Faaoraraa

Auraa: O te oraraa ˈtu ïa i te ati aore ra i te pohe, te tiamâraa mai, ei hiˈoraa, i te mana o te feia e haavî ra aore ra e hamani ino ra ia tatou. Na roto i te arai o ta ˈna Tamaiti, te faaora nei Iehova i te mau Kerisetiano mau atoa i teie faanahoraa ino o te mau mea e i te faatîtîraa o te hara e o te pohe. Te faaoraraa no te feia rahi roa o te mau tavini haapao maitai a Iehova e ora nei i “te mau mahana hopea,” o to ratou ïa parururaahia i roto i te ati rahi.

No to ˈna aroha rahi, e faaora anei te Atua i te pae hopea i te huitaata atoa nei?

Te turu ra anei te Petero 2, 3:9 i te manaˈo e e faaorahia te huitaata atoa nei? Te taiohia ra e: “Aore te Fatu i faanuu i te faatupuraa i ta ˈna parau tǎpǔ, mai ta vetahi pae e tiaturi ra: te faaite nei râ oia i te faaoromai ia outou nei, e ore hoi oia e hinaaro e ia mou vetahi [“aita oia e hinaaro ra e ia haamouhia te hoê,” MN], ia naea pauroa râ te tatarahapa.” (CT) No to ˈna aroha, te hinaaro nei te Atua e ia tatarahapa te huaai atoa a Adamu, e ua rave oia i te mau faanahoraa hamani maitai ia nehenehe te feia o te tatarahapa mau e fanaˈo i te faaoreraa i ta ratou mau hara. Aita râ oia e faahepo ra i te taata ia fanaˈo i teie mau faanahoraa. (Hiˈo Deuteronomi 30:15-20.) E rave rahi hoi o te patoi nei i te reira. E au ratou i te hoê taata e paremo ra, o te turai atu ra râ i te ahu poito o tei taorahia mai. A tapao na râ e eita te feia o te ore e tatarahapa e mauiui e a muri noa ˈtu i roto i te hoê po auahi. Ia au i te Petero 2, 3:9, e mou ratou, aore ra e “haamouhia.” Te faaite atoa ra te irava 7 (CT) i “te haamouraa o te feia paieti ore.” Aita e itehia ra i roto i teie irava te manaˈo o te faaoraraa i te huitaata atoa nei.—Hiˈo atoa i te tumu parau “Po auahi.”

Te haapapu ra anei te Korinetia 1, 15:22 e e faaorahia te mau taata atoa i te pae hopea? Te na ô ra oia e: “Mai te taata atoa e pohe ia Adamu, e ora faahou ïa te taata atoa i te Mesia.” (CT) Mai ta te mau irava tapiri e haamatara ra, te faahiti ra teie irava i te parau o te tia-faahou-raa. O vai te faatiahia mai? Te feia atoa i pohe no te hara a Adamu (hiˈo i te irava 21) aita râ ratou i rave i te hara ma te hinaaro mau, ia au i ta te Hebera 10:26-29 e faataa ra. Mai ia Iesu tei faatiahia mai Hade mai (Ohi. 2:31), e “ora faahou” ïa te feia atoa i roto ia Hade maoti te tia-faahou-raa. (Apo. 1:18; 20:13) E noaa anei i te feia atoa e faatiahia mai te faaoraraa mure ore? E horoahia ˈtu te ravea, eita râ ratou pauroa e maiti i te reira, mai ta te Ioane 5:28, 29 e faaite ra, e ‘haavahia’ (MN) vetahi pae i te pae hopea.

Eaha ïa no te irava mai te Tito 2:11 e na ô ra e e noaa te ora i “te taata atoa”? E au ra e te turu atoa ra vetahi atu mau irava, mai te Ioane 12:32, Roma 5:18 e Timoteo 1, 2:3, 4 (ia au i te BFC, Da, Ku, PB, TOB), i te manaˈo o te faaoraraa i te huitaata atoa nei. No roto mai te mau parau Heleni i hurihia na roto i te parau “atoa” i te parau pas. Inaha, ia au i te faataaraa a te Expository Dictionary of New Testament Words a Vine (Lonedona, 1962, Buka I, api 46), te auraa atoa o te parau pas oia ïa “te huru atoa, te huru rau.” No reira, i roto i te mau irava tei faahitihia ˈtu, e nehenehe e mono i te parau “atoa” e te mau parau ra “te huru atoa,” aore ra “te mau huru atoa.” (MN) Eaha ˈtura ïa te huriraa e tano—“atoa” aore ra “te mau huru atoa”? Teihea hoi te tuea maitai aˈe e te toea o te Bibilia? Ia tuatapapahia te Ohipa 10:34, 35, te Apokalupo 7:9, 10 e te Tesalonia 2, 1:9, te itehia ra e o te piti ïa o te huriraa. (A tapao na: Te farii nei te feia i huri i te mau iritiraa i nia nei e tera atoa te auraa o teie parau Heleni, inaha ua iriti ratou i teie parau o te Mataio 5:11 na roto i te mau parau “te mau huru atoa,” Ku; “te huru atoa,” BFC, Li, TOB; “te huru rau,” Da.)

Te parau papu ra anei te mau Papai e eita roa vetahi mau taata e faaorahia?

Tes. 2, 1:9, Da: “E roohia [ratou] i te utua o te hoê haamouraa mure ore i mua i te aro o te Fatu e i mua i te hanahana o to ˈna ra puai.” (Na matou i papai faaopa.)

Apo. 21:8, Da: “Area te feia mamahu ra, e te feia tiaturi ore, e te feia atoa i haaviivii ia ratou i te mau mea hairiiri ra, e te feia taparahi taata, e te feia poreneia, e te feia tahutahu, e te feia haamori idolo, e te feia haavare atoa, e hope ratou i roto i te roto veavea o te auahi e te gopheri, oia hoi te piti o te pohe.”

Mat. 7:13, 14: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!”

Ia ora te hoê taata, ua ora anei oia e a muri noa ˈtu?

Iuda 5, Li: “Te hinaaro nei au e faahaamanaˈo atu ia outou, a hoê aˈenei outou iteraa: i muri aˈe i to ˈna faaoraraa i to ˈna nunaa i te fenua Aiphiti, ua haamou te Fatu i muri iho i te feia o tei ore i tiaturi.” (Na matou i papai faaopa.)

Mat. 24:13, Li: “O te tapea e tae noa ˈtu i te hopea, o ˈna te faaorahia.” (Ia haamata te hoê taata i te faaohipa i te faaroo ia Iesu, aitâ i papu e e ora oia i te pae hopea.)

Phil. 2:12, Li: “No reira, e mau here e, o tei faaroo noa ia ˈu, a faaroo eiaha noa ia parahi anaˈe au i rotopu ia outou, hau atu râ i teie nei, aita vau i pihai iho ia outou: a rohi ia noaa to outou faaoraraa ma te mǎtaˈu e te rurutaina.” (Mai ta te Philipi 1:1 e faaite ra, te papai atura o Paulo i te “feia moˈa” i Philipi. Te faaitoito ra oia ia ratou ia ore e tiaturi rahi roa ia ratou iho e ia haamanaˈo e aitâ to ratou faaoraraa i papu.)

Heb. 10:26, 27, Li: “Mai te peu e e hara tatou ma te hinaaro mau i muri aˈe i te noaaraa mai te ite o te parau mau, aita faahou ïa e tusia no te hara; o te tiai-noa-raa ïa ma te mehameha i te haavaraa e te auahi o te riri o te haapau i te feia orure.” (Aita te Bibilia e turu ra i te manaˈo e ia “ora” te hoê taata, ua ora ïa oia e a muri noa ˈtu, noa ˈtu eaha ta ˈna mau hara. Te aˈo maira râ oia ia tapea i te haapao maitai. Hiˈo atoa Hebera 6:4-6, e faaite ra e e nehenehe atoa te hoê Kerisetiano faatavaihia i te varua moˈa e erehia i te tiaturiraa o te faaoraraa.)

E navai anei te faaroo ia noaa mai te faaoraraa?

Eph. 2:8, 9, CT: “Mea na roto i te karatia [“maitai rahi,” MN] i faaorahia ˈi outou maoti te faaroo. E ere na roto ia outou: e ô na te Atua. E ere atoa na roto i te mau ohipa, ia ore te tahi ia faatietie ia ˈna iho.” (Ua riro te taatoaraa o te mau faanahoraa ta Iehova i rave ia ora tatou ei faaiteraa o to ˈna maitai rahi. Aita hoê noa ˈˈe huaai a Adamu e nehenehe e faaora ia ˈna na roto i ta ˈna iho ravea, noa ˈtu eaha te faufaa o ta ˈna mau ohipa. Te faaoraraa, o te hoê ïa ô ta te Atua e pûpû i te feia atoa e faaroo to ratou i te faufaa taraehara o te tusia a ta ˈna Tamaiti.)

Heb. 5:9, CT: “Ua riro mai [o Iesu] no te feia atoa e auraro ra ia ˈna ei tumu o to ratou faaoraraa mure ore.” (Na matou i papai faaopa.) (Te patoi ra anei teie mau parau i te irava e na ô ra e e “faaorahia” te mau Kerisetiano “maoti te faaroo?” Aita. Na roto i to ratou auraroraa, te faaite noa nei te mau Kerisetiano e e faaroo haavare ore to ratou.)

Iak. 2:14, 26: “Eaha te faufaa, e au mau taeae, ia parau mai te hoê e, e faaroo to ˈna, e aore a ˈna e ohipa, e ora anei oia i te faaroo? Mai te tino nei hoi ia ore te varua ra, e mea pohe ïa, oia atoa te faaroo aore e ohipa ra, e mea pohe atoa ïa.” (Eita te faaoraraa e noaa ia tatou na roto i ta tatou mau ohipa. Teie râ, ia faaohipa te hoê taata i te faaroo mau, e ohipa ïa oia—e auraro oia i te mau faaueraa a te Atua e a te Mesia e e faaite oia i to ˈna faaroo e to ˈna here na roto i te mau ohipa. Ahiri aita, e mea pohe ïa to ˈna faaroo.)

Ohi. 16:30, 31: “E homa e, eaha vau e ora ˈi au? Ua parau maira raua [o Paulo e o Sila], E faaroo i te Fatu ia Iesu Mesia, e e ora ïa oe e to fetii atoa.” (Mai te peu e ua tiaturi mau teie taata e to ˈna utuafare, eita anei ratou e ohipa? Oia.)

Ia parau mai te hoê taata e:

‘Ua faaorahia vau’

E nehenehe oe e pahono e: ‘Mea oaoa roa na ˈu ta oe mau parau, no te mea te faaite ra te reira e te tiaturi nei oe ia Iesu Mesia. Te ohipa ta ˈu e apiti nei i teie mahana, o te ohipa ïa ta Iesu i faaue i ta ˈna mau pǐpǐ e rave oia hoi te faaiteraa i te mau taata e ua haamauhia to ˈna Basileia. (Mat. 24:14)’ E nehenehe oe e parau i muri iho e: (1) ‘Eaha taua Basileia ra? Eaha te auraa o to ˈna haereraa mai no te ao nei? (Dan. 2:44)’ (2) ‘Eaha te mau huru tupuraa e itehia i nia i te fenua i raro aˈe i taua faatereraa no te raˈi ra? (Sal. 37:11; Apo. 21:3, 4)’

Aore ra e nehenehe oe e parau e: ‘Te taa ra ïa ia oe te faufaaraa o te mau parau a te aposetolo Petero i roto i te Ohipa 4:12. . . . Ua aniani aˈena anei oe na vai i horoa i te iˈoa o Iesu ia faaohipa tatou i te faaroo ia ˈna?’ E nehenehe oe e parau i muri iho e: (1) ‘Na Iesu iho e faaite maira. (Ioa. 17:3)’ (2) ‘A tapao na e ua parau o Iesu e ua faaite oia i te iˈoa o to ˈna Metua. (Ioa. 17:6) O vai te iˈoa iho o te Atua? Eaha te mea e puta mai i roto i to oe feruriraa? (Exo. 3:15; 34:5-7)’

‘Ua faaorahia anei oe?’

E nehenehe oe e pahono e: ‘E tae roa mai i teie nei, e. Te na reira nei au i te parau no te mea te aˈo ra te hoê irava Bibilia i te mau Kerisetiano eiaha ia tiaturi rahi roa ia ratou iho. Ua ite anei oe i teie irava? (Kor. 1, 10:12)’ E nehenehe oe e parau i muri iho e: ‘No te aha teie aˈoraa e horoahia ˈi? Ma te parau atu i te mau taata tei fanau-faahou-hia e tiaturi ra e ora i nia i te raˈi (Heb. 3:1), ua papai te aposetolo Paulo e . . . (Heb. 3:12-14) E nehenehe e haapaari i to tatou faaroo na roto i te faahohonuraa i to tatou ite i te Parau a te Atua.’

Aore ra e nehenehe oe e parau e: ‘E nehenehe au e pahono noa ˈtu e e. Tera râ, ua ite anei oe e te faahiti ra te Bibilia e rave rahi faaoraraa? Ei hiˈoraa, ua feruri anei oe i te auraa o te mau parau o te Apokalupo 7:9, 10, 14? . . . No reira, e faaorahia vetahi mau taata i roto i te ati rahi i mua nei no te ora i nia i te fenua. (Mat. 5:5)’

‘Te farii ra anei outou ia Iesu ei Faaora no outou?’

Hiˈo i te mau api 196, 197, i te tumu parau “Iesu Mesia.”

‘Te parau nei outou e 144 000 taata anaˈe te faaorahia’

E nehenehe oe e pahono e: ‘Te oaoa nei au i to oe vaiihoraa mai ia ˈu ia faataa ˈtu i ta matou e tiaturi mau nei. Te pûpûhia ra te faaoraraa i te feia atoa o te faaohipa mau i te faaroo i te mau faanahoraa ta te Atua i rave na roto i te arai o ta ˈna Tamaiti. Tera râ, ia au i te Bibilia, 144 000 taata anaˈe o te haere atu i nia i te raˈi e te Mesia. Peneiaˈe ua hiˈo aˈena oe eaha ta te Bibilia e faaite ra no nia i teie parau. . . . A hiˈo na eaha te na ôhia ra i roto i te Apokalupo 14:1, 3.’ E nehenehe oe e parau i muri iho e: (1) ‘Eaha ta ratou ohipa i nia i te raˈi? (Apo. 20:6)’ (2) ‘E mea papu e e arii ratou i nia i te mau taata. I to oe manaˈo, o vai taua mau taata ra? . . . (Mat. 5:5; 6:10)’