Te piri mai ra te hopea o teie ao

I te 27 no Tenuare 2026, ua taui te mau aivanaa i te uati o te haavaraa hopea, o te faaite ra i te hora 12 i te tuiraa po. E faatupu te taata i te hoê ati.

“I teie mahana ua tuu te Bulletin of the Atomic Scientists Science and Security Board, i te uati o te haavaraa hopea i nia 85 tetoni hou te hora 12 i te tuiraa po, te faito piri roa ˈˈe aita i itehia aˈenei no te hoê ati.”—Bulletin of the Atomic Scientists.
“Ua faaohipa te mau aivanaa i teie uati no te faataa ia tatou i te hoê ohipa. Te vai ra e rave rahi tupuraa atâta na te ao nei, aita e haere i te taata ia faatitiaifaro i to ratou mau fifi e te ino noa ˈtura te reira. E titauhia i te taata ia rave i te mau tauiraa, e e nehenehe ratou e rave i te reira. E titauhia râ i te taata na te ao nei ia onoono i ta ratou mau faatere ia haa oioi.”—Alexandra Bell, peretiteni e peretiteni o te hoê taiete, Bulletin of the Atomic Scientists.

O te hopea anei o te huitaata e o te fenua taatoa? E titauhia anei ia riaria tatou no te tupu no a muri aˈe? Eaha ta te Bibilia e parau ra?

Eaha te tupu a muri aˈe?

Te parau ra te Bibilia ‘e vai noa te fenua e a muri noa ˈtu’ e ‘e parahi te taata i nia iho e a muri noa ˈtu.’ (Koheleta 1:4; Salamo 37:29) Aita ïa te taata e tuino i te fenua aore ra e faariro i te fenua ei vahi aita faahou e nehenehe e ora.

Te faahiti ra te Bibilia i te hoê hopea. Ei hiˈoraa, te parau ra te Bibilia ‘e mou teie nei ao.’—Ioane 1, 2:17.

No te ite i ta te Bibilia e parau no nia i te hopea o te ao, a taio i te tumu parau “Fatata anei te hopea o teie nei ao?”
No te haapii eaha ta te Bibilia e parau ra e afea te mau tupuraa faufaa e rave rau e tupu ai, a taio i te tumu parau “Afea te hopea o teie ao e tae mai ai?”

Tamau i te tiaturi i te a muri aˈe

E nehenehe te Bibilia e tauturu mai ia tamau i te tiaturi i te a muri aˈe noa ˈtu te mau fifi i roto i te ao. E nafea?

Te horoa mai ra te Bibilia i te aˈoraa. (Timoteo 2, 3:16, 17) Ei hiˈoraa, a taio i te tumu parau “E nafea ia ore ia haapeapea rahi roa?” no te ite e nafea te Bibilia e tauturu mai ia tamau i te tiaturi i te a muri aˈe noa ˈtu te fifi o te oraraa.
Te horoa mai ra te Bibilia i te tahi tiaturiraa papu no a muri aˈe. (Roma 15:4) Te faataa maitai ra te reira i te tiai ra ia tatou i teie nei e no a muri aˈe. E tauturu mai te reira ia tamau i te tiaturi papu noa ˈtu eaha te tupu i roto i te ao.

No te ite atu â eaha ta te Bibilia e parau ra, te titau manihini nei matou ia outou ia haamata i te hoê haapiiraa Bibilia e te hoê taata haapii. Mea tamoni ore te reira.