E tupu anei te hau maoti te mau faanahoraa a te taata?

Te rahi noa ˈtu ra te tamaˈi e te mau faahuehueraa ati aˈe te ao nei. No reira, te tutava nei te Hau amui e te tahi atu mau faanahoraaa i te haamau i te hau i te mau vahi atâta, i reira e tupu ai te tamaˈi. Ta ratou fa, o te tautururaa ïa i tei roohia i te ati e te feia o te faaruru ra i te haavîraa uˈana. Ua parau António Guterres, tia mana no te Hau amui: “Mea faufaa roa te hau no te Hau amui e te tutava nei matou i te faatupu i te hau ati aˈe te ao nei.”

A mairi ai te mau matahiti, ua itehia te tahi mau maitai ta teie mau faanahoraa no te hau i faatupu. Ei hiˈoraa, maoti teie mau ravea ua paruruhia te huiraatira, ua nehenehe te feia horo ê e hoˈi i to ratou fenua, ua hopoihia te tauturu no tei roohia i te ati e ua tataîhia te mau purumu e te tahi atu mau mea tupararihia no te tamaˈi. Noa ˈtu râ, aita i haere ia ratou ia faaore roa i teie mau ati. E hiti mai ïa teie na uiraa: ‘Te vai ra anei te ravea ia itehia te hau ati aˈe te fenua? Eaha ta te Bibilia e parau ra?’

Te mau fifi faaruruhia e te mau ravea ta te Bibilia e horoa ra

Hoê hohoˈa e faaite ra e piti tane mea huri tua raua.

Te fifi: Te ohipa amui. No te faatupu i te hau, e ere roa ˈtu i te mea ohie no te mau faanahoraa faehau e te huiraatira no tera e tera fenua ia ohipa amui. I te tahi taime, eita to ratou manaˈo e tuati, eita ïa ratou e afaro te tahi i te tahi. Tera ïa te tumu eita e haere ia ratou ia rave amui i te hoê ohipa.

Te ravea a te Bibilia: “E haamau te Atua o te raˈi i te hoê faatereraa arii . . . e e haamou oia i tera mau faatereraa arii atoa [te faatereraa taata], e o ˈna anaˈe te vai mai e a muri noa ˈtu.”—Daniela 2:44.

Fatata te Atua i te faaore roa i te mau tamaˈi atoa e i te haamau i te hau i te fenua. (Salamo 46:8, 9) E faaore roa o ˈna i te mau faatereraa atoa na roto i ta ˈna Faatereraa arii. Tei te raˈi te Faatereraa arii a te Atua, e mea tia roa. O ˈna anaˈe te faatere i te fenua, aita faahou e faahuehueraa i tera taime. Aita atoa ïa e faufaa ia tutava te mau faanahoraa taata i te faatupu i te hau.

Hoê hohoˈa e faaite ra i te hoê afata aita e taihaa to roto.

Te fifi: Te navai-ore-raa o te moni e te tahi atu mau taotiaraa. E manaˈo maitai to te mau faanahoraa no te hau. Eita râ e navai te taata, te moni aore ra te tahi atu mau faufaa. Na te reira e tapea ia ratou ia rave maite i ta ratou mau opuaraa. Hau atu, e titauhia ia ohipa ratou i te mau vahi atâta roa.

Te ravea a te Bibilia: “Te Atua hoi o to tatou Fatu ra o Iesu Mesia . . . i to ˈna haaparahiraa ia ˈna [Iesu] i to ˈna rima atau i te raˈi, i nia ê roa i te mau faatereraa e mana e puai e hau atoa.”—Ephesia 1:17, 20, 21.

Ua maiti te Atua Manahope ra o Iehovab ia Iesu ei Arii no ta ˈna Faatereraa arii e ua horoa oia i te mau mea atoa na ˈna. (Daniela 7:13, 14 c) Oia mau, ua horoa te Atua i te mana na Iesu, te paari, te ite e te haroˈaroˈa hau ê i to te taata nei e to te faatereraa taata. (Isaia 11:2) E nuu atoa ta Iesu, oia hoi te mau melahi puai. (Apokalupo 19:14) No reira, aita hoê aˈe ohipa aita ta Iesu e nehenehe e rave.

E faaohipa Iesu i te mau mea atoa ta te Atua i horoa ia ˈna oia atoa te aravihi no te faaore roa i te mau tamaˈi. I reira ïa te huitaata e fanaˈo ai i te hau e te taiâ ore i raro aˈe i te Faatereraa arii a te Atua.—Isaia 32:17, 18.

Hoê hohoˈa e faaite ra i te hamara raau a te haava.

Te fifi: Te mau taotiaraa i te pae o te ture. I te tahi taime, eita ta te mau faanahoraa no te hau e nehenehe e rave i te tahi mau ohipa no te mea aita e aratairaa papu aore ra no te ture e faatiahia e e opanihia ratou ia rave i tahi mau ohipa. Tera ïa te tumu e ore ai ratou e paruru maitai i te huiraatira aore ra e rave faahope roa i ta ratou mau opuaraa.

Te ravea a te Bibilia: “Ua horoahia mai ia ˈu [Iesu] te mana atoa i te raˈi e i te fenua.”—Mataio 28:18.

Ua faaue te Atua ia Iesu ia haamau i te hau i nia i te fenua, e ua horoa oia ia ˈna i te mana no te faatupu i te reira. (Ioane 5:22) Ua ite tatou eita roa ˈtu Iesu e rave i te ohipa tano ore. (Isaia 11:3-5) No reira Iesu i piihia ˈi i roto i te Bibilia te “Huiarii o te hau,” e ua haamau-papu-hia ta ˈna Faatereraa arii na roto “i te parau-tia e te afaro.”—Isaia 9:6, 7.

O te Faatereraa arii a te Atua te ravea hoê roa

Te tutava nei te taata i te faatupu i te hau. E i te tahi taime, e nehenehe ratou e tapea i te tamaˈi aore ra te faahuehueraa. Tera râ, eita e haere ia ratou ia faaore roa i te tumu o te haavîraa uˈana, oia hoi te ino i roto i te aau o te taata.

“E ere mea ohie ia haamau i te hau, no te mea eita te reira e vai mai.”—Dennis Jett, e tiahau o ˈna na mua ˈˈe no Marite.

Area te Faatereraa arii a te Atua, e tauturu ïa i te taata ia haapae roa i te ino, te riri, i roto i to ratou aau. Ei hiˈoraa, i to Iesu haereraa mai i te fenua, ua haapii o ˈna i ta ˈna mau pǐpǐ na roto i to ˈna haerea e ta ˈna mau parau e nafea ia faatupu i te hau e ia here ia vetahi ê:

“E oaoa te feia faatupu i te hau.”—Mataio 5:9.

“Ia here oe i to oe taata tupu mai ia oe iho.”—Mareko 12:29-31.

“A faahoˈi i ta oe ˈoˈe i roto i te vehî, te taata atoa hoi e rave i te ˈoˈe, e pohe ïa i te ˈoˈe.”—Mataio 26:52.

“A tuhihia ˈi [Iesu], aita oia i tuhi atu. A mauiui ai oia, aita oia i haamǎtaˈu atu.”—Petero 1, 2:23.

Ua parau atoa Iesu e itehia o vai ma te auraro ra i te Faatereraa arii a te Atua na roto i to ratou here te tahi i te tahi. Te faaite ra te Bibilia eita te feia e hae i te tahi atu e faatiahia ia ora i raro aˈe i te aratairaa a te Faatereraa arii a te Atua:

“I te mea e mea here outou te tahi i te tahi, e ite ïa te taata atoa e e pǐpǐ outou na ˈu.”—Ioane 13:34, 35.

“Te taata mea hae na ˈna i to ˈna taeae, e taparahi taata ïa.”—Ioane 1, 3:15.

“Te taata e here ra i te Atua, ia here atoa ïa i to ˈna taeae e tia ˈi.”—Ioane 1, 4:20, 21.

Na te Atua ra o Iehova i poiete i te taata, o ˈna atoa tei ite eaha te mea maitai roa ˈˈe no ratou. E tei ia ˈna ra te ravea ia tupu te hau i nia i te fenua. Maoti ta ˈna Faatereraa arii e faatupu ai o ˈna i te hau, aita hoi i haere i te mau faatereraa taata e faanahoraa no te hau ia na reira.

a Te faaohipa atoa ra te Hau amui e te tahi atu mau faanahoraa i teie mau taˈo “paturu i te hau,” “faatupu i te hau,” “parau faaau no te hau” e “faanahoraa no te hau.”

b O Iehova te iˈoa o te Atua. (Salamo 83:18) A hiˈo i te tumu parau “O vai o Iehova?”

c I roto i te Daniela 7:13, 14, e piihia Iesu Mesia “te tamaiti a te taata.”—Mataio 25:31; 26:63, 64.

E tauturu te Faatereraa arii a te Atua i te taata ia ora ma te hau e te tahoê

Ia faatere mai te Faatereraa arii a te Atua i te fenua taatoa, i reira ïa te huitaata e tahoê ai i roto i te hau no te mea ua auraro ratou i te mau haapiiraa a te Atua. (Isaia 2:4; 11:9) Tera râ, ua haamau aˈena te Atua i ta ˈna Faatereraa arii i te raˈi. E maoti teie ravea, te tauturu ra o ˈna e mirioni taata ia ora ma te hau e te tahoê.

A mataitai i te video Puai aˈe anei te here i te riri? no te ite mea nafea te Bibilia i te tautururaa e piti taata ia haapae roa i te riri, noa ˈtu mea rahi te ati Iuda e te Arabia eita e afaro mai te tau mai â.

A mataitai i te video E enemi tei riro mai ei hoa no te ite mea nafea te Bibilia i te tautururaa i te hoê raatira pǔpǔ taparahi taata e te hoê mutoi ia haapae i te riri e ia riro ei hoa rahi.