Tauturu no te feia matapo
Ati aˈe te ao nei, te vai ra 43 mirioni taata matapo e 295 mirioni tei mohimohi te mata.a Te mea peapea râ, te hamani ino ra vetahi taata i te feia matapo aore ra tei mohimohi te mata.
Eaha te manaˈo o te Atua no nia i te feia matapo? Eaha ta te Bibilia e parau ra no nia ia ratou? E nafea te mau Ite no Iehova e tauturu ai ia ratou i teie mahana?
Eaha te manaˈo o te Atua no nia i te feia matapo?
Te faahiti ra te Bibilia te haapeapea mau ra Iehovab i te feia matapo. Te hinaaro ra oia ia aupuru e ia fanaˈo ratou i te hoê haapiiraa no ǒ mai ia ˈna. Te horoa atoa ra oia i te hoê tiaturiraa no a muri aˈe.
Irava Bibilia: “Ua ati te taata o te faahahi ê i te tahi taata matapo i to ˈna eˈa.”—Deuteronomi 27:18.
Te auraa: I te tau tahito, te Ture ta te Atua i horoa i to ˈna nunaa no te paruru ïa i te matapo i te hamani-ino-raa.
Irava Bibilia: “E ore te Atua e maitiiti i te taata.”—Ohipa 10:34.
Te auraa: Te haafaufaa ra te Atua i te feia matapo e o te ite atoa.
Irava Bibilia: ‘Ua faaora Iesu i te matapo e rave rahi ia ite faahou ratou.’—Luka 7:21.
Te auraa: I to Iesu haereraa mai i nia i te fenua, ua faaora oia i te matapo. E ua faaite o ˈna eaha ta te Faatereraa arii a te Atua e rave no a muri aˈe.
Irava Bibilia: “E araara te mata o te matapo.”—Isaia 35:5.
Te auraa: Te fafau ra Iehova e fatata roa, e ia faatere mai te Faatereraa arii a te Atua i nia i te fenua, e araara te mata o te matapo.
E nafea te mau Ite no Iehova e tauturu ai ia ratou i teie mahana?
Na te ao nei, e faaite matou te mau Ite no Iehova i te feia matapo i te poroi a te Atua no nia i te tiaturiraa. E nafea matou e rave ai i te reira?
Te nenei ra matou i te Bibilia, oia atoa te mau papai haapiiraa Bibilia e te mau video na roto e rave rahi ravea, no te feia matapo e tei mohimohi te mata, te vai ra te papai na te matapo parauhia braille, te papai rarahi e te haruharuraa.
Te tamau nei matou i te apiti i te mau putuputuraa Kerisetiano, e nehenehe te taata atoa e apiti mai, oia atoa te matapo.
Te pûpû atoa ra matou i te hoê haapiiraa Bibilia maoti te tauturu a te hoê taata haapii.c
Mea tamoni ore. No te aha? Ua horoa Iesu i teie aˈoraa: “Mea horoa-noa-hia mai ta outou, a horoa noa atoa ïa.”—Mataio 10:8.
Te haapeapea ra te mau Ite no Iehova i te feia matapo. Te feia e hinaaro ra e haamori i te Atua e o matou, e ite mai ratou i te hoa maitai. A taio i te aamu o te tahi o te mau Ite no Iehova tei matapo.
No Tuete o Talita Alnashi, e mata mohimohi to ˈna mai to ˈna fanauraahia mai. A haapii mea nafea to ˈna na metua i te haapiiraa ia ˈna i te Bibilia e mea nafea oia e to ˈna utuafare i te fanaˈoraa i te here e te tauturu o to ratou mau hoa.
No Marite o James Ryan, e tariˈa turi to ˈna mai to ˈna fanauraahia mai e i muri iho ua matapohia. A haapii mea nafea oia i te oaoaraa i roto i to ˈna oraraa.
No Philipino o Cynthia Pablo, e tariˈa turi e e matapo atoa oia. Mea nafea te mau hoa Kerisetiano i te tautururaa ia ˈna i te tau o te maˈi pee COVID-19? A taio i te tumu parau “Une assemblée soutient une sœur sourde et aveugle pendant la pandémie.”
Eaha te mau ravea ta matou e horoa ra no te haapii i te Bibilia?
Te mau papai na te matapo parauhia braille. Te pia nei matou i te Bibilia na te matapo, taatoa aore ra te tahi mau tuhaa, na roto e rave rahi reo. (No te ite i te tapura o te mau reo, a hiˈo i te tumu parau tarenihia “Te Bibilia, Huriraa o te ao apî reo braille.”) Te nenei atoa ra matou e rave rahi papai na te matapo niuhia i nia i te Bibilia. No te fanaˈo i te reira ua pia matou i te hoê buka reo Beretane no te haapii i te taio i te braille. E tauturu teie buka i te feia matapo ia haapii i te taio i te braille maoti te tauturu a te hoê taata e ere i te matapo.
No te fanaˈo i te mau papai braille a ani i te hoê Ite no Iehova aore ra a ani i te hoê farereiraa.
I nia i te reni jw.org, a rave mai i te pue parau no te hoê ravea no te tapaopao i te mau nota.d
Te mau papai papai-rarahi-hia e tei piahia i nia i te natirara. E rave rahi o ta tatou mau papai papai-rarahi-hia no te feia mata mohimohi. Ua hamanihia ta tatou jw.org ia pura maitai i nia i te paruai oia atoa ia faararahihia. E nehenehe atoa e faatano i te papairaa o te tahi papai i nia i te JW Library.
No te fanaˈo i te mau papai papai-rarahi-hia a ani i te hoê Ite no Iehova aore ra a ani i te hoê farereiraa.
I nia i te reni jw.org, a rave mai i te mau papai papai-rarahi-hia tei tuea i te papai neneihia.
Te mau papai haruharuhia. Te haruharu ra matou i Te Bibilia, Huriraa o te ao apî na roto 200 reo. Hau atu â, te rave atoa ra matou i te mau haruharuraa no e rave rahi papai niuhia i nia i te Bibilia. Pinepine e faataa-atoa-hia te mau hohoˈa i roto i teie mau haruharuraa.
A mataitai aore ra a rave mai i te haruharuraa i nia i te reni jw.org e i te JW Library.
I nia i te reni jw.org, a rave mai i te pue parau no te taio, mai te hoê porotarama roro uira o te taio i te papai ma te reo puai.e
Te mau video e e faaroohia te faataaraa o te mau mea e patahia mai.f E rave te mau Ite no Iehova i te mau video e e faaroohia te faataaraa o te mau mea e patahia mai niuhia i nia i te Bibilia na roto hau atu 100 reo. E tauturu teie mau video i te mau taata ia taa e ia faaohipa i te mau aˈoraa Bibilia.
A tuatapapa i te anairaa video e e faaroohia te faataaraa o te mau mea e patahia mai:
Putuputuraa e tairururaa. Na te ao nei, te vai ra te mau amuiraa i reira matou e putuputu ai no te haapii e no te haamori i te mau hebedoma atoa. E faanaho atoa matou i te mau tairururaa no te haapii i te Bibilia i te mau matahiti atoa. I ta matou mau tairururaa, te vai ra te mau video, e tamata matou i te pata i te mau video e e faaroohia te faataaraa o te mau mea e patahia mai. I te vahi e nehenehe, no te feia matapo e tariˈa turi, na te tahi atu e rave i to ratou rima no te apǎ i te reo i ta matou mau putuputuraa e tairururaa. E farii matou i te taata atoa e eita roa ˈtu matou e maitiiti i te taata.
A imi i te hoê putuputuraa.
A haapii no nia i ta matou mau tairururaa tamatahiti.
A haere i te Oroa haamanaˈoraa o te pohe o Iesu, te oroa faufaa roa i te matahiti.
Te ora ra José Luis Ayala i Mehiko. Ua fanauhia o ˈna ei tariˈa turi e i muri iho ua matapohia i te 29raa o to ˈna matahiti. A haapii mea nafea te mau putuputuraa i te ohiparaa i roto i to ˈna oraraa e mea nafea te reira i te tautururaa ia ˈna ia riro ei taata aravihi i te haapii i te Bibilia.
a Aita te hoê taata e “mata mohimohi” e ite maitai e aita e nehenehe e rapaau. E haafifi te reira i to ˈna oraraa i te mau mahana atoa. I roto i teie tumu parau, no te taata matapo e tei mohimohi te mata te parau “matapo.”
b O Iehova te iˈoa o te Atua. (Salamo 83:18) A hiˈo i te tumu parau “O vai o Iehova?”
c E nehenehe outou e ani i te hoê faataaraa o teie haapiiraa Bibilia tamoni ore.
d E matini tapaopao no te papai i te braille, e nehenehe atoa e faahaere i te tahi reo haruharuhia e te matini roro uira. No te papai i te braille e taumi e e hoˈi mai te pitopito i nia i te paruai. Mai te peu e matini tapaopao ta te hoê taata, aita e titauhia ia haaputu rahi mai te papie ua papaihia te braille i nia iho.
e E taio te porotarama roro uira i te paruai o te tahi roro uira aore ra te haruharuraa o te buka ma te reo puai o te roro uira aore ra te tahi haruharuraa. E faaohie te reira no te ite mai i te mau tuhaa o te papai.
f E faaroohia te faataaraa o te mau mea e patahia mai i roto i te video no te faataa eaha te tupu ra i nia i te paruai.