Te mau pupuhiraa i tupu na te ao atoa nei: Eaha ta te Bibilia e parau ra?

I Tiurai 2022, e rave rahi pupuhiraa tei tupu na te ao atoa nei:

• “Ua arepurepu roa te fenua Tapone i te pupuhiraahia te taata poritita tuiroo roa ˈˈe, oia hoi te faatere hau nui tahito, o Shinzo Abe te iˈoa. Ua huru ê roa to te ao atoa nei e ua tupu te hoê ohipa ino mai teie te huru i te hoê fenua e mea fifi ia hoo mai i te pupuhi e aita i rahi te ohipa ino.”—10 no Tiurai 2022, The Japan Times.

• “Ua arepurepu te nunaa Danemata, ua pupuhihia hoi e toru taata i te hoê fare toa rahi i Copenhague.”—4 no Tiurai 2022, Reuters.

• “Afirika apatoa: e taata tei pupuhi 15 taata i roto i te hoê fare inuraa i te oire o Soweto.”—10 no Tiurai 2022, The Guardian.

• “Ua hau i te 220 taata tei pupuhihia i Marite, i te hopea hebedoma o te 4 no Tiurai.”—5 no Tiurai 2022, CBS News.

E nehenehe anei e tiaturi e ia tae i te hoê mahana e ore roa tera huru ohipa ino? Eaha ta te Bibilia e parau ra?

E faaorehia te ohipa ino

Te parau ra te Bibilia e te ora nei tatou i “te mau mahana hopea,” oia hoi, te hoê tau e mea ino, iria e e mea taehae te taata. (Timoteo 2, 3:1, 3) No teie mau ohipa ino, e ora noa te taata i roto i te mǎtaˈu. (Luka 21:11) Tera râ, te fafau ra te Bibilia e e ore roa te ino e “e parahi [te taata] i te hoê vahi hau e te papu, i te nohoraa papu e te faaearaa hau.” (Isaia 32:18) Afea râ te ino e ore roa ˈi?

E haamou te Atua i te taata ino e te mauhaa tamaˈi.

• “Area te feia ino, e haamouhia ratou mai nia i te fenua.”—Maseli 2:22.

• “Te faaore nei [te Atua] i te mau tamaˈi ati aˈe i te fenua. Te ofati nei oia i te fana e te tuparari nei i te omore. Te tutui nei oia i te mau pereoo faehau.”—Salamo 46:9.

E faaore te Atua i te tumu o te ohipa ino ma te haapii i te taata ia parahi hau noa.

• “Aita e hamani-ino-raa, aita e tuinoraa e tupu na to ˈu mouˈa moˈa atoa, no te mea e î te fenua i te ite ia Iehova mai te moana tei î i te miti.”—Isaia 11:9.

• I teie nei â, te haapii nei te Atua i te taata ia faarue i te ino e te mau mauhaa tamaˈi, e ia “tupai . . . i ta ratou mau ˈoˈe ei auri arote e ta ratou mau omore ei tipi tope raau.”—Mika 4:3.

No te ite atu â no nia i te parau fafau a te Bibilia e eita te taata e ora faahou i roto i te mǎtaˈu, a taio i te tumu parau “Affranchis de la peur : est-ce possible ?”

No te ite atu â no nia i te mau ohipa ino o te faaorehia e a muri noa ˈtu, a taio i te tumu parau “Enfin la paix sur la terre !”