Te tamaˈi i Hitia o te râ no ropu: Eaha ta te Bibilia e parau ra?

Te haapeapea ra te taata na te ao nei no te aroraa e vai ra i rotopu i te hau Marite, Iseraela e Irania. E riro anei teie aroraa ei tamaˈi o te faaô e rave rahi atu â fenua? E nehenehe anei te mau faatereraa e tapea i te reira e e faatupu i te hau na te ao nei?

No te feia o te ite i te parau tohu Bibilia, e manaˈo paha ratou e te aroraa o te tupu ra i Hitia o te râ no ropu o te haamataraa ïa o te tamaˈi o Aramagedo tohuhia i roto i te buka Apokalupo.

Eaha ta te Bibilia e parau ra?

E faaore anei te mau faatereraa i te tamaˈi i Hitia o te râ no ropu?

Te parau ra te Bibilia: “Eiaha outou e tiaturi i te huiarii e i te tamaiti a te taata nei, o te ore e nehenehe e faaora.”—Salamo 146:3.

Aita e papu e nehenehe te mau faatereraa e faatupu i te hau i taua vahi ra. Tera râ, te haapapu maitai ra te Bibilia, eita hoê noa ˈˈe tia poritita, faatereraa taata aore ra pǔpǔ taata e nehenehe e faaore i te tamaˈi e e hopoi mai i te hau. O te Atua anaˈe râ o te nehenehe e “faaore . . . i te mau tamaˈi ati aˈe i te fenua.”—Salamo 46:9.

• No te ite hau atu â, a taio i Te Pare Tiairaa “E ore anei te tamaˈi?”

Te faatupu ra anei te tamaˈi i Hitia o te râ no ropu i te parau tohu Bibilia?

Te parau ra te Bibilia: “E faaroo outou i te tamaˈi e te parau o te tamaˈi. . . . E aro hoi te tahi nunaa i te tahi atu nunaa e te tahi faatereraa i te tahi atu faatereraa.”—Mataio 24:6, 7.

E tapao te aroraa i Hitia o te râ no ropu e te ora nei tatou i te “anotau hopea o te ao,” ta te Bibilia atoa e parau o “te mau mahana hopea.” (Mataio 24:3; Timoteo 2, 3:1) Te haapapu atoa ra te reira fatata roa te Atua i te faaore i te tamaˈi e te mau fifi atoa o te haamauiui ra i te huitaata.

• No te ite atu â, a taio i te tumu parau “Eaha te tapao o ‘te mau mahana hopea’ aore ra ‘te taime faataahia o te hopea’?”

E haamata anei te tamaˈi o Aramagedo i Hitia o te râ no ropu?

Te parau ra te Bibilia: “Haaputuputu maira ratou i te mau arii i te vahi parauhia Aramagedo na roto i te reo Hebera.”—Apokalupo 16:16.

E ere te tamaˈi o Aramagedo i te aroraa i rotopu i te mau faatereraa taata o te haamata i Hitia o te râ no ropu. O te hoê râ tamaˈi na te ao taatoa i rotopu i te Atua e te mau faatereraa taata atoa.

• No te ite atu â, a taio i te tumu parau “Eaha te tamaˈi o Aramagedo?”

Na te aha e tauturu ia tatou ia vai hau noa?

Te parau ra te Bibilia: “Eiaha ïa e haapeapea noa ˈˈe, na roto râ i te pure e te taparuparuraa e te haamaitairaa, a faaite i ta outou mau aniraa i te Atua.”—Philipi 4:6.

Te hinaaro ra te Atua ra o Iehovaa ia pure tatou ia ˈna. No te mea te haapeapea ra te Atua no tatou, e faaroo oia i ta tatou mau pure e e tauturu atoa mai ia hepohepo tatou. (Petero 1, 5:7) E tauturu mai o ˈna ia taa tatou no te aha te vai ra te mau tamaˈi, e nafea oia e faaore i te reira e eaha ta ˈna e rave ia ore tatou e mauiui faahou.—Apokalupo 21:3, 4.

• No te ite atu â e nafea te Atua e tauturu ai ia tatou, a taio i te tumu parau “E nehenehe anei te Bibilia e tamahanahana ia ˈu?”