouhia hoi te feia ohipa ino” ia oaoa te taata i to ratou oraraa i nia i te fenua. (Salamo 37:9-11) E haamouhia ratou ia hope te “ati rahi” i te tamaˈi o Aramagedo.​—Mataio 24:21, 22; Apokalupo 16:14, 16.

Afea te hopea o teie nei ao e tae mai ai?

Ua parau Iesu: “No nia i te reira mahana e te reira hora, aita te hoê i ite, aita te mau melahi o te raˈi e aita atoa te Tamaiti, o te Metua anaˈe râ.” (Mataio 24:36, 42) Ua parau â o ˈna e e tae mai te hopea “i te hora manaˈo-ore-hia e outou.”​—Mataio 24:44.

Noa ˈtu aita tatou i ite i te mahana e te hora, ua horoa Iesu i te hoê “tapao” tuhaa rau o te tauturu mai ia ite i te anotau hou te hopea o te ao e tae mai. (Mataio 24:3, 7-14) Te faahiti ra te Bibilia i te reira mai “te anotau o te hopea” e “te mau mahana hopea.”​—Daniela 12:4; Timoteo 2, 3:1-5.

Eaha te vai noa mai ia tae mai te hopea o te ao?

E vai noa mai te fenua. Te parau ra hoi te Bibilia e “e ore te reira e tauihia i to ˈna vahi e a muri noa ˈtu.” (Salamo 104:5) E î te fenua i te taata mai ta te Bibilia e tohu ra: “E fatu te feia parau-tia i te fenua, E e parahi ratou i nia iho e a muri noa ˈtu.” (Salamo 37:29) E faatupu te Atua i ta ˈna i opua i te omuaraa:

• Te hoê paradaiso.​—Isaia 35:1; Luka 23:43.

• Te hau e te ruperuperaa.​—Mika 4:4.

• Te hoê ohipa au mau e te mauruuru no te taata atoa.​—Isaia 65:21-23.

• Aita faahou e maˈi e e vai apî noa te taata.​—Ioba 33:25; Isaia 33:24.