O vai o Babulonia rahi?

Te pahonoraa a te Bibilia

Te faataa ra te buka o te Apokalupo i te hoê “vahine taiata rahi” e to ˈna iˈoa “te hoê parau huna: ‘Babulonia rahi.’” (Apokalupo 17:1, 3, 5) Te faahohoˈa ra teie vahine te taatoaraa o te mau haapaoraa hape na te ao nei, e “ua maiti ratou e tiaturi i te haavare eiaha râ i te parau mau a te Atua.”a (Roma 1:25) Noa ˈtu mea rahi te mau haapaoraa, ua faaatea ê ratou i te taata i te haamoriraa o te Atua mau ra o Iehova.—Deuteronomi 4:35.

Nafea ia ite o vai o Babulonia rahi?

1. E hohoˈa taipe o Babulonia rahi. Mea rahi te mau “taipe” i roto i te buka o te Apokalupo, no reira aita tatou e maere e taipe atoa o Babulonia rahi, e ere i te hoê vahine mau. (Apokalupo 1:1) Hau atu â, o ˈna te “parahi ra i nia iho i te pape e rave rahi,” oia hoi i nia i te “nahoa taata ïa e e nunaa e e reo atoa.” (Apokalupo 17:1, 15) Aita ïa te hoê vahine mau e nehenehe e na reira.

2. E faanahonahoraa o Babulonia rahi na te ao nei. Ua piihia o ˈna te “oire rahi . . . e faatere ra i te mau arii o te fenua.” (Apokalupo 17:18) No reira, e mana to ˈna na te ao atoa nei.

3. E ere o Babulonia rahi i te hoê faanahonahoraa poritita aore ra tapihooraa. Ua matauhia Babulonia i tahito ra no te mau haamoriraa e rave rau e no te mau ohipa “pifao” e te “peu tahutahu e rave rahi.” (Isaia 47:1, 12, 13; Ieremia 50:1, 2, 38) Tei roto te mau taata tei noho i taua oire i te haapaoraa hape e ua patoi ratou i te Atua mau ra o Iehova. (Genese 10:8, 9; 11:2-4, 8) Ua faateitei te mau arii teoteo no Babulonia i nia ia Iehova e ta ˈna haamoriraa. (Isaia 14:4, 13, 14; Daniela 5:2-4, 23) Oia atoa, ua matauhia Babulonia rahi no ta ˈna ra “mau peu tahutahu.” Te faaite ra te reira e te faahohoˈahia ra o Babulonia rahi i te mau haapaoraa.—Apokalupo 18:23.

   E ere o Babulonia rahi i te hoê faanahonahoraa poritita no te mea e oto “te mau arii o te fenua” no ta ˈna haamouraa. (Apokalupo 17:1, 2; 18:9) E ere atoa o ˈna i te hoê faanahonahoraa tapihoo no te mea te faataa ê ra te Bibilia ia ˈna i “te mau ona o te fenua.”—Apokalupo 18:11, 15.

4. 

   Hohoˈa patahia e te parau faatia a te fare vairaa taihaa tahito British Museum

   E hohoˈa maitai o ˈna i te mau haapaoraa hape. Te aratai ra te haapaoraa hape i te taata ia haamori i te mau atua ê eiaha râ ia faafatata i te Atua mau ra o Iehova. Te parau ra te Bibilia e “taiata . . . pae varua” te reira. (Levitiko 20:6; Exodo 34:15, 16) I Babulonia tahito ra, mea rahi te mau haapiiraa hape mai te Toru tahi, e ora ˈtu te tahi mea i roto i te taata ia pohe o ˈna, te faaohiparaa i te mau hohoˈa i roto i te haamoriraa. Te tamau noa ra te haapaoraa hape i te haapii i te reira. Hau atua â, e anoi ratou i ta ratou huru haamoriraa e te here o teie nei ao. No reira, ia au i te Bibilia ua taiva ratou aore ra ua faaturi i te pae varua.—Iakobo 4:4.

   Te faaiteite ra te haapaoraa hape i ta ˈna mau taoˈa e rave rahi. Teie atoa ta te Bibilia e parau ra no nia ia Babulonia rahi: “E ahu vareau e te uteute to te vahine, e ua faanehenehe o ˈna ia ˈna i te auro e te mau ofai maitai roa e te poe.” (Apokalupo 17:4) No roto mai ia Babulonia rahi “te mau mea faufau o te fenua,” aore ra te mau haapiiraa e haerea tei faaino i te Atua. (Apokalupo 17:5) No roto mai i te “nahoa taata . . . e e nunaa e e reo atoa,” te mau mero o te haapaoraa hape o te turu ra ia Babulonia rahi.—Apokalupo 17:15.

O Babulonia rahi te tumu i pohe ai “te feia atoa i haapohehia i nia i te fenua.” (Apokalupo 18:24) I te roaraa o te tau, aita noa te haapaoraa hape i turai i te taata ia faatupu i te mau tamaˈi e te ohipa totoaraa, ua ore atoa o ˈna i haapii i te parau mau no nia ia Iehova ra, te Atua here. (Ioane 1, 4:8) Tera ïa te tumu i manii-rahi-hia ˈi te toto o e rave rahi taata.

Eaha to te Atua manaˈo no nia ia Babulonia rahi?

I mua i te aro o te Atua, “ua pue hoi ta ˈna mau hara e ua tae roa i te raˈi.” (Apokalupo 18:4, 5) Ua riri te Atua ia Babulonia rahi no te mea aita o ˈna e faaite ra i te parau mau no nia ia ˈna e te hamani ino ra o ˈna i ta ˈna mau tavini.

Eaha te faahopearaa no Babulonia rahi?

Te parau ra te Bibilia e “ua haava te Atua” ia Babulonia rahi. (Apokalupo 18:20) Na roto i te hoê auraa taipe, te tohu ra te Bibilia e haamou roa te Atua i te mau haapaoraa hape atoa. (Apokalupo 18:8) E turai o ˈna i te puaa taehae uteute ia hae e ia haamou roa i te mau haapaoraa hape. (Apokalupo 17:16, 17) “Mea na reira Babulonia te oire rahi e taorahia ˈi i raro, e eita oia e ite-faahou-hia.” (Apokalupo 18:21) No reira, e titauhia i te taata tei hinaaro ia mauruuru te Atua ia ratou, ia “haere ê mai i rapae mai rotopu mai ia ratou,” oia hoi ia faataa ê atu i te haapaoraa hape.—Korinetia 2, 6:14-17.