Anton Petrus/Moment via Getty Images
A VAI ARA!
Fatata anei te hoê tamaˈi rahi i te tupu mai? Eaha ta te Bibilia e parau ra?
I te roaraa o na 30 matahiti i mairi, e rave rahi tei manaˈo aita e tauiraa i rotopu i te mau fenua e no ratou ua maitai atoa mai te reira. No te mau tupuraa râ tei itehia aita i maoro, mea fifi roa ia feruri mai tera.
“Te haapeapea ra te taata e haafifi te tamaˈi i Gaza i te tahi atu mau fenua, no te aroraa e tupu ra i Iseraela e Hezbollah i te otia fenua o Lebanona.”—Reuters, 6 no Tenuare 2024.
“Te aro ra te mau pǔpǔ faaterehia e Iran i te tahi atu mau vahi, e ua haamata faahou Iran i te hamani i te paura atomi. Hau atu â, ua amui Iran ia Rusia e Taina. Ua riro ïa ratou ei haafifiraa no te tahi atu mau fenua.”—The New York Times, 7 no Tenuare 2024.
“Te tamau ra Rusia i te aro ia Ukraine.”—UN News, 11 no Tenuare 2024.
“Te maraa noa ˈtura te faufaa e te puai noa ra te nuu faehau i Taina. Te maraa atoa ra te here aiˈa i Taïwan, e mea huru fifi i rotopu ia Taina e ia Marite, e nehenehe te tamaˈi e tupu mai.”—The Japan Times, 9 no Tenuare 2024.
Te parau ra anei te Bibilia i te tahi mea no nia i te mau ohipa e tupu ra na te ao nei i teie mahana? E aratai anei te reira i te hoê tamaˈi rahi?
Ua tohu te Bibilia i teie mau tupuraa
Aita te Bibilia i tohu i te hoê tamaˈi taa maitai mai ta tatou e ite ra i teie mahana. Ua tohu râ te Bibilia i te hoê tamaˈi o te tupu i to tatou tau e o te “faaore i te hau i nia i te fenua.”—Apokalupo 6:4.
Ua tohu te buka Daniela “i te anotau o te hopea,” e “turai” te mau hau puai na te ao nei aore ra e aro ratou no te faatereraa. E faaite teie aroraa i te puai o te nuu faehau e te moni aore ra “taoˈa hunahia” haamâuˈahia.—Daniela 11:40, 42, 43.
E tupu mai te hoê tamaˈi
Te faataa ra te Bibilia e ino atu â te tupuraa o te ao hou a maitai mai ai te reira. Ua tohu Iesu “e tupu . . . te hoê ati rahi aita i tupu aˈenei mai te omuaraa mai o teie nei ao.” (Mataio 24:21) E aratai teie “ati rahi” i te hoê tamaˈi parauhia Aramagedo o tei faataahia mai “te tamaˈi o te mahana rahi o te Atua Manahope.”—Apokalupo 16:14, 16.
Eita Aramagedo e haamou i te huitaata, e faaora râ te reira i te taata. Maoti teie tamaˈi, e faaore roa te Atua i te faatereraa a te taata o tei faatupu e rave rahi tamaˈi. No te ite e nafea Aramagedo e hopoi mai ai i te hau mure ore, a taio i te mau tumu parau i muri nei: