Eaha te faaoraraa?

Te pahonoraa a te Bibilia

I te tahi taime, ua faaohipa te mau papai Bibilia i te mau taˈo “ora” e “faaoraraa” no te hoê taata tei faaorahia mai roto mai i te hoê tupuraa atâta aore ra i te haamouraa. (Exodo 14:13, 14; Ohipa 27:20) Tera râ, ua faaohipa-pinepine-hia teie mau taˈo no te hoê taata tei faaorahia mai i te hara. (Mataio 1:21) No te hara e pohe hoi te mau taata, tera râ no tei faaorahia mai i te hara e tiaturiraa to ratou ia ora e a muri noa ˈtu.—Ioane 3:16, 17.a

Eaha te tia ia rave ia faaorahia oe?

E titauhia ia faatupu oe i te faaroo ia Iesu e ia faaite i te reira ma te auraro i ta ˈna mau faaueraa.—Ohipa 4:10, 12; Roma 10:9, 10; Hebera 5:9.

Te faaite ra te Bibilia aita e navai noa ia parau e faaroo to tatou, e tia atoa ia auraro i te Atua e ia faaite i te reira na roto i te ohipa. (Iakobo 2:24, 26) E ere te auraa e noaa iho â ia oe te faaoraraa no te mea e “ô . . . te reira na te Atua,” o te faaite ra i to ˈna “hamani maitai rahi.”—Ephesia 2:8, 9.

No te aha mea faufaa ia tutava ia faaorahia oe?

E nehenehe te hoê taata tei faaorahia mai roto mai i te pape e paremo faahou. Oia atoa no te hoê taata tei faaorahia mai i te hara, e nehenehe atoa o ˈna e faaea i te faatupu i te faaroo ia Iesu a ere ai o ˈna i te ora. No reira, te parau ra te Bibilia no te mau Kerisetiano tei faaorahia “ia aro uˈana no te faaroo.” (Iuda 3) E faaara atoa te Bibilia ia ratou: “A tutava noa ïa ma te mǎtaˈu e te rûrû ia noaa ia outou te ora.”—Philipi 2:12.

O vai te Faaora? Te Atua aore ra Iesu?

Te faataa ra te Bibilia o te Atua to tatou “Faaora” rahi roa ˈˈe. (Samuela 1, 10:19; Isaia 43:11; Tito 2:10; Iuda 25) Hau atu â, ua maiti te Atua te tahi mau taata ei “faaora” no te tauturu i te nunaa Iseraela i tahito ra. (Nehemia 9:27; Te mau tavana 3:9, 15; Te mau arii 2, 13:5) Oia atoa, ua faaora te Atua i te taata i te hara maoti te tusia taraehara o Iesu Mesia. No reira te Bibilia i parau ai e o Iesu to tatou “Faaora.”—Ohipa 5:31; Tito 1:4.b

Pauroa te taata tei faaorahia?

E ere pauroa te taata tei faaorahia. (Tesalonia 2, 1:9) I to te hoê taata aniraa ia Iesu “e parau mau anei e aita i rahi te taata e faaorahia?” pahono atura Iesu: “A tutava i te tomo na te uputa pirihao. Te parau atu nei hoi au e mea rahi te tamata i te tomo, eita râ ratou e ô atu.”—Luka 13:23, 24.

Manaˈo hape no nia i te faaoraraa i te mau taata atoa

Manaˈo hape: Ia parau te Petero 2, 3:9 aita te Atua “e hinaaro ra ia haamouhia te hoê,” te auraa ïa e faaora te Atua i te mau taata atoa.

Tupuraa mau: Te hinaaro ra te Atua ia ora te mau taata, no reira ua horoa o ˈna i te ravea no te faaora ia ratou. Aita râ o ˈna e faahepo i te taata ia farii i te reira. Tera râ, te vai ra te “mahana haavaraa” a te Atua oia hoi te “haamouraa o te feia faatura ore i te Atua.”—Petero 2, 3:7.