Eaha te auraa ei Kerisetiano? Eaha ta te Bibilia e parau ra?

I teie mahana, e rave rahi taata na te ao nei o te faahua parau ra e Kerisetiano ratou. Tera râ, te haamauiui ra to ratou haerea ia vetahi ê. E haapao noa vetahi ia ratou iho, e haerea tano ore to ratou e e taata ino ratou. Area vetahi e taiva ratou i to ratou hoa faaipoipo. No to ratou haerea e ui ai vetahi: ‘Eaha mau na te auraa ei Kerisetiano?’

Eaha mau na te auraa ei Kerisetiano?

Mea ohie no te hoê taata ia parau e Kerisetiano o ˈna. E ere râ tera anaˈe. Ia au i te Bibilia, te hoê Kerisetiano e pǐpǐ na Iesu. (Ohipa 11:26) Ua parau Iesu: “Ia haapao noa outou i ta ˈu parau, e pǐpǐ mau ïa outou na ˈu.” (Ioane 8:31) Parau mau, eita ta te hoê e nehenehe e pee ma te tia roa i te mau parau a Iesu. Tera râ, e tutava ra te hoê Kerisetiano i te pee i mau haapiiraa a Iesu e i te ora ia au i ta ˈna i haapii. E hiˈo mai tatou i te tahi mau hiˈoraa.

E faaite te mau Kerisetiano i te here

Eaha ta Iesu i parau? “E faaueraa apî ta ˈu e horoa ˈtu nei, ia here outou te tahi i te tahi. Mai ia ˈu i here ia outou, ia here atoa outou te tahi i te tahi. I te mea e mea here outou te tahi i te tahi, e ite ïa te taata atoa e e pǐpǐ outou na ˈu.”—Ioane 13:34, 35.

Eaha ta Iesu i rave? Ua faaite Iesu i te here i te mau taata atoa, noa ˈtu to ratou tiaraa aore ra tupuraa. Ua faaora o ˈna i te mau maˈi, ua faatamaa i te taata e ua horoa o ˈna i to ˈna ora no vetahi ê.—Mataio 14:14-21; 20:28.

Eaha ta te mau Kerisetiano e rave? E faaite te mau Kerisetiano i te here na roto i te horoaraa ma te aau tae, ma te ore e maitiiti i te taata e ma te faaore i te hapa. E tauturu ratou i te feia o te fifi ra e ua ineine ratou i te rave i te mau haapaeraa no vetahi ê.—Ioane 1, 3:16.

E faaite te mau Kerisetiano i te parau mau

Eaha ta Iesu i parau? “O vau . . . te parau mau.”—Ioane 14:6.

Eaha ta Iesu i rave? Ua faaite Iesu i te parau mau na roto i te parau e te ohipa. Aita roa ˈtu o ˈna i taviri ia vetahi ê aore ra i haavare i te taata. Ua matauhia o ˈna mai te hoê taata o te faaite i te parau mau noa ˈtu te patoiraa.—Mataio 22:16; 26:63-67.

Eaha ta te mau Kerisetiano e rave? Eita te mau Kerisetiano e haavare. E aufau ratou i ta ratou mau tute, aita ratou e eiâ e e rave maitai ratou i ta ratou ohipa. (Roma 13:5-7; Ephesia 4:28) Aita ratou e taviri ia vetahi ê, e punu i te fare haapiiraa, aore ra e haavare i nia i ta ratou mau papie aore ra haamaramaramaraa ia noaa mai te ohipa.—Hebera 13:18.

E faaite te mau Kerisetiano i te hamani maitai

Eaha ta Iesu i parau? “A haere mai ia ˈu nei outou atoa e rohirohi e e teimaha nei, na ˈu e tamahanahana ia outou. A rave mai i ta ˈu zugo i nia ia outou e ia haapiihia outou e au, mea mǎrû hoi au e te haehaa o te aau, e ite ïa outou i te tamahanahanaraa. Mea mǎrû hoi ta ˈu zugo, e mea mâmâ ta ˈu hopoia.”—Mataio 11:28-30.

Eaha ta Iesu i rave? E taata maitai o Iesu e te ohie ia tapiri atu. E farii maitai i te mau tamarii, e tamahanahana o ˈna i te feia e hepohepo ra e e faatura o ˈna ia vetahi ê.—Mareko 10:13-15; Luka 9:11.

Eaha ta te mau Kerisetiano e rave? E paraparau te mau Kerisetiano ia vetahi ê ma te hamani maitai. Aita ratou e faahiti i te parau ino aore ra te mau parau etaeta. (Ephesia 4:29, 31, 32) E tâuˈa ratou ia vetahi ê ma imi i te mau ravea no te tauturu ia ratou.—Galatia 6:10.

E vai taiva ore te mau Kerisetiano i to ratou hoa faaipoipo

Eaha ta Iesu i parau? “No reira, o ta te Atua i taati, eiaha te taata e faataa ê.”—Mareko 10:9.

Eaha ta Iesu i rave? Noa ˈtu aita roa ˈtu Iesu i faaipoipo, ua faaitoito o ˈna i te mau hoa faaipoipo ia vai taiva ore i to ˈna apiti. (Mataio 19:9) Ua faaara o ˈna i nia i te mau ohipa o te tuino i te faaipoiporaa.—Mataio 5:28.

Eaha ta te mau Kerisetiano e rave? E patoi te mau Kerisetiano i te mau haerea o te haaviivii i te faaipoiporaa. (Hebera 13:4) E faaite te mau hoa faaipoipo i te here e te faatura te tahi i te tahi.—Ephesia 5:28, 33.