Uiraa no nia i te raˈi

E rave rahi te aimârô ra eita e nehenehe e ite atu â no nia i te raˈi, aita hoi hoê aˈe taata no te raˈi mai o te nehenehe e faaite mai. Ua hape râ tera manaˈo. Ua ora Iesu Mesia i te raˈi hou a pou mai ai i te fenua. Ua parau tia roa ˈtu oia i te mau tia haapaoraa i to ˈna ra tau: “I pou mai nei hoi au mai te raˈi mai e haapao i to tei tono mai ia ˈu nei hinaaro, eiaha to ˈu iho hinaaro.” Ua faaite Iesu i te hoê haamaramaramaraa a parau ai i ta ˈna mau aposetolo: “E rave rahi te parahiraa mau i te fare o tau Metua ra.”—Ioane 6:38; 14:2.

O vai to Iesu Metua? O te Atua, o Iehova to ˈna iˈoa e tei te raˈi to ˈna parahiraa. (Salamo 83:18) No reira, o te Atua Iehova e o Iesu Mesia te nehenehe e faataa maitai aˈe i te ao itea ore. O ta raua ïa i rave maoti te mau orama faahiahia mau ta raua i horoa i te feia taiva ore.

I to muri nei tumu parau, e ite oe i te tahi mau irava Bibilia o te faataa i ta te taata i ite i roto i te mau orama. A hiˈopoa ˈi i te reira, a haamanaˈo e ere te raˈi mai te ao taata nei hamanihia e te mau mea o ta tatou e ite e e tapea. Ua faaohipa te Atua i te mau orama ia taa ia tatou mai te aha te raˈi. Ahani aita o ˈna i na reira, eita tatou e taa. E tauturu ïa te mau orama ia oe ia taa i tei parahi ra i te raˈi.