E ore anei te ohipa piˈo a te mau faatereraa?

E itehia te ohipa piˈo i roto i te mau faatereraa na te ao atoa nei e ua faatupu te reira i te mauiui rahi.a Ei hiˈoraa, a tupu ai te COVID-19, ua parihia te feia mana i roto i tera e tera fenua i te faaohipa i te moni faataahia no te tauturu i te huiraatira i roto i tera maˈi. Aita ˈtu ra te taata i fanaˈo i te mau mea hinaarohia no te rapaau aore ra no te paruru ia ratou e e rave rahi tei mauiui e tei pohe.

Mea rahi atu â te faahopearaa ino tei itehia no te ohipa piˈo a te mau faatereraa. Ua parau David Cameron, Faatere hau nui tahito o te hau Beretane: “E au te ohipa piˈo i te hoê upeˈa rahi e e herepata tera e itehia na te ao atoa nei!”

Tera râ, fatata te ohipa piˈo a te mau faatereraa atoa i te faaorehia. Na te aha e haapapu ra? A hiˈo i ta te Bibilia e parau ra no te ite eaha ta te Atua e rave.

Eaha te tumu e faaore ai te Atua i te ohipa piˈo?

I roto i te Bibilia, ua parau te Atua: “Mea au roa hoi na ˈu, o Iehova, i te parau-tia. Mea au ore roa na ˈu i te eiâ e te parau-tia ore.”b (Isaia 61:8) Ia mauiui te taata no te ohipa piˈo a te tahi, e ite te Atua i te reira. (Maseli 14:31) Te fafau ra te Atua: “No te mea te haavîhia ra te feia e ahoaho ra, . . . e tia vau a ohipa ˈtu ai.”—Salamo 12:5.

Eaha ïa ta te Atua e rave? Eita o ˈna e tamata i te faatitiaifaro i te mau faatereraa a te taata. E faaore roa râ oia i te reira a mono atu ai i ta ˈna iho faatereraa i te raˈi, parau-atoa-hia te Basileia o te Atua. (Mareko 1:14, 15; Mataio 6:10) Te na ô atoa ra te Bibilia: “E haamau te Atua o te raˈi i te hoê faatereraa arii. . . . E faahuˈahuˈa e e haamou oia i tera mau faatereraa arii atoa, e o ˈna anaˈe te vai mai e a muri noa ˈtu.” (Daniela 2:44) Tera ïa te ravea ta te Atua e faaohipa no te faaore i te ohipa piˈo ta tatou e ite nei.

Te hoê faatereraa aita e ohipa piˈo

Na te aha e haapapu ra aita e ohipa piˈo i roto i te Faatereraa arii a te Atua? Teie e toru tumu:

1. 1.Te mana. Na te Atua Manahope i haamau i te Faatereraa arii.—Apokalupo 11:15.

   Eaha ïa te auraa? E hinaaro e e titau te mau faatereraa a te taata i te moni a to ratou huiraatira. Pinepine te reira i te turai i te taata ia rave i te ohipa piˈo mai te ohipa peta, te eiâ e te taviriraa i te taata. Area te faatereraa ta te Atua i haamau, e haamâha noa o ˈna i te hinaaro o te feia atoa i raro aˈe i ta ˈna faatereraa.—Salamo 145:16.

2. 2.Te faatere. Ua maiti te Atua ia Iesu Mesia ei Arii no ta ˈna faatereraa.

   Eaha ïa te auraa? Noa ˈtu e manaˈo maitai to te tahi faatere, e taata hara oia e e nehenehe ïa oia e fati ia peta-anaˈe-hia o ˈna. (Koheleta 7:20) Area o Iesu, ua haapapu ïa eita o ˈna e roaa i te petahia. (Mataio 4:8-11) Hau atu â, mea here na ˈna te feia ta ˈna e faatere ra, e o to ratou maitai ta ˈna e imi na mua roa.—Salamo 72:12-14.

3. 3.Te mau ture. Mea tia roa te mau ture a te Faatereraa arii a te Atua e e hopoi atoa mai te reira i te oaoa.—Salamo 19:7, 8.

   Eaha ïa te auraa? Pinepine, mea teimaha te mau ture a te taata e e ere i te mea ohie ia taa i te reira. Eita atoa te mau faatereraa e nehenehe e haamau i te mau ture e mauruuru ai te taatoaraa o te huiraatira. Te tumu ïa te taata e rave ai i te mau ohipa piˈo. Area te mau ture a te Atua, no to tatou ïa maitai e e hopoi mai te reira i te oaoa. (Isaia 48:17, 18) E ohipa roa tera mau ture i nia i to tatou haerea e i roto i to tatou aau. (Mataio 22:37, 39) Hau atu â, e nehenehe te Atua e ite i te aau o te taata e ua haamau oia i te ture ma te tâuˈa i te tupuraa o te taata tataitahi.—Ieremia 17:10.

Te faaitoito ra matou ia oe ia haapii atu â no nia i ta te Bibilia parau fafau no te hoê faatereraa aita e ohipa piˈo.

• No te ite e toru atu â tumu eita roa te ohipa piˈo e itehia i roto i ta te Atua faatereraa, a taio i te tumu parau “Te Basileia o te Atua: Hoê faatereraa aita e ohipa petaraa.”

• A mataitai i te video Eaha te Basileia o te Atua? no te haapii atu â no nia i ta te Atua faatereraa e eaha ta ˈna e rave a muri aˈe.

• A farii i te hoê haapiiraa Bibilia tamoni ore no te ite e nafea oe e fanaˈo ai i ta te Bibilia i fafau.